‘Hokamɛ Kele Kokondja Wetshelo w’Efula’
1 Dibuku dia Tukedi mbutaka dia lomba lekɔ lo pangɔhangɔ ate: “Nyulungi, ne dia dimi luyanga mvuta akambu a waki, ne dia aui w’usimbwi wayanga ntumba uma l’unyo ami. Wulu wa ndaka antu weli wami, ndu yimba y’ololo . . . Nyumbukeli, ne dia wane watulamaka ditshelu diami, weli la ongenongeno. One lambuntana, atutanaka lumu, atuhumoka lukulu l’olo le [Jehowa].” (Tuk. 8:6, 14, 32, 35) Ɛtɛkɛta ɛsɔ mɛnyaka dimɛna woho wa wetshelo watokongɛ lo Losanganya la Distrikɛ “Embetsha w’Ɔtɛkɛta wa Nzambi.”
2 Ehomba wa nkumbo kaso k’anto l’ɔnango ka l’andja w’otondo wakasɛdingɔma ndo ekongelo ka losanganya lɔnɛ kakalɔngɔsɔma dia kotsha ehomba ɛsɔ. Wetshelo wa lo nyuma ndo alako w’eshika wayoshama kokaka, naka sho kamba lawɔ, tokimanyiya dia monga l’ɔngɛnɔngɛnɔ, monga la diɔtɔnganelo dia dimɛna lam’asaso la Jehowa, ndo dia shikimala lo mboka k’otsha lo lɔsɛnɔ la pondjo. Lo mɛtɛ, tekɔ la shadiya y’oshika ya ‘mpokamɛ woho wa kondja wetshelo w’efula.’—Tuk. 1:5.
3 La Ntondo ka Losanganya: Dia kondja wahɔ w’efula oma lo kɛnɛ katama, sho pombaka mbidjasɛ l’ahole aso ndo kitsha yimba yaso ki etena katatɛ losanganya. Kɛsɔ nɔmbaka di’onto ndjalɔngɔsɔla dimɛna. Kɛnɛ kayotokimanyiya efula lo dikambo sɔ ele tatɛ akambo la wonya. Lala la wonya. Emɔka esadi dia sala kɛnɛ kahombama di’anto wa l’olui ayɛ kondja wonya wa ndjalɔngɔsɔla ndo wa kondja yangɔ ya ndɛ. Koma esadi lo dihole dia losanganya dia wɛ tana dihole dia mbidjasɛ ndo nyanga kɛnɛ kele layɛ ohomba la ntondo ka losanganya tatɛ. Nkuke yayodihɔka l’eshidi 8:00 wa pindju ndo losanganya layotatɛ l’eshidi 9:30 wa pindju lushi tshɛ.
4 Lam’ele oyango wa ntondo wa nsanganya ele wa tombola Jehowa “lu sanganya,” etenyi tshɛ pombaka tatɛ lo yoho yatombola Nzambi kaso. (Osam. 26:12) Diɔ diakɔ diambokeketshama anto tshɛ dia mbidjasɛ la ntondo ka vɔ mbuta dia memba osambo wa ndjihwelo. Kɛsɔ mbɔtɔnɛka la kɛnɛ katɔlɔmba Afundelo dia: ‘Akambo tshɛ salema dimɛna ndo aha l’ofukutanu.’ (1 Kor. 14:40) Kɛsɔ alembetshiyatɔ le ɔm’ɔmɔ la l’atei aso na? Naka wɛ ambɛna dia ɔnɔmbɔdi w’etenyi ambodjasɛ lo lɔyɛnga etena kahomama mishiki wa l’etatelo, kete djasɛ lo diholɛ diayɛ aha la tshimbatshimba. Kɛsɔ ayokokimanyiya dia memba kamɛ l’anto akina osambo watatɛ l’etenyi tshɛ l’otema ɔtɔi dia tombola Jehowa.—Osam. 149:1.
