‘Tɔlɔshane la Diabolo’ oko wakasale Yeso
“Nyosemaneli [la Diabolo], ku ndi ayunyulawo.”—JAK. 4:7.
1. Yeso akeyaka dia nde ayohomana la ɔlɔshamelo akɔna la nkɛtɛ, ndo etombelo akɔna wakayala?
YESO KRISTO akeyaka dia Diabolo ayowɔlɔsha. Dikambo sɔ diakɛnama hwe oma lo kɛnɛ kakatɛ Nzambi etongami ka lo nyuma kakatɔmbɔkɔ kakatɛkɛtaka lo tshimbo y’olui ate: ‘Dimi layodja lohetsho lam’asayɛ la womoto [etenyi ka l’olongo k’okongamelo waki Jehowa], ndo lam’asa tokanula tayɛ la tokanula tande. Nde [Yeso Kristo] ayokɔkɔmɔla l’ɔtɛ, ko wɛ ayowolumata lo etshindji.’ (Etat. 3:14, 15; Eny. 12:9) Olumatelo wa Yeso l’etshindji akalembetshiyaka dia nde akahombe sowa lo tshanda mɔtshi tsho etena kakandadiakema la nkɛtɛ, nɛ dia Jehowa akahombe mbolola. Koko, ɔkɔmwɛlɔ w’olui l’ɔtɛ nembetshiyaka dia Diabolo akahombe ndjakema nyɔi kahandolɔki pondjo.—Adia Etsha 2:31, 32; Heberu 2:14.
2. Lande na kaki Jehowa l’eshikikelo dia Yeso akahombe mbidja Diabolo otshumba?
2 Jehowa aki l’eshikikelo dia Yeso akahombe kotsha dimɛna ɔkɛndɛ wakandawosha ndo ndɔshana la Diabolo etena kakinde la nkɛtɛ. Lande na kakakoke Jehowa monga l’eshikikelo ka ngasɔ? Nɛ dia nde akatonge Yeso ambeta deko aha nɛ, nde akɔsɛdingolaka ndo akeyaka dia “ukambi a komba” ɔsɔ ndo “enundu a diango tshe diakatungama” aki l’okitanyiya ndo la kɔlamelo. (Tuk. 8:22-31; Kol. 1:15) Ɔnkɔnɛ, etena kakatomama Yeso lanɛ la nkɛtɛ ndo kaketawɔ Nzambi dia Diabolo mbohemba polo lo nyɔi, Jehowa aki l’eshikikelo dia Ɔnande ɛtɔi lakandote akahombe mbidja otshumba.—Joa. 3:16.
Jehowa kokɛka ekambi Ande
3. Dionga diakɔna diele la Diabolo otsha le ekambi waki Jehowa?
3 Yeso akelɛ Diabolo “umbuledi a kete nye” ndo akewola ambeki Ande dia vɔ wayɔhɛnyahɛnyama oko wakandahɛnyahɛnyama. (Joa. 12:31; 15:20) Andja walɔmbwama oma le Satana Diabolo mpetshaka Akristo wa mɛtɛ nɛ dia vɔ wekɔ lo kambɛ Jehowa ndo wekɔ esambisha w’akambo w’ɛlɔlɔ. (Mat. 24:9; 1 Joa. 5:19) Diabolo ndekaka sɔma atshikadi w’akitami wayotolɛ kâmɛ la Kristo lo Diolelo dia l’olongo. Satana sɔmaka nto Ɛmɛnyi waki Jehowa efula wele l’elongamelo ka nsɛna pondjo pondjo lo paradiso ka la nkɛtɛ. Ɔtɛkɛta wa Nzambi tewolaka ɔnɛ: “Utunyi anyu uhimbanyi atokendakendaka uku tambwe kadikita kayanga walendi.”—1 Pet. 5:8.
4. Kakɔna kɛnya di’ekambi waki Nzambi wekɔ lo tondoya dia ndɔshana la Diabolo lo nshi yaso nyɛ?
4 Oko weso okongamelo wakondja osukɔ oma le Jehowa Nzambi, sho tondoyaka dia ndɔshana la Diabolo. Tɔsɛdingole bɛnyɛlɔ nɛ: Lo ɛnɔnyi 100 wetshi, ewandji ɛmɔtshi wa ngala efula wa lo ɔkɔndɔ w’anto wakahembe dia shila Ɛmɛnyi Jehowa oshiki. Koko, lofulo l’Ɛmɛnyi wa Jehowa lekɔ lo tatetemala pama ndo kakianɛ laya anto suke la 7 000 000 lo tshumanelo ndekana 100 000 dia lo andja w’otondo. Ewandji wa ngala efula wakahɛnyahɛnyaka ekambi waki Jehowa mbamboshila oshiki!
