Tshapita 102

Kristo ambɔtɔ lo Jerusalɛma la lotombo

LA PINDJU ka Lushi la Lomingu, lo ngɔndɔ ka Nisana 9, Yeso ambonɛ oma la Bɛtaniya nde l’ambeki ande ko wambotshɔ otsha la Jerusalɛma, vɔ wambodjɛ lo mboka ka lo Dikona di’Ɔlivɛ. Kem’edja, vɔ wambosukana la Bɛtɛfange, ngelo kele lo Dikona di’Ɔlivɛ. Yeso mbatɛnde ambeki ande ahende ate:

“Nyutshu utsha la ngelu keledinyu, nyayutana punda ukelekami la on’ato. Kanyuyikelekuli, kanyuyi la yo le mi. Naka untu omotshi ayunyumbula, kanyuwuteli nyati: Khumadiondjo kayihumba. Kem’edja, ndi ayuyituma.”

Ntondotondo, ambeki hawoshihodia ɔnɛ awui asɔ wawatɛnde mendanaka l’ekotshamelo ka pɔlɔfɛsi kɛmɔtshi ka lo Bible, koko l’ɔkɔngɔ diko mbayowoyâmana fundo. Omvutshi Zɛkariya akatatshi ɔnɛ Nkumekanga kakalakema oma le Nzambi ayɔtɔ lo Jerusalɛma, ahemi lâdiko dia ponda, ɛɛ, ‘lâdiko di’ɔsɔngɔ wa ponda k’omi, ɔna ponda ka wadi.’ Woho akɔ wâmɛ mbakahema Nkumekanga Sɔlɔmɔna lâdiko di’ɔna ponda lam’akandatatshɔka dia tokitama esɔ.

Lam’ɔtwɛ ambeki lo ngielongelo ya Bɛtɛfange ko wambɔsa ɔna ponda la nyangɛtɔ, anto wakemadi lâwɔ wambowambola ɔnɛ: “Na dikambu diku?” Koko, kam’okiwɔ ɔnɛ Nkumadiɔndjɔ mbayanga nyama yakɔ, vɔ wambotshika ambeki dia vɔ ndjiɔsa ko ndjitɔlɛ Yeso. Ambeki wambahɛ ahɔndɔ awɔ wa lâdiko lâdiko dia ponda ka wadi ndo lâdiko di’ɔnatɔ, koko Yeso ambahema lâdikɔ di’ɔna ponda.

Lam’ayasukana Yeso oya la Jerusalɛma, elui w’anto wekɔ lo ndjaleke fulanɛ. Anto efula wambâlɛ ahɔndɔ lo mboka, ko akina wambɔkɔta avundja w’esongo ko wambâlɛ lo mboka, wata vate: “Khum’ekanga luyi lu lukumbu la [Jehowa], atumbwami! Ki kayali l’ulungu, la lutumbu layali ladiku dia ulungu!”

Afarisɛ amɔtshi wele l’atei w’olui w’anto wambodunganela la nkɛlɛ lam’okiwɔ awui asɔ, ko vɔ wôkiyanɛ Yeso vate: “Umbetsha, uhangweli ambeki aye.” Yeso mbâkadimolande ate: “Dimi lambunyutela nti: Naka vo wayolembohala, ave wayuhangohango.”

Oko wamondokoma suke la Jerusalɛma, Yeso ambɛna osomba ko ambotatɛ ndela lo dikambo diawɔ ate: “Utuyeya weme lu lushi l’elo, akambu watutungaka ki li! Keli kakiane, akambu ako wambushama uma lu ashu aye.” L’ɔtɛ w’ohedia awɔ wa l’okonda, Jerusalɛma pombaka kondja dilanya, nɛ dia Yeso ate:

‘Atunyi ayɛ [alembe w’Ase Rɔmɔ oma l’ɛlɔmbwɛlɔ ka Titus, Nkumi k’alembe] wayokodinga la longele, vɔ wayokɔhɛnyahɛnya lo bɛkɛ tshɛ, wayokohondja lo nkɛtɛ, wɛ la anayɛ wele l’atei ayɛ, vɔ hawotokotshikɛ dive lâdiko dia dive.’ Elanyelo kɛsɔ ka Jerusalɛma kakatatshi Yeso kayoyosalema l’ɔkɔngɔ w’ɛnɔnyi 37, l’ɔnɔnyi 70 T.D.

Ambeta mingu mɔtshi tsho, efula wa l’olui ɔsɔ w’anto wakɛnyi lam’akolola Yeso Lazaro. L’etena kɛnɛ, vɔ wekɔ lo tetemala mbutanela dikambo sɔ. Ɔnkɔnɛ, lam’ɔtwɛ Yeso lo Jerusalɛma, osomba w’otondo waya lo lofunguso. Anto wombola vate: “Akona one na?” Ko elui w’anto vate: “Uku eli umvutshi Jesu, uma la Nazareta ka la Ngalili.” Lam’ɛnyiwɔ kɛnɛ kotshami, Afarisɛ wôyakiyanya nɛ dia hawoyeya ka ntsha nto, nɛ dia ndo vamɛ wota vate: ‘Anto tshɛ wekɔ lo toyele.’

Oko wele mbekelo kande, lam’okuminde la Jerusalɛma, Yeso ambotshɔ otsha lo tɛmpɛlɔ dia tetsha anto. Lɛkɔ, akanga a totshungu la akanga wa tshumbe wamboya le nde, ko nde ambâkɔnɔya! Ɛlɔmbɛdi a weke la afundji kam’ɛnyiwɔ akambo wa diambo wasala Yeso, ndo lam’okiwɔ ana w’akɛnda wahangɔhangɔ lo tɛmpɛlɔ vate: “Hosana le Kanula ya Davidi!,” vɔ wambodunganela la nkɛlɛ. Vɔ hawolange mboka dikambo sɔ, ko vɔ lande vate: “We mbukaka okone wata akenda aso?”

Ko Yeso mbâkadimolande ate: ‘Onde nyu nyatalaka ndoko lushi ɔnɛ: Wɛ akatondja lotombo oma l’enyɔ w’ana w’akɛnda ndo w’ana walɔma?’

Yeso ambotetemala mbetsha, ɛwɛwa oseka ɛngɔ tshɛ ka lo tɛmpɛlɔ. Kem’edja, wonya aya suke la mbidja. Ɔnkɔnɛ, nde l’apɔstɔlɔ ande 12 wambotshɔ, wambosala lɔkɛndɔ la kilɔmɛtɛlɛ shato otsha la Bɛtaniya. Lɛkɔ mbamondotolala Lushi la Lomingu, ondo laka ɔngɛnyi ande Lazaro. Mateu 21:1-11, 14-17; Mako 11:1-11; Luka 19:29-44; Joani 12:12-19; Zekariya 9:9.

▪ Etena kakɔna ndo woho akɔna wambɔtɔ Yeso lo Jerusalɛma oko Nkumekanga?

▪ Onde ekɔ ohomba di’elui w’anto tombola Yeso?

▪ Ngande waya asolo wa Yeso lam’ɛnyinde Jerusalɛma, ndo pɔlɔfɛsi kakɔna kamondota?

▪ Kakɔna kambotshama lam’otshwe Yeso lo tɛmpɛlɔ?