Tɔkɛndɛkɛndɛ la Nzambi lo tena nɛ dia ofukutanu
‘Ɛnɔka akakɛndakɛndaka la Nzambi ka mɛtɛ. Nde kɔmɛnama nto, nɛ dia Nzambi akawɔsɛ.’—ETATELU 5:24.
1. Naa awui amɔtshi wa lo tena diaso nɛ wetɛ lɔsɛnɔ tshondo y’okakatanu?
TENA dia ofukutanu! Ɛtɛkɛta ɛsɔ kɛnɛmɔlaka dimɛna dimɛna ɛnɔnyi w’osukusuku ndo w’awui wa ngala wambodiɛnɛ anto tatɛ etena kakashikikɛma Diolelo diaki Mɛsiya lo 1914. Tatɛ oma lo etena kɛsɔ polo ndo ɛlɔ, anto wekɔ lo nsɛna lo “nshi y’ekumelu.” Ndo anto wekɔ lo diɛnɛ lo yoho yamboleka tshɛ la ekakatanu wele oko, ndjala, hemɔ, adidimu wa nkɛtɛ, ndo ata. (2 Timote 3:1; Enyelo 6:1-8) Wanɛ watɛmɔla Jehowa hawohandwe oma lo ekakatanu ɛsɔ. Lo yɛdikɔ mɔtshi, sho tshɛ ndɔshanaka l’akambo waheyama heyama ndo ekakatanu wendana la tena di’ofukutanu. Ekakatanu wendana la ekondjelo, osukusuku wa pɔlitikɛ, awui wa ngala ndo hemɔ wekɔ l’atei w’akambo wetɛ lɔsɛnɔ pâ efula.
2. Ekakatanu akɔna wahomana la ekambi wa Jehowa?
2 Ndo nto, ekambi wa Jehowa efula wekɔ lo tetemala la mbikikɛ ɛhɛnyɔhɛnyɔ wa wolo oko watetemala Satana ndɔsha wanɛ “watukitanyiaka elembe wa [Nzambi], watulamaka diui dia Jesu.” (Enyelo 12:17) Kânga mbele aha sho tshɛ mbahɛnyahɛnyama lo demba, Akristo wa mɛtɛ tshɛ wekɔ lo ndɔshana la Satana Diabolo ndo la yimba yakeketshande anto dia monga la yɔ. (Efeso 2:2; 6:12) Sho pombaka nsɛna wolo diaha sɛngiyama la yimba shɔ, nɛ dia sho pomanaka la yɔ lo olimu, la kalasa ndo oseka dihole tshɛ diakokaso monga kâmɛ la wanɛ wahayasha lo ɔtɛmwɛlɔ wa pudipudi.
Tɔkɛndɛkɛndɛ la Nzambi koko aha la wedja
3, 4. Lo yoho yakɔna yotshikitanyi Akristo la ase andja ɔnɛ?
3 Lo ntambe ka ntondo, ndo Akristo wakatetemala shika tanga la wolo tshɛ la yimba ya andja ɔnɛ ndo dui sɔ diakatshikitanyaka efula la wanɛ waki l’andja w’etshumanelo ka Akristo. Paulo akɛnya otshikitanu ɔsɔ etena kakandafunde ate: “Dimi lambuta diui ne okone, ndu lambunyenya le Khumadiondjo nti: Tanyutshaki ntu uku atutshaka asi wedja, lu tunginyanginya ta tumba tawo. Tukanyi tawo tambuyala udjima lu ewu kawo. Vo wakangana uma lu lumu la [Nzambi], ne dia tunginyanginya tawo, ne dia ekikitshelu k’etema awo. Vo wambuyala akanga a lunyu, wambuyakimo lu akambu wa sonyi, dia ntsha akambu tshe wa mindu la saki ka wulu.”—Efeso 4:17-19.
