Tshapita 39

Akanga wa lotamanya la wa ndjakitshakitsha

L’ƆKƆNGƆ wa nde mbuta waonga w’ɛlɔlɔ waki Joani Obatizanyi, Yeso ambɔtwɛ akanga wa lotamanya ndo wahashikimala la dui, wanɛ wele suke la nde. Nde lawɔ ate: “[lolonga lɔnɛ lekɔ] oko akenda wudjashi lu tuka, weta anyawo lu tokenyo vati: Shu takanyudedi pungi, ku nyu hanyonwe wenye. Shu takaledi, ku nyu [hanyoyatshatshisha la lonyangu, NW].”

Yeso alangande mbuta na? Nde ambolembetshiya ate: “Joani akayi, ndi kondekaka, konokaka, ku antu wakaweti vati: Kanga edienge kendi. On’a untu akayi, ndi ndekaka, nokaka, ku vo mvutaka vati: Nyendi kanga dishi la onoshi a wanu! ongenyi wa elungudi w’elambu la antu wa kolo!”

Ndoko kɛnɛ kakoka onto sala dia nde ngɛnyangɛnya anto asɔ. Ndoko dikambo diele dimɛna lo asho awɔ. Joani akasɛnaka lɔsɛnɔ la wolo efula, lɔsɛnɔ l’Okidiami, lɔsɛnɔ la ndjasɛka, ndo nde akayelaka ɛtɛkɛta w’ondjelo w’ɔnɛ: ‘Nde hahombe nɔ wanu kana ɛnɔnɔ ka wolo.’ Koko, anto mbutaka ɔnɛ nde ekɔ l’ɔdiɛngɛ. Lo wedi okina, Yeso ekɔ lo nsɛna oko anto akina, nde hakile diangɔ, ndo hayadjasɛ ndamɛ, koko anto wotatɛ mbuta ɔnɛ nde ambɔtɛkɔya.

Ande anto asɔ ekandjakandja wonde! Vɔ wekɔ oko ana w’akɛnda wele amɔtshi hawolange nɔ wɛnyɛ wonya wada asekawɔ ponge, kana hawonyange wonya wayakiyanya asekawɔ. Koko Yeso ambota ate: ‘Lomba lamboyindjama oma l’etsha alɔ.’ Eelo, akambo wɛnama—mbuta ate etsha—mɛnyaka hwe ɔnɛ akambo wa kashi mbamamatanyiyɛwɔ Yeso nde la Joani.

Yeso ambotetemala l’ɔkɔndɔ ande, asɔma esomba esato la mbahangwɛ, esomba akɔ ko: Kɔrazina, Bɛtɛsayida la Kapɛrɛnauma, lɛnɛ akandaleke sala akambo wa mamba. Yeso ate: otondoyala nde akasale akambo asɔ l’osomba wa Tura la wa Sidɔna, tshike esomba ɛsɔ wotoyatshumoya lo ndɔta akoto la mbidjasɛ l’otoko. Wonya wânyande Kapɛrɛnauma, osomba wɛnama ɔnɛ vɔ mbakandasɔnɔla dia mbidjasɛ lɔkɔ l’edja k’olimu ande, Yeso ambota ate: “Lu lushi l’elumbwelu, fono kaye kayuleka ka kete ya Sodoma.”

Oma lâsɔ, Yeso ambotombola She lele l’olongo lo asho w’anto tshɛ. Nde ambotshutshuyama dia sala dikambo sɔ nɛ dia Nzambi mbishɛka mɛtɛ ya lo nyuma y’ohomba efula di’aha akanga a lomba l’ase timba ndjikondja, koko nde mbisholaka akambo asɔ w’amɛna efula le akanga wa ndjakitshakitsha, wanɛ wele oko akɛnda lo yoho ya didjidji.

L’ɔkɔngɔ diko, Yeso amboyokimɔ leeta lɔnɛ la dimɛna efula, ate: “Nyuyi le mi, nyu [wanɛ tshɛ wɛna pâ ndo wasowa la wetsho, NW], ku dimi [layonyokeketsha, NW]. Nyembe lokoho lami, nyeki akambu uma le mi. [Nɛ dia dimi lekɔ la dionga dia wɔladi ndo l’otema wa ndjakitshakitsha. Lɔkɔhɔ lami lekɔ tefutefu ndo oshikɔ ami wekɔ osadi, NW].”

Woho akɔna wakondja anto ekeketshelo oma le Yeso na? Nde mbashaka ekeketshelo lam’awatshungolande oma lo lɔhɔmbɔ la wetsho wa mbekelo y’ashidi wawaɛndja ewandji w’ɛtɛmwɛlɔ, ɛnyɛlɔ oko ɛlɛmbɛ wa wolo wolo w’endana la Sabato. Ndo nto, nde ekɔ lo mɛnya woho wakoka wanɛ wasowa la wetsho la tshina dia mandji ya pɔlitikɛ kondja esambelo, ndo woho wakoka wanɛ wɛna pâ la wotsho wa pɛkato yawɔ nɛ dia nkum’etema yawɔ mbahɛnyahɛnyaka kondja esambelo ndo vɔ lawɔ. Nde ekɔ lo mɛnya anto wa ngasɔ wasowa woho wakoka pɛkato yawɔ nyimanyiyama ndo wakokawɔ monga la diokanelo di’ohomba efula vɔ la Nzambi.

Dia sho mɛmba lɔkɔhɔ la tefutefu lalaka Yeso dia mbisha anto, sho pombaka ndjakimɔ le Nzambi dia mbokambɛ, nɛ dia nde kele Shɛso lele l’olongo loludi la ngandji ndo la kɛtshi. Ndo oshikɔ w’osadi walaka Yeso dia mbisha ɔnɛ laya oya le nde kɛdikɛdi kitanyiya adjango wa lɔsɛnɔ wakadje Nzambi, adjango akɔ ko ɛlɛmbɛ Ande wofundami l’atei a Bible. Ndo okitanyielo w’ɛlɛmbɛ akɔ ɛsɔ kema wotsho. Mateu 11:16-30; Luka 1:15; 7:31-35; 1 Joani 5:3.

▪ Ngande wele akanga wa lotamanya, wanɛ wahashikimala la dui wa lo lɔlɔnga la Yeso, oko ana w’akɛnda?

▪ Lande na kambotshutshuyama Yeso dia tombola She lele l’olongo?

▪ Lo yoho yakɔna yasowa anto la wetsho, ndo ekimanyielo kakɔna kawasha Yeso?