Tetemala mpama oko osambisha wa Diolelo
1. Ɛnyɛlɔ kakɔna ka lo ntambe ka ntondo kɛnya dia sho pombaka ntetemala mpama oko esambisha wa Diolelo?
1 Akristo pombaka ntetemala mpama oko esambisha wa Diolelo. Diakɔ diele, Yeso akasha ambeki ande olowanyelo wakaakimanyiya dia vɔ mpama l’olimu w’esambishelo. (Luka 9:1-5; 10:1-11) Ndo nto, Akula la Piriskila wakɔshi Apolo dia nde mbatshindɛ l’esambishelo ndo “wakoolembetshiya mboka ka Nzambi dimɛna dimɛna.” (Ets. 18:24-26) L’ɔtɛ w’ɔkɔkɔ akɔ waamɛ, Pɔɔlɔ akakeketsha Timɔte laki osambisha wa manamana dia nde ntetemala nkamba la wetshelo ande dia ehamelo ande “mɛnama hwe le anto tshɛ.” (1 Tim. 4:13-15) Oyadi edja ka ngande kambotokambɛ Nkumadiɔndjɔ oko esambisha wa lokumu l’ɔlɔlɔ, sho pombaka ntetemala mpamia akoka aso wa nsambisha.
2. Ngande wakokaso nkondja wetshelo oma le anto akina?
2 Tokondja wetshelo oma le anto akina: Oko wakidiɔ lo ntambe ka ntondo, yoho mɔtshi yakokaso mpamia akoka aso, ele lo nkondja wetshelo oma le anto akina. (Tuk. 27:17) Ɔnkɔnɛ, kodjake yimba etena kasala asekayɛ apandjudi mbɔtwɛlɔ. Mbola esambisha wa tomanamana kɛnɛ kakokayɛ nsala dia wɛ nsambisha dimɛna ndo hokamɛ la yambalo tshɛ kɛnɛ kakotɛwɔ. (Tuk. 1:5) Onde wɛ haleke mbeya woho wa nsala wendelo w’oyoyo, woho wa ntatɛ wekelo wa Bible kana woho wa ndjasha lo toho tɔmɔtshi t’esambishelo? Yasha lo awui asɔ ndo lɔmba ɔnɔmbɔdi w’olui anyu w’esambishelo kana opandjudi ɔmɔtshi wele la diewo dia nde kolowanya. Ohɔ nto dia nyuma k’ekila kaki Jehowa koka mpamia akoka aso, diakɔ diele wɛ pombaka kilɔmbaka mbala la mbala lo dɔmbɛlɔ.—Luka 11:13.
3. Ngande wahombaso nsala naka tambolongola dako diele mbala mɔtshi hatodilɔmbi?
3 Naka onto ɔmɔtshi ambokosha dako diɛnya woho wakokayɛ ndjalowanya oyadi wɛ hawɔlɔmbidiɔ, tomalake. (Und. 7:9) L’ɛnyɛlɔ k’Apolo, etawɔ ekimanyielo l’okitshakitsha ndo la lowando. Naka wɛ nsala ngasɔ, kete dui sɔ ayɛnya dia wɛ ekɔ la lomba.—Tuk. 12:15.
4. Naa ɔkɔkɔ wa laande wakasha Yeso dia sho mpama oko esambisha?
4 Ehamelo tombolaka Nzambi: Lo nkamba la ɛnyɛlɔ, Yeso akakeketsha ambeki ande dia vɔ mpama oko esambisha. Nde akayaɛdika ndamɛ la vinyɔ ndo ambeki ande w’akitami la tahe. Nde akate, ate Papa kandjolaka lotahe tshɛ latɔ elowa “dia lɔ ndeka ntɔ elowa.” (Jni. 15:2) L’ɛnyɛlɔ ka kanga vinyɔ lakombola dia tahe ya vinyɔ yande ntɔ elowa efula, Jehowa nangaka dia sho ntetemala mpama lo akoka aso l’oyango wa sho ntɔ “elowa w’oma l’ɛlɔmɔ aso.” (Hɛb. 13:15) Etombelo akɔna w’ɛlɔlɔ wayotokondja naka sho mpama oko esambisha? Yeso toshaka okadimwelo ɔnɛ: “Lo dikambo nɛ mbatombɔma Papa: Dia nyu ntetemala ntɔ elowa efula.”—Jni. 15:8.