4 Ɛtɛkɛta ɛsɔ mɛnyaka mɛtɛ dia oyadi lo nshi ya Paulo kana lo nshi yaso nyɛ, andja ɔnɛ wekɔ lo wodjima wa lo nyuma ndo wa lo awui wendana la lɔkɛwɔ! Oko wakidiɔ lo ntambe ka ntondo, Akristo wa nshi nyɛ ‘hawɔkɛndakɛnda oko wakakɛndakɛndaka ase wedja.’ Koko, vɔ wekɔ la diɛsɛ dia diambo dia kɛndakɛnda kâmɛ la Nzambi. Lo mɛtɛ, anto amɔtshi mbeyaka ndjambola dia kana anto wele kema kokele kokaka kɛndakɛnda kâmɛ la Jehowa. Koko, Bible mɛnyaka dia vɔ kokaka sala dui sɔ. Ndo nto, Jehowa nongamɛka dia vɔ sala ngasɔ. Lo ntambe ka enanɛi la ntondo ka tena diaso, ɔprɔfɛta Mika akafunde ɛtɛkɛta wakasambiyama ɛnɛ: “Kakona katuyangaka [Jehowa] uma le ye? Paka dia ntsha akambu w’ololo, dia nanga ketshi, ndu dia nkendakenda la ndjakitshakitsha kame la [Nzambi k]aye?”—Mika 6:8, sho mbɛnganyisha alɛta ango.
Ngande ndo lande na kɛndakɛnda la Nzambi?
5. Ngande wakoka anto wele kema kokele kɛndakɛnda la Nzambi?
5 Ngande wakokaso kɛndakɛnda la Nzambi kanga wolo tshɛ ndo kahɛnama? Lo mɛtɛ, aha lo yoho yakɛndakɛndaso la anyaso anto. Lo Bible, tshɛkɛta “kɛndakɛnda” koka nembetshiya “ndjela yoho mɔtshi ya lɔsɛnɔ.”a La dui sɔ lo yimba, sho mbokaka lâsɔ dia ɔnɛ lakɛndakɛnda la Nzambi ndjelaka yoho ya lɔsɛnɔ yakɛnya Nzambi ndo yɔngɛnyangɛnya. Ndjela yoho ya lɔsɛnɔ ya ngasɔ totshikitanyaka la efula k’anto wotodingi. Koko ɔsɔ ekɔ ɔsɔnwɛlɔ wâmɛ wa dimɛna wakoka Okristo sala. Lande na? L’ɔtɛ wa ɛkɔkɔ efula.
6, 7. Lande na kele kɛndakɛnda la Nzambi ekɔ yoho ya lɔsɛnɔ yoleki dimɛna?
6 Ntondotondo, Jehowa ekɔ Otungi aso, Kiɔkɔ ya lɔsɛnɔ laso ndo Nde mbatosha kɛnɛ tshɛ kele laso ohomba dia sukɛ lɔsɛnɔ. (Enyelo 4:11) Ɔnkɔnɛ, nde oto mbele la lotshungɔ la totɛ woho wahombaso kɛndakɛnda. Ndo nto, kɛndakɛnda la Nzambi mbele yoho ya lɔsɛnɔ yoleki dimɛna. Le wanɛ wakɛndakɛnda la nde, Jehowa akɔshi yɛdikɔ dikambo dia edimanyielo ka pɛkato yawɔ ndo nde mbashaka elongamelo ka lɔsɛnɔ la pondjo pondjo. Shɛso ka ngandji kele l’olongo mbishaka nto alako wa lomba wakimanyiya wanɛ wakɛndakɛnda la nde dia vɔ monga la lɔsɛnɔ la dimɛna oma ko kakianɛ, kânga mbewɔ kema kokele ndo mbasɛnawɔ lo andja wele lo wolo waki Satana. (Joani 3:16; 2 Timote 3:15, 16; 1 Joani 1:8; 2:25; 5:19) Ɔkɔkɔ okina watotshutshuya dia kɛndakɛnda la Nzambi ele woho wetawɔso la lolango laso dia sala ngasɔ kimanyiyaka dia wɔladi ndo kâmɛ monga lo etshumanelo.—Kolosai 3:15, 16.
7 Lo ekomelo ndo kɛnɛ koleki ohomba ele, etena kakɛndakɛndaso la Nzambi, sho mɛnyaka wedi weso lo dikambo dia woke diakonyiyama lo ekambɔ k’Ɛdɛna, mbuta ate dikambo diendana la lowandji. (Etatelu 3:1-6) Sho mɛnyaka oma lo yoho yaso ya lɔsɛnɔ ɔnɛ lo wedi wa Jehowa mbeso ndo sho mbewoyaka anto aha la mboka wɔma dia nde ndamɛ mbakoka monga Nkum’Olongo. (Osambu 83:18) Ɔnkɔnɛ, sho salaka akambo lo yoho yɔtɔnɛ la dɔmbɛlɔ dialɔmbaso dia lokombo la Nzambi kidiama ndo dia lolango lande salema. (Mateu 6:9, 10) Wanɛ wasɔna dia kɛndakɛnda la Nzambi wekɔ mɛtɛ la lomba! Vɔ kokaka ndjashikikɛ ɔnɛ wekɔ lo takɛndakɛnda lo mboka k’ɔlɔlɔ, lam’ele Jehowa ‘ndamɛ oto mbele la lomba.’ Nde handjaka pondjo.—Romo 16:27.
