Kɛnɛ kele sɔlɔ lo dikambo di’anima
‘Nyu nyayeya sɔlɔ, ko sɔlɔ kayonyotshungola.’—JOANI 8:32.
1. Bonde kediɔ ohomba sɛdingola kɛnɛ ketawɔso lo dikambo di’anima la nyɔi na?
WETSHELO wetawɔ onto lo dikambo dia nyɔi la di’Andja-Okina nemanɛka efula la kɛnɛ ketawɔwɔ l’ɔtɛmwɛlɔ ande la lo ngelo kawɔ. Oko akatadiɛnyi, vɔ wakatatɛ oma l’eshikikelo k’ɔnɛ anima kotshaka oyango ande wa ndjihelo paka l’ɔkɔngɔ wa mbotɔ mbala efula ko ndjokoma lo kanyi y’ɔnɛ lɔlɔnga lakôtɔ onto mbɛnya lɛnɛ ayondotokomɛ. Omalɔkɔ, onto ɔmɔtshi mbeyaka mbetawɔ ɔnɛ lam’avɔso sho tshɔka dia tosangana mbala ka ndjihelo la mɛtɛ koleki tshɛ, akina mbetawɔka di’otshwelo wa lo Nirvana, ndo akina mbetawɔka dia difuto dia l’olongo. Ko, naa kanyi yele sɔlɔ lâsɔ na? Shi sunganaka sho ntsha tshɛ dia mbeya okadimwelo wa dimbola sɔ nɛ dia kɛnɛ ketawɔso kekɔ la shɛngiya lo lɔkɛwɔ laso, etsha aso, ndo lo tɛdikɔ tɔsaso?
2, 3. (a) Bonde kakokaso ndjaɛkɛ lo kɛnɛ kata Bible lo dikambo di’anima? (b) Oko adita Bible, kakɔna kele sɔlɔ lo dikambo di’anima?
2 Bible, dibuku dioleki edja l’abuku tshɛ, tatɛka kɔndɔla ɔkɔndɔ w’onto oma ko etongelo k’onto, anima wa ntondo. Wetshelo wa lɔkɔ bu okakatanu ndo hasɔhanyi la filozofi kana wetshelo w’anto. Bible mbutaka hwe kɛnɛ kele sɔlɔ lo dikambo di’anima ɔnɛ: Anima ayɛ ele tshondo yayɛ, wanɛ wakavu bu la lɔsɛnɔ kânga yema, ndo wanɛ wele Nzambi mbaohɔka wayolɔ l’etena kakandashikikɛ. Naka wɛ ambeya awui asɔ kete na?
3 ‘Nyu nyayeya sɔlɔ, ko sɔlɔ kayonyotshungola,’ mbakatɛ Yeso Kristo ambeki ande. (Joani 8:32) Eelo, sɔlɔ tshungɔnaka. Ko oma lo na ayototshungola sɔlɔ kendana l’anima na?
Lotshungɔ oma lo wɔma la l’oshishelo w’elongamelo
4, 5. (a) Naa wɔma washila oma lo mbeya sɔlɔ lo dikambo di’anima? (b) Ngande wakakondja dikɛnda di’ɛnɔnyi dikumi l’ɛmɔtshi dihonga oma lo dikongelo di’eolwelo lam’akinde ka nyɔi?
4 Dibuku The World Book Encyclopedia mbutaka ɔnɛ: “Anto efula mbokaka nyɔi wɔma ndo tonaka kikanyiya.” Ofundji ɔmɔtshi w’ɛkɔndɔ mbutaka ate: “Tshondo ya tshɛkɛta ‘nyɔi’ hayɔtɛkɛtama lo lɛkɛ l’Ehotwelo ka wonya.” Ndo lo mbekelo mɔtshi, hawoyota ɔnɛ ‘onto ambovɔ’ wotaka paka ɔnɛ “ambohomɔ” kana “amboshishɔ.” Wɔma a nyɔi ɔsɔ mbaya wɔma w’ɛngɔ kahaweye, nɛ dia anto efula mɛnaka ɔnɛ nyɔi ekɔ ehekesa ka dikambo. Ewo ka sɔlɔ lo dikambo dia nganɛ wayalaso lam’avɔso kitshakitshaka wɔma ɔsɔ.
