ƆKƆNDƆ 7

Pami ka dihonga

OKO akatatɛ anto fulanɛ la kɛtɛ, efula ka l’atei awɔ wakatshaka akambo wa kɔlɔ oko Kɛna. Koko pami kɛmɔtshi akatshikitana lawɔ. Lokombo la pami kakɔ Ɛnɔka. Ɛnɔka aki pami ka dihonga. Kânga mbakatshaka anto tshɛ akambo wa kɔlɔ efula, Ɛnɔka akatetemalaka la kambɛ Nzambi.

Onde wɛ mbeyaka lande na kele anto wa ntondo asɔ wakatshaka akambo wa kɔlɔ efula? Eelo, ohotokokanyiya, Akɔna akasokoya Adama la Eva dia vɔ tɔmbɔkwɛ Nzambi ndo ndɛ olowa wakate Nzambi di’aha vɔ ndɛ na? Eelo, ondjelo wa kɔlɔ mbakâsokoya. Bible mbowelɛka ɔnɛ Satana. Nde pembaka dia sokoya oseka onto tshɛ dia ntsha kɔlɔ.

Lushi lɔmɔtshi, Jehowa Nzambi akatumi Ɛnɔka oko dikɛndji dia nde mbewoya anto kɛnɛ kakiwɔ kɔngɛnangɛnaka mboka. Aki ɔnɛ: ‘Lushi lɔmɔtshi Nzambi ayodiaka anto wa kɔlɔ tshɛ.’ Ondo anto wakomala efula lam’akawoke awui wa ngasɔ. Vɔ wakayange woho wa ndjaka Ɛnɔka. Omalɔkɔ, Ɛnɔka akahombe ndjâla l’otema wolo dia mbutela anto akambo w’endana la kɛnɛ kakalange Nzambi sala.

Nzambi konanga dia Ɛnɔka sɛna edja efula l’atei w’anto wa kɔlɔ wa ngasɔ. Ɛnɔka akasɛnɛ paka ɛnɔnyi 365 eto. Lande na kataso ɔnɛ paka “ɛnɔnyi 365 eto” na? Nɛ dia lo nshi yakɔ anto wakikɔ l’alemba a wolo efula oleki anto wa nshi nyɛ ndo wakasɛnaka edja efula. Diakɔ mbakasɛnɛ kânga Metusela, ɔn’aki Ɛnɔka, ɛnɔnyi 969!

Eelo, l’ɔkɔngɔ wa nyɔi kaki Ɛnɔka, anto wakatetemala ndjâla kɔlɔ ka ditshi. Bible mbutaka dia ‘tokanyi tawɔ tshɛ taki paka kɔlɔ keto,’ ndo ‘kɛtɛ kakalole la kɔlɔ.’

Onde wɛ mbeyaka ɔkɔkɔ ɔmɔtshi wɛnya bonde kaki kɔlɔ efula nshi yakɔ shɔ la kɛtɛ? Nɛ dia Satana akikɔ la shambu kina y’oyoyo yakandasalaka dia tshutshuya anto woho wa vɔ tshaka akambo wa kɔlɔ. Tayohotɔ dui sɔ la ntondo.

Etatelu 5:​21-24, 27; 6:5; Heberu 11:5; Jude 14, 15.