8. Ngande wafɔna nshi ya Ɛnɔka la Nɔa la nshi yaso nyɛ?
8 Ngande wakokaso nsɛna woho wahomba Akristo nsɛna lam’ele tekɔ lo nsɛna lo tena dia ofukutanu efula ndo diele anto efula bu la nsaki ka kambɛ Jehowa? Sho kondjaka okadimwelo etena kasɛdingolaso bɛnyɛlɔ dia apami wa kɔlamelo wa lo nshi y’edjedja wakalame olowanyi awɔ lo tena dia wolo efula. Ɛnɔka la Nɔa waki l’atei awɔ. Vɔ akɔ ahende wakasɛnɛ lo tena diafɔna efula la tena diaso nɛ. Awui wa kɔlɔ wakadiangana efula. Lo nshi ya Nɔa, nkɛtɛ yakalole la awui wa ngala ndo la awui wa mindo. Koko, Ɛnɔka nde la Nɔa wakashike tanga la ntondo ka yimba y’andja wa nshi yawɔ ndo wakakɛndakɛnda la Jehowa. Ngande wakawakoke sala dui sɔ? Dia kadimola dimbola sɔ, tayɔkɛtshanya lo sawo nɛ ɛnyɛlɔ ka Ɛnɔka. Ndo lo sawo diayela tayɔsɛdingola ɛnyɛlɔ ka Nɔa.
Ɛnɔka akakɛndakɛnda la Nzambi lo tena dia ofukutanu
9. Kakɔna keyaso lo dikambo dia Ɛnɔka?
9 Ɛnɔka mbele onto la ntondo lakɔndɔla Afundelo dia nde akakɛndakɛnda la Nzambi. Ɔkɔndɔ wa lo Bible mbutaka ɔnɛ: ‘L’ɔkɔngɔ wa nde mbota Metusela, Ɛnɔka akatetemala kɛndakɛnda la Nzambi ka mɛtɛ.’ (Etatelu 5:22) Oma lâsɔ, l’ɔkɔngɔ wa ɔkɔndɔ ɔsɔ tɛkɛta dikambo dia otale wa lɔsɛnɔ la Ɛnɔka lele kânga mbele lɔ laki otale lo liɛdika la lɔsɛnɔ laso, lɔ laki mondo lo liɛdika la lɔsɛnɔ la anto wa nshi shɔ, ɔkɔndɔ mbutaka nto ɔnɛ: “Enoke akakendakendaka la [Nzambi]. Ndi komenama ntu, ne dia [Nzambi] akawose asena.” (Etatelu 5:24) Lo mɛtɛ, Jehowa akasɛkɔla Ɛnɔka oma lo nkɛtɛ ya wasɛna otsha lo djɔ ya nyɔi la ntondo ka atunyi ande mbosalɛ kɔlɔ. (Heberu 11:5, 13) Lâdiko dia avɛsa wa tomondo asɔ, tɔtɔi t’avɛsa wa lo Bible toto mbatɛkɛta dikambo dia Ɛnɔka. Koko, oma lo awui wele laso ndo oma lo tolembetelo tokina, tekɔ la ɛkɔkɔ wa shikaa wa mbuta ɔnɛ Ɛnɔka akasɛnaka lo tena dia ofukutanu.
10, 11. a) Ngande wakadiangana awui wa kɔlɔ l’ɔkɔngɔ w’ɔtɔmbɔkwɛlɔ wa Adama la Eva? b) Losango lakɔna la prɔfɛsiya lakasambisha Ɛnɔka ndo ngande wakɔshi anto losango lakɔ?
