‘Dja yimba lo woho wahokamɛyɛ’

MPOKAMƐ ekɔ dikambo di’ohomba efula lo kɛnɛ kendana la wekelo. Dui sɔ koka monga nto la shɛngiya l’elongamelo kele l’onto ka shimbamɛ. Lam’akayalɔngɔsɔlaka Jehowa dia tshungola wodja ande oma lo lɔhɔmbɔ l’Edjibito, nde akadjangɛ Mɔsɛ dia mbutɛ dikumanyi di’apami dia l’Isariyɛlɛ kɛnɛ kakawahombe sala dia shimbɛ anawɔ wa nondo di’aha vɔ ndjakema oma le ondjelo. (Etum. 12:21-23) Oma lâsɔ, dikumanyi di’apami wakɔshi awui akɔ ko mbutɛ nkumbo tshɛ. Wakawaewoya awui asɔ l’onyɔ. Anto wakahombe mpokamɛ awui akɔ la yambalo tshɛ. Ngande wakawasale na? Bible mbutaka ɔnɛ: “Ku asi Isariyele wakatshu, wakatutsha pupu; uku akadjangela [Jehowa] Mose la Arona mbakawatshi.” (Etum. 12:28, 50, 51) L’ɔtɛ wa dikambo sɔ, wodja w’Isariyɛlɛ wakatshungɔ lo yoho ya diambo efula.

Ɛlɔ kɛnɛ, Jehowa ekɔ lo tɔlɔngɔsɔla dia tosha etshungwelo kɛmɔtshi koleki woke. Lo mɛtɛ, ekɔ ɔlɔlɔ dia sho mbidja yimba efula lo wetshelo watoshande lo nsanganya ya l’etshumanelo. Onde wɛ kondjaka wahɔ w’efula oma lo wetshelo ɔsɔ? Lo yɛdikɔ ya woke, dui sɔ nemanɛka la woho wahokamɛyɛ.

Onde wɛ kimɛka awui w’ohomba wa wetshelo washama lo nsanganya? Onde wɛ ekɔ la mbekelo ka nyangaka lomingu la lomingu dia kamba la wetshelo ɔsɔ lo lɔsɛnɔ layɛ hita ndo dia kahana l’anto akina wetshelo akɔ?

Lɔngɔsɔla otema ayɛ

Dia sho kondja wahɔ efula oma lo wetshelo washama lo nsanganya y’Akristo, sho la dia nɔngɔsɔla etema aso. Kɛnɛ kakatombe lo nshi yakolɛka Nkumekanga Jehɔshafata la Juda mɛnyaka ohomba wa sala dikambo sɔ. La dihonga tshɛ, Jehɔshafata akete l’ɔtɛmwɛlɔ wa mɛtɛ wedi. Nde “akalanya ndu alunga la dikishi dia la Juda” ndo akatɛ ewandji, ase Lɛwi amɔtshi, ndo ɛlɔmbɛdi dia mbetsha anto Ɛlɛmbɛ wa Jehowa l’esomba tshɛ wa Juda. Koko, “alunga kuminyama.” (2 Ek. 17:6-9; 20:33) Ɔtɛmwɛlɔ wa tonzambizambi ta kashi ndo wa woho okina wa kɔlɔ waki kombetawɔmaka l’ɔtɛmwɛlɔ wa Jehowa wakatɛmɔlaka apanganu l’akona wakashikimala wolo efula woho ɔnɛ wele ditshelo diakɔ koshila.

Lande na kele ekongelo ka wetshelo kaki Jehɔshafata komonga l’etombelo wakaviya na? Afundelo mbutaka nto ɔnɛ: “Ndu antu [kɔnɔngɔsɔla] etema awo lu nyanga [Nzambi k]a washewo.” Vɔ wakoke, koko kokamba l’awui wakawoke. Ondo vɔ wakɛnaka wolo efula dia munda lɔkɛndɔ otsha lo tɛmpɛlɔ ka la Jerusalɛma dia tolambola elambo. Lo weho akɔ tshɛ, vɔ komonga la mbetawɔ l’etema awɔ.