5. Ngande wakotshama Isaya 54:17 lo dikambo di’ekambi waki Jehowa?
5 Nzambi akalake etshumanelo k’Isariyɛlɛ w’edjedja kaki oko ‘womoto’ Ande ate: ‘Ehomɔ tshɛ ka ta kayotshulama dia kɔlɔsha hatotondoya, ndo lolemi tshɛ layɔtɛkɛta kɔlɔ lo dikambo diayɛ lo kilombo, wɛ ayolianya. Ɔsɔ ele sango dia ekambi waki Jehowa, ndo losembwe lawɔ ndja oma le mi.’ (Is. 54:11, 17) Daka sɔ diekɔ lo kotshama lo dikambo di’ekambi waki Jehowa wa la nkɛtɛ k’otondo wasɛna “lu nshi y’ekumelu” nyɛ. (2 Tim. 3:1-5, 13) Tekɔ lo tetemala ndɔshana la Diabolo ndo ndoko ehomɔ ka ta kakamba la Satana dia shila ekambi waki Nzambi oshiki katondoya, nɛ dia Jehowa ekɔ lo wedi aso.—Osam. 118:6, 7.
6. Kakɔna katotɛ prɔfɛsiya ka Danyɛlɛ lo dikambo dia nshi yayaye ya ɛlɔmbwɛlɔ kaki Diabolo?
6 Oko wayasukana ekomelo ka dikongɛ di’akambo dia kɔlɔ nɛ esadi esadi, Satana l’anto ande tshɛ wayolanyema lo pondjo. L’ekimanyielo ka nyuma kaki Nzambi, ɔprɔfɛta Danyɛlɛ akate ate: “Lu nshi ya khumi ya dikanga yako [yele nshi nyɛ], [Nzambi] leli l’ulungu ayutundja diulelu [dia l’olongo] diahalanaki pundju. Dio hadiuyala l’okongo a wudja ukina. Dio diayulanya waulelu ako tshe [wele nshi nyɛ], diayâshila ushiki, ku dio diame diayushikikala pundju.” (Dan. 2:44) Etena kayosalema dikambo sɔ, ɛlɔmbwɛlɔ kaki Satana ndo k’anto wele bu kokele kayokomɛ. Akambo tshɛ wa lo dikongɛ di’akambo diaki Diabolo wayolanyema lo pondjo ndo Diolelo diaki Nzambi to mbayolɛ nkɛtɛ k’otondo.—Adia 2 Petero 3:7, 13.
7. Ngande weyaso dia ekambi waki Jehowa kokaka tondoya dia ndɔshana la Diabolo?
7 Aha la tâmu, okongamelo waki Jehowa wayoshimbamɛ ndo wayotetemala pama lo nyuma. (Adia Osambu 125:1, 2.) Kayotota dikambo diaso? Bible totɛka dia sho kokaka tondoya dia ndɔshana la Diabolo oko wakasale Yeso. Lo mɛtɛ, prɔfɛsiya kakasha Kristo ɔpɔstɔlɔ Joani mɛnyaka dia kânga mbatɔlɔsha Satana, “ului a wuki” w’anto wele l’elongamelo ka nsɛna la nkɛtɛ wayoka lo ekomelo ka dikongɛ nɛ di’akambo. Lo ndjela Afundelo, vɔ mbutaka la dui dia wolo ɔnɛ: “Panda keko ka [Nzambi k]asu latudjaseka lu kiti ka diulelu ndu ka Ona-Okoko [Yeso Kristo]!” (Eny. 7:9-14) Bible mbutaka dikambo dia akitami oko wanɛ wadja Satana otshumba ndo lo dikambo di’asekawɔ “ekoko ekina” ɔnɛ wekɔ lo tondoya vɔ lawɔ dia ndɔshana la Satana. (Joa. 10:16; Eny. 12:10, 11) Koko dia tondoya dia ndɔshana la Satana pombaka mbidja welo efula ndo nɔmbaka la etete dia ‘tshungɔ oma le kanga kɔlɔ.’—Mat. 6:13.
