Onga oko onto lasawola l’onto

MBALA efula anto ndjaokaka dimɛna etena kasawolawɔ l’angɛnyi awɔ. Ɛtɛkɛta awɔ tombaka l’onyɔ watekana ashi mbakɛla. Anto amɔtshi tɛkɛtaka efula, koko akina hawɔtɛkɛta efula. Diɔ diakɔ diele, tɛkɛta woho wokoyɔtɛkɛtaka tshutshuyaka anto akina dia vɔ lawɔ tɛkɛta.

Ɔnkɔnɛ, lam’asawolayɛ l’onto lahayeye, bu dimɛna sawola la nde oko onto lokekesanɛka la yɛ efula kana mbidja la nde shɛkɛsɛkɛ yamboleka. Lo ndjela mbekelo ya l’ahole amɔtshi, asawo tshɛ wa l’anto wahayeye pombaka tatɛ la loshilambo l’efula. L’ɔkɔngɔ wa mbasha dilɛmiɛlɔ diahombama sɔ, la shɛnɔdi tshɛ wɛ koka ndjodja yema ya shɛkɛsɛkɛ ndo monga oko ɔnɛ lasawola l’onto.

Wonya watɛkɛtayɛ lo lɔyɛnga, wɛ pombaka menda ɔlɔlɔ. Naka wɛ mbidja shɛkɛsɛkɛ yamboleka, kete losanganya l’Akristo layoshisha kɛnɛmɔ kalɔ ndo kɛnɛ katama hatɔsama la nɛmɔ. L’ɛtɛkɛta ɛmɔtshi, ekɔ tɔtɛkɛta tɔmɔtshi tahomba onto kamba latɔ naka nde ekɔ lo tɛkɛta l’opalanga, l’ombetsha, l’ɔnɛnɛ, kana l’ombutshi. (Enda ɛtɛkɛta wokambi lawɔ l’Etsha 7:2 ndo 13:16.) Naka onto ekɔ lo tɛkɛta la wadɛnde kana omɛnde, kana l’ɔngɛnyi ande ɔmɔtshi w’oshika, nde koka kamba la woho wa tɔtɛkɛta efula. Kânga mbele yoho yatɛkɛtaso lo lɔyɛnga hayohombe monga la kiongamu yamboleka, yɔ pombaka monga la dilɛmiyɛlɔ di’efula.

Koko ekɔ awui amɔtshi wakoka konya sawo di’onto oko diamboleka tshitshi k’efula kana kiongamu yambotamba olelo. Dui dimɔtshi l’atei w’awui asɔ ko okongelo w’ɛtɛkɛta kana wa ditelo. Okakatanu tombaka naka ɔtɛkɛtshi adiaka tɔtɛkɛta paka woho wofundamitɔ lo dikatshi. Tɔtɛkɛta ta lofunda tshikitana efula la ta lɔtɛkɛta. Lo mɛtɛ, ɔlɔngɔswɛlɔ wa sawo salemaka mbala efula l’ekimanyielo k’awui wele l’ekanda wambotombaka. Ekongelo ka sawo diaso tɛnyaka woho wɔlɔngami akambo. Koko naka wɛ ayɔmbɔla tokanyi paka yoho yofundamitɔ lo dikatshi kana mbadia mbala kakɔ ɔtɔi oma l’ekongelo kayɛ wonya washayɛ sawo diayɛ, kete ondo ɔtɛkɛta ayɛ hatonga oko onto lasawola l’anto. Dia monga oko onto lasawola l’anto, ɔmbɔla tokanyi l’ɛtɛkɛta ayɛ hita ndo ewɔ dia kamba la ditelo dia wolo wolo.

Dui dikina ele otshikitanyelo wa vitɛsɛ. Mbala efula, sawo diele l’awui wa wolo ndo diele la kiongamu yamboleka mongaka la lokema l’ɛtɛkɛta wele l’atutsha efula ndo la vitɛsɛ ya woho akɔ wamɛ. Lo asawo aso wa lushi la lushi, sho tshikitanyaka vitɛsɛ ndo otale wa diomuyelo mbala efula.

Lo mɛtɛ, lam’atɛkɛtayɛ la ntondo k’anto efula, wɛ hahombe tsho tɛkɛta oko onto lasawola l’anto, koko paka mbidiya yɛdikɔ ya dui ndo tɛkɛta la wangasanu dia kotola yambalo yawɔ.

Dia wɛ tɛkɛta oko onto lasawola l’anto l’esambishelo, wɛ la dia monga la mbekelo ka tɛkɛtaka dimɛna lushi tshɛ. Kɛsɔ halembetshiya dia pombaka wɛ mbeya mukanda efula. Koko ekɔ ɔlɔlɔ wɛ tɛkɛtaka yoho yayotshutshuya anto akina dia mbɔsa kɛnɛ katayɛ la nɛmɔ. Aha la mbohɛ dikambo sɔ, sɛdingola dia kana ekɔ dikambo dimɔtshi l’atei w’akambo wayela anɛ diele wɛ pombaka ndjalowanya lɔkɔ l’asawo ayɛ wa lushi la lushi.

1. Lo ndjela dako dia lo Kolosai 3:​8, wɛ la dia mbewɔ dia kamba l’ɛtɛkɛta wa lɔsɛndji kana w’anyanya. Koko, kema kɔlɔ kamba la tɔtɛkɛta teya anto tshɛ. Tɔtɛkɛta teya anto tshɛ kana tatɛkɛtama lushi tshɛ bu amɛna efula, koko tɔ mbɔtɔnɛka l’ɛlɛmbɛ w’ɔtɛkɛtɛlɔ wetawɔma.

2. Ona woho wa kambaka la tɔtɛkɛta takɛnɛmɔla hwe kɛnɛ kalangayɛ mbuta.

4. Onga la mbekelo ka tɛkɛta l’ɛtɛkɛta wa wɔdu ndo wokɛma hwe naka ekɔ dikambo diahayalange anto diohɛ.