Dia mbewɔ dia kawola nto otsha lo mboka y’andja ɔnɛ waki Satana, sho la dia nɔngɔsɔla etema aso dia nongola wetshelo watosha Jehowa ɛlɔ kɛnɛ. Ngande wakokaso sala dikambo sɔ na? Yoho mɔtshi y’oshika ele oma lo dɔmbɛlɔ. Sho la dia nɔmba dia nongolaka wetshelo waki Nzambi la lowando tshɛ. (Osam. 27:4; 95:2) Dui sɔ diayotokimanyiya dia sho mandola welo wadja anangɛso wele, kânga mbewɔ kema kokele, wekɔ lo ndjakimɔ vamɛ dia Jehowa kamba la wɔ dia mbetsha ekambi ande. Dui sɔ diayototshutshuya dia mbisha Jehowa losaka, aha tsho l’ɔtɛ w’awui w’eyoyo wekaso, koko ndo l’ɔtɛ wa diaaso diele laso dia nyomoleka ngɛnangɛna awui wambotoshilaka la mbeka. Oko weso la nsaki k’efula ka sala lolango la Nzambi, sho nɔmbaka shate: “[Jehowa] li, [ombetsha] mbuka kaye. . . . Olongosole utema ami, dia dimi mbuka lukumbu laye woma.”​—Osam. 86:11.

Dja yimba

Ekɔ awui efula watoshimba dia mpokamɛ la yambalo tshɛ. Yimba yaso koka mbekɔ lo ekiyanu wa lo lɔsɛnɔ. Londjo kana lɔhɔsɔ lɔmɔtshi lokaso l’atei w’ampokami kana l’andja wa dihole diasalema losanganya koka tekola yimba. Pâ kɛmɔtshi ka lo demba koka toshimba dia sho mpokamɛ la yambalo tshɛ. Wanɛ wele l’ana watotshitshɛ tɛnaka mbala efula dia yimba yawɔ kahanyemaka. Kakɔna kakoka tokimanyiya dia shikikɛ yimba yaso tshɛ lo losanganya na?

Washo mongaka la shɛngiya ya wolo efula lo dihole diadjaso yimba. Kamba la washo ayɛ dia vɔ kokimanyiya dia wɛ mpokamɛ la yambalo tshɛ lo mendaka ɔtɛkɛtshi. Lam’ashilande divɛsa dimɔtshi, oyadi diokoyeyaka, yangadiɔ, ndo yela wadielo adiɔ kamɛ l’ɔtɛkɛtshi. Sala la wolo di’aha mbɛwɛwaka wonya tshɛ wokɛ yema ya londjo kana y’osukusuku dihole dimɔtshi. Naka washo ayɛ wekɔ lo mbekola yimba yɛ, kete wɛ ayohandja awui efula watama oma lo lɔyɛnga.

Naka ‘tokanyi ta lonyangu’ hakosha diaaso dia wɛ ndjela losanganya dimɛna, kete lɔmba Jehowa dia nde kɔ̂ladja wɔɔngɔ nd’asolo dia wɛ mbeya mbidja yimba lo losanganya. (Osam. 94:19; Fil. 4:6, 7) Salaka dikambo sɔ mbala la mbala naka ekɔ ohomba. (Mat. 7:7, 8) Nsanganya ya l’etshumanelo yekɔ yɛdikɔ y’oma le Jehowa. Onga l’eshikikelo ɔnɛ nde nangaka dia wɛ kondja wahɔ oma lɔkɔ.​—1 Joa. 5:14, 15.

Ohokamelo w’asawo

Ondo wɛ mbohɔka awui amɔtshi wa lo sawo nɛ dia vɔ wakakɔngɛnyingɛnyisha. Koko, mpokamɛ sawo halembetshiya tsho kimɛ awui amɔtshi w’ohomba. Sawo ekɔ oko lɔkɛndɔ. Kânga mbokoki monga awui efula w’ohomba wa menda lo mboka, kɛnɛ koleki ohomba ele dihole diatayatshu, mbut’ate oyango wa lɔkɛndɔ lɔsɔ. Ɔtɛkɛtshi koka pemba dia nɔmbɔla ampokami otsha lo kanyi mɔtshi kana mbatshutshuya dia mbɔsa yɛdikɔ mɔtshi.

