ƆKƆNDƆ 43

Jashua aya ɔnɔmbɔdi

MƆSƐ akalange mbɔtɔ la Ase Isariyɛlɛ lo Kanana. Omalɔkɔ mbakandalɔmbɛ ate: ‘Jehowa le, otshike tehɔ Ɔkɛdi wa Jɔrɔdana kele tɛnyi kɛtɛ ka dimɛna kɛsɔ.’ Koko Jehowa akawotɛ ate: ‘Ambokoka! Todimolake dikambo sɔ nto!’ Wɛ mbeyaka lande na akate Jehowa ɔsɔku?

Nɛ dia dikambo diakatombe etena kakakɔmɔla Mɔsɛ danga lo dive. Ohɔ dia, nde l’Arɔna kɔnɛmiya Jehowa. Vɔ kombutɛ anto ɔnɛ Jehowa mbakatondjaka ashi oma lo dive. L’ɔkɔkɔ ɔsɔ mbakatone Jehowa mbatshika dia vɔ mbɔtɔ lo Kanana.

Omalɔkɔ, ngɔndɔ mɔtshi l’ɔkɔngɔ a nyɔi k’Arɔna, Jehowa akatɛ Mɔsɛ ate: ‘Ɔsa Jashua kele emadjande la ntondo ka ɔlɔmbɛdi Eleazara ndo la ntondo ka wodja. Kele tɛkɛta la ntondo k’anto tshɛ ɔnɛ Jashua kaya ɔnɔmbɔdi w’oyoyo.’ Mɔsɛ akasale woho wakawotɛ Jehowa, oko wɛnayɛ l’osato.

Ko Jehowa akatɛ Jashua ate: ‘Yâla la dihonga ndo tokake wɔma. Wɛ kayɔlɔmbɔla Ase Isariyɛlɛ tshalo kɛtɛ ya Kanana yakamâlake, ndo layonga layɛ.’

L’ɔkɔngɔ diko, Jehowa akatɛ Mɔsɛ dia nde mbudɛ ka shɔdi ya Dikona dia Nebo lo kɛtɛ ya Mɔaba. Kɛkɔ mbakende Mɔsɛ la wedi wa Jɔrɔdana ko nde akɛnyi kɛtɛ ka dimɛna efula ka Kanana. Jehowa akawotɛ ate: ‘Kɛtɛ kakamalake ana wa Abarahama, w’Isaka la wa Jakɔbɔ dia mbasha tɔ kengo. Dimi lambokokɛnyatɔ koko hatokɔtshiya lɔkɔ.’

Ko Mɔsɛ akavu kɛkɔ ka shɔdi ya Dikona dia Nebo. Nde aki l’ɛnɔnyi 120. Nde aki la wolo ndo asho ande wakɛnaka dimɛna. Anto wakanyangi ndo wakalele efula nɛ dia Mɔsɛ ambovɔ. Koko vɔ wakangɛnangɛna dia kondja Jashua oko ɔnɔmbɔdi awɔ w’oyoyo.

Walelu 27:​12-23; Euhwelu k’Elembe 3:​23-29; 31:​1-8, 14-23; 32:​45-52; 34:​1-12.