Nsanganya ya weke yasalema ɔnɔnyi tshɛ​—Waaso wa mɛnyanya ngandji

Lande na kangɛnangɛnaso nsanganya yaso ya weke yasalema ɔnɔnyi tshɛ efula? L’ɛnyɛlɔ k’ase Isariyɛlɛ w’edjedja, nsanganya ya weke yasalaso nshi nyɛ toshaka mbala efula waaso wa ntɛmɔla Jehowa kaamɛ la nkama ndo kaanga nunu di’asekaso ambetawudi. Sho ngɛnangɛnaka awui tshɛ watotetshamaka lɛkɔ watokimanyiya dia sho ntetemala mongaka suke suke la Jehowa. Sho mbɔsaka nto wenya wetshaso l’angɛnyi ndo nkumbo yaso la nɛmɔ di’efula. Lowando l’efula lele la so totshutshuyaka dia sho mbɔtɔ lo nshi yakɔ shato ya losanganya la woke lɔsɔ.

Etena kongaso la diaaso dia nsangana kaamɛ, sho pombaka nkanyiya aha tsho la kɛnɛ kakokaso nkondja onto l’onto, koko ndo woho wakokaso mɛnya ndo anto akina ngandji. (Nga 6:10; Hɛb 10:24, 25) Etena kadiholɛso ɔnangɛso kana kadiyɛso lokuke kana kotshikɛso dihole diakatombi dia nde mbidjasɛ, sho mɛnyaka dia tekɔ lo mbetsha wahɔ w’anto akina lo dihole dia ntondo. (Flp 2:3, 4) Nsanganya ya weke toshaka waaso w’amɛna efula dia nkondja angɛnyi w’eyoyo. La ntondo kana l’ɔkɔngɔ wa losanganya ndo lo wonya wa ndɛ yangɔ ya ndɛ ya la midi, sho koka ndjadjɛ oyango wa nsawola l’onto ɔmɔtshi lahateye. (2Kɔ 6:13) Lɔngɛnyi lakondjaso lo waaso asɔ koka ntshikala pondjo! Laadiko a laasɔ, etena kɛna anto akina woho wɛnyanyaso ngandji ka mɛtɛ l’etsha, vɔ mbeyaka ndjɔsa yɛdikɔ ya nkambɛ Jehowa kaamɛ la so.​—Jni 13:35.

NYENDE VIDƐO YELE L’ƆTƐ A DUI ƆNƐ: NSANGANYA YA WEDJA EFULA​—“NGANDJI HAKOMƐ PONDJO”! NDO OMA LAASƆ, NYOKADIMOLE LO AMBOLA WAYELA ANƐ:

• 

  Ngande wakawɛnya waa delenge wakatshu dia tɔtɔ lo nsanganya ya wedja efula yakasalema lo 2019 ngandji?

• 

  Lande na kele kaamɛ ndo ngandji ka lam’asa ekambi wa Jehowa ekɔ dui dia diambo?

• 

  Awui akɔna wendana la ngandji k’Okristo wakaleke ntɔtɔmiya ase Olui-walɔmbɔla?

• 

  Ngande wakadje ngandji k’Okristo otshumba lo wodja wa Allemagne ndo lo wodja wa Corée du Sud?

• Kakɔna kahombaso ndjashikikɛ?