Wangasanu

WANGASANU kimanyiyaka dia salanganya dako. Kânga mbele ekɔ ohomba monga l’awui w’eshika, naka wɛ hasha sawo diayɛ l’osalanganu ndo la wangasanu, kete wɛ hatokotola yambalo y’ampokami ayɛ. Oyadi dihole diakɔna diakayole kana woho wa lonto lele layɛ, wɛ kokaka monga la wangasanu.

Tɛkɛta la nsaki. Lam’akandasawolaka la womoto l’ose Samariya, Yeso akate dia wanɛ watɛmɔla Jehowa pombaka mbɔtɛmɔla “lu nyuma la lu mete.” (Joa. 4:24) Ɔtɛmwɛlɔ awɔ pombaka ndja oma lo lowando l’oma k’ɛse otema ndo mbɔtɔnɛ l’akambo wa mɛtɛ wa l’Ɔtɛkɛta wa Nzambi. Naka onto ekɔ la lowando la ngasɔ, kete lɔ layɛnama oma lo yoho yatɛkɛtande. Nde ayolomɔlomɔ dia mbewoya anto akina awui wendana la tɛdikɔ taki Jehowa toludi la ngandji. Elungi kande, tɔjɛstɛ tasalande, ndo dui diande ayɛnya mɛtɛ yoho yayaokande.

Ko lande na katokomaka ko ɔtɛkɛtshi woka Jehowa ngandji ndo wetawɔ awui watande ɔtɛkɛta aha la monga la wangasanu na? Nde kema tsho l’ohomba wa nɔngɔsɔla awui wayondotosha koko nde pombaka ndjasha tshɛ lo sawo diande, ndo mbidja yimba yande tshɛ lɔkɔ. Tɔshi dia nde ayɔtɛkɛta awui wendana l’olambo wa tshungo waki Yeso Kristo. Etena kasha ɔtɛkɛtshi sawo diande, wɔɔngɔ ande pombaka ndola aha tsho l’awui wendana la dikambo sɔ, koko ndo la lowando lo kɛnɛ kalembetshiya olambo waki Yeso oyadi le ɔtɛkɛtshi ndamɛ kana le ampokami ande. Nde pombaka mɛnya lowando lande otsha le Jehowa Nzambi ndo otsha le Yeso Kristo l’ɔtɛ wa yɛdikɔ shɔ ya diambo. Nde pombaka kanyiya dikambo di’elongamelo ka woke ka lɔsɛnɔ kele la ntondo k’anto, mbut’ate elongamelo ka monga l’ɔngɛnɔngɛnɔ wa pondjo, ndo la yonge ya demba ya kokele lo nkɛtɛ kayokadimɔ paradiso! Lâsɔ, nde pombaka mbidja otema ande tshɛ lo dikambo sɔ.

Lo kɛnɛ kendana l’ofundji Ɛzɛra laki ombetsha ɔmɔtshi wa l’Isariyɛlɛ, Bible mbutaka dia nde “akalɔngɔsɔla otema ande dia sɛdingola ɛlɛmbɛ wa Jehowa, mbakitanyiya ndo mbaetsha lo Isariyɛlɛ.” (Ɛzɛra 7:10, NW) Naka sho sala ngasɔ, mbut’ate nɔngɔsɔla aha tsho awui wahombaso tota koko ndo etema aso, kete tayɔtɛkɛta awui wotombi oma k’ɛse otema. Naka sho mbewoya akambo wa mɛtɛ lo yoho shɔ, kete tayokoka kimanyiya ampokami aso efula dia vɔ monga la ngandji k’oshika k’akambo wa mɛtɛ.

Kanyiya dikambo di’ampokami ayɛ. Ɔtɛkɛtshi pombaka nto ndjashikikɛ ɔnɛ ampokami wekɔ l’ohomba wa mboka kɛnɛ kayangande mbuta. Kɛsɔ nembetshiyaka dia wonya walɔngɔsɔlayɛ sawo diayɛ, wɛ hahombe tsho tshumanya awui w’ohomba koko wɛ pombaka nto nɔmba Jehowa ɛlɔmbwɛlɔ kande dia mbeya kamba l’awui asɔ lo wahɔ w’anto wayanga tohokamɛ sawo diayɛ. (Osam. 32:8; Mat. 7:7, 8) Yambola bonde kele ampokami ayɛ wekɔ l’ohomba wa mboka awui asɔ, woho wayowokondja wahɔ oma lɔkɔ, ndo nganɛ wayoyokoka mbisha sawo diakɔ lo yoho yakoka ampokami shihodia ohomba w’awui akɔ.

Sɛdingola sawo diayɛ dimɛna edja ndo wɛ ambokondja kanyi mɔtshi yɛnayɛ wate yekɔ dimɛna efula. Kema ohomba yɔ monga kanyi y’oyoyo, koko wɛ koka ndjilembetshiya wɛmɛ lo yoho yotshikitanyi. Naka wɛ nɔngɔsɔla dikambo dimɔtshi diayokimanyiya mɛtɛ ampokami ayɛ dia keketsha diɔtɔnganelo diasawɔ la Jehowa, dia ngɛnangɛna tɛdikɔ tande, ndɔshana dimɛna l’ekakatanu wa lo lɔsɛnɔ la l’andja ɔnɛ, kana mbeya woho wa sambisha dimɛna, kete wɛ ayonga mɛtɛ l’akoka wa mbisha sawo diayɛ la wangasanu tshɛ.

Ko ayoyosala naka sawo diayɛ diekɔ wadielo wa lo sɛkɛ? Dia sala dikambo sɔ la wangasanu, ekɔ awui efula walɔmbama, koko aha paka monga tsho l’akoka wa mbadia tɔtɛkɛta dimɛna kana tikakatanya dimɛna. Eka awui wayoyadia. Naka etenyi kɛmɔtshi ka lo Bible mbayoyadia, kete sala yema y’eyangelo lo kɛnɛ kendana l’etenyi kakɔ. Yashikikɛ dia wɛ ekɔ lo shihodia ohomba w’awui akɔ. Enda woho wele awui asɔ ohomba le yɛ ndo le ampokami ayɛ, ndo adia l’oyango wa mɛnya ampokami ayɛ ohomba w’awui akɔ.

Onde wɛ ekɔ lo ndjalɔngɔsɔla otsha l’olimu w’esambishelo? Vusola sawo diayoyɔmbɔla ndo avɛsa wakayalɔngɔsɔdi dia tokamba la wɔ. Sɛdingola nto kɛnɛ kele lo timba t’anto. Naa nsango yeke katomba? Ekakatanu akɔna wahomana lawɔ? Etena kamboyalɔngɔsɔla dia mɛnya anto ɔnɛ Ɔtɛkɛta wa Nzambi mɛnyaka woho wa kandola ekakatanu awɔ, wɛ ayolomɔlomɔ dia mbaewoya dikambo sɔ, ndo wangasanu wayokoyɛ vɔamɛ.

Ɛnya wangasanu lo salanganya sawo diayɛ. Wangasanu ndeka mɛnama oma lo woho washayɛ sawo diayɛ l’osalosalo tshɛ. Dionga sɔ pombaka mɛnama l’elungi kayɛ. Wɛ pombaka tɛkɛta l’eshikikelo tshɛ, koko aha oko onto lafundɛ anto akina awui.

Ekɔ ohomba monga la wɛdimo. Amɔtshi koka nyanga dia tɛkɛta l’osalosalo l’oseka dikambo tshɛ. Vɔ koka monga l’ohomba w’ekimanyielo dia vɔ mbeya ɔnɛ naka onto okamba l’ɛtɛkɛta wa kawotake kana amboleka kɛnɛmɔla nsaki yele l’asolo, kete anto wayokanyiyaka dikambo diande lo dihole dia kanyiya dikambo dia losango lashande. Lo wedi okina, wanɛ wele l’ɔsɔnyi pombaka keketshama dia kɛnɛmɔlaka nsaki yawɔ ya l’asolo dimɛna.

Wangasanu sambiyamaka. Naka wɛ ayendaka ampokami ayɛ ndo ayonga la wangasanu lo sawo diayɛ, kete ndo ampokami ayɛ wayoyaoka woho akɔ wamɛ. Apolo akatɛkɛtaka l’osalosalo tshɛ, ndo akɔsamaka oko ɔtɛkɛtshi wa manamana. Naka wɛ ekɔ lo pɛtahɛta la nyuma ka Nzambi, kete sawo diayoyosha l’osalosalo tshɛ diayotshutshuya ampokami ayɛ dia mbɔsa yɛdikɔ.​—Etsha 18:24, 25; Romo 12:11.

Wangasanu wɔtɔnɛ la tokanyi tɔmbɔlayɛ. Ewɔ dia monga la wangasanu wa tshambandeko oma k’etatelo polo l’ekomelo ka sawo diayɛ di’aha ampokami ayɛ ndjodioka eshi. Lâsɔ kete hawotoka alako tshɛ wayoyosha. Kɛsɔ mɛnyaka ohomba wa nɔngɔsɔla tokanyi totshikitanyi lo sawo diayɛ. Tɔtɛkɛtake oko onto lele la wendjudi. Naka wɛ sɔna awui ayɛ dimɛna dimɛna, kete wɛ ayoyasha tshɛ lɔkɔ. Koko ekɔ awui amɔtshi walɔmba dia mbatɛkɛta la wangasanu oleki awui akina, lâsɔ lo sawo diayɛ di’otondo paka mbeya awui wahombayɛ kana wahayahombe tɛkɛta la wangasanu.

Awui woleki ohomba mbaleka sungana tɛkɛtama la wangasanu tshɛ. Sawo diayɛ pombaka monga la tokanyi ta weke tadikonya lo kondoko. Lam’ele tɔ mboleki ohomba lo sawo diayɛ, tɔ mbayokimanyiya ampokami ayɛ dia mbɔsa yɛdikɔ mɔtshi. L’ɔkɔngɔ wa wɛ shila la mbetawoya ampokami ayɛ, wɛ pombaka mbakeketsha ndo mbaɛnya wahɔ wayowokondja lo kamba l’awui wɔmbɔlayɛ. Wangasanu ayɛ wayokokimanyiya dia minanda etema w’ampokami ayɛ. Wangasanu pombaka ndjaka vɔamɛ, koko aha loyanga la wolo. Wɛ la dia monga l’ɔkɔkɔ ɔmɔtshi wa tɛkɛta la wangasanu, ndo awui wɔmbɔlayɛ mbayokɛnya ɔkɔkɔ akɔ.