Tolowanya akoka aso wa nsambisha—Lo fundaka awui wendana l’anto wɛnya nsaki
“Oyalamake ndo odjake yimba lo wetshelo ayɛ.” (1 Tim. 4:16) Dako diakafundama lo wolo wa nyuma k’ekila diakasha ɔpɔstɔlɔ Pɔɔlɔ Timɔte sɔ, mɛnyaka dia oyadi teke eyoyo kana taya la diewo, sho pombaka mbidja welo dia mpama. Dia tokimanyiya dia nsala dui sɔ, sawo di’oyoyo diele l’ɔtɛ a dui ɔnɛ: “Tolowanya akoka aso wa nsambisha,” diayotombaka lo Olimu aso wa Diolelo. Lo sawo tshɛ, tayɔsɛdingolaka dikoka dimɔtshi di’ohomba ndo alako amɔtshi wɛnya woho wa monga la dikoka diakɔ. Opandjudi tshɛ keketshamaka dia mbidja yambalo ya laande lo dui di’ohomba diayɔsɛdingwamaka lo ngɔndɔ. L’ekomelo ka ngɔndɔ, sawo dimɔtshi dia lo Losanganya l’olimu diayotoshaka diaaso dia mbisha kɔmatɛrɛ yendana la wahɔ wambotokondja lo nsala tshɛ dia nkamba la dikoka sɔ. Ngɔndɔ kɛnɛ tambokeketshama dia mfunda awui wendana l’anto wɛnya nsaki.
Ohomba wa dikoka sɔ: Dia nkotsha ɔkɛndɛ aso, sho pombaka nsala awui efula koko aha tsho nsambisha. Sho pombaka nkalola le anto wakɛnya nsaki dia towaetsha ndo totɛ ntɔngɔ y’akambo wa mɛtɛ yakatonɛ ashi. (Mat. 28:19, 20; 1 Kɔr. 3:6-9) Dui sɔ nembetshiyaka ntshɔ dia tɛnana l’onto mbala kekina, tosawola la nde awui amɔtshi wookiyanya ndo tɔkɛtshanya la nde awui wakatasawola mbala ka ntondo. Ɔnkɔnɛ, etena kahomanaso l’onto lɛnya nsaki, ekɔ ohomba sho mfunda dui sɔ.
Woho wa nsala dui sɔ:
• Etena katayatshu l’esambishelo, yashikikɛ dia wɛ ekɔ la dihomɔ dia tofunda awui wendana l’onto layɛnya nsaki. Kofundake nɔtɛ yayɛ dimɛna, koyilɔngake ndo kayongake l’awui w’eyoyo. Funda nɔtɛ kɛsɔ kam’ashidiyayɛ nsawola l’onto.
• Funda awui wendana l’ompokami ayɛ. Ɛnyɛlɔ, lokombo lande ndo awui wakoka ndjokokimanyiya dia nyu ndjohomana wele oko, adrɛsɛ ande, numɛlɔ kande ka telefɔnɛ kana adrɛsɛ ande w’Ɛtɛrnɛtɛ. Dui di’ohomba diakayɛnyi le nde ndo le ase nkumbo kande.
• Funda awui wakanyasawodi. Avɛsa wakanyadisha. Kɛnɛ kakandatshi lo dikambo dia dietawɔ diande. Okanda wakayootshike. Funda wonya, lushi ndo datɛ diakayawembodi.
• Funda awui wamboyɔlɔngɔsɔla dia tosawola la nde mbala kayaye. Dui diakayatawolaki dia nyu tɔkɛtshanya. Lushi lakayawotɛ dia towembola.
• Mbala tshɛ katshɔyɛ dia towembola, ko wɛ mfunda. Hatonga kɔlɔ wɛ mfunda awui efula wele la yɛ ohomba.
Hemba nsala nganɛ lo ngɔndɔ kɛnɛ:
• Etena kayoyɔsaka nɔtɛ, kotɛke apandjudi wayosambishaka la yɛ kɛnɛ katayafunde.