Kamba la wembola dimɛna

LAM’ELE wembola nɔmbaka okadimwelo oyadi wa l’onyɔ kana wa lo yimba, vɔ kimanyiyaka di’ampokami ayɛ ndjasha lo kɛnɛ katayɛ. Wembola koka kokimanyiya dia tatɛ sawo ndo dia mengɔnya l’onto tokanyi takeketsha. Oko weyɛ ɔtɛkɛtshi ndo ombetsha, wɛ koka kamba la wembola dia memula nsaki, dia kimanyiya onto ɔmɔtshi dia kana yimba lo dui diasawolanyu, kana dia mbidja dikako vɔlɛ lo kɛnɛ katayɛ. Naka wɛ kamba la wembola dimɛna, kete wɛ ayokeketshaka anto akina dia vɔ kana yimba dimɛna lo dihole dia vɔ pokamɛka tsho. Onga l’oyango ɔmɔtshi lo yimba, ndo oka wembola ayɛ lo yoho yayokokimanyiya dia kotsha oyango akɔ.

Dia keketsha onto dia nde lawɔ tɛkɛta. Lam’eyɛ l’esambishelo, konake woho wa kotola anto oya lo sawo naka vɔ nangaka sala dikambo sɔ.

Ɛmɛnyi wa Jehowa efula tatɛka sawo dia dimɛna lo mimbola tsho ɔnɛ: “Onde wɛ atayambolaka dia . . . ?” Etena kasɔnawɔ wombola wele mɛtɛ lo wɛɔngɔ w’anto efula, vɔ koka monga l’eshikikelo ka sawola l’anto dimɛna l’esambishelo. Oyadi wombola ɔsɔ wekɔ oyoyo le anto akina, vɔ koka memula nsaki kawɔ. Lam’atɛkɛtayɛ awui wotshikitanyi, wɛ koka mbɔtshiya awui akɔ l’ɛtɛkɛta wele oko: “Akanyiyayɛ . . . ?,” “Afɔnyayɛ . . . ?,” ndo “Onde wɛ mbetawɔka dia . . . ?”

Lam’akasukana osambisha Filipɛ otsha le owandji w’alembe w’ose Etiyɔpiya lakadiaka prɔfɛsiya k’Isaya la dui dia wolo, Filipɛ akawombola tsho ate: “We nimbitelaka [kana shihodiaka] kene kalaye?” (Etsha 8:30) Wombola ɔsɔ wakasha Filipɛ diaaso dia nembetshiya akambo wa mɛtɛ wendana la Yeso Kristo. Lo kamba la wembola wa ngasɔ, Ɛmɛnyi wa Jehowa wa nshi nyɛ tanaka anto wele mɛtɛ la mposa k’efula ka shihodia akambo wa mɛtɛ wa lo Bible.

