TSHAPITA 11

Ekimanyielo K’oma Le Andjelo Waki Nzambi

ANTO amɔtshi mbutaka dia vɔ mbetawɔka paka kɛnɛ kakokawɔ mɛna. Koko ɔsɔ kema dikambo dia yimba. Ekɔ diangɔ efula diele diekɔ mɛtɛ koko tatɛnaka diangɔ diakɔ la washo aso ndoko lushi. Onde wɛ koka shila ɛngɔ kɛmɔtshi?. . .

Kayotota dikambo dia lɔhɛlɛlɛ lahɛngaso? Onde sho kokaka lioka woho welɔ?. . . Ohonyiya lonya layɛ kele etshetshalɔ. Onde wɛ ekɔ lo mboka ɛngɔ kɛmɔtshi?. . . Eelo, koko wɛ hakoke mɛna lɔhɛlɛlɛ, shi mɛtɛ?. . .

Takashile la tɛkɛta dikambo di’anto wa lo nyuma wele hatokoke mbaɛna. Takeke dia l’atei awɔ amɔtshi wekɔ ɔlɔlɔ ndo akina wekɔ kɔlɔ. Ohoshila nkombo y’anto amɔtshi wa lo nyuma w’ɔlɔlɔ wahatakoke mɛna.. . . Anto akɔ ko Jehowa Nzambi, Yeso, ndo andjelo w’ɛlɔlɔ. Onde tekɔ ndo l’andjelo wa kɔlɔ?. . . Eelo, ɔsɔku mbata Bible. Ohombutɛ kɛnɛ kakayeke lo dikambo diawɔ. . . .

Dikambo dimɔtshi dieyaso ele ɔnɛ oyadi andjelo w’ɔlɔlɔ kana wa kɔlɔ, vɔ toleka wolo. Ombetsha a Woke akeyaka awui efula lo kɛnɛ kendana la andjelo. Ekɔ ngasɔ nɛ dia nde aki ondjelo la ntondo ka nde ndjotɔ oko ɔn’ashashi lanɛ la nkɛtɛ. Nde akasɛnaka kâmɛ la andjelo akina l’olongo. Nde akeyaka miliyɔ ya l’atei awɔ. Onde andjelo asɔ tshɛ wekɔ la nkombo?. . .

Takeke dia Nzambi akɔlɛ tɔɔtɔ nkombo. Ɔnkɔnɛ, sho koka monga l’eshikikelo dia andjelo tshɛ wekɔ vɔ lawɔ la nkombo. Ndo sho mbeyaka dia vɔ koka tɛkɛta lam’asawɔ nɛ dia Bible tɛkɛtaka dikambo ‘di’ɔtɛkɛta waki andjelo.’ (1 Koreto 13:⁠1) Weho akɔna w’awui wafɔnyayɛ watɛkɛta andjelo na? Onde vɔ tɛkɛtaka awui wendana la so lanɛ la nkɛtɛ?. . .

Sho mbeyaka dia andjelo waki Satana, mbut’ate ɛdiɛngɛ totshutshuyaka di’aha sho monga l’okitanyiya otsha le Jehowa. Lâsɔ vɔ tɛkɛtaka lo kɛnɛ kendana la woho wakokawɔ sala dikambo sɔ. Vɔ nangaka dia sho monga oko vɔ dia Jehowa tohetsha oko wâhetshande. Ko kayotota dikambo dia andjelo waki Nzambi wa kɔlamelo na? Onde wɛ fɔnyaka dia vɔ lawɔ tɛkɛtaka dikambo diaso?. . . Eelo, vɔ tɛkɛtaka. Vɔ nangaka tokimanyiya. Lotsha kotɛ woho wakakimanyiya andjelo amɔtshi waki Nzambi anto wakokaka Jehowa ngandji ndo wakokambɛka.

Ɛnyɛlɔ, pami kɛmɔtshi kakawelɛka Danyɛlɛ akasɛnaka lo wodja wa Babilɔna. Anto efula wa lo wodja ɔsɔ konangaka Jehowa. Anto asɔ wakadje ndo ɔlɛmbɛ ɔmɔtshi ɔnɛ onto tshɛ lalɔmba Jehowa Nzambi ayohomba kondja dilanya. Koko Danyɛlɛ kotshika dia nɔmbaka Jehowa. Onde wɛ mbeyaka kɛnɛ kakawasalɛ Danyɛlɛ?. . .

Anto wa kɔlɔ wakakasha Danyɛlɛ lo difuku dia tambwɛ. Danyɛlɛ aki ndamɛ l’etei ka difuku sɔ nde la tambwɛ yaki la ndjala efula. Onde wɛ mbeyaka kɛnɛ kakete oma lâsɔ?. . . Danyɛlɛ akate ate: ‘Nzambi akatome ondjelo ande ndo akadihe enyɔ wa tambwɛ.’ Nde kopomɔ kânga yema! Andjelo koka salɛ wanɛ wakambɛ Jehowa awui wa diambo efula.​—⁠Danyele 6:​18-22.

Ɛnyɛlɔ kekina ele kaki Petero laki etena kɛmɔtshi lo lokanu. Tohɛke dia Petero aki ɔngɛnyi waki Yeso Kristo lele Ombetsha a Woke. Anto amɔtshi kɔngɛnangɛna lam’akate Petero ate Yeso mbele Ɔna Nzambi. Diakɔ diakawadje Petero lo lokanu. Asɔlayi wakalamaka Petero di’aha nde ndawɔ. Onde nde aki l’onto ɔmɔtshi lakakoke mbokimanyiya?. . .