5 Ohenda oko ɛnyɛlɔ, yimba yaki la Micheline, dikɛnda dia omoto di’ɛnɔnyi 15. Nde akatate hemɔ ka S. S. ko akavu. Paula ka nyango ate: “Micheline akate ate nde hayâkiyanya l’ɔnɛ ayanga mvɔ, nɛ dia nde mbeyaka ate nyɔi ekɔ paka tshanda mɔtshi ntsho. Takasawola efula lo dikambo di’andja w’oyoyo waki Nzambi ndo wanɛ tshɛ wayolɔ lɔkɔ. Micheline aki la mbetawɔ ka mamba le Jehowa Nzambi ndo lo eolwelo—nde kombidja tâmu kânga yema.” Dikongelo di’eolwelo diakatshungola dikɛnda dia omoto sɔ dia dihonga oma lo wɔma a nyɔi wa tshambandeko.
6, 7. Sɔlɔ lo dikambo di’anima totshungolaka oma l’oshishelo w’elongamelo kakɔna? Sha ɛnyɛlɔ.
6 Ngande wakonge sɔlɔ la shɛngiya le ambutshi waki Micheline na? Jeff ya she ate: “Nyɔi ka yana yaso ya yimato akonge dikambo diakaleke tosha kandji l’asolo ndeka akambo tshɛ wambotokomɛ. Koko, tamboyaɛkɛ tshɛ lo daka dia Jehowa di’eolwelo, ndo tekɔ lo mendɛ l’asolo lokoloko lushi layotolongola Michaelyn aso wa ngandji l’anya aso nto. Ande ohomanelo wayonga lee!”
7 Eelo, mbeya sɔlɔ lo dikambo di’anima tshungolaka onto oma l’oshishelo w’elongamelo waya lam’avɔ onto lalangaso. Mɛtɛ, ndoko ɛngɔ kokoki minya kandji la lonyangu tshɛtshɛ latongaka l’onto lam’avushande onto ande la ngandji. Koko, dikongelo di’eolwelo mbɔladiaka delo ndo tokimanyiyaka dia sho mbikikɛ kandji.
8, 9. Sɔlɔ lo dikambo dia nganɛ wele wanɛ wakavu totshungolaka oma lo wɔma akɔna?
8 Sɔlɔ kele l’Afundelo lo dikambo dia nganɛ wele wanɛ wakavu totshungolaka nto oma lo wɔma a wanɛ wakavu. Tamba lam’akaweye sɔlɔ kɛsɔ, anto efula wambotomba oma lo lowete l’etshelo wa dikanyikanyi lo dikambo dia wanɛ wakavu, hawoyoka wɔma w’etshî, wa nimu, mpako, ekanga, ndo hawoyokimɔ elambo wahɛnɛ pe dia tutsha nkɛlɛ ka watshɛwɔ wakavu ndo mbâshimba di’aha vɔ kalola a ndjosoya wanɛ wasɛna. Mɛtɛ, lam’ele wanɛ wakavu ‘haweye ndoko dikambo,’ etshelo wa ngasɔ wekɔ anyanya.—Undaki 9:5.
9 Sɔlɔ kɛnyiso lo Bible lo dikambo di’anima, totshungolaka mɛtɛ ndo sunganaka sho kiɛtawɔ. Koko, ohenda ndo elongamelo ka lânde kakosha Bible.
[Efundelo wa l’etei w’odingɔ wa lo lɛkɛ 29]
Sɔlɔ lo dikambo di’anima kotshungolaka oma lo wɔma a nyɔi, wa wanɛ wakavu, ndo oma l’oshishelo w’elongamelo waya lam’avɔ onto lalangaso