Jehowa ambɔsɔna Jashua

L’ɔkɔngɔ wa nde nɔmbɔla wodja w’Isariyɛlɛ ɛnɔnyi efula, Mɔsɛ aki suke l’ekomelo ka lɔsɛnɔ lande. Jehowa akawotɛ ate: ‘Aha wɛ mbayɔtshiya ase Isariyɛlɛ lo nkɛtɛ ya Daka. Koko, dimi layokɛnya nkɛtɛ yakɔ.’ Ko Mɔsɛ akalɔmbɛ Jehowa dia nde nsɔna ɔnɔmbɔdi okina dia kokɛka wodja ande. Jehowa akawotɛ ate: ‘Tshɔka le Jashua ndo towote dia nde kamomɔsɔna.’

Mɔsɛ akatɛ ase Isariyɛlɛ dia kem’edja nde ayanga mvɔ ndo Jehowa ambɔsɔna Jashua dia mbalɔmbɔla otsha lo nkɛtɛ ya Daka. Mɔsɛ akatɛ Jashua ate: ‘Tokake wɔma. Jehowa ayokokimanyiya.’ Yema l’ɔkɔngɔ wa laasɔ, Mɔsɛ akadɛ lo shɔdi ya dikona dia Nɛbo lɛnɛ akawɛnya Jehowa nkɛtɛ yakandalake Abrahama, Isaka ndo Jakɔbɔ. Mɔsɛ aki l’ɛnɔnyi 120 etena kakandavu.

Jehowa akatɛ Jashua ɔnɛ: ‘Tehɔ Ɔkɛdi wa Jɔrdana, kele ɔtɔ lo nkɛtɛ ya Kanana. Dimi layokokimanyiya woho wakamakimanyiya Mɔsɛ. Yashikikɛ dia mbadiaka Ɛlɛmbɛ ami lushi tshɛ. Tokake wɔma. Onga la dihonga. Tshɔka ndo nsala kɛnɛ kakodjangɛmi dia wɛ nsala.’

Jashua akatome atɔpi ahende l’osomba wa Jeriko. L’ɔkɔndɔ wayela, tayeka akambo efula lo kɛnɛ kakataakomɛ lɛkɔ. Etena kakawakalola, vɔ wakayota dia ɔsɔ aki etena ka dimɛna ka vɔ ntshɔ la Kanana. Lushi lakayele, Jashua akatɛ wodja w’Isariyɛlɛ dia vɔ nɔnga diangɔ dia monɛɛ. Oma laasɔ, nde akatɛ ɛlɔmbɛdi wakatɛmbaka Ɔshɛtɛ wa sheke dia vɔ mbeta ntondo l’Ɔkɛdi wa Jɔrdana. Ashi waki l’elola. Koko, kam’akakamɛ ekolo w’ɛlɔmbɛdi ashi, ashi wakatshike nkɛla ndo wakemala! Ɛlɔmbɛdi wakakɛndakɛnda l’atei ndo wakemala etena kakatehɔka wodja w’Isariyɛlɛ otsha lo wedi okina. Shi dihindo sɔ diakawaohola kɛnɛ kakasale Jehowa lo Ndjale ka Beela?

L’ekomelo, l’ɔkɔngɔ w’ɛnɔnyi ɛsɔ tshɛ, ase Isariyɛlɛ wakayɔtɔka lo nkɛtɛ ya Daka. Vɔ wakakoke mbika mvudu ndo esomba. Vɔ wakakoke nkamba dikambɔ, dikambɔ dia vinyɔ ndo dikambɔ di’elowa ekina. Yɔ yaki nkɛtɛ yakɛlanɛ abɛlɛ l’osanga.