Onde wɛ ekɔ la ɛtshi kayɛ ka nkɛtɛ?

1. Elɛwɔ ɛtshi ka nkɛtɛ k’onto ndamɛ?

¹ Ɛtshi ka nkɛtɛ k’onto ndamɛ ekɔ ɛtshi ka nkɛtɛ kakawawosha. Mbeyaka monga dimɛna tɔ monga lo dihole dia suke diakokayɛ komaka esadi ndo sambishaka kânga wɛmɛ kana wɛ la opandjudi okina. Kânga mbele ekɔ ohomba sukɛka tɛdikɔ takɔshi etshumanelo ta sambishaka l’olui l’etena kakoka, monga la ɛtshi kayɛ ka nkɛtɛ ka sambishaka tena dikina koka kokimanyiya dia wɛ sambisha dimɛna, djekoleko lo tshumanelo diele la ɛtshi ka nkɛtɛ ka woke.​—⁠Etsha 10:⁠42.

2. Naa wahɔ ɛmɔtshi waya oma lo onto l’onto monga la ɛtshi kande ka nkɛtɛ?

² Ɛlɔlɔ waya l’onto monga la ɛtshi kande ka nkɛtɛ: Anto amɔtshi wakɛnyi ɛlɔlɔ ekina waya lo sambishaka lo bɛtshi diawɔ dia nkɛtɛ diele suke la ahole wakambawɔ elimu lo wenya wa diomuyelo kana kam’ashidiyawɔ olimu. Akina wakɛnyi dimɛna sambishaka kâmɛ lo nkumbo l’ɛtshi ka nkɛtɛ kodjashiwɔ lo wonya a tango ɔtɔi kana wonya a tango ɔtɔi la ntondo ka Wekelo wa dibuku wa l’etshumanelo. Etombelo waki la dui sɔ ele, waendelo w’eyoyo ndo ambeki wa Bible wakawakondja waki lo dihole dia suke, kɛsɔ akakimanyiya diaha vɔ shishaka welo awɔ ndo mbetshaka wenya awɔ wetshetsha. Lam’ele onto koka sala akambo efula l’etena ka tshitshɛ, anto amɔtshi kokaka kambaka oko ambatshi mboka wa tshanda tena la tena kana oko ambatshi mboka wa pondjo, naka onto l’onto monga l’ɛtshi kande ka nkɛtɛ. Ndo nto, sambishaka l’ɛtshi kayɛ ka nkɛtɛ ndo mbekesanɛ l’anto wa l’ɛtshi ka nkɛtɛ kɛsɔ koka mbakonya dia vɔ mbetawɔ losango layɛ ndo koka kokimanyiya dia wɛ mbɔtɔnganyiya mbɔtwɛlɔ kayɛ la ehomba awɔ dia esambishelo kayɛ ndeka monga l’etombelo w’ɛlɔlɔ.

3. Etombelo akɔna wakakondja ombatshi mboka ɔmɔtshi wakalongola ɛtshi kande ka nkɛtɛ?

³ Ombatshi mboka ɔmɔtshi wakakeketshama oma le omendji w’otshimbedi dia monga l’ɛtshi kande ndamɛ ka nkɛtɛ mbutaka ate: “Laketawɔ dako sɔ ndo kombeta edja lakatatɛ mbekesanɛ ndo monga la diɔtɔnganelo la anto wa l’ɛtshi kami ka nkɛtɛ. Lakatshikitanya wenya wakamahombaka ntshɔ dia tenda anto lo ndjela waaso awɔ. Etombelo waki la dui sɔ ele, waendelo ami w’eyoyo wakadɛ oma lo 35 polo ndekana 80 lo ngɔndɔ, ndo lekɔ la ambeki wa Bible esambele.”

4. Ngande wakokaso kondja ndo kamba onto l’onto lo ɛtshi kande ka nkɛtɛ?

⁴ Woho wakondja ɛtshi kayɛ ka nkɛtɛ: Naka wɛ nangaka kondja ɛtshi kayɛ ka nkɛtɛ, kete tɛ okambi wakamba lo bɛtshi dia nkɛtɛ. Tengengake dia sɛngɔla opandjudi okina dia nde kotshindɛ l’esambishelo, ndo tohɛke funda ahole wele anto bu lawakawɔ. Wɛ pombaka sala la wolo dia mana kindjakindja ɛtshi kayɛ ka nkɛtɛ lo ngɔndɔ nyɛi. Naka wɛ ekɔ l’okakatanu dia sala dui sɔ, kete wɛ koka nyanga ekimanyielo le omendji anyu wa Wekelo wa dibuku wa l’etshumanelo kana le anto akina. L’ekomelo ka ngɔndɔ nyɛi, wɛ koka kaloya ɛtshi ka nkɛtɛ kamboyokindjakindja kana nɔmba dia wɛ nyomokamba lɔkɔ nto. Koko, wɛ hakoke tshikala la ɛtshi ka nkɛtɛ ɔtɔi pondjo pondjo, kaloyatɔ nɛ dia anto akina mbeyaka kilɔmba. Naka wɛ ekɔ lo etshumanelo kele la ɛtshi ka nkɛtɛ ka tshitshɛ ndo hawokoke kosha ɛtshi kayɛ ka nkɛtɛ, kete ondo wɛ koka nɔmba yɛtshi ya nkɛtɛ ya tshitshɛ le omendji anyu wa wekelo wa dibuku.

5. Kakɔna kalɔmbama dia sho kotsha ɔkɛndɛ aso wa sambisha?

⁵ Ɔkɛndɛ aso wa sambisha ‘lo nkɛtɛ k’otondo’ ekɔ olimu wa wolo. (Mat. 24:14) Vɔ nɔmbaka dia kamba kâmɛ. Lâdiko wa esambishelo ka l’olui, naka onto l’onto sambishaka l’ɛtshi kande ka nkɛtɛ, kete dui sɔ koka tokimanyiya dia sho sambisha anto efula lokumu l’ɔlɔlɔ.