Etena kakɔna kayoya ekomelo k’andja? Kɛnɛ kakate Yeso

TƆSƐDINGOLE AWUI AHENDE WAKATE YESO LO DIKAMBO DIA EKOMELO K’ANDJA:

“Ɔnkɔnɛ nyosungukalake, nɛ dia hanyeye lushi kaanga wonya.”​—MATEO 25:13.

“Nyendake, nyɔsɛnake, nɛ dia nyu hanyeye etena kakashikikɛma.”​—MAKƆ 13:33.

Mbokɛmaka laasɔ dia ndooko onto la lanɛ la nkɛtɛ leya etena shikaa kayokomɛ dikongɛ nɛ di’akambo. Koko, Nzambi akashikikɛ “etena,” mbuta ate “lushi ndo wonya” wayondela ekomelo. (Mateo 24:36) Ko onde kɛsɔ nangaka nembetshiya dia ndooko woho ɔmɔtshi wakokaso mbeya dia kana ekomelo kaya suke? Ndooko. Yeso akatɛ ambeki ande dia wayɛna lokema l’akambo wayohomba mɛnya dia ekomelo kaya suke.

DJEMBETELO

Awui asɔ mbayɛnya djembetelo ya “ekomelo ka dikongɛ di’akambo.” Yeso akate ɔnɛ: “Wodja wayɔlɔsha wodja okina ndo diolelo diayɔlɔsha diolelo dikina, ndjala ya kasha l’adidimu wa nkɛtɛ wayonga lo dihole la dihole.” (Mateo 24:3, 7) Nde akate nto dia “elando,” mbuta ate hemɔ yayoyala. (Luka 21:11) Onde wɛ ekɔ lo mɛna awui wakatatshi Yeso asɔ?

Ɛlɔ kɛnɛ anto wekɔ lo nsowa l’ɔtɛ w’ata, ndjala ndo adidimu wa nkɛtɛ ndo elando lo dihole la dihole. Ɛnyɛlɔ lo 2004, didimu dia nkɛtɛ dimɔtshi dia wolo efula diakasalema lo Océan Indien diakatondja lɔpɛpɛ la wolo lakadiake anto oko 225 000. Lo ɛnɔnyi esato, hemɔ ka COVID-19 kambodiaka suke la 6.9 miliyɔ y’anto l’andja w’otondo. Yeso akatatshi dia awui wele oko wasɔ mbayohomba mɛnya dia ekomelo ka dikongɛ di’akambo nɛ diaya suke.

“NSHI Y’EKOMELO”

Bible mbelɛka awui wayosalema la ntondo k’etena k’ekomelo, ɔnɛ “nshi y’ekomelo.” (2 Petero 3:3, 4) 2 Timɔte 3:1-5 mbutaka dia lo nshi y’ekomelo anto wayotona atɔndɔ wendana la lɔkɛwɔ. (Enda kiombo yele l’ɔtɛ a dui ɔnɛ: “Awui wayosalema la ntondo k’ekomelo k’andja.”) Onde ɛlɔ kɛnɛ wɛ hɛnyi di’anto wekɔ lo nkɛnɛmɔla yimba y’otako, ya lokaki, akanga w’odudu ndo hawɛnyanya ngandji lam’asawɔ? Dui sɔ nto mɛnyaka dia tekɔ lo nsɛna suke suke l’ekomelo k’andja.

Edja ka ngande kayoviya nshi y’ekomelo? Lo ndjela Bible, paka “etena ka mondo keto.” Oma laasɔ, Nzambi ayolanya “wanɛ walanya nkɛtɛ.”​—Ɛnyɛlɔ 11:15-18, nɔtɛ; 12:12.

PARADISO KA LA NKƐTƐ KAYA SUKE!

Nzambi ambotashikikɛka lushi ndo wonya wayondokomiya dikongɛ nɛ di’akambo dia kɔlɔ. (Mateo 24:36) Koko, ekɔ nsango kina y’ɛlɔlɔ, mbuta ate Nzambi “halange kaanga onto 1 ndanyema.” (2 Petero 3:9) Nde ekɔ lo mbisha anto tshɛ diaaso dia mbeka awui wendana la lolango lande ndo mbokitanyiya. Lande na? Nɛ dia nde kombolaka dia sho ndjoka lo ekomelo k’andja ɔnɛ ndo ndjɔsɛna l’andja wakinde w’oyoyo, etena kayokadimɔ nkɛtɛ paradiso.

Nzambi akakongɛ esambishelo ka l’andja w’otondo dia nkimanyiya anto dia mbeka woho wa ndjɔtɔ l’andja w’oyoyo l’ɛse ka Diolelo diande. Yeso akate dia lokumu l’ɔlɔlɔ lendana la Diolelo diaki Nzambi layosambishama lo “nkɛtɛ k’otondo.” (Mateo 24:14) L’andja w’otondo, Ɛmɛnyi wa Jehowa waketsha miliyara ya wenya dia nsambisha ndo mbetsha anto losango la lo Bible lasha elongamelo. Yeso akate dia kampanyɛ k’esambishelo kɛsɔ kayosalema lo nkɛtɛ k’otondo la ntondo k’ekomelo ndja.

Etena k’ɛlɔmbwɛlɔ k’ɔna onto kaya suke la nkomɛ. Koko losango l’ɔlɔlɔ ele ɔnɛ wɛ koka ndjoka l’ekomelo k’andja ndo monga l’atei wa wanɛ wayɔtɔ lo Paradiso ka la nkɛtɛ kakalake Nzambi. Sawo diayela diayɛnya woho wakokayɛ ndjɔsɛna l’andja w’oyoyo ɔsɔ.