Tende sawo diakasha Jashua la ntondo ka wodja w’Isariyɛlɛ diele lo Jashua 24:1-15. Oyango ande aki wa tshutshuya anto dia vɔ mbeta l’ɔtɛmwɛlɔ wa mɛtɛ wedi lo ndjânganya tshɛ lo tshɛ oma l’ɔtɛmwɛlɔ wa dikishi wa wedja wakâdinge. Sawo sɔ diaki ohomba nɛ dia woho wakakokanɛ ɔtɛmwɛlɔ wa kashi akadjaka diɔtɔnganelo di’ɔlɔlɔ diaki lam’asa wodja ɔsɔ vɔ la Jehowa lo wâle w’efula. Wodja wakakadimola lo kɛnɛ kakalɔmbɛ Jashua lo mbuta ɔnɛ: “Kanyi ya ntuna [Jehowa] la ya ntemola ditemolatemola [dikina] yeko etali uma le su. . . . Tayotemolaka paka [Jehowa].” Ndo dikambo sɔ mbakawasale!​—Jas. 24:16, 18, 31.

Lam’ahokamɛyɛ sawo dimɔtshi, hemba dia sɛdingola oyango adiɔ. Sɛdingola woho wayokokimanyiya awui watɔmbɔla ɔtɛkɛtshi dia kotsha oyango ɔsɔ. Yambola dia mbeya kɛnɛ kakotshutshuya awui anɛ dia sala.

Ohokamelo wa l’etena kasalema ɛkɛtshanyelo

Wekelo wa Tshoto y’Etangelo, Wekelo wa Dibuku wa l’Etshumanelo, ndo tenyi dimɔtshi dia Losanganya l’Olimu nɔmbwamaka oko ɔkɛtshanyelo wele la wembola la ekadimwelo w’oma l’ekanda walembetshiya awui wa lo Bible.

Mpokamɛ wonya wasalema ɔkɛtshanyelo wa ngasɔ ekɔ lo yoho mɔtshi oko onto lasawola l’onto. Dia kondja wahɔ efula oma lɔkɔ, wɛ pombaka mpokamɛ dimɛna. Sɛdingola nganɛ watalɔmbɔma ɔkɛtshanyelo akɔ. Lembetɛ woho waka ɔnɔmbɔdi epole ɔsɛkɛ lo lokanyi loleki ohomba la lo sawo ndo l’awui woleki ohomba. Takadimolaka wembola ande l’otema. Ka lotui wonya walembetshiya anto akina awui akɔ kana wonya wɛnyawɔ woho wa kamba la wɔ. Naka wɛ mpokamɛ tokanyi t’anto akina, kete wɛ koka ndjokondja eokelo kekina lo dikambo diokoyeyaka. Keketsha anto akina lo kɛnɛmɔla mbetawɔ kayɛ lo mbishaka kɔmatɛrɛ.​—Romo 1:12.

Naka wɛ teki la ntondo awui wayekama, kete wɛ ayoyasha tshɛ l’ɔkɛtshanyelo akɔ ndo ayoyela kɔmatɛrɛ y’anto akina. Naka wɛ hakondjisha diaaso dia teki awui asɔ dimɛna, kete ɔsa kânga minitɛ ngana dia toki sso l’awui wayekama lo losanganya. Kɛsɔ ayokokimanyiya dia kondja wahɔ efula oma l’ɔkɛtshanyelo akɔ.

Ohokamelo wa lo nsanganya ya totshitshɛ ndo ya weke

Ondo nsanganya ya weke mbaleka monga l’awui wakoka tekola yimba oleki nsanganya ya l’etshumanelo. Dui sɔ koka koshimba dia mpokamɛ dimɛna. Kakɔna kayokokimanyiya na?