Petero akalale lam’asa alami ahende wakolamaka ndo wakokeleka mɔlɔla l’anya. Koko Bible mbutaka ɔnɛ: ‘Enda! Ondjelo waki Jehowa akaye ndo osase wakatatɛ mpɛta lo luudu la lokanu. Ondjelo akananda Petero ndo akawemula ata ate: ‘Emala esadi!’

L’etena kɛsɔ, mɔlɔla wakawakeleka Petero l’anya wakakɔ! Ndo ondjelo ɔsɔ akawotɛ ate: ‘Lɔta ahɔndɔ, lɔta sabata yayɛ ndo ondjele.’ Alami wakolamaka kokoka mbaemadia nɛ dia ondjelo akakimanyiya Petero. Oma lâsɔ, vɔ wakakome lo lokuke la mbolo ndo dikambo dia diambo efula diakasalema. Lokuke lakɔ lakadihɔ lɔamɛ! Ondjelo ɔsɔ akatshungola Petero dia nde tetemala la sambisha.​—⁠Etsha 12:​3-11.

Onde andjelo waki Nzambi koka tokimanyiya ndo sho lawɔ?. . . Eelo, vɔ koka. Onde kɛsɔ nembetshiyaka dia vɔ hawotetawɔ ndoko lushi dia mpokoso tokomɛ?. . . Kema, andjelo hawotoshimba mpokoso dia tokomɛ naka tekɔ lo sala awui wa kɔlɔ. Koko, oyadi kânga hatosale awui wa kɔlɔ, mpokoso koka tokomɛ. Vɔ kombutɛ andjelo dia shimba dikambo sɔ dia diɔ salema. Koko, Nzambi akawasha olimu ɔmɔtshi wa lânde wa sala.

Bible tɛkɛtaka dikambo dia ondjelo ɔmɔtshi watɛ anto wa l’ahole tshɛ dia vɔ tɛmɔla Nzambi. (Enyelo 14:​6, 7) Ngande wawatɛ ondjelo ɔsɔ dikambo sɔ na? Onde nde ekɔ lo pangɔhangɔ oma l’olongo woho w’onto tshɛ mboka kɛnɛ katande?. . . Kema, koko ambeki waki Yeso wa lanɛ la nkɛtɛ mbewoyaka anto akina awui wendana la Nzambi ndo andjelo mbâlɔmbɔlaka l’olimu awɔ. Andjelo salaka tshɛ dia wanɛ walanga mɛtɛ dia mbeya Nzambi kondja diaaso dia mboka awui wendana la nde. Sho koka kamba olimu ɔsɔ ndo andjelo wayotokimanyiya.

Ko ayotosala naka anto wahoke Nzambi ngandji wotɔhɛnyahɛnya na? Ayotosala naka wambotodja lo lokanu na? Onde andjelo wayototshungola?. . . Vɔ koka totshungola. Koko aha ngasɔ mbasalawɔ nshi tshɛ.

Paulo y’ombeki waki Yeso akadjama mbala kɛmɔtshi lo lokanu. Nde akatandaka lɔkɛndɔ lo masuwa etena kaki lɔpɛpɛ la wolo. Koko andjelo kotshungola Paulo esadi nɛ dia aki anto akina waki l’ohomba wa mboka awui wendana la Nzambi. Ondjelo ɔmɔtshi akate ate: “Paulu, tukaki woma; dieli la ye dia memala la ntundu ka Kayisa.” Eelo, Paulo akahombe tɔlama la ntondo k’omboledi wa l’andja ɔnɛ wakawelɛka Kayisa dia nde tosambisha owandji ɔsɔ. Andjelo wakeyaka mbala tshɛ lɛnɛ aki Paulo ndo vɔ wakokimanyiyaka. Vɔ wayotokimanyiya ndo sho lawɔ naka tekɔ lo kambɛ Nzambi mɛtɛ.​—⁠Etsha 27:​23-25.

Andjelo wayokamba olimu okina w’ohomba efula ndo kem’edja vɔ wayanga la kamba olimu akɔ. Etena ka Nzambi ndanya anto wa kɔlɔ kambosukana efula. Anto tshɛ wahatɛmɔla Nzambi ka mɛtɛ wayolanyema. Wanɛ wata dia hawetawɔ andjelo nɛ dia vɔ hawokoke mbaɛna wayɛna dia wekɔ lo ndjakesa efula.​—⁠2 Tesalonika 1:​6-8.

Dui sɔ ayondolembetshiya le so na?. . . Naka tekɔ la andjelo waki Nzambi wedi ɔtɔi, kete vɔ wayotokimanyiya. Ko onde tekɔ lo wedi awɔ?. . . Tekɔ lo wedi awɔ naka tekɔ lo kambɛ Jehowa. Ndo naka tekɔ lo kambɛ Jehowa, kete tayotɛka anto akina dia vɔ lawɔ mbôkambɛ.

Dia mbeka awui efula lo kɛnɛ kendana la shɛngiya yele la andjelo lo nsɛnɔ y’anto, adia Osambu 34:7; Mateu 4:11;  18:10; Luka 22:43; ndo Etsha  8:​26-31.

[Osato wa lo lɛkɛ 63]

Nzambi akandasale dia shimbɛ Danyɛlɛ?

[Osato wa lo lɛkɛ 64]

Ondjelo ɔmɔtshi ngande wakandakimanyiya Petero dia ntomba oma lo lokanu?

[Osato wa lo lɛkɛ 66]

Ondjelo atɛnde Paulo?