5 Wonya wa Losanganya: Ɛzɛra “aka[lɔngɔsɔla] utema andi dia mbeka la ntsha elembe wa [Jehowa].” (Ez. 7:10) Ngande wakokaso nɔngɔsɔla etema aso dia nongola wetshelo watosha Jehowa na? Lam’endayɛ ɛtɛ w’asawo wa tenyi diotshikitanyi dia l’ekongelo ka losanganya, yambola wate, ‘Kakɔna kambutɛ Jehowa oma lo tshimbo ya losanganya lɔnɛ na? Ngande wakokami kamba l’awui anɛ dia dimi la nkumbo kami kondja wahɔ na?’ (Is. 30:21; Ef. 5:17) Tetemala la ndjambola wembola ɛnɛ lo losanganya l’otondo. Ɔsa nɔtɛ y’akambo wayoyokamba lawɔ. Tshungola etena ka kɛtshanya akambo akɔ l’ekomelo k’ekongelo ka lushi tshɛ. Kɛsɔ ayokokimanyiya di’aha mbohɛ ndo dia kamba l’akambo akɔ.
6 Mbidja yimba lo dikambo dimɔtshi wenya efula kokaka monga tshondo y’okakatanu. Kakɔna kayotokimanyiya di’aha mbekola yimba l’awui akina na? Kamba la washo ayɛ lo yoho ya dimɛna. Mbala efula, yimba yaso tshɔka l’akambo wakaso washo. (Mat. 6:22) Ɔnkɔnɛ, ewɔ tshelo ya kɛsakɛsaka dia menda lɛnɛ atomba yema ya londjo tshɛ kana osukusuku ɔmɔtshi. Tetemala la menda paka ɔtɛkɛtshi. Yela wadielo lo Bible kayɛ etena kadiema divɛsa dimɔtshi ndo tofɛke Bible kayɛ etena katawalembetshiya divɛsa diadishawɔ.
7 Ngandji k’Okristo ayototshutshuya dia mbewɔ fukutanya anto akina wonya wa losanganya. (1 Kor. 13:5) Ɔnɛ ekɔ “etena ka nembohala” ndo ka mpokamɛ. (Und. 3:7) Ɔnkɔnɛ, tewɔ asawo ndo weteto wele bu ohomba. Talɔngɔsɔdi akambo la ntondo di’aha tetetaka efula otsha lo nkomba. Tewɔ dia tetemala la ndɛ kana la nnɔ naka wonya wa diomuyelo amboshila, onyake paka kana dikambo dia hemɔ kɛmɔtshi. Wanɛ watshɔ la telefɔnɛ ya l’anya, fɔtɔ, kana kamɛra pombaka kamba la diangɔ sɔ lo yoho yahakoke futanya anto akina. Ambutshi pombaka sala woho wa nkumbo kawɔ k’otondo ndo ana waya l’ɛnɔnyi dikumi l’ɛmɔtshi mbidjasɛ kamɛ woho wa vɔ mbeya mbâlamaka.—Tuk. 29:15.
8 Ɔnɔnyi wetshi, ekumanyi kɛmɔtshi kele aya ɛnɔnyi akumi wende lo mbɔtɔ lo nsanganya ya weke akate ate: “Lakɛnyi dia losanganya lɔnɛ laki dimɛna efula nɛ dia ɔkɔkɔ okina. Suke l’ampokami tshɛ wakɔsaka nɔtɛ oyadi kânga ana w’akɛnda. Aki ndjaka nd’ɔlɔ menda. Wakakambaka la Bible dimɛna etena kakâlɔmbaka atɛkɛtshi dia mbifola akatshi amɔtshi.” Woho w’ohokamelo wa la yambalo wa ngasɔ mɛtɛ mandɔmaka. Vɔ telaka wahɔ sho l’asekaso waya lo losanganya, ndo kɛnɛ koleki tshɛ ele Jehowa Nzambi lele Ombetsha aso wa woke tombɔmaka.—Is. 30:20.