Totombole Nzambi l’Ɔngɛnɔngɛnɔ w’Efula lo Sanganya ya Weke
Mako etatelo k’ɛnɔnyi 1880, Ambeki wa Bible wakakane yimba ɔnɛ lâdiko dia sanganya ya lo ngelo yawɔ, ayonga ɔlɔlɔ le wɔ dia vɔ mbeyana ndo l’anyawɔ ambetawudi wa lo tenyi dia kɛtɛ dikina. Omalɔkɔ, vɔ wakatatɛ nɔngɔsɔla sanganya ya weke y’ɔnɔnyi tshɛ y’Ambeki wa Bible ntondo lo Etats-Unis, ko l’ɔkɔngɔ diko lo Canada. Ɔsɔ aki tena di’eketshelo ka lo nyuma; lɛnɛ akawalongolaka wetshelo w’oma lo Bible w’efula edja ka nshi efula ndo kakawakeketshanyaka onto la onyande l’ɔngɛnɔngɛnɔ efula. Batismu k’ambetawudi w’eyoyo kaki djembi mɔtshi ya dikambo lo sanganya shɔ ya weke. Sanganya yakɔ ya weke yakakimanyiyaka nto dia sambisha anto efula.—Romo 1:11, 12.
Ɛlɔ kɛnɛ, Ɛmɛnyi wa Jehowa mbɔtɔka sanganya ya weke l’ɔngɛnɔngɛnɔ efula esangɔ l’esangɔ. Oko atodiongaka, otshimbedi kengamaka la tshumanelo l’asa 18 la 25, diɔ diatembwamaka ndo diatokimanyiyamaka oma le omendji w’eteta. Mbala hiende l’ɔnɔnyi, sanganya ya weke tɔlɔngɔswamaka lushi la samalo ndo (kana) la lomingu, yɔ sanganyaka tshumanelo dia l’otshimbedi ɔmɔtshi kana dia lo etenyi katɔ kɛmɔtshi.
Mbala ɔtɔi l’ɔnɔnyi, sanganya yoleki weke, yasalema l’edja ka nshi shato kana nyɛi ndo y’elɛwɔ sanganya ya distrikɛ, nɔngɔswamaka lo wodja tshɛ, lo sanganya yakɔ nunu la nunu di’anto tshumanaka lo dihole diâmɛ. Sanganya shɔ keketshaka Ɛmɛnyi wa Jehowa lo nyuma ndo anto akina wayasha l’elimu awɔ, yɔ yekɔ nto esambishelo ka lo sɛkɛ.
Ekongelo ka sanganya shɔ ya weke, nɔngɔswamaka oma le Olui Walɔmbɔla waki Ɛmɛnyi wa Jehowa, ndo tɔ nemanɛka l’ehomba waki ɛmɛnyi wa l’andja w’otondo. Tɔ kekɔ l’alako, l’ɛkɛtshanyelo, la diɛnyɛlɔ dia mɛtɛ, tenyi sɔ diotshikitanyi mbishamaka oma le emendji w’eteta ndo oma le Ɛmɛnyi wakoka wakasɔnwama oma lo tshumanelo. Anto efula tɔkɔndɔlaka woho watowoshidiyaka tɔfwɛfwɛ t’endana la nsɛna oko Okristo l’andja ɔnɛ wa mindo, kana tosanyaka di’etombelo w’ewɔ lo kondja l’olimu awɔ. Sanganya ya distrikɛ yekɔ nto la ɛnamelo kɛmɔtshi ka lânde—tɔkɛnyɔ ta wetshelo totumbi oma lo Bible kana tɔkɛnyɔ ta wetshelo t’endana la tena diaso nɛ, nɔngɔswamaka lo lɔyɛnga la tɔkɛnyɔ, ndo tɔ mɛnyaka woho watokomɛ Akristo ekakatanu wa l’etena kaso kɛnɛ.
Anto kondjaka ndo elelo ɛmɔtshi la diangɔ dimɔtshi diatutsha asolo. Dui sɔ mbakimanyiyaka, lo lɔngɛnyi lasawɔ, dia vɔ mbetsha tena di’ɛlɔlɔ l’ɔkɔngɔ kana la ntondo ka tenyi dia lo sanganya yakɔ. Tumu tshɛ yahombama dia nɔngɔsɔla sanganya shɔ salemaka oma le anto wayakimɔ la lolango wotumbi oma l’atei w’Ɛmɛnyi wa Jehowa. Falanga ya wâmbelo wa dihole dia sanganya l’akambo akina tomba oma lo weshasha wa la lolango. Soko diekɔ hwe ndo ndoko ɛkɔngɔ wakɔngwama lɛkɔ.
Wɛ kokaka kondja elakanyelo ɛmɔtshi oma l’etshumanelo k’Ɛmɛnyi wa Jehowa wa lo ngelo kanyu lo kɛnɛ k’endana la lushi ndo la dihole dia sanganya shɔ yakalɔngɔswama dia salema lo lɛtshi lanyu la kɛtɛ. Wɛ ayokondja ndo elakanyelo lo kɛnɛ k’endana la okongelo tshɛ wa lɔkɛndɔ layɛ otsha lɛkɔ ndo woho wahombayɛ totana mpango k’ɔlɔlɔ lɛkɔ.
Sanganya ya weke shɔ kimanyiyaka Ɛmɛnyi wa Jehowa dia vɔ mɛna aha paka etshumanelo ka lo ngelo kawɔ keto, koko ndo dia mboka nkumbo k’otondo k’anangɛso wa l’andja w’otondo ngandji.—1 Petero 2:17.
• Naa ɛlɔlɔ ɛmɔtshi wakakondja Ambeki wa Bible wa ntondo oma lo sanganya yawɔ ya weke na?
• Kɔndɔla ɔlɔngɔswamelo ndo ekongelo ka sanganya y’otshimbedi la ya distrikɛ.
[Esato wa lo lɛkɛ 18]
Kɛnyɔ ya wetshelo y’oma lo Bible lo losanganya la distrikɛ l’Etats-Unis
Losanganya la wedja efula, lo Pologne
Losanganya la wedja efula, lo Argentine
Losanganya l’otshimbedi, lo Japon
Atomami wasomba ekanda w’endana la Bible, la Suisse
Batismu lo losanganya la wedja efula, l’Afrique du Sud
Olowoelo w’okanda w’oyoyo, lo Canada
Atomami wa lo losanganya la woke wêmba, l’Espagne