ƆKƆNDƆ 38
Atɔpi 12
ENDA elowa engo wɛmbi apami ango. Ohenda woho wele esangi k’elowa wa vinyɔ kengo woke. Paka apami ahende ko mɛmba l’osembe. Enda ndo elowa a fingo la w’amandɛ. Oma lende oye elowa w’amɛna ɛnɛ na? Toko ma lo kɛtɛ ya Kanana. Ohɔ dia la Kanana mbakadjasɛka Abarahama, Isaka la Jakɔbɔ. Jakɔbɔ akayonɔka la nkumbo kande l’Edjibito dikambo dia ndjala. L’ɔkɔngɔ w’ɛnɔnyi oko 216 mbakayɔlɔmbɔlaka Mɔsɛ Ase Isariyɛlɛ oya la Kanana. Vɔ wambokoma lo dihole diakawelɛka Kadɛshɛ.
Ase Kanana waki anto wa kɔlɔ efula. Omalɔkɔ, Mɔsɛ akasɔnɛ atɔpi 12 ndo akâtome ate: ‘Nyotoshihodia kana anto wa lɛkɔ wekɔ efula, ndo kana wekɔ weolo. Nyoshihodia kana kɛtɛ kakɔ kekɔ ɛtɛtɔ. Ndo tanyohɛke mbela elowa ɛmɔtshi w’oma lɛkɔ.’
Lam’akakalola atɔpi la Kadɛshɛ, vɔ wakatɛ Mɔsɛ vate: ‘Ekɔ mɛtɛ kɛtɛ ka dimɛna.’ Dia mɛnya mɛtɛ ka dikambo diakɔ, vɔ wakɛnya Mɔsɛ elowa ɛmɔtshi. Koko atɔpi dikumi akina wakate vate: ‘Anto wodjashi lɛkɔ wekɔ akongote ndo weolo wa mamba. Tayotovɔ lɛkɔ ovɔvɔ naka sho pemba dia mbɔsa kɛtɛ.’
Ase Isariyɛlɛ wakandama la wɔma kam’akawoke ngasɔ. Vɔ wakate vate: ‘Akaleke ɔlɔlɔ sho mvɔ l’Edjibito kana lanɛ l’oswe wa shɛnga. Tayotovɔ sho tshɛ lo ta, ko wadiɛso l’anaso wayotondama. Nyoye tɔsɔnɛ ɔnɔmbɔdi okina lo dihole dia Mɔsɛ kele tokalole otsha l’Edjibito!’
Koko atɔpi akina ahende wakɛkamaka Jehowa ndo wakahembe nɛmbɔhaya anto. Jashua la Kalɛba mbaki nkombo yawɔ. Vɔ wakawatɛ vate: ‘Tanyokake wɔma. Jehowa ekɔ laso. Hatonga wolo dia sho mbɔsa kɛtɛ.’ Koko anto kombaetawɔ kânga yema. Vɔ wakalange ndo mbadiaka.
Dikambo sɔ diakomadia Jehowa heyama, ko nde akatɛ Mɔsɛ ate: ‘Ndoko onto ɔtɔi lambokotsha ɛnɔnyi 20 kana ndekana layɔ̂tɔ lo kɛtɛ ya Kanana. Vɔ wakɛnyi ahindo wakamasale l’Edjibito ndo l’oswe wa shɛnga, koko vɔ wekɔ lo tona dia mbɛkamami. Omalɔkɔ, vɔ wayekekɔ l’oswe wa shɛnga ɛnɔnyi 40 w’etondo edja ndo anto asɔ tshɛ mvɔ. Onyake Jashua la Kalɛba mbayɔ̂tɔ lo kɛtɛ ya Kanana.’