Kamba la sitɛ kaso ka jw.org l’esambishelo—“Deviens l’ami de Jéhovah”

Lo etenyi kata ɔnɛ “La Bible et vous” ka lo sitɛ kaso ka jw.org, tanemaka sawo diendana l’ana w’akɛnda diata ɔnɛ “Deviens l’ami de Jéhovah” ndo diɔ diekɔ la esambo, tovidɛo ndo awui akina. Onde wɛ ambokambaka l’awui wa lɔkɔ lo esambishelo? Naka wɛ ekɔ lo mbeka Bible la ombutshi wele l’ana w’akɛnda, lande na kahayawɛnya sawo nɛ? Dui sɔ diayowotshutshuya dia nde menda awui akina watanema lo sitɛ kaso k’Ɛtɛrnɛtɛ.

Etena kakandatakahaka Nkumu ya Diolelo No. 38, ɔnangɛso ɔmɔtshi akahomana la womoto ɔmɔtshi, akawosha traktɛ ko womoto ɔsɔ akatatɛ kiadia kowonyakɔ. Womoto ɔsɔ aki l’ana w’akɛnda wakangɛnangɛnaka traktɛ kakɔ. Ɔnangɛso akakɛtshanya la womoto ɔsɔ lo tshena pe awui wa lo traktɛ kɛsɔ ndo akawɛnya adrɛsɛ wa sitɛ kaso k’Ɛtɛrnɛtɛ watanema lo lɛkɛ l’ekomelo la traktɛ. Etena kakɛnya womoto ɔsɔ nsaki, ɔnangɛso akakambe la diaso sɔ dia mbɛnya nde l’anande vidɛo mɔtshi ya Kalɛba lo nkamba la telefɔnɛ kande ka l’anya.

Kadiyɛso kɛmɔtshi akasawola l’osekande la l’olimu lele l’ana w’akɛnda lo kɛnɛ kendana la sitɛ kaso k’Ɛtɛrnɛtɛ ndo awui wendana la nkumbo watanema lɔkɔ. Womoto ɔsɔ akɔtɔ lo sitɛ ka jw.org nde l’anande. L’ɔkɔngɔ diko, nde akayotɛka kadiyɛso ɔnɛ anande waya la mbekelo ka tatshimbaka la luudu ko tembaka ɔnɛ: “Sambisha dui” osambo ɔmɔtshi watanema lo ɔtɛ a dui wata ɔnɛ: “Deviens l’ami de Jéhovah.”

Yaekesanyiya la awui watanema lo sitɛ kaso ka jw.org ndo telesharjɛ vidɛo, osambo kana dui dimɔtshi lo nkamba la ehomɔ kɛmɔtshi kakonya l’Ɛtɛrnɛtɛ. Lo nsala ngasɔ, wɛ ayonga suke dia nkamba la etenyi ka lo jw.org kɛnɛ lo esambishelo. Sitɛ ka jw.org ekɔ mɛtɛ ehomɔ katokimanyiya dia sho kambɛ Nkumadiɔndjɔ.—Ets. 20:19.