ƆKƆNDƆ 45
Otehwelo w’ɔkɛdi wa Jɔrɔdana
ENDA! Ase Isariyɛlɛ wotatehɔ Ɔkɛdi wa Jɔrɔdana! Ko lende ele ashi na? Nɛ dia l’eleko kɛsɔ ka l’ɔnɔnyi mvula ndɔka efula, ambeta paka taahe tɔmɔtshi ta wenya toto lam’aki ɔkɛdi elola tɔ. Ko kakianɛ ashi tshɛ wambôma! Ko Ase Isariyɛlɛ wotatehɔ lo lɔkɔngɔ la wûmu oko akawatehɔ Ndjale ka Beela! Lende ambotshɔ ashi anɛ tshɛ na? Tênde dikambo diakɔ.
Lam’akakoke etena ka Ase Isariyɛlɛ tehɔ Ɔkɛdi wa Jɔrɔdana, Jashua akatɛ anto oko akawotɛ Jehowa ate: ‘Ɛlɔmbɛdi wɔsɛ ɔshɛtɛ wa sheke kele watshu la ntondo kaso. Etena kayowɔtshiya ekolo awɔ l’ashi w’Ɔkɛdi wa Jɔrɔdana, ashi hawotɔkɛla nto.’
Ɔnkɔnɛ ɛlɔmbɛdi wakɛmbɛ ɔshɛtɛ wa sheke ndo wakete la ntondo k’anto. Lam’akawakome l’omamu wa Jɔrɔdana, ɛlɔmbɛdi wakɔtɔ l’ashi aha la kandakanda. Ɔkɛdi wakakɛlaka la pedu k’efula ndo waki dingunda dia mamba. Koko kam’akatambiya ɛlɔmbɛdi ekolo awɔ l’ashi, ashi wakatatɛ kɔka! Ɔsɔ aki dihindo! Jehowa akemadja asuku odikodiko. Ko kem’edja ɔkɛdi wakôme!
Ɛlɔmbɛdi wakatɛmbaka ɔshɛtɛ wa sheke wakemala l’atei atei w’ɔkɛdi wa wûmu. Wɛ hawawɛnyi l’osato? Vɔ wakemala lango ki, ko Ase Isariyɛlɛ tshɛ wakatehɔka ɔkɛdi wa Jɔrɔdana lo kɛtɛ y’ofumbo!
Etena kakashile anto tshɛ la tehɔ, Jehowa akatɛ Jashua dia mbutɛ apami dikumi l’ahende wa weolo ɔnɛ: ‘Nyutshu l’ɔkɛdi lo dihole diemadi ɛlɔmbɛdi wɛmbi ɔshɛtɛ wa sheke. Nyɛmbɛ ave dikumi l’ahende oma lâwɔ kele kanyotowaemɛ olui lo dihole diayonyotolala. Lo nshi yayaye, lam’ayonyombola ananyu kitshimudi y’ave akɔ, kanyowate nyate: ashi wakatshike kɛla etena kakatatehɔka ɔshɛtɛ wa sheke waki Jehowa Jɔrɔdana. Ave wayonyoholaka dihindo nɛ!’ Jashua akemadja nto ave dikumi l’ahende lo dihole diakemala ɛlɔmbɛdi l’atei w’ɔkɛdi.
L’ɔkɔngɔ diko, Jashua akatɛ ɛlɔmbɛdi wakɛmbɛ ɔshɛtɛ wa sheke ate: ‘Nyotombe oma lo Jɔrɔdana.’ Ko kam’akawatombe, ɔkɛdi wakatatɛ la kɛla nto.