Ekɔ ohomba efula ndala djɔ dimɛna l’otsho. La pindju tshɛ la ntondo ka losanganya tatɛ, kimɛ ɔtɛ a dui dimɛna lo yimba. Enda ɔtɛ a dui wa sawo tshɛ, ndo hemba dia kanyiya kɛnɛ kayotama lo sawo diakɔ. Kamba dimɛna la Bible kayɛ. Anto efula mɛnaka dia mbɔsa nɔtɛ ya tomondo y’awui w’ohomba mbakimanyiyaka dia ndjela losanganya dimɛna. Funda awui wɛnayɛ dia wɛ ayoyonga l’ohomba wa kamba la wɔ lo lɔsɛnɔ ndo l’olimu ayɛ. Lushi tshɛ, nyɔkɛtshanyake awui amɔtshi wonya watanyatshu kana wayanyakawola oma lo losanganya. Dui sɔ ayonyokimanyiya dia kimɛ awui wakatami.

Nyetsha ana woho wa vɔ mpokamɛka

Ambutshi w’Akristo koka kimanyiya anawɔ, kânga weke totshitshɛ dia vɔ koma ‘akanga wa lomba dikambo dia panda’ lo ndjaka la wɔ lo nsanganya ya l’etshumanelo, lo nsanganya ya totshitshɛ kana ya weke. (2 Tim. 3:15) Lam’ele waonga ndo akoka wa mbidja yimba lo dikambo wele l’ana tshikitana, ekɔ ohomba monga la shɛnɔdi dia mbakimanyiya woho wa vɔ mpokamɛka la yambalo tshɛ. Alako wayela anɛ koka kokimanyiya efula.

La ngelo, lɔngɔsɔla tena dimɔtshi diahomba anayɛ watotshitshɛ mbidjasɛ ki dia mbadia kana menda esato wa l’ekanda aso w’Akristo. Ewɔ dia ndjâka la diangɔ di’ana ndjɔkɛnyaka ladiɔ lo nsanganya. Oko wakidiɔ l’Isariyɛlɛ w’edjedja, mbele ndo nshi nyɛ, ana ndjâka lo nsanganya ‘dia ndjohokamɛ ndo dia vɔ ndjeka.’ (Euh. 31:12) Lam’ɛnawɔ ɔnɛ kokaka, ambutshi amɔtshi mbishaka anawɔ kɔpi mɔtshi y’ekanda wekama lo nsanganya oyadi kânga weke akɛnda efula. Lam’akoma ana tomangase, kimanyiyawɔ dia vɔ ndjalɔngɔsɔla woho wa vɔ tosha kɔmatɛrɛ lo nsanganya etena kalɔmbawɔ ampokami dia sala dui sɔ.

Afundelo mɛnyaka diɔtɔnganelo di’efula diele lam’asa mpokamɛ kɛnɛ kata Jehowa la monga l’okitanyiya le nde. Dui sɔ koka mɛnama l’ɛtɛkɛta waki Mɔsɛ wakandatɛ wodja w’Isariyɛlɛ ate: “Dimi lambet[ɛ] ulungu la kete emenyi lu dikambu dianyu elo nti: Dimi lambukitsha lumu la nyoi, otshoko la mananu la ntundu kanyu. Okone nyosonole lumu . . . lu mbuka [Jehowa, Nzambi k]anyu, ngandji, lu [“mpokamɛ dui diande,” NW] ndu lu mbumamema.” (Euh. 30:19, 20) Ɛlɔ kɛnɛ, mpokamɛ wetshelo watosha Jehowa ndo kitanyiya wetshelo akɔ lo nsɛnɔ yaso ekɔ ohomba efula dia sho mbetawɔma le nde ndo kondja ɔtshɔkɔ wa lɔsɛnɔ la pondjo. Lâsɔ, ekɔ mɛtɛ ohomba sho kitanyiya ɛtɛkɛta waki Yeso wata ɔnɛ: ‘Dja yimba lo woho wahokamɛyɛ’!​—Luka 8:18.