TSHAPITA 9

Sho La Dia Shika Ekolo La Ntondo K’ehemba

ONDE ndoko lushi lakakɔlɔmbɛ onto ɔmɔtshi dia wɛ sala dikambo dimɔtshi dia kɔlɔ?. . . Onde nde akakotshutshuya dia wɛ sala dikambo diakɔ? Kana onde nde akakotɛ ate diɔ diayonga dikambo di’ɔngɛnɔngɛnɔ ndo ɔnɛ hatonga mɛtɛ kɔlɔ wɛ sala dikambo diakɔ?. . . Lam’atotɛ onto ɔmɔtshi awui wa ngasɔ, nde ekɔ lo nyanga dia todja l’ehemba.

Kakɔna kahombaso sala naka tambohembama? Onde sho pombaka mbetawɔ ndo sala kɛnɛ kele kɔlɔ?. . . Dikambo sɔ hatɔngɛnyangɛnya Jehowa Nzambi. Ko onde wɛ mbeyaka onto layɔngɛnangɛna?. . . Satana Diabolo mbayɔngɛnangɛna.

Satana ekɔ otunyi waki Nzambi ndo nde ekɔ otunyi aso. Sho hatokoke mɛna Satana nɛ dia nde ekɔ nyuma. Koko nde tɛnaka. Lushi lɔmɔtshi, Diabolo akatɛkɛta nde la Yeso lele Ombetsha a Woke, ndo akohembe. Tende kɛnɛ kakasale Yeso. Oma lâsɔ tayeya kɛnɛ kahombaso sala lam’ahembamaso.

Yeso akalangaka nshi tshɛ dia sala lolango laki Nzambi. Nde akɛnya dikambo sɔ lo batizama l’Ɔkɛdi wa Jɔrɔdana. Satana akahembe Yeso yema tshitshɛ l’ɔkɔngɔ wa Nde batizama. Bible mbutaka dia ‘olongo wakadihwɛ’ Yeso. (Mateu 3:16) Dui sɔ koka nembetshiya dia l’etena kɛsɔ Yeso akatatɛ mbohɔ lɔsɛnɔ lakandasɛnaka l’olongo nde la Nzambi.

L’ɔkɔngɔ wa batismu kande, Yeso akatshu l’oswe wa shɛnga dia tokana yimba l’awui wakandatatɛ mbohɔ. Nde akatshu lɛkɔ tanyi ndo etsho akumi anɛi. L’etena kɛsɔ tshɛ Yeso kɔndɛ ndoko yangɔ, ɔnkɔnɛ nde aki la ndjala k’efula. Paka l’etena kɛsɔ mbakaye Satana dia ndjohemba Yeso.

Diabolo akate ate: “Naka On’a [Nzambi] keye, uteli ave ane wahilo kenga dia ma.” Mma akahombe monga mɛtɛ olelo wa dimɛna efula! Ko onde Yeso akakoke mpiloya ave ko vɔ koma dikenga dia mma?. . . Eelo, nde akakoke. Lande na na? Nɛ dia Yeso, Ɔna Nzambi aki la wolo wa lânde.

Onde wɛ otokadimola dive ekenga ka mma otondonga Diabolo wɛ mbakandalɔmbɛ dia sala dikambo sɔ?. . . Yeso aki la ndjala. Onde otonga dimɛna nde sala dikambo sɔ kânga mbala ɔtɔi keto?. . . Yeso akeyaka dia aki kɔlɔ kamba la wolo ande lo yoho shɔ. Jehowa akawosha wolo ɔsɔ dia kotola anto oya le Nde koko aha dia kamba la wɔ dikambo dia wahɔ ande hita.

Diakɔ diakatɛ Yeso Satana kɛnɛ kofundami lo Bible ɔnɛ: ‘Onto hahombe nsɛna tsho la mma koko ndo l’ɔtɛkɛta tshɛ watomba oma l’onyɔ waki Jehowa.’ Yeso akeyaka dia sala kɛnɛ kangɛnyangɛnya Jehowa ekɔ ohomba efula ndeka kondja mma dia ndɛ.

