Wambɔhɛnyahɛnyama l’ɔtɛ wa Losembwe Lawɔ
Angɛnyi amɔtshi kana ambutshi kokaka kotɛ ɔnɛ Ɛmɛnyi wa Jehowa wekɔ l’okakatanu vɔ la lɛɛta, ɔnɛ vɔ wamboshimbama lo wedja ɛmɔtshi kana ɔnɛ vɔ kema anto a nombe. Lande na katɛkɛtawɔ kɔlɔ lo lokombo lawɔ na?
Mɛtɛ ah’ɔnɛ nɛ dia Ɛmɛnyi wekɔ lo mɔnyɔla ɛlɛmbɛ, koko nɛ dia vɔ wekɔ lo tayele wanya wa Yeso. Yeso akatɛ ambeki ande di’ɔnɛ anto wayowatɛnga, wayowahɛnyahɛnya ndo wayota akambo tshɛ wa kɔlɔ wa kashi lo lokombo lawɔ. Ɔkɔkɔ wa dikambo diakɔ v’ɔnɛ: Satana, otunyi a woke wa Jehowa, kele nzambi k’andj’ɔnɛ ndo nde nyangaka dia mingola anto oma l’olimu wa Nzambi. —Mateu 5:10-12; 10:16-22, 34-39; 24:9, 10; Joani 15:17–16:3; 2 Timote 3:12; 1 Petero 5:8; Enyelo 12:17.
Lam’akawande apɔstɔlɔ dia mbatɔla la ntondo ka tuminadi, ah’ɔnɛ nɛ dia vɔ waki andjakanyi kana waki l’onongo ɔmɔtshi, kana waki anto wa ngala kana anto watɔmbɔsha wodja. Aki paka l’ɔtɛ w’ɔnɛ vɔ waki lo sambisha lokumu l’ɔlɔlɔ. Lam’akayamɛka ɔpɔstɔlɔ Paulo l’akambo asɔ la ntondo ka tuminadi ta lâdiko, nde akayangaka dia mamɛ̂ ndo dia keketsha lotshungɔ lele l’Akristo dia sambisha lokumu l’ɔlɔlɔ le lɛɛta.—Etsha 4:18-20; 5:28-32; Filipi 1:7.
Ɛlɔ kɛnɛ, Ɛmɛnyi wa Jehowa wekɔ Akristo wakitanyiya ɛlɛmbɛ, futaka elambo ndo nɛmiyaka emboledi. Vɔ mbishaka Kayisa diangɔ dia Kayisa ndo Nzambi diangɔ dia Nzambi. Naka wekɔ l’okakatanu vɔ la lɛɛta lɔmɔtshi, kete nɛ dia lɛɛta lakɔ tonaka dia mbetawɔ olimu awɔ w’esambishelo kana l’ɔtɛ wa lomangemange lawɔ l’akambo wa wedja. Lo tena dia ngasɔ, Ɛmɛnyi wa Jehowa pombaka monga la dionga diâmɛ diaki l’apɔstɔlɔ wakate vɔate: “Dieli la su dia nkitanyia aui wa Unyashungu, aha w’antu atu.”—Etsha 5:29; Mako 12:17; Joani 18:36; Tito 3:1, 2.
Ɛmɛnyi wa Jehowa hawone ɔhɛnyɔhɛnyɔ, koko vɔ ndeka nanga nsɛna la lɔsɛnɔ la lotui tshitshi ndo la wɔladi. Koko, naka vɔ wambɔhɛnyahɛnyama l’ɔtɛ wa wamboyela ɛlɛmbɛ wa Nzambi la ɛnyɛlɔ ka Yeso Kristo, vɔ tokikɛka l’ɔngɛnɔngɛnɔ.—Mateu 5:10-12; Etsha 5:40, 41; 1 Koreto 4:12; 1 Timote 2:2; 1 Petero 3:14, 15; 4:12-16.
• Lande na katɛngama Ɛmɛnyi wa Jehowa ndo kahɛnyahɛnyamawɔ na?
• Lande na Ɛmɛnyi wa Jehowa tôngaka l’okakatanu l’emboledi, oko wâki apɔstɔlɔ wa Kristo na?
• Woho akɔna wɔsa ekambi wa Jehowa ɔhɛnyɔhɛnyɔ na?
[Esato wa lo lɛkɛ 29]
Yeso akatɔlama la ntondo ka Pilato ndo ɔpɔstɔlɔ Paulu akadjama lo lokanu l’ɔtɛ wa esambishelo ka Diolelo dia Nzambi