Ɛnyɛlɔ ka kokele lo kɛnɛ kendana la ndɔshana la Diabolo
8. Naa ohemba wa ntondo wofundami wakahembe Diabolo Yeso l’oswe wa shɛnga, ndo ngande wakasale Kristo?
8 Diabolo akayange dia ndanya olowanyi waki Yeso. L’oswe wa shɛnga, Satana akahembe Yeso diaha nde monga l’okitanyiya le Jehowa. Koko, Yeso akatotshikɛ ɛnyɛlɔ ka kokele lo kɛnɛ kendana la ndɔshana la Satana. L’ɔkɔngɔ wa nde sala nshi 40 ndo etsho 40 aha la ndɛ, Yeso mɛtɛ aki la ndjala efula. Satana akate ate: “Naka On’a [Nzambi] keye, uteli ave ane wahilo kenga dia ma.” Koko, Yeso akatone dia kamba la wolo wakawosha Nzambi lo wahɔ ande hita. Yeso akate ate: “Untu hayala la lumu ne dia ma tu, keli ayuyala la lo ne dia aui tshe watumba uma l’unyo wa [Nzambi].”—Mat. 4:1-4; Euh. 8:3.
9. Lande na kahombaso shika tanga la ntondo ka woho wayanga Diabolo dia kamba la nsaki yaso ya demba?
9 Ɛlɔ kɛnɛ, Diabolo nyangaka dia kamba la nsaki ya demba y’ekambi waki Jehowa. Ɔnkɔnɛ, sho pombaka ndjashikikɛ dia shika tanga la ntondo ka ehemba wendana la nsaki ya kɔlɔ ya dieyanelo waleka tanema lo andja ɔnɛ wa kɔlɔ. Ɔtɛkɛta waki Nzambi mbutaka ɔnɛ: “Nyu Hanyeyi nyati: Antu wa kolo hawukiti diulelu dia [Nzambi]? Tanyuyandimbiyaki: atshi w’akambu wa sonyi, kuyanga atemodi wa dikishi, kuyanga amunanyi, kuyanga akanga a nende, kuyanga atshi w’akambu wa sonyi la apami, . . . hawukiti diulelu dia [Nzambi].” (1 Kor. 6:9, 10) Mbokɛmaka hwe lâsɔ dia anto wasala awui wa mindo ndo watona sala etshikitanu hawotetawɔma dia nsɛna lo andja w’oyoyo waki Nzambi.
10. Lo ndjela Mateu 4:5, 6, naa ohemba okina wakakambe la Satana dia ndanya olowanyi waki Yeso?
10 Lo kɛnɛ kendana la ohemba ɔmɔtshi wakahomana la Yeso l’oswe wa shɛnga, Afundelo mbutaka ɔnɛ: “Ku uhimbanyi akatshu la ndi lu ngelu k’ekila, akûkitsha l’ote w’etemwelo. Ndi akawutela ati: Naka On’a [Nzambi] keye, ulimbo uya la kete, ne dia akafundama ati: Ndi ayukosengwela andjelo andi, ku vo wayukemba lu anya awo, ne dia we âtukuhumanya dikaka lu dive.” (Mat. 4:5, 6) Ondo, Satana akalongamɛka dia Yeso mɛnya lo sɛkɛ woho wende Mɛsiya. Koko lo mɛtɛ, dui sɔ diotonga kɔlɔ ndo Nzambi totondowetawɔ ndo totondosukɛ. Mbala kɛsɔ nto, Yeso akalame olowanyi ande otsha le Jehowa ndo akakadimola lo shila divɛsa dimɔtshi. Nde akate ate: “Akafundama ntu ati: Tuhimbaki Khumadiondjo, [Nzambi k]aye.”—Mat. 4:7; Euh. 6:16.
11. Ngande wakoka Satana tohemba, ndo etombelo akɔna wakoka monga?
11 Satana mbeyaka tohemba lo toho totshikitanyi dia sho nyanga lotombo. Nde mbeyaka pemba dia totshutshuya dia sho mbokoya andja ɔnɛ lo kɛnɛ kendana la ɔlɔtɔ ndo la ɔlɔngɔswɛlɔ wa divo kana lo kɛnɛ kendana la weho ɛmɔtshi wa tɔkɛnyɔ tavɔ anto tshɔdia. Koko, naka sho minya yimba lo alako w’oma lo Bible ndo mbokoya andja ɔnɛ, onde sho kokaka nongamɛ dia andjelo tokokɛ oma l’etombelo wa kɔlɔ wakoka ndja oma lo yoho ya lɔsɛnɔ ya ngasɔ? Kânga mbakayatshumoya nkumekanga Davidi lo dikambo dia pɛkato kakandasale la Batɛ-Shɛba, nde kokokamɛ oma l’etombelo wa kɔlɔ w’etsha ande. (2 Sam. 12:9-12) Tatodjake Jehowa l’ohemba lo toho ta kɔlɔ, ondo lo monga la lɔngɛnyi la kɔlɔ la andja ɔnɛ.—Adia Jakoba 4:4; 1 Joani 2:15-17.