Koko Diabolo akohembe mbala kekina nto. Nde akɛmbɛ Yeso la Jerusalɛma ndo akokitsha lo tshoto ya tɛmpɛlɔ. Oma lâsɔ, Satana akate ate: ‘Naka ɔna Nzambi mbeyɛ, fumbɔ oma lengo. Nɛ dia akafundama ate andjelo waki Nzambi wayokɛmba di’aha wɛ mpomɔ.’

Lande na kakate Satana dikambo sɔ na?. . . Nde akadite dia pemba Yeso dia sala dikambo dimɔtshi dia kɔlɔ. Koko Yeso akatone nto dia mbetawɔ kɛnɛ kakawotɛ Satana. Nde akatɛ Satana ate: “Akafundama ntu ati: Tuhimbaki [Jehowa Nzambi k]aye.” Yeso akeyaka dia bu dimɛna nde pemba Jehowa lo mbidja lɔsɛnɔ lande lo wâle.

Koko Satana akatetemala la mbohemba. L’ɔkɔngɔ wa lâsɔ, nde akatɔlɛ Yeso lo dikona dimɔtshi di’otale efula. Lɛkɔ, nde akawɛnya waolelo kana mandji tshɛ ya l’andja ndo lotombo lawɔ. Oma lâsɔ, Satana akatɛ Yeso ate: “Dimi layukushawo, vo tshe, naka we ayunkhusamela dia ntemolami.”

Ohokanyiya kɛnɛ kakalange Diabolo mbisha Yeso kɛsɔ. Onde waolelo tshɛ kana mandji shɔ y’anto yekɔ mɛtɛ yaki Satana?. . . Yeso kombidja tâmu dia mandji shɔ aki yaki Satana. Nde otodja tâmu otondonga Satana komonga kanga mandji shɔ. Eelo, Satana mbele mɛtɛ omboledi wa wedja tshɛ wa l’andja ɔnɛ. Bible mbêtaka ɔnɛ ‘omboledi w’andja ɔnɛ.’​—⁠Joani 12:⁠31.

Kakɔna kayoyosala naka Diabolo ambokolaka dia kosha ɛngɔ kɛmɔtshi naka wɛ mbɔtɛmɔla?. . . Yeso akeyaka dia ekɔ kɔlɔ tɛmɔla Diabolo oyadi difuto dia woho akɔna tshɛ diayondokondja. Diakɔ diakate Yeso ate: ‘Satana, omɔ oma lango! Nɛ dia Bible mbutaka ɔnɛ Jehowa Nzambi kayɛ mbahombayɛ tɛmɔla ndo ndamɛ oto mbahombayɛ kambɛ olimu.’​—⁠Mateu 4:​1-10; Luka 4:​1-13.

Sho lawɔ pomanaka l’ehemba. Onde wɛ mbeyaka ehemba ɛmɔtshi wahomana laso?. . . Tɔshi ɛnyɛlɔ kɛmɔtshi. Mama kayɛ mbeyaka mbahɛ osawo kana ekate w’amɛna efula. Nde mbeyaka kotɛ di’aha wɛ ndɛ kânga yema polo l’etena kayonyoyɔlɛ nyu tshɛ. Koko, naka wɛ ekɔ la ndjala k’efula, kete wɛ mbeyaka pembama dia ndɛ diangɔ sɔ. Onde wɛ ayokitanyiya kɛnɛ kakakote mama kayɛ?. . . Satana nangaka di’aha wɛ monga l’okitanyiya otsha le mama kayɛ.

Tohɔ kɛnɛ kakasale Yeso. Nde lawɔ aki la ndjala k’efula. Koko nde akeyaka dia ngɛnyangɛnya Nzambi ekɔ ohomba efula ndeka diangɔ dia ndɛ. Wɛ ayɛnya dia wɛ mbokoyaka Yeso naka wɛ sala kɛnɛ kakotɛ mama kayɛ.

