Woho wa nɔngɔsɔla sawo dikambo di’anto tshɛ

LOMINGU tshɛ, tshumanelo efula di’Ɛmɛnyi wa Jehowa tshumanaka dia mpokamɛ sawo dimɔtshi di’oma l’Afundelo dikambo di’anto tshɛ. Naka wɛ ekɔ ekumanyi kana okambi w’olimu, onde wɛ mɛnyaka dia wɛ ekɔ ɔtɛkɛtshi kana ombetsha w’oshika wa lo sɛkɛ? Naka eelo, kete vɔ koka kɔlɔmba dia wɛ mbisha sawo dimɔtshi dia lo sɛkɛ. Kalasa k’Olimu wa Teokrasi kambokimanyiya nunu akumi di’anangɛso dia vɔ monga l’akoka wa kondja diɛsɛ sɔ di’olimu. Naka wambokɔlɔmba dia nɔngɔsɔla sawo dia lo sɛkɛ, lende ahombayɛ tatɛ na?

Eka awui wa l’ekongelo

La ntondo ka sala eyangelo, adia ekongelo kakawakosha ndo kana yimba l’awui wa lɔkɔ edja ndo wɛ amboshihodia kɛnɛ kalangawɔ mbuta lɔkɔ. Kimɛ ɔtɛ a dui wa sawo diayɛ. Kakɔna kayoyetsha ampokami ayɛ na? Naa oyango wele layɛ na?

Shihodia dimɛna ɛtɛ w’awui wahɔnyi woleki ohomba. Sɛdingola awui woleki ohomba asɔ. Ngande wɔtɔnɛ dui tshɛ la lokanyi loleki ohomba la lo sawo diayɛ? L’ɛse ka dui tshɛ dioleki ohomba, wɛ ayɛna awui amɔtshi wahɔnyi. Tokanyi tasukɛ awui wahɔnyi asɔ tekɔ l’ɛse k’awui akɔ. Sɛdingola woho wasukɛ etenyi tshɛ ka sawo diayɛ etenyi k’oma la ntondo katɔ, woho wakɔtɔlatɔ otsha l’etenyi kayela, ndo wakokimanyiyatɔ dia kotsha oyango wele la sawo. Naka wɛ amboshihodia lokanyi loleki ohomba la lo sawo diayɛ, oyango wa sawo diakɔ, ndo woho wakokimanyiya awui woleki ohomba dia kotsha oyango akɔ, kete lâsɔ wɛ ambokoka tatɛ la mɔmbɔla sawo diayɛ.

Ntondotondo, wɛ koka mɛna ohomba kahanya sawo diayɛ lo tenyi nɛi kana tanu diele, etenyi l’etenyi kekɔ la dui ɔtɔi dioleki ohomba. Tɔlɔngɔsɔlake tenyi diakɔ tshɛ mbala ɔtɔi.

Ekongelo kakawakosha ekɔ tsho ehomɔ kakokimanyiya dia nɔngɔsɔla sawo diayɛ. Tɔ kema dikatshi diahombayɛ mbadiaka awui wa lɔkɔ wonya washayɛ sawo diayɛ. Tɔ kɛnyaka tsho woho wahomba nɔngama tokanyi. Wɛ ayohomba mbidja yema y’esɔ, ya lɛhɔ ndo y’epapa lɔkɔ, mbut’ate mɔtsha sawo diayɛ.

Okambelo wa l’Afundelo

Wetshelo waki Yeso Kristo nde l’ambeki ande wakɔsamaka oma l’Afundelo. (Luka 4:16-21; 24:27; Etsha 17:2, 3) Wɛ koka sala woho akɔ wamɛ. Afundelo mbahomba sukɛ sawo diayɛ. Diakɔ diele, lo dihole dia nembetshiya tsho kana mɛnya woho wa kamba l’awui wele l’ekongelo kakawakosha, sɛdingola woho wasukɛ Afundelo awui akɔ, oma lâsɔ ko wɛ mbisha wetshelo ayɛ lo ndjela Afundelo.

Etena kalɔngɔsɔlayɛ sawo diayɛ, sɛdingola divɛsa tshɛ diele l’ekongelo. Lembetɛ tshondo ya dikambo diatama l’etenyi kakɔ. Avɛsa amɔtshi koka kokimanyiya tsho dia wɛ mbeya woho wakasalema awui watɛkɛtayɛ. Aha avɛsa tshɛ wele l’ekongelo mbahombayɛ mbadia kana nembetshiya wonya washayɛ sawo diayɛ. Sɔtɔla wanɛ wɛnayɛ wate wayonga la wahɔ woleki le ampokami ayɛ. Naka wɛ ndjasha tshɛ l’avɛsa woshilami l’ekongelo kayɛ, kete ondo wɛ hatonga l’ohomba wa kamba l’avɛsa akina.

