Tokalole dia tenda onto tshɛ lakɛnya nsaki lo yɛdikɔ mɔtshi
1 Efula ka l’atei aso wekɔ ɛlɔ kɛnɛ l’atei w’okongamelo nɛ dia onto ɔmɔtshi akɛnyi dia sho mbetawɔka losango la Diolelo ndo akakalola dia ndjotenda, ondo mbala efula, dia ndjolomialomia nsaki kaso. Woho akɔ wâmɛ mbele, sho lawɔ pombaka kalolaka l’otema ɔtɔi dia tenda onto tshɛ lakɛnya nsaki lo yɛdikɔ mɔtshi. Lo mɛtɛ, ndo sala waendelo w’eyoyo mbɔtɔ lo ɔkɛndɛ aso wa ‘mbetɛ anto ambeki.’—Mat. 28:19, 20.
2 Toshole nsaki kele la onto: Kânga onto halange nongola ekanda aso, ɛnamelo kande ka l’elungi, wendjo ande wa dui, kana ɔsɔnwɛlɔ ande w’ɛtɛkɛta koka mɛnya dia nde ekɔ la yema ya nsaki ka losango la Diolelo. Oma lo akambo asɔ, sho koka sala wendelo w’oyoyo. Ɔnangɛso ɔmɔ akakalola dia tenda onto ɔmɔtshi mbala tshanu y’etondo aha la onto ɔsɔ nongola okanda aso ɔmɔ. Mbala ka samalo, onto ɔsɔ akayetawɔka nongola ekanda aso ndo l’ɔkɔngɔ wekelo wa Bible wakatatɛ.
3 Naka wɛ amboshola dia onto ekɔ la nsaki, kete kalola dia towenda aha la tshimbatshimba, kânga l’ɔkɔngɔ wa nshi ngana tsho. Totshikɛke “kanga kolo” dihole dia nde munula kɛnɛ kakonɛma l’otema w’onto. (Mat. 13:19) Naka wɛ akokana l’onto dia towenda lo wonya ɔmɔtshi shikaa, kete yashikikɛ dia wɛ ayɔlɛnya daka diayɛ.—Mat. 5:37.
4 Lo esambishelo ka lo toshinga: Onde wɛ salaka la wolo dia tolomialomia nsaki ka wanɛ wakahomana la yɛ l’esambishelo ka lo toshinga kana ka lo tshakitudi? L’ekomelo ka sawo dianyu wɛ koka mbuta wate: “Lambɔngɛnangɛna sawo diaso efula. Lende akokami kotana dia sho nyomoyosawola?” L’ahole wele waa telefɔnɛ, apandjudi amɔ koka mɛna ɔlɔlɔ dia mbisha anto wɛnya nsaki numɛlɔ yawɔ ya telefɔnɛ kana mbalɔmba yawɔ. Naka anto kɛnaka asambisha lo toshinga l’ɛtshi ka nkɛtɛ kakɔ ɔtɔi mbala la mbala, kete vɔ mbeyaka mbetawɔ kosha numɛlɔ yawɔ ya telefɔnɛ kana kolakanya lɛnɛ atshikalawɔ. Oyadi hawolangi kotɛ woho wakokanyu pomana, wɛ koka tetemala nyanga dia nomialomia nsaki kawɔ mbala kekina kayoyohomana la wɔ lo shinga.
5 Etena kɛnaso esongo wakatonɛ ndo wakatatɛka ashi wayole sho mongaka l’ɔngɛnɔngɛnɔ. Woho akɔ wâmɛ, sho koka monga l’ɔngɛnɔngɛnɔ efula lo sala waendelo w’eyoyo ndo lo kimanyiya anto akina dia vɔ pama lo nyuma. (1 Kor. 3:6) Yadjɛ oyango wa kalolaka dia tenda onto tshɛ lakɛnya nsaki lo yɛdikɔ mɔtshi.