Tonge la ngandji

Okakatanu

Totshelo ta nkanɛ anto kɔlɔ hashile esadi. Paka oko watɔsamaka etena k’otale ndo welo efula dia hemɔ nshila, mbele mbɔsaka etena ndo welo efula dia minya tshelo ya nkanɛ anto kɔlɔ. Kakɔna kakoka kokimanyiya dia minya tshelo ya nkanɛ anto kɔlɔ yele la yɛ?

Tɔndɔ dia lo Bible

Esato womamatanyi: 1. Pami kɛmɔtshi k’ose Asie okime lokuke lodihwami dia onto odima ɔmɔtshi lokime akɔhɔ w’eloko mbɔtɔ. 2. Onto odima akɔ laamɛ akahɛ asekande wa l’olimu akɔhɔ w’eloko, mbidja ndo womoto ɔmɔtshi l’ose Inde lakatɛnyi l’osato wetshi.

“Nyɔlɔtɛ ngandji, nɛ dia tɔ kele dimama dia kokele.”—KƆLƆSAYI 3:14.

Kakɔna katetsha divɛsa nɛ? Salɛ anto akina akambo w’ɛlɔlɔ konyaka di’anto monga kaamɛ. Etena tshɛ kayoyotalekaka mɛnya anto akina ngandji, mbayotakitakitaka tshelo ya nkanɛ anto kɔlɔ yele la yɛ. Etena kayoyotalekaka mboka anto akina ngandji, mbayoyotalekaka minya lohetsho lele la yɛ otsha le anto akina.

Kɛnɛ kakokayɛ nsala

Esato womamatanyi: 1. Osungu ɔmɔtshi wa womoto w’opalanga lekewɔ oma la nkimanyiya oma le womoto ɔmɔtshi l’ose Inde dia mbidɛ la diangɔ dia ndɛ diakandasombi lo kibandola. 2. Osungu wa womoto w’opalanga ambɔtɔlɛ osukanyande ekate, mbuta ate pami kɛmɔtshi k’ose Asie kɛnyiso l’osato wetshi.

Yanga toho shikaa takokayɛ mɛnya ngandji otsha le anto wa l’olui wɔsayɛ dia ondo wekɔ anto wa kɔlɔ. Awui asɔ hɛnya dia paka sho mbeya oseka kiambokambo tshɛ. Hemba nsala dui ɔtɔi kana awui efula lo awui wayela anɛ:

Naka wɛ nsala totshelo ta toshitshɛ ta ngandji tɔsɔ, kete wɛ ayonya tshelo ya nkanɛ anto kɔlɔ

Ɛnya anto w’oma l’olui akɔ awui w’ɛlɔlɔ wele oko, mbadiholɛ lokuke kana tshikɛ ɔmɔtshi la l’atei awɔ dihole lo mutuka wɛmba anto.
Hemba ntatɛ nsawola la wɔ yema, kaanga mbewɔ hawoleke mbeya ɔtɛkɛta watɛkɛtayɛ dimɛna.
Onga la solo dia lotutsha etena kasalawɔ akambo lo yoho yahayashihodia.
Okawɔ kɛtshi etena katɛkɛtawɔ awui wendana l’ekakatanu awɔ.

Ɛnyɛlɔ ka mɛtɛ: Nazaré (Guinée-Bissao)

“Etena kɛmɔ lakayotatɛka monga la tokanyi ta kɔlɔ le anto wakayaka oma lo wedja ekina. Wakambutɛ dia vɔ, mbitɛka ewandji wa lɛɛta kashi l’oyango wa vɔ nkondja falanga kana nkondja ekimanyielo ndo efula kawɔ waki andjakanyi. Dui sɔ diakayokonya dia dimi monga l’okakatanu wa mboaetawɔ. Koko, dimi kɔfɔnyaka dia lakaakanɛka kɔlɔ, nɛ dia ngasɔ mbɔsa anto efula wanɛ wonɔ oma lo wedja ekina.

“Koko l’edjedja ka wonya, lakayoshola dia dionga dia kɔlɔ diaki la mi otsha le anto asɔ diakasokoyama oma lo tshelo ya nkanɛ anto kɔlɔ. Lomba l’oshika l’oma lo Bible lambokimanyiya dia dimi monga la ngandji efula otsha le wɔ. Kakianɛ handjowaewɔ. Koko, lowasha mɔyɔ ndo lɔtɛkɛta la wɔ. Lakahembe mbeya ɔmɔmɔ la l’atei w’anto asɔ. Wonya ɔnɛ laya la tokanyi t’amɛna otsha le anto asɔ ndo loyaoka dia laya l’ɔngɛnɔngɛnɔ efula etena kongami kaamɛ la wɔ.”