Dimɛna dia sawo diayɛ hadiolemanɛ l’efula k’avɛsa wayokamba layɛ, koko diɔ nemanɛka la wetshelo wayoyosha. Etena kalangɛ mbɔtshiya divɛsa, ɛnya lande na kakambayɛ ladiɔ. Ɔsa etena ka mɛnya woho wa kamba la diavɛsa diakɔ. L’ɔkɔngɔ wa wɛ mbadia divɛsa dimɔtshi, tofɛke Bible etena kakayadilembetshiya. Ondo ampokami ayɛ koka sala yoho yakɔ yamɛ. Ngande wakokayɛ nomialomia nsaki k’ampokami ayɛ ndo mbakimanyiya dia vɔ kondja wahɔ efula oma l’Ɔtɛkɛta wa Nzambi na? (Neh. 8:8, 12) Wɛ koka sala dikambo sɔ lo nembetshiya, mbisha ɛnyɛlɔ, ndo lo mɛnya woho wa kamba la divɛsa diakɔ.

Olembetshiyelo. Etena kalɔngɔsɔlayɛ olembetshiyelo wa divɛsa dimɔtshi di’ohomba, yambola wate: ‘Kakɔna kalembetshiya divɛsa nɛ na? Lande na kayomokamba ladiɔ lo sawo diami? Kakɔna kakoka ampokami ndjambola vamɛ lo kɛnɛ kendana la divɛsa nɛ?’ Mbeyaka monga ohomba wɛ sɛdingola avɛsa wa l’etenyi kakɔ, woho ndo dihole diakete awui akɔ, etshikitanu wele lam’asa tɔtɛkɛta, ndo oyango w’ɔnɛ lakafunde awui akɔ lo wolo wa nyuma k’ekila. Dikambo sɔ kɔlɔmbaka dia sala eyangelo. Wɛ ayotana awui efula w’ohomba l’ekanda watondja ‘ɔhɔmbɔ wa kɔlamelo ndo wa kɛsɔ.’ (Mat. 24:45-47) Tonake dia nembetshiya dui tshɛ diendana la divɛsa sɔ, koko lembetshiya ɔnɛ naka wɛ akalɔmbi ampokami dia ndjela wadielo adiɔ, kete diɔ mbɔtɔnɛka la dikambo dieyɛ lo nembetshiya.

Ɛnyɛlɔ. Oyango wa bɛnyɛlɔ ele dia konya ampokami ayɛ dia vɔ ndeka shihodia dikambo kana tɔndɔ dimɔtshi diakayatɛkɛtshi lo sawo diayɛ ndo mbakimanyiya dia vɔ dikimɛ. Bɛnyɛlɔ kimanyiyaka ampokami dia vɔ mboka kɛnɛ kowateyɛ ndo kiɛdika la kɛnɛ kambowoshilaka la mbeya. Kɛsɔ mbakasale Yeso etena kakandasha Dako diande dia lo Dikona dia diambo efula. Ditelo diele oko “fudu ya l’ulungu,” “alembo wa l’usui,” “suku dia tshitshe,” ‘luudu lakahikama lâdiko di’ave,’ ndo tɔtɛkɛta tokina ta woho ɔsɔ takasalaka dia wetshelo ande monga la nkudu k’efula, mbokɛma hwe, ndo di’aha anto mbohɛ wetshelo akɔ.​—Mat. tshap. 5-7.

Woho wa kamba la divɛsa. Nembetshiya divɛsa ndo mbisha ɛnyɛlɔ dia diokiya ayokokimanyiya dia mbisha anto ewo, koko okambelo wa l’ewo kɛsɔ mbatondja etombelo w’ɔlɔlɔ. Ekɔ mɛtɛ dia ampokami ayɛ mbele l’ɔkɛndɛ wa kamba la losango l’oma lo Bible, koko wɛ koka mbakimanyiya dia vɔ mbeya kɛnɛ kahombawɔ sala. Naka wɛ amboshikikɛ dia ampokami ayɛ wamboshihodia divɛsa dialembetshiyayɛ ndo wambɛna ohomba adiɔ, kete ɔsa etena ka mbaɛnya shɛngiya yele la divɛsa sɔ l’awui wetawɔwɔ ndo lo lɔkɛwɔ lawɔ. Ɛnya ɛlɔlɔ wayowokondja lo tshika tokanyi ta kɔlɔ kana lɔkɛwɔ lahɔtɔnɛ l’akambo wa mɛtɛ weyɛ lo nembetshiya.

