Woho wa mɛnya ngandji otsha le wonyaso onto

Oko weso tokanula ta pami ka ntondo, mbuta ate Adama, sho tshɛ tekɔ ase nkumbo ɔtɔi. Kaanga mbalongamɛso di’anto wele lo nkumbo ɔtɔi mbokana ngandji ndo nɛmiyana lam’asawɔ, ekɔ tshondo y’okakatanu ɛlɔ kɛnɛ dia ntana woho wa ngandji ka ngasɔ. Aha kɛsɔ mbakombola Nzambi kaso ka ngandji.

KƐNƐ KATA AFUNDELO W’EKILA LO DIKAMBO DIA NGANDJI

“Langa wonyayɛ onto oko wayalangayɛ.”​—AKAMBO W’ASE LƐWI 19:18.

“Nyotetemale nanga atunyi anyu.”​—MATEO 5:44.

KƐNƐ KALEMBETSHIYA MBOKA WONYASO ONTO NGANDJI

Tende woho walembetshiya Nzambi ngandji lo Ɔtɛkɛta ande lo 1 Kɔrɛtɔ 13:4-7:

“Ngandji ekɔ la solo dia lotutsha ndo ɔlɔlɔ.”

Tɔsɛdingole dui nɛ: Ngande wayaokayɛ etena kakɛnya anto akina solo dia lotutsha, kakosalɛwɔ ɔlɔlɔ ndo kewɔ hawomala esadi l’ɔtɛ wa munga yasalayɛ?

“Ngandji bu la kandjema.”

Tɔsɛdingole dui nɛ: Ngande wayaokayɛ etena kakokanɛ anto akina kɔlɔ kana kakɔkɔmiyawɔ?

Ngandji “hayange wahɔ ande hita.”

Tɔsɛdingole dui nɛ: Ngande wayaokayɛ etena konga anto akina suke dia mbetawɔ kanyi yayɛ ndo kewɔ hawotshininala lo tokanyi tawɔ hita?

Ngandji “hadia akambo wa kɔlɔ wosalɛwɔ.”

Tɔsɛdingole dui nɛ: Nzambi ekɔ suke dia dimanyiya wanɛ wosalɛ kɔlɔ wayatshumoya. “Nde hatondaka anto la munga nshi tshɛ, ndo nde hatolama kumbɛkumbɛ pondjo.” (Osambo 103:9) Sho mongaka la lowando etena katodimanyiya onto ɔmɔtshi lakatasalɛ kɔlɔ. Ɔnkɔnɛ sho pombaka monga suke dia dimanyiya anto akina etena katosalɛwɔ kɔlɔ.​—Osambo 86:5.

Ngandji “hangɛnangɛna l’akambo wa kɔlɔ.”

Tɔsɛdingole dui nɛ: Etena katokomɛ dui dimɔtshi dia kɔlɔ, sho hatokombola dia anto akina ngɛnangɛna l’ɔtɛ w’asui wambotokomɛ. Ɔnkɔnɛ, hatohombe ngɛnangɛna etena kasowa anto akina, oyadi kaanga naka vɔ wakatɔhɛnyahɛnyaka.

Dia ngɛnangɛna l’ɛtshɔkɔ w’oma le Nzambi, sho pombaka mboka anto akina ngandji lo toho tɔsɔ oyadi ɛnɔnyi, wodja awɔ kana ɔtɛmwɛlɔ wewɔ. Yoho mɔtshi shikaa yakokaso nsala dui sɔ ele lo nkimanyiya wanɛ wele lo dihombo.