ƆKƆNDƆ 33
Otehwelo wa Ndjale ka Beela
OHENDA kɛnɛ kambotomba kengo! Mɔsɛ ongo asembola danga diande lâdiko dia Ndjale ka Beela. Ase Isariyɛlɛ ango wemadi lo wedi ande. Koko Farawɔ l’alembe ande tshɛ wambɔkɛla lo ndjale. Ohɛ̂sɔ tênde woho wamboyotomba dikambo nɛ.
Oko akatêke, Farawɔ akatɛ Ase Isariyɛlɛ dia vɔ monɛ oma l’Edjibito, l’ɔkɔngɔ wa sui dia dikumi diakela Nzambi le Ase Edjibito. Apami w’Ase Isariyɛlɛ waki 600 000 aha mbadia lokema la amato l’ana. Ndo, lemba l’anto akina, wanɛ waketawɔ Jehowa wakatombe kâmɛ l’Ase Isariyɛlɛ. Vɔ tshɛ wakɔsɛ ɛkɔkɔ, mbudi la dongalonga diawɔ tshɛ.
La ntondo ka vɔ tomba, Ase Isariyɛlɛ wakalɔmbɛ Ase Edjibito ahɔndɔ ndo diangɔ diosalemi la paunyi la fɛsa. Ase Edjibito waki la wɔma efula, lo dikambo dia sui dia komelo diakâkomɛ. Omalɔkɔ, vɔ wakasha Ase Isariyɛlɛ ɛngɔ tshɛ kakawalɔmbɛ.
L’ɔkɔngɔ a nshi mɔtshi, Ase Isariyɛlɛ wakakome lo Ndjale ka Beela. Vɔ wakomuya lawɔ. Ko lo wonya akɔ wâmɛ, Farawɔ l’apami ande wakatatɛ ndjatshumuya lo woho wakawetawɔ di’Ase Isariyɛlɛ ntshɔ. Vɔ wakate vɔate: ‘Tambotshika fumbe yaso dia vɔ ntshɔ!’
Omalɔkɔ, Farawɔ akakeketsha otema nto. Nde akɔsɛ pusupusu yande ya ta l’alembe ande esadi esadi. Pusupusu 600 ya wolo efula mbakandɔshi, kâmɛ la kina yaki l’Edjibito w’otondo, ko vɔ wakatatɛ ndjelana l’Ase Isariyɛlɛ.
Lam’akɛnyi Ase Isariyɛlɛ Farawɔ l’alembe ande wayaye, vɔ wakadidima la wɔma efula. Mboka kondjala lawɔ ka vɔ ndawɔ. Lo wedi awɔ ɔmɔtshi Ndjale ka Beela kakikɔ ndo lo wedi okina Ase Edjibito waki lo ndjaye. Ko Jehowa akadje dinge lasa anto ande l’Ase Edjibito. Omalɔkɔ, Ase Edjibito kokoka mɛna Ase Isariyɛlɛ dia vɔ mbanda.
Ko Jehowa akatɛ Mɔsɛ dia nde tshuma danga diande lâdiko dia Ndjale ka Beela. Etena kakandasale ɔsɔku, Jehowa akatome lɔpɛpɛ la wolo oma l’ehotwelo ka wonya dia lɔ pɛpa. Ashi wa ndjale wakâtɔma, ndo wakakengama l’emamu ehende.
Ko Ase Isariyɛlɛ wakatatɛ kɛndakɛnda lo lɔkɔngɔ la womu dia tenyanya ndjale. Akahombama wenya efula dia miliyɔ y’anto la wa nyama yawɔ tshɛ tenyanya ndjale ka womu aha la wâle. Ko l’ɔkɔngɔ diko Ase Edjibito wakayɛna Ase Isariyɛlɛ nto. Fumbe yawɔ yambotshɔ! Ko vɔ wakahungumɔ lo ndjale l’ɔkɔngɔ awɔ.
Lam’akawasale ɔsɔku, Nzambi akasale di’ekato wa pusupusu yawɔ mongôngɔ. Ase Edjibito wakoke wɔma efula ndo wakatatɛ mbida ekoko vɔate: ‘Jehowa ekɔ lo ndwɛla Ase Isariyɛlɛ. Nyɛ̂sɔ tolawɔ oma lanɛ!’ Koko kombeyama nto.
L’etena kɛsɔ Jehowa akatɛ Mɔsɛ dia nde tshuma danga diande lo Ndjale ka Beela, oko wɛnayɛ l’osato. Ko etena kakasale Mɔsɛ ɔsɔku, pele di’ashi diakakongotɔ ko diakafɛ Ase Edjibito la pusupusu yawɔ tshɛ. Lâsɔ ko olui w’alembe wakayayelaka Ase Isariyɛlɛ waya lo ndjale. Ndo ndoko Ose Edjibito ɔtɔi lakake!
Ande ɔlɔ waki la wodja a Nzambi lam’akawake lee! Apami wakembɛ Jehowa lembo la diando vɔate: ‘Jehowa ambodja otshumba. Nde ambotambiya ambahemi a ponda la ponda yawɔ tshɛ lo ndjale.’ Kadiyɛnde la Mɔsɛ le Miriamɛ akɔsɛ saka diande ko amato tshɛ wakôyele l’asaka awɔ. Ɔsɔku mbakawanɔ l’ɔngɛnɔngɛnɔ, wakembe nkembo mɔtshi kâmɛ l’apami lakawembe vɔate: ‘Jehowa ambodja otshumba. Nde ambotambiya ambahemi wa ponda la ponda yawɔ lo ndjale.’