Tɛkɛta woho wokoyɔtɛkɛtaka

NAKA wɛ tɛkɛta woho wokoyɔtɛkɛtaka, kete wɛ ayokotola yambalo y’anto oya lo kɛnɛ katayɛ. Onde wɛ koka mbetawɔ dui diotshi onto ɔmɔtshi lɔlɔtshi elungi ka losala dia mbishɛ elungi kande di’aha vɔ mbeya? Onde wɛ ayetawɔ dui diakɔ naka elungi ka losala kɔlɔtshi onto ɔsɔ ndeka kande hita olangala? Ondo bu. Ɔnkɔnɛ, lo dihole dia tɛkɛta oko onto okina, tɛkɛta woho wokoyɔtɛkɛta.

Tɛkɛta aha la mbokoya dui di’onto tshikitana la tɛkɛta yoho ya kɔlɔ. Pombaka nɛmiya ɛlɛmbɛ wa gramatika, mpotola ɛtɛkɛta, ndo mbewɔ di’aha tondja ɛtɛkɛta wahokɛma. Pombaka nto mbewɔ ɛtɛkɛta wa lofabe. Sho pombaka ndjashaka nɛmɔ nshi tshɛ, oyadi oma l’ɛtɛkɛta kana oma lo dionga diaso. Onto latɛkɛta woho wokondɔtɛkɛtaka hone dia tɛkɛta la kiongamu yamboleka ndo hayange dia mambiya anto akina.

L’Olimu w’esambishelo. Etena keyɛ suke la mbɔtɔ lo parsɛlɛ kɛmɔtshi kana kalangɛ tɛkɛta l’onto ɔmɔtshi dia mbosambisha, onde wɛ tokaka wɔma? Efula ka l’atei aso tokaka wɔma, koko le amɔtshi dikambo sɔ tolekoyaka. Wɔma koka tshikitanya dui di’onto kana sala di’onto tatɛ ngɛnguma, ndo wɔma wele l’onto koka mɛnama oma lo woho wasakande lokomba l’anya kana l’ɔtɛ.

Ekɔ awui efula wakoka konya opandjudi dia monga l’okakatanu ɔsɔ. Ondo nde ekɔ lo kanyiya woho wayowɔsa anto akina ndo ekɔ lo ndjambola dia kana wayɔngɛnangɛna sawo diande. Awui asɔ tshɛ tokomɛka, koko ekakatanu tombaka lam’alekaso mbidja yimba l’akambo asɔ. Kakɔna kakoka kokimanyiya naka wɛ oka wɔma la ntondo ka tomba l’esambishelo? Yalɔngɔsɔla dimɛna ndo lɔmba Jehowa l’etete. (Etsha 4:29) Kanyiya dikambo dia kɛtshi k’efula kele la Jehowa lo woho wetande anto dia ndjonga l’alemba wa kokele ndo la lɔsɛnɔ la pondjo lo Paradiso. Kanyiya dikambo di’anto wasalayɛ la wolo dia kimanyiya ndo ohomba wele lawɔ wa mboka lokumu l’ɔlɔlɔ.

Eya nto di’anto wekɔ la lotshungɔ la sala kɛnɛ kalangawɔ, ɔnkɔnɛ, vɔ koka mbetawɔ kana tona losango latayɛmbɛ. Kɛsɔ mbakonge kânga lam’akasambishaka Yeso l’Isariyɛlɛ w’edjedja. Ɔkɛndɛ ayɛ ekɔ tsho wa sambisha. (Mat. 24:14) Oyadi kânga anto hawokosha diaaso dia tɛkɛta la wɔ, wôngelo ayɛ la ntondo kawɔ ekɔ tshondo y’esambishelo. Wɛ ayotondoya nɛ dia wɛ mbetawɔka dia Jehowa kamba la yɛ dia kotsha lolango lande. Lam’akondjayɛ diaaso dia tɛkɛta lo waaso asɔ, weho akɔna w’ɛtɛkɛta wayoyotondja na? Naka wɛ mbidja yimba efula l’ehomba wele l’anto akina, kete anto wayɔngɛnangɛna ndo wɛ ayɔtɛkɛta oko wokoyɔtɛkɛtaka.

Lam’asambishayɛ, naka wɛ ayotsha ndo ayɔtɛkɛta woho wokoyɔtɛkɛtaka lushi tshɛ, kete ampokami ayɛ wayoyaoka dimɛna. Ondo vɔ wayoleka monga suke dia mbetawɔ tokanyi t’oma l’Afundelo talangayɛ mbaewoya. Lo dihole dia wɛmamɛ oto tɛkɛtaka paka wɛ mbashaka yema y’ɔtɛkɛta. Sawola la wɔ la lɔngɛnyi tshɛ. Yasha le wɔ ndo hokamɛka kɔmatɛrɛ yawɔ. Lo mɛtɛ, naka ahole wele ɔtɛkɛta kana mbekelo y’anto nɔmbaka dia sala awui amɔtshi dia mɛnya dilɛmiyɛlɔ etena katɛkɛtayɛ l’onto lahayeye, kete wɛ ayohomba nɛmiya awui asɔ. Koko, wɛ koka mongaka l’elungi k’ɔmɔnɔmɔnɔ wonya tshɛ.

Lo lɔyɛnga. Etena katɛkɛtayɛ la ntondo k’olui w’anto, mbala efula ndeka dimɛna wɛ tɛkɛta woho wokoyɔtɛkɛtaka, ndo tɛkɛta oko onto lasawola l’anto. Koko, naka ampokami wekɔ efula, kete wɛ ayohomba tɛkɛta la dui dia wolo ndo diokɛma hwe. Naka wɛ nyanga dia kimɛ sawo diayɛ l’ɔtɛ kana naka awui wakayafundji wamboleka efula, kete ondo wɛ ayoyakiyanya dia mbuta paka awui wakayakime l’ɔtɛ kana wakayafundji. Ɛtɛkɛta wasungana wekɔ ohomba, koko naka wɛ ndeka mbidja yimba lo dikambo sɔ, kete woshelo wa sawo ayonga pâ ndo ayona dia paka monga la kiongamu y’efula. Lâsɔ kete wɛ hatɔtɛkɛta woho wokoyɔtɛkɛtaka. Ɔnkɔnɛ, wɛ pombaka takonge tokanyi tayɛ dimɛna la ntondo ndo ndeka mbidja yimba lo tokanyi takɔ, koko aha lo tɔtɛkɛta tahombayɛ tɔtɛkɛta.

Ngasɔ mbahombayɛ sala ndo l’etena kakɔkɔnyawɔ lo losanganya lɔmɔtshi. Yalɔngɔsɔla dimɛna, koko tadiake kana kimɛ ekadimwelo ayɛ l’ɔtɛ. Di’anto ngɛnangɛna ekadimwelo ayɛ, wɛ pombaka kadimola lo mbidiya ndo lo kitshakitsha dui oko watoyɔtɛkɛtaka.

Oyadi wɛ ekɔ l’akoka w’ɔtɛkɛtshi w’ɔlɔlɔ, naka wɛ kamba la wɔ lo yoho yambotamba olelo, kete ampokami koka mbɔsa dia wɛ hayɔtɛkɛta oko wokoyɔtɛkɛtaka. Ɛnyɛlɔ, wɛ pombaka tɛkɛta lo yoho yokɛma hwe ndo mpotola ɛtɛkɛta dimɛna, koko aha yoho yahokɛma kana yaheyama heyama. Naka wɛ kamba dimɛna la tɔjɛstɛ tatɔtɔmiya kana talembetshiya woho wele dikambo, kete dui sɔ koka salanganya sawo diayɛ. Koko tɔjɛstɛ taheyama kana ta tshambandeko tayekola timba t’anto oma lo kɛnɛ katayɛ. Kamba la yɛdikɔ ya dui yahombama, koko aha la dui diamboleka wolo. Tena dimɔtshi, sunganaka wɛ mbisha sawo diayɛ la wangasanu tshɛ, koko wɛ la dia mbewɔ dia sala dui sɔ lo yoho y’ɔnɛ kawoshimboya. Wɛ hahombe kamba la wengwelo wa dui, wangasanu, ndo la nsaki lo yoho yakotola yambalo y’anto oya le yɛ kana yakoka nyangiya ampokami ayɛ.

Anto amɔtshi wekɔ la yoho yawɔ ya lânde yokowɔtɛkɛtaka, oyadi kânga aha sawo mbashawɔ. Ndo akina ndeka mbeya fudja sawo. Kɛnɛ kele ohomba ele tɛkɛtaka dimɛna lushi tshɛ ndo ndjalɔmbɔlaka oko Okristo wayasha nɛmɔ. Ɔnkɔnɛ, lam’ayoyonga lo lɔyɛnga, wɛ ayonga suke dia tɛkɛta woho wokoyɔtɛkɛtaka ndo ayɔngɛnyangɛnya anto.

Etena kadiayɛ lo sɛkɛ. Mbadia lo sɛkɛ la dui diokoyɔtɛkɛtaka nɔmbaka dia mbidja wolo. Dia wɛ sala dui sɔ, shihodia tokanyi toleki ohomba tayangayɛ tadia ndo sɛdingola woho wɔmbwamitɔ. Shihodiatɔ dimɛna, nɛ dia naka wɛ hasadi ngasɔ kete wɛ ayadiaka paka tɔtɛkɛta toto. Ona dia mbeya woho wadiema tɔtɛkɛta tɔmɔtshi tahayeye. Hemba mbadia la dui dia wolo dia mbeya ahole wayoyotadiyaka kana kitshakitsha dui ndo takakatanyaka tɔtɛkɛta lo yoho yakɛnɛmɔla tokanyi hwe. Sala dui sɔ mbala la mbala edja ndo wɛ adia aha la kakema. Ona woho wa manyamanya awui akɔ, dia kele etena kayoyadia awui akɔ la dui dia wolo, wadielo ayɛ wonge oko sawo. Ɔsɔ mbelɛwɔ tɛkɛta woho wokoyɔtɛkɛtaka.

Mbala efula, efula ka wadielo aso wa lo sɛkɛ mbɔsamaka oma l’ekanda walembetshiya Bible. Lâdiko wa wadielo washanawɔ lo Kalasa k’Olimu wa Teokrasi, sho mbadiaka avɛsa l’esambishelo ndo etena kashaso sawo oma lo lɔyɛnga. Anangɛso nongolaka ɔkɛndɛ wa mbadia edingɔ lo Wekelo wa Tshoto y’Etangelo ndo lo Wekelo wa Dibuku wa l’Etshumanelo. Anangɛso amɔtshi wakoka nongolaka asawo wadiawɔ ladia la ntondo k’ampokami lo nsanganya ya weke. Oyadi Bible mbadiayɛ kana awui w’oma l’abuku akina, adia ditelo diakate anto lo yoho yasalanganya awui akɔ. Naka ekɔ sawo dia lam’asa anto efula, kete tshikitanyaka yema ya dui lo ɛtɛkɛta w’onto l’onto. Dako dia mbidja yimba: Tonake dia ndeka mbidja oshimu esɔ, koko adia l’osalanganu tshɛ ndo woho wokoyadiaka.

Wadielo wasalema lo woho wokadiaka onto mongaka oko sawo. Vɔ hawonge oko heyama heyama koko mbetawoyaka anto.