ETENYI 1

Oma l’Etongelo Polo ndo lo Mvula k’Elola

Oma lende akatɔngɔ olongo la kɛtɛ na? Woho akɔna wakatshama wonya, ngɔndɔ la tɔ̂tɔ kâmɛ ndo efula ka diangɔ diele la kɛtɛ na? Bible kadimulaka l’ɔlɔlɔ tshɛ lam’atatɔ ɔnɛ diɔ diakatongama oma le Nzambi. Omalɔkɔ, buku diaso tatɛ l’ɛkɔndɔ wa Bible w’endana l’etongelo.

Oko ahombaso mbeya, ditongami dia ntondo diaki Nzambi diaki anto wa lo nyuma wɔfɔnyi lande. Andjelo mbakiwɔ. Koko kɛtɛ kakatongama dikambo di’anto wele oko sho. Omalɔkɔ, Nzambi akatonge pami la omoto, Adama la Eva mbaki nkombo yawɔ ndo nde akâkitsha l’ekambɔ ka dimɛna efula. Koko, vɔ wakatɔmbɔkwɛ Nzambi ndo wakatshanyema oma lɔkɔ.

Tatɛ oma l’etongelo polo ndo lo Mvula k’Elola, aki tshɛtshɛ ɛnɔnyi 1 656. L’etena kakɔ kɛso, atshi w’akambo wa kɔlɔ efula waki la lɔsɛnɔ. Satana la andjelo ande wa kɔlɔ, anto wa lo nyuma wahɛnama, wakikɔ l’olongo. Kɛna l’atshi w’akambo wa kɔlɔ akina efula, kâmɛ ndo wanɛ waki la wolo wa mamba wakikɔ la kɛtɛ. Koko ndo anto w’ɛlɔlɔ oko​—⁠Abɛlɛ, Ɛnɔka la Nɔa wakikɔ la kɛtɛ. L’Etenyi ka NTONDO kɛnɛ, tayɔtɛkɛta dikambo di’anto akɔ asɔ tshɛ ndo di’akambo wa lo nshi yakɔ.