Wetshelo lo woho wakalɔshana Yeso l’ehemba

Yema tshitshɛ l’ɔkɔngɔ wa Yeso batizama oma le Joani, nyuma kaki Nzambi kakalɔmbɔla Yeso otsha l’oswe wa Judeya. Nde akahombe nkana yimba l’akambo efula. Lo batisimu ka Yeso, “olongo wakadihɔ.” (Mateo 3:16) Ɔnkɔnɛ nde okoka mbohɔ akambo wakandeke ndo wakandasalaka l’olongo. Lo mɛtɛ, nde aki l’akambo efula wa nkana la wɔ yimba!

Yeso aketsha nshi 40 la etsho 40 l’oswe. L’etena kɛsɔ, nde kɔndɛ ndooko ɛngɔ. Ko Yeso akoke ndjala efula, Satana Diabolo akaye ndjohemba lo mbuta ɔnɛ: “Naka ɔna Nzambi keyɛ, otɛ ave anɛ dia vɔ mpilɔ mbo ya ndɛ.” (Mateo 4:3) Lo mbeya dia aki kɔlɔ dia nkamba la wolo ande wa nsala ahindo l’oyango wa nkotsha nsaki yande hita, Yeso akashike ntanga la ntondo k’ohemba ɔsɔ.

Diabolo kokomɛ laasɔ. Nde akayange yoho kina ya mbohemba. Nde akadje Yeso tɔfwɛfwɛ dia nde ndjakɔsha oma laadiko dia tɛmpɛlɔ. Koko Yeso kombetawɔ dia nsala dui dia ngasɔ. Lo nshila Afundelo, Yeso akɛnya dia aki dui dia kɔlɔ dia mbidja Nzambi l’ohemba lo yoho shɔ.

Ko, l’ohemba wa sato, Diabolo akɛnya Yeso lo yoho mɔtshi “waolelo tshɛ wa l’andja ɔnɛ la lotombo lawɔ” ndo akate ate: “Layokosha diangɔ nɛ tshɛ naka wɛ kusamɛmi ndo nsala tshelo 1 ya tɛmɔlami.” Mbala kɛsɔ nto, Yeso akatone la wolo tshɛ lo mbuta ate: “Satana, mɔ!” (Mateo 4:8-10) Nde kombetawɔ dia nsala kɔlɔ etena kakandahembama, lo mbeya dia paka Jehowa oto mbahombaso kambɛ olimu w’ekila. Eelo, nde akasɔnɛ dia ntshikala la kɔlamelo le Nzambi.

Sho kokaka nkondja wetshelo oma l’ehemba ɛsɔ ndo oma lo kɛnɛ kakasale Yeso. Ehemba ɛsɔ waki wa mɛtɛ mɛtɛ, dui sɔ mɛnyaka dia Diabolo bu tsho dionga dia kɔlɔ oko wata anto amɔtshi. Nde ekɔ onto la mɛtɛ, lahɛnama. Ɔkɔndɔ ɔsɔ nto mɛnyaka dia mandji ya l’andja w’otondo yekɔ mɛtɛ l’anya waki Diabolo; nde mbayilɔmbɔla. Naka aha ngasɔ, ngande wakakoke woshelo ayɔ le Kristo monga ohemba wa mɛtɛ mɛtɛ?

Ndo nto, Diabolo akate dia nde akalange mfuta Yeso naka nde nsala tshelo kaanga tshɔi y’ɔtɛmwɛlɔ lo mbisha Yeso waolelo tshɛ wa l’andja w’otondo. Diabolo mbeyaka nyanga dia tohemba lo yoho yakɔ yaamɛ, ondo lo tosha waaso w’amɛna efula wa nkondja ɔngɔnyi wa l’andja ɔnɛ, lowandji ndo dihole dia woke. Ayonga dui dia lomba le so etena kayelaso ɛnyɛlɔ ka Yeso lo ntshikala la kɔlamelo le Nzambi oyadi ohemba akɔna tshɛ! Koko tohɔ dia Diabolo akatshike tsho Yeso “polo lam’ayondokondja diaaso dikina dia dimɛna.” (Luka 4:13) Dui sɔ mbeyaka tokomɛ ndo sho, diakɔ diele sho pombaka sungukalaka.