Ana akina mbeyaka kɔlɔmba dia wɛ nnɔ amuka amɔtshi w’ekanga kana akatshi amɔtshi. Vɔ mbeyaka kotɛ ɔnɛ naka wɛ mbanɔ, kete wɛ ayonga l’ɔngɛnɔngɛnɔ wa mamba. Koko amuka w’ekanga kana akatshi asɔ mbeyaka monga nɔnɔ dia wolo. Amuka akɔ koka kotatsha hemɔ ka wolo ndo kânga kodiaka. Kana onto ɔmɔtshi mbeyaka kosha mfɔka ndo kotshutshuya dia wɛ nnɔ, koko mfɔka ekɔ la lɔlɛngɔ. Kakɔna kayoyosala?. . .

Tohɔ kɛnɛ kakasale Yeso. Satana akasale woho wa Yeso mbidja lɔsɛnɔ lande lo wâle lam’akandawotɛ dia nde fumbɔ oma la tshoto ya tɛmpɛlɔ. Koko Yeso kosala dikambo sɔ. Kakɔna kayoyosala naka onto ɔmɔtshi ambokotɛ dia wɛ sala dikambo dimɔtshi dia kɔlɔ na?. . . Yeso kosala kɛnɛ kakawotɛ Satana. Wɛ lawɔ hahombe ndjela kɛnɛ kakotɛ onto tshɛ lakotshutshuya dia sala awui wa kɔlɔ.

Mbala mɔtshi vɔ mbeyaka kɔlɔmba dia tɛmɔla lohingu, koko Bible mbutaka dia hatohombe sala dikambo dia ngasɔ. (Etumbelu 20:​4, 5) Lo sɛlɛmɔnyi kɛmɔtshi ka la kalasa, vɔ koka kɔlɔmba dia sala woho wa dikambo dia ngasɔ. Vɔ mbeyaka kotɛ ɔnɛ wayokonya oma lo kalasa naka wɛ tona dia sala dikambo diakɔ. Kakɔna kayoyosala?. . .

Ekɔ wɔdu sala kɛnɛ kele ɔlɔlɔ naka anto akina tshɛ wekɔ lo kisala. Koko sala kɛnɛ kele ɔlɔlɔ koka monga dikambo dia wolo efula naka anto akina wekɔ lo totshutshuya dia sala kɛnɛ kele kɔlɔ. Vɔ mbeyaka mbuta ɔnɛ kɛnɛ kasalawɔ bu mɛtɛ kɔlɔ efula. Koko wombola w’ohomba ele wa mbeya ɔnɛ: Kakɔna kata Nzambi lo dikambo diakɔ na? Nzambi mboleki mbeya.

Ɔnkɔnɛ, oyadi kakɔna kayota anto akina, sho hatohombe pondjo sala awui watona Nzambi. Yoho shɔ mbayotɔngɛnyangɛnyaka Nzambi nshi tshɛ ndo mbahatatɔngɛnyangɛnya Diabolo pondjo.

Awui efula wendana la woho wa shika ekolo la ntondo k’ehemba ndo wa sala kɛnɛ kele kɔlɔ koka tanema l’Osambu 1:​1, 2; Tukedi 1:​10, 11; Mateu 26:41; ndo 2 Timote 2:⁠22.

[Osato wa lo lɛkɛ 52]

Kakɔna kele ondo Yeso akatatɛ mbohɔ etena kakandabatizama?

[Osato wa lo lɛkɛ 53]

Ngande wakakambe Satana l’ave dia pemba Yeso?

[Osato wa lo lɛkɛ 55]

Lande na kakalange Satana mbisha Yeso waolelo anɛ tshɛ?

[Esato wa lo lɛkɛ 55]

Ayoyosala naka wɛ ambohembama?

[Osato wa lo lɛkɛ 56]

Lande na ekɔ kɔlɔ dia kamba la mpingu l’ɔtɛmwɛlɔ?