12. Ohemba akɔna wɔtɛkɛtami lo Mateu 4:8, 9, ndo kakɔna kakasale Ɔna Nzambi la ntondo k’ohemba akɔ?
12 Ohemba okina wakakambe la Diabolo l’oswe wa shɛnga akendanaka la mbisha Yeso lowandji la pɔlitikɛ. Satana akɛnya Yeso waolelo tshɛ wa l’andja la lotombo lawɔ ko nde akate ate: “Dimi layukushawo, vo tshe, naka we ayunkhusamela dia ntemolami.” (Mat. 4:8, 9) Ɔsɔ mɛtɛ aki oyango wa kɔlɔ wa tɛmɔma woho watɛmɔma Jehowa ndo wa konya Yeso dia nde shisha kɔlamelo yande le Nzambi! Lo kana yimba lo nsaki kaki la nde ka tɛmɔma, ondjelo waki ntondo la kɔlamelo ɔsɔ akayosalaka pɛkato l’ɔtɛ wakinde l’ɔkɔmiya ndo akakome Satana Diabolo ohembanyi. (Jak. 1:14, 15) Koko, otshikitanyi la nde, Yeso akayashikikɛ dia tshikala la kɔlamelo le She lele l’olongo ndo omalɔkɔ nde akate ate: “Satana, mo! Ne dia akafundama ati: Kotemolaki Khumadiondjo, [Nzambi k]aye, Kûkambelaki ndame ulimu.” Lo sala ngasɔ, Yeso akalɔshana nto la Diabolo lo ɛtɛkɛta wokɛma hwe. Ɔna Nzambi konangaka dia monga la losambi la andja waki Satana ndo nde hatɛmɔlaki kanga kɔlɔ ɔsɔ pondjo!—Mat. 4:10; Euh. 6:13; 10:20, sho mbɛnganyisha alɛta ango.
‘Tɔlɔshane la Diabolo, ko nde ayotolawɔ’
13, 14. a) Etena kakandɛnya Yeso waolelo tshɛ wa la andja, kakɔna kakalange Diabolo mbosha? b) Ngande wayanga Satana dia tokonya dia sala kɔlɔ?
13 Lo mɛnya Yeso waolelo tshɛ wa lo andja, Diabolo akawoshaka lowandji lele ndoko onto lambolikondjaka. Satana akalongamɛ dia Yeso ayɔngɛnangɛna kɛnɛ kakandɛnyi ndo ayetawɔ dia nde koma owandji wa pɔlitikɛ woleki wolo wa la nkɛtɛ. Ɛlɔ kɛnɛ, Diabolo hayotosha waolelo, koko nde pembaka dia kesa etema asɔ oma lo kɛnɛ kɛnaso, kokaso ndo kakanyiyaso.
14 Diabolo mbalɔmbɔla andja ɔnɛ. Ɔnkɔnɛ, nde mbalɔmbɔla tita sango. Omalɔkɔ, hatokoke mamba dia kɛnɛ tshɛ kɛnaso, kahokamɛso ndo kadiaso lo tita sango ndola l’awui wa mindo ndo wa ngala. Piblisite ya lo andja ɔnɛ pembaka dia nomialomia nsaki kaso ka somba diangɔ efula dieso bu l’ohomba adiɔ mɛtɛ. Lo ekimanyielo ka piblisite, Diabolo tetemalaka tohemba dia monga la nsaki ka lomombo la l’emunyi oma lo kɛnɛ kɛnaso, kokaso ndo kakanyiyaso. Koko etena katonaso dia mbadia, menda ndo mpokamɛ awui wahetawɔma l’Afundelo, sho mbutaka lo mɛtɛ ɔnɛ: “Satana, mo!” Lo sala ngasɔ, sho mbokoyaka Yeso lo tshikala nge ndo mbɔsaka yɛdikɔ ya tona andja wa mindo waki Satana. Woho weso bu la losambi la andja ɔnɛ waki Satana mɛnamaka nto lo woho wayaɛnyaso la dihonga tshɛ oko Ɛmɛnyi wa Jehowa ndo ambeki waki Kristo l’olimu, la kalasa, le asukanyi ndo le ase nkumbo yaso.—Adia Mako 8:38.