Etena kakanyiyayɛ woho wakoka anto kamba l’avɛsa, tohɛke di’ampokami ayɛ ndja oma l’ahole wotshikitanyi ndo dia onto l’onto ekɔ l’akambo ande. Amɔtshi l’atei awɔ weke esadi woyashawɔ l’akambo wa mɛtɛ, akina weke akɛnda, akina nto waya epalanga, ndo akina wekɔ lo ndɔshana l’ekakatanu wotshikitanyi. Sala woho wa sawo diayɛ monga l’awui w’eshika ndo wendana l’awui wakomɛ anto lo lɔsɛnɔ. Ewɔ dia mbisha alako wɛnama di’oko wɛ ekɔ lo kanyiya paka dikambo di’anto amɔtshi ato.

Tɛdikɔ tahomba ɔtɛkɛtshi mbɔsa

Wambotashilaki kɔsɛ tɛdikɔ tɔmɔtshi tendana la sawo diayɛ. Wakashile mɛnya awui woleki ohomba ndo yɛdikɔ ya wonya y’etenyi l’etenyi ka dui tshɛ dioleki ohomba mɛnyama hwe. Tɛdikɔ tokina wɛmɛ mbahomba tiɔsa. Wɛ mbeyaka sɔna dia mbetsha wenya efula l’awui amɔtshi wahɔnyi ko wenya yema tshitshɛ l’awui akina. Tɔfɔnyake dia wɛ pombaka mɔmbɔla awui wele l’ɛse k’ɛtɛ w’awui wahɔnyi tshɛ lo yɛdikɔ ya wonya ya woho wamɛ. Kɛsɔ koka ndjokotshutshuya dia mbeta lowango lowango ndo dia pɔpa ampokami ayɛ awui wele bu ndo ohomba. Ngande wakokayɛ shikikɛ ɔnɛ l’etenyi kɛnɛ layetsha minitɛ efula ndo ɔnɛ l’etenyi kɛnɛ layɔtɛkɛta lo tshena pe, kana mbuta paka awui amɔtshi ato ko mbeta? Yambola wate: ‘Awui akɔna wayokimanyiya dia kɛnɛmɔla kanyi yoleki ohomba ya lo sawo diami? Awui akɔna wayoleka monga la wahɔ le ampokami ami? Onde naka dimi tshika divɛsa dimɔtshi diakashilami kana dikambo dimɔtshi diendana la divɛsa diakɔ, kete hawotoleka mbetawɔ kɛnɛ katami?’

Sala tshɛ dia mbewɔ mbidja ditakataka kana tokanyi tayɛ hita. Kânga Yeso Kristo, Ɔna Nzambi akewɔ dia tɛkɛta ‘awui ande hita.’ (Joa. 14:10) Eya di’oyango waya anto lo nsanganya y’Ɛmɛnyi wa Jehowa ele dia ndjoka awui w’oma lo Bible. Naka wɛ ɔsama oko ɔtɛkɛtshi w’oshika ɛlɔ kɛnɛ, kete ondo nɛ dia wɛ salaka la wolo di’aha kotola yambalo y’anto oya le yɛ, koko otsha l’Ɔtɛkɛta wa Nzambi. L’ɔkɔkɔ ɔsɔ mbangɛnangɛna anto asawo ayɛ.​—Fil. 1:10, 11.

L’ɔkɔngɔ wa wɛ sala di’ekongelo kakawakosha monga sawo dia dimɛna efula l’ekimanyielo k’Afundelo, kɛnɛ kahombayɛ sala nto ele diohola mbala efula. Ekɔ ɔlɔlɔ sala dikambo sɔ la dui dia wolo. Koko kɛnɛ kele ohomba ele ndjashikikɛ dia wɛ ekɔ l’awui tshɛ w’ohomba lo wɔɔngɔ ayɛ. Wɛ pombaka monga l’akoka wa disha l’otema ɔtɔi, mbidja yema ya lɛhɔ l’awui watayɛ, ndo mɔmbɔla awui wa mɛtɛ wele lɔkɔ la wangasanu tshɛ. La ntondo ka wɛ mbisha sawo diayɛ, yambola wate: ‘Oyango akɔna watamawese? Onde awui woleki ohomba kɛnɛmɔma dimɛna? Onde mɛtɛ awui wa lo sawo diami wayotomba oma l’Afundelo? Onde dui tshɛ dioleki ohomba tɔlakami otsha lo dui diahɔnyi? Onde sawo diami keketshaka anto dia monga la lowando otsha le Jehowa ndo lo tɛdikɔ tande? Onde ɛtɛkɛta wa ndjihelo mbɔtɔnɛka la lokanyi loleki ohomba la lo sawo, ndo vɔ mɛnyaka ampokami kɛnɛ kahombawɔ sala, ndo mbatshutshuyaka dia sala dikambo diakɔ?’ Naka wɛ kokaka kadimola wate eelo lo wembola ɛnɛ, kete ‘awui w’ewo’ mbayangayɛ tondja lo wahɔ w’etshumanelo ndo dia tombola Jehowa!​—Tuk. 15:2.