ƆKƆNDƆ 23

Alɔ wa Farawɔ

ƐNƆNYI ehende wakete, ko Yɔsɛfu aki paka lo lokanu. Kapita k’amangudi a wanu kombôhɔ nto. Ko l’otsho ɔmɔtshi, Farawɔ akɛnyi alɔ ahende waki la kitshimudi, ko nde akalange mbeya kitshimudi. Wɛ hawɛnyi woho woladinde lango? La wedi a pindju Farawɔ akelɛ ase timba ande ndo akawatɛ akambo wakandɛnyi lo dɔ. Koko vɔ kokoka mbɔtɛ kitshimudi y’alɔ ande.

Kakianɛ kapita k’amangudi a wanu amboyôhɔ Yɔsɛfu. Nde akatɛ Farawɔ ate: ‘Lam’akimi lo lokanu, takikɔ la pami kɛmɔtshi kakeyaka nembetshiya alɔ.’ Farawɔ akatondja Yɔsɛfu oma lo lokanu esadi esadi.

Farawɔ akatela Yɔsɛfu alɔ ande ate: ‘Dimi lakɛnyi ngɔmbɛ ya wadi esambele ya wake ndo amɛna. Mɛnyi nto ko ngɔmbɛ esambele kina ya wɛɔndju. Ko ngɔmbɛ ya wɛɔndju yakamɛnɛ nyɛ ya weke.’

‘Lo dɔ diami dia hende, dimi lakɛnyi washa esambele wele la tɔngɔ ya wake y’amɛna wayatombe oma lo tshina ɔtɔi. Mɛnyi nto ko washa esambele w’atanganyi atanganyi ndo elungudi. Ko washa w’atanganyi ndo elungudi wakamɛnɛ washa esambele waki la tɔngɔ ya wake y’amɛna.’

Yɔsɛfu akatɛ Farawɔ ate: ‘Alɔ akɔ ahende wekɔ lo nembetshiya dikambo ɔtɔi. Ngɔmbɛ esambele ya wata la washa esambele wele la tɔngɔ ya wake kɛdikɛdi ɛnɔnyi esambele, ndo ngɔmbɛ esambele ya tɔndjutɔndju la washa esambele w’elungudi mɛnyaka ɛnɔnyi esambele ekina. Ayoyala ɛnɔnyi esambele wayonga mbo ya ndɛ efula l’Edjibito. Ko l’ɔkɔngɔ ayoyala ɛnɔnyi esambele wa ndjala ka kasha.’

Ko Yɔsɛfu akatela Farawɔ ate: ‘Sɔna pami ka yimba kele shande ɔkɛndɛ wa kɔngɔla mbo ya ndɛ lo ɛnɔnyi esambele ɛnɛ w’amɛna. Lâsɔ kele anto tawovɔkake la ndjala lo edja k’ɛnɔnyi esambele ekina wa ndjala ka kasha wayoyela.’

Kanyi shɔ yakangɛnyangɛnya Farawɔ. Ko nde akasɔnɛ Yɔsɛfu dia kɔngɔla mbo ya ndɛ ndo ndjiomba. Yɔsɛfu akakome onto la woke l’Edjibito malale Farawɔ.

L’ɔkɔngɔ w’ɛnɔnyi enanɛi, mbuta ate lo nshi ya ndjala, Yɔsɛfu ɛnyi ko apami amɔtshi wayaye. Onde wɛ mbaeyaka? Toko nondo diande 10 di’apami! Shɛwɔ le Jakɔbɔ akâtome l’Edjibito dikambo mbo ya ndɛ yakatatɛ shila lakawɔ la Kanana. Yɔsɛfu akeye anango koko vɔ kombeya. Wɛ mbeyaka dikambo kona? Dikambo dia Yɔsɛfu ambôla ndo ambɔlɔta ahɔndɔ wa woho okina.

Yɔsɛfu akohɔ dia lam’akinde eke dikɛnda, nde akɛnyi lo dɔ anango wawokɛ adwe. Onde wɛ ekɔ lo mbohɔ kɛnɛ kakatadia dia dikambo diakɔ? Omalɔkɔ, Yɔsɛfu akɛnyi dia ekɔ Nzambi mbakôtome l’Edjibito, ndo di’ɔkɔkɔ w’ɔlɔlɔ. Kakɔna kakanyiyɛ kakasale Yɔsɛfu na? Ɛsɔ tênde.

Etatelu 41:​1-57; 42:​1-8; 50:⁠20.