10 Ɛnyɛlɔ, tɔsɛdingole woho wakadiangana awui wa kɔlɔ esadi eto le dioho di’anto l’ɔkɔngɔ wa Adama sala pɛkato. Bible totɛka dia Kɛna, ɔnaki Adama l’enondo mbakakome onto la ntondo lakadiake onto okina etena kakandadiake Abɛlɛ w’ɔnango. (Etatelu 4:8-10) L’ɔkɔngɔ wa nyɔi ka kɔlɔ kaki Abɛlɛ, Adama la Eva wakote ɔna okina ndo wakawɔlɛ lokombo ɔnɛ Sɛta. Lo dikambo diande sho mbadiaka ɔnɛ: “Sɛta akote ɔna pami, ko akawɔlɛ lokombo ɔnɛ: Ɛnɔsha ndo oma lâsɔ mbakatatɛ anto tɛndɛ lokombo la Jehowa.” (Etatelu 4:25, 26, NW) Lonyangu ko, anto waki lo ‘tɛndɛ lokombo la Jehowa’ lo yoho ya kɔlɔ.b Ɛnɔnyi efula l’ɔkɔngɔ wa eotwelo ka Ɛnɔsha, kanula mɔtshi yaki Kɛna yakawelɛka ɔnɛ Lamɛka akembe lembo lɔmɔtshi dikambo dia wadiɛnde ahende lo mbuta dia nde akadiake ɔlɔngɔ a pami ɔmɔtshi wakohumuya. Nde akewola nto ate: “Naka Kena ayosombweyama tena esambeli, mete Lameka akumi esambeli la esambeli.”—Etatelu 4:10, 19, 23, 24.
11 Awui wambotɔsɛdingola lo tshena pe asɔ mɛnyaka dia awui wa kɔlɔ wakɔtshiya Satana lo ekambɔ ka Ɛdɛna wakadiangana esadi eto l’atei wa ana waki Adama. Lo andja wa ngasɔ, mbaki Ɛnɔka ɔprɔfɛta waki Jehowa ndo ɛtɛkɛta ande wakasambiyama weke la nkudu polo ndo ɛlɔ kɛnɛ. Jude akate dia Ɛnɔka akasambishaka ate: “Nyulungi, [Jehowa] ambuya la ekilami andi nunu akumi akumi, dia ndjulumbuya tshe, dia mamia atshi wa kolo tshe dia akambu wa kolo watshawo, la dia tengo tshe yôtenga antu wa kolo.” (Jude 14, 15) Ɛtɛkɛta ɛsɔ wayokotshama tshɛ lo tshɛ lo Aramangɛdɔna. (Enyelo 16:14, 16) Koko, sho koka ndjashikikɛ dia oyadi lo nshi ya Ɛnɔka “atshi wa kolo” efula wakoke awui wakasambishaka Ɛnɔka kombangɛnagɛna. Aki mɛtɛ tshelo ya ngandji dia Jehowa sɛkɔla Ɛnɔka diaha anto asɔ mbosalɛ kɔlɔ!
Kakɔna kakakeketsha Ɛnɔka dia kɛndakɛnda la Nzambi?
12. Kakɔna kakatshikitanya Ɛnɔka la anto wa lo nshi yande?
12 Lo ekambɔ ka Ɛdɛna, Adama nde la Eva wakahokamɛ awui wa Satana ndo Adama akatɔmbɔkwɛ Jehowa. (Etatelu 3:1-6) Jehowa akangɛnangɛna ɔnawɔ Abɛlɛ nɛ dia nde kondjela mboka kawɔ kɛsɔ. (Etatelu 4:3, 4) Lonyangu ko, efula ka tokanula ta Adama komonga oko Abɛlɛ. Koko, Ɛnɔka lakotɔ nkama y’ɛnɔnyi l’ɔkɔngɔ aki oko nde. Naa otshikitanu waki lam’asa Ɛnɔka nde la tokanula tokina ta Adama? Ɔpɔstɔlɔ Paulo akakadimola lo dimbola sɔ lam’akandafunde ate: “Dia mbetawo, mbakasekwama Enoka, dia ndi tenaki nyoi; ndi kuntanema, ne dia [Nzambi] akôsekola. La ntundu k’esekwamelu kandi, wakawuti vati: Ndi akangenyangenya [Nzambi].” (Heberu 11:5) Ɛnɔka aki ɔtɔi ɔmɔtshi l’atei wa “ului a wuki w’emenyi [wakasɛnɛ la ntondo ka Kristo],” waki bɛnyɛlɔ di’ɔlɔlɔ efula dia mbetawɔ. (Heberu 12:1) Mbetawɔ mbakakimanyiya Ɛnɔka dia nde mbikikɛ lo nama lɔkɛwɔ lande la dimɛna lo edja ka olekanyi ɛnɔnyi 300, mbuta ate ndekana otale wa lɔsɛnɔ lasɛna efula ka l’atei aso mbala shato!
13. Woho akɔna wa mbetawɔ waki la Ɛnɔka?
13 Paulo akatɛkɛta dikambo dia mbetawɔ kaki Ɛnɔka ndo ka ɛmɛnyi ekina lam’akandafunde ate: ‘Mbetawɔ ekɔ dikongelo dia shikaa di’awui walongamɛ onto, wɛnyɛlɔ wa lo sɛkɛ w’awui wa mɛtɛ wele hawɛnama.’ (Heberu 11:1) Eelo, mbetawɔ ekɔ dikongelo dia shikaa diohikami lo eshikikelo kele laso ɔnɛ awui walongamɛso wayokotshama. Mbetawɔ mendanaka la dikongelo dia nge diele la shɛngiya lo kɛnɛ kɔsaso oko dikambo dioleki ohomba lo nsɛnɔ yaso. Woho wa mbetawɔ kɛsɔ akakimanyiya Ɛnɔka dia nde kɛndakɛnda la Nzambi kânga mbaki anto efula wakodinge kosalaka ngasɔ.
14. Mbetawɔ kaki Ɛnɔka kakahikama lo ewo kakɔna k’oshika?
14 Mbetawɔ ka mɛtɛ mbikama lo ewo k’oshika. Ewo kakɔna kaki la Ɛnɔka? (Romo 10:14, 17; 1 Timote 2:4) Aha la tâmu, nde akeyaka dimɛna awui wakete lo Ɛdɛna. Ondo, nde akoke nto woho waki lɔsɛnɔ lo ekambɔ ka Ɛdɛna, yoho ya lɔsɛnɔ yele ondo yakatetemala kânga mbaki anto komonga nto lo ekambɔ kakɔ. (Etatelo 3:23, 24) Nde akeyaka nto sangwelo diaki Nzambi dia ɔnɛ tokanula taki Adama wayolodja nkɛtɛ ndo wayokonya andja w’otondo oko Paradiso kaki lo etatelo. (Etatelu 1:28) Ndo nto, Ɛnɔka akangɛnangɛnaka mɛtɛ daka diakasha Jehowa dia tondja Kanula yakahombe ndjominola Satana lo ɔtɛ ndo minya etombelo tshɛ wa kɔlɔ w’oma lo lokeso laki Satana. (Etatelu 3:15) Lo mɛtɛ, ɛtɛkɛta waki Ɛnɔka wakasambiyama wakalamema lo dibuku dia Jude wakatɛkɛta dia elanyelo ka kanula yaki Satana. Lam’ele Ɛnɔka aki la mbetawɔ, sho mbeyaka dia nde akatɛmɔlaka Jehowa lele ‘ofutshi a wanɛ watoyangaka la otema ɔtɔi.’ (Heberu 11:6) Omalɔkɔ, kânga mbaki Ɛnɔka komonga la ewo tshɛ kele laso ɛlɔ kɛnɛ, nde aki la ewo kɛmɔtshi kakahikama mbetawɔ kande ka nge. Mbetawɔ kɛsɔ akokimanyiya dia nde nama olowanyi ande lo tena dia ofukutanu.
Tokoya ɛnyɛlɔ kaki Ɛnɔka
15, 16. Ngande wakokaso mbokoya yoho ya lɔsɛnɔ yaki Ɛnɔka?
15 Lam’ele lo ɛnyɛlɔ kaki Ɛnɔka, sho nangaka ngɛnyangɛnya Jehowa lo tena dia ofukutanu dia nshi nyɛ, sho pombaka mbokoya ɛnyɛlɔ kaki Ɛnɔka. Sho pombaka kondja ndo nama ewo k’oshika kaki Jehowa ndo ka asangwelo ande. Koko, tekɔ l’ohomba w’akambo efula. Sho pombaka mbetawɔ dia ewo k’oshika kɛsɔ nɔmbɔla nsɛnɔ yaso. (Osambu 119:101; 2 Petero 1:19) Sho pombaka nɔmbwama la tokanyi ta Nzambi ndo salaka la wolo mbala tshɛ dia mbɔngɛnyangɛnya lo tokanyi ndo lo etsha aso tshɛ.
16 Sho kema la ɔkɔndɔ wa onto ɔmɔtshi lakakambɛka Jehowa lo nshi ya Ɛnɔka, lâsɔ mbokɛmaka hwe dia ondo nde aki ndamɛ kana l’atei wa djui mɔtshi ya tshitshɛ y’anto. Kânga mbeso yema tshitshɛ l’atei wa andja ɔnɛ, dui sɔ hatɔkɔmɔla demba. Jehowa ayotosukɛ oyadi onto akɔna tshɛ layolanga tɔlɔsha. (Romo 8:31) La dihonga tshɛ, Ɛnɔka akewola anto lo kɛnɛ kendana la oyelo w’elanyelo k’anto wa kɔlɔ. Sho lawɔ tekɔ la dihonga etena kasambishaso “lukumu l’ololo lone la diulelu” kânga mbatɔlawɔ, mbatɔlɔshawɔ ndo mbatɔhɛnyahɛnyawɔ. (Mateu 24:14) Ɛnɔka kɔsɛna ɛnɔnyi efula oko wakasɛnaka anto efula wa lo nshi yande. Koko elongamelo kande komonga ka lo andja ɔsɔ. Washo ande wakakama lo dikambo dimɔtshi diakaleke woke. (Heberu 11:10, 35) Sho lawɔ tamboka washo aso lo okotshamelo wa sangwelo diaki Jehowa. Omalɔkɔ, hatoyasha tshɛ lo awui wa lo andja ɔnɛ lo yoho y’efula. (1 Koreto 7:31) Koko, sho kambaka ntondotondo la wolo aso ndo la diangɔ diele laso lo olimu wa Jehowa.
17. Ewo kakɔna kele laso kele Ɛnɔka komonga latɔ ndo ahombaso sala?
17 Ɛnɔka aki la mbetawɔ dia Kanula yakalake Nzambi yakahombe mɛnama lo etena kakashikikɛ Jehowa. Aya kakianɛ suke la ɛnɔnyi 2 000 wambeta, tatɛ lam’akɛnɛ Kanula shɔ mbuta ate Yeso Kristo, lo kimɔ tshungo ndo lo todiholɛ mboka sho la ɛmɛnyi wa kɔlamelo wa lo nshi y’edjedja wele oko Ɛnɔka dia kondja lɔsɛnɔ la pondjo. Kanula shɔ yakahenyama lo okudi oko Nkumekanga ka Diolelo diaki Nzambi akatshanya Satana oma l’olongo oya la nkɛtɛ nyɛ ndo sho mɛnaka woho wadisowa anto l’ɔtɛ wa dikambo sɔ. (Enyelo 12:12) Eelo, tekɔ la ewo k’efula oleki ewo kaki la Ɛnɔka. Nyɛsɔ tonge la mbetawɔ ka nge oko kaki lande. Eshikikelo kele laso lo okotshamelo w’alaka wa Nzambi konge la shɛngiya lo kɛnɛ tshɛ kasalaso. Nyɛsɔ sho tshɛ, lo ɛnyɛlɔ kaki Ɛnɔka tɔkɛndɛkɛndɛ la Nzambi kânga mbasɛnaso lo tena dia ofukutanu.
[Nɔtɛ ya l’ɛse ka dikatshi]
a Enda lo vɔlimɛ 1, lɛkɛ 228, odingɔ 6, ya dibuku Étude perspicace des Écritures, diakatondjama oma le Ɛmɛnyi wa Jehowa.
b La ntondo ka nshi ya Ɛnɔsha, Jehowa akatɛkɛtaka la Adama. Abɛlɛ akalambola Jehowa olambo wa dimɛna. Nzambi akasawola ndo la Kɛna la ntondo ka kɛlɛ kande ka kandjema mbotoma dia nde ndjaka onto. Ɔnkɔnɛ, etelo k’ɔnɛ wakatatɛ “tɛndɛ lokombo la Jehowa” akahombe monga lo yoho yotshikitanyi la yoho yakawalitɛndɛka lo ɔtɛmwɛlɔ wa pudipudi.
Ngande wayoyokadimola?
• Kakɔna kalembetshiya kɛndakɛnda la Nzambi?
• Lande na kele kɛndakɛnda la Nzambi ekɔ yoho ya lɔsɛnɔ yoleki dimɛna?
• Kakɔna kakakimanyiya Ɛnɔka dia nde kɛndakɛnda la Nzambi kânga lo tena dia ofukutanu?
• Ngande wakokaso mbokoya Ɛnɔka?
[Osato wa lo lɛkɛ 25]
Oma lo mbetawɔ, ‘Ɛnɔka akatetemala kɛndakɛnda la Nzambi ka mɛtɛ’
[Osato wa lo lɛkɛ 26]
Sho mbetawɔka la wolo tshɛ dia alaka wa Jehowa wayokotshama
[Efundelo wɛnya kanga osato wa lo lɛkɛ 23]
Womoto, lo lonya l’omi: FAO photo/B. Imevbore; luudu lambolana: San Hong R-C Picture Company