15. Lande na kele ndɔshana la Satana nembetshiyaka mambalɛka tena tshɛ?
15 L’ɔkɔngɔ wa Diabolo kita tatala etena kakandahembe Yeso mbala ka sato diaha nde monga l’olowanyi le Nzambi, “uhimbanyi akûtshiki.” (Mat. 4:11) Koko, Satana kotshika Yeso lo pondjo, nɛ dia sho mbadiaka ɔnɛ: “Lam’akashidiya uhimbanyi ehimba eso tshe [l’oswe wa shɛnga], ndi akatukûtshika, edja ndu lam’ayundutana etena ka mbuhimba ntu.” (Luka 4:13) Etena katondoyaso dia ndɔshana la Diabolo, sho pombaka mbisha Jehowa losaka. Koko, sho pombaka nto tetemala nyanga ekimanyielo kaki Nzambi, nɛ dia Diabolo ayokalola dia ndjotohemba lo etena kekina kele dimɛna le nde koko aha paka lo etena kalongamɛso ohemba. Lâsɔ, sho pombaka mambalɛka tena tshɛ, mongaka suke dia kambɛ Jehowa olimu w’ekila oyadi ehemba wakoka pomana la so.
16. Wolo akɔna watosha Jehowa, ndo lande na kahombaso nɔmba dia mbokondja?
16 Dia tokimanyiya lo welo wadjaso dia ndɔshana la Diabolo, sho pombaka nɔmba dia dikambo sɔ ko tayolongola wolo woleki tshɛ lo andja w’otondo, mbuta ate nyuma k’ekila kaki Nzambi. Vɔ wayotokimanyiya dia sho sala akambo wahatakoke sala la wolo aso hita. Yeso akashikikɛ ambeki ande dia vɔ koka kondja nyuma kaki Nzambi lo mbuta ate: “Naka nyu antu [wele kema kokele ndo wele lo yɛdikɔ mɔtshi anto] wa kolo mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba nyuma k’[ekila]?” (Luka 11:13) Nyɛsɔ totetemale nɔmba Jehowa dia nde tosha nyuma kande k’ekila. Wolo woleki tshɛ ɔsɔ wayotokimanyiya dia ndɔshana la Diabolo ndo dia mbidja otshumba. Lâdiko di’alɔmbɛlɔ wa l’etete ndo wa mbala la mbala, sho pombaka ndɔta nto dihomɔ tshɛ dia ta dia lo nyuma di’oma le Nzambi ‘dia sho tshikala nge la ntondo ka keso tshɛ ya Diabolo.’—Ef. 6:11-18.
17. Ɔngɛnɔngɛnɔ akɔna wakakimanyiya Yeso dia nde shika tanga la ntondo ka Diabolo?
17 Dui dikina nto diakakimanyiya Yeso dia nde ndɔshana la Diabolo ndo dui diakɔ kokaka tokimanyiya ndo sho lawɔ. Bible mbutaka ɔnɛ: “Nde akakekeca otema dya vɔ mbooyaka l’otamba w’aswi, aha la nde mbija yimba ɔnɛɛ lambovɔ wooho ɔnɛ wa nyɔi ka nsɔnyi, dikambo nde akeeyaka ɔngɛnɔngɛnɔ ɔnɛ wakawawoombɛɛ ko kankiyaanɛ nd’a nkana ambojaasɛ l’okudi wa [Nzambi] lo lonya l’omi.” (Heb. 12:2, Dyookaneelo dy’Oyooyo) Sho lawɔ koka monga l’ɔngɛnɔngɛnɔ wa woho akɔ wâmɛ lo sukɛ lowandji la Jehowa, lo tombola lokombo lande l’ekila ndo namaka elongamelo ka lɔsɛnɔ la pondjo la ntondo ka lɔsɛnɔ laso. Tayonga mɛtɛ l’ɔngɛnɔngɛnɔ w’efula etena kayonyɛma Satana nde l’anto ande tshɛ lo pondjo ndo ‘kayokita akanga wa memakana nkɛtɛ ndo kayowɔngɛnangɛnaka la ɛtshɔkɔ efula wa ki’! (Osam. 37:11) Ɔnkɔnɛ, totetemale ndɔshana la Diabolo oko wakasale Yeso.—Adia Jakoba 4:7, 8.
Ngande wayoyokadimola?
• Djembetelo yakɔna yɛnya dia Jehowa kokɛka ekambi Ande?
• Ngande wakatotshikɛ Yeso ɛnyɛlɔ lo kɛnɛ kendana la ndɔshana la Satana?
• Lo toho takɔna takokaso ndɔshana la Diabolo?
[Osato wa lo lɛkɛ 29]
Mbɔtɔ lɔngɛnyi la andja ɔnɛ tokonyaka atunyi waki Nzambi
[Osato wa lo lɛkɛ 31]
Yeso akatone woho wakalange Satana mbosha waolelo tshɛ wa lo andja