Tshapita 13

Tɔ̂shi wetshelo oma l’ehemba wa Yeso

KEM’EDJA l’ɔkɔngɔ wa nde batizama, nyuma ka Nzambi kambɔlɔmbɔla otsha l’oswe wa Judeya. Nde ekɔ l’akambo efula wahombande kanyiya nɛ dia lo batismu kande, “ulungu akadihwama,” ko nde akakoke shihodia akambo wa l’olongo. Mɛtɛ, nde ekɔ l’akambo efula wahombande kanyiya!

Yeso ambetsha nshi 40 l’etsho 40 l’oswe aha la nde ndɛ ndoko yangɔ. L’ɔkɔngɔ diko, l’etena kôka Yeso ndjala k’efula, Diabolo amboya dia ndjôhemba, awotɛ ate: “Naka on’a [Nzambi, NW] keye, uteli ave ane wahilo kenga dia ma.” Koko Yeso mbeyaka ate ekɔ kɔlɔ di’onto kamba la wolo ande wa sala ahindo dia nde ndjangɛnyangɛnya. Ɔnkɔnɛ, nde ambohika tanga la ntondo k’ohemba ɔsɔ.

Koko Diabolo hahekɔ. Nde ambohemba yoho kina. Nde ambodja Yeso tɔfwɛfwɛ dia nde fumbɔ oma lâdiko di’ehele ka tɛmpɛlɔ oya la nkɛtɛ ɔnɛ kele andjelo wa Nzambi wayowokimanyiya. Koko Yeso hakwɛ l’ohemba ɔsɔ wa sala ahindo osalasala dia nde ndjaɛnya. Oma l’ekimanyielo k’Afundelo, Yeso ambɛnya ɔnɛ ekɔ kɔlɔ dia mbidja Nzambi l’ohemba lo yoho ya ngasɔ.

L’ohemba wa sato, Diabolo ambɛnya Yeso waolelo tshɛ wa l’andja lo yoho mɔtshi ya lo dihindo ko ambowotɛ ate: “Dimi layukushawo, vo tshe, naka we ayunkhusamela [ndo salɛmi tshelo mɔtshi y’ɔtɛmwɛlɔ, NW].” Koko, ndo mbala kɛsɔ nto, Yeso ambotona dia nkɔ l’ohemba wa ntsha kɔlɔ, nde ambɔsɔna dia tshikala la kɔlamelo le Nzambi.

Sho kokaka mbɔsa wetshelo oma l’ehemba ɛsɔ wa Yeso. Oko ɛnyɛlɔ, vɔ tɛnyaka ɔnɛ: Diabolo kema lokanyi la kɔlɔ lele l’etema w’anto oko wata anto amɔtshi, koko nde ekɔ onto mɛtɛ lahɛnama. Ohemba ɔmɔtshi wa Yeso mɛnyaka nto ɔnɛ Satana mbakanga mandji ya l’andja ɔnɛ tshɛ. Naka aha nde mɛtɛ mbayikanga, woho akɔna wotondolaka Kristo dia mboshayɔ ko dikambo sɔ ndjâla tshondo y’ohemba le nde?

Ohokanyiya dikambo nɛ nto: Diabolo akate ɔnɛ otondoyala Yeso akasale tshelo tshɔi y’ɔtɛmwɛlɔ, tshike nde otowosha difuto, otowosha ndo waolelo tshɛ wa l’andja. Diabolo kokaka tohemba lo yoho ya ngasɔ, ondo lam’ayondotosha diaaso dimɔtshi diɛnama ɔlɔlɔ lo asho dia sho kondja ɔngɔnyi, lowandji kana dihole dimɔtshi dia lokumu. Koko, naka sho ndjâla la lomba ko mbokoya ɛnyɛlɔ ka Yeso, kete tayotshikala la kɔlamelo le Nzambi oyadi la ntondo k’ohemba a woho akɔna tshɛ! Mateu 3:16; 4:1-11; Mako 1:12, 13; Luka 4:1-13.

▪ Akambo akɔna ondo wakanyiya Yeso l’edja ka nshi 40 yênde l’oswe?

▪ Woho akɔna wambohemba Diabolo Yeso?

▪ Wetshelo akɔna wakokaso mbɔsa oma l’ehemba wa Yeso?