Ekadimwelo lo wembola anyu

◼ Kanyi yakɔna yahomba monga laso lam’alaso edingɔ lo nsanganya na?   

Etenyi ka woke ka wonya kakalɔngɔswama dia wekelo wa Tshoto y’Etangelo la wekelo wa dibuku mbetaka lo walelo w’edingɔ. Kɛsɔ mɛnyaka ɔnɛ ombadi ekɔ l’ɔkɛndɛ w’ohomba efula lo kɛnɛ k’endana la wetshelo. Nde pombaka mbala lo yoho ya ‘mbokiya’ ampokami awui akɔ dia vɔ mbashihodia, ndo mbatshutshuya lo vɔ mbâkotsha. (Neh. 8:⁠8) Diɔ diakɔ diahomba ombadi ndjalɔngɔsɔla dimɛna. (1 Tim. 4:13; enda wekelo 6 lo Manuel pour l’École.) Akambo amɔtshi anɛ wahombaso ndjela dia walelo aso wa lo sɛkɛ ndowana.

Mbala Yikɔ lo Yikɔ lo Woho Wasungana. Tasɔtɔdi ntondo ɛtɛkɛta kana wetelo wahombayɛ mbika epole ɔsɛkɛ dia anto shihodia dimɛna.

Mponola Ɛtɛkɛta Dimɛna. Ekɔ ohomba dia tɛkɛta dimɛna ndo mponula ɔtɛkɛta dia ampokami shihodia wetelo wofundami l’ekanda. Yanga lo dikisiɔnɛrɛ ɛtɛkɛta wahayeye kana wahaleke tɛkɛtama.

Tɛkɛta Woho Wokɛma ndo la Wangasanu. Naka wɛ tɛkɛta la dui dia wolo ndo la wangasanu, kete wɛ ayokotola yambalo y’ampokami ayɛ, ayemula nsaki yawɔ ndo ayowasalanganya.

Tɛkɛta la Wangasanu ndo oko Onto Lasawola Lawɔ. Ɛtɛkɛta wa wɔdu hetsha sawo ohokosanu. Lo ndjalɔngɔsɔlaka ndo mboholaka tena la tena, ombadi ayoleka mangasana ndo ayetɛ walelo ande ɔlɔ nonga koko aha ɔlɛlɔ oto ndo yɛnyi.​—⁠Hab. 2:⁠2.

Mbala Kɛnɛ Tshɛ Kofundami. Awui wafundama l’ɛse ka dikatshi kâmɛ ndo akambo wele l’atei wa tokombo kana wa tɔkɔhi tadiemaka nshi tshɛ la dui dia wolo naka vɔ nembetshiyaka ɛngɔ kɛmɔtshi. Paka awui walembetshiya oma lɛnɛ otombi dikambo dimɔtshi mbahalema la dui dia wolo. Awui wofundami la tshina dia dikatshi pombaka mbalema lo dihole diodjiwɔ djembetelo l’odingɔ akɔ ndo mbuta ɔnkɔnɛ: “Awui wa l’ɛse ka dikatshi mbutaka ɔnɛ. . . ” L’ɔkɔngɔ a mbâla, ko wɛ tetemala l’etenyi k’odingɔ kotshikadi.

Walelo wa dimɛna wa lo sɛkɛ ekɔ yoho mɔtshi y’ohomba ya ‘mbetsha akina dia ntsha akambo tshɛ wakatofundɛ’ Ombetsha aso wa woke.​—⁠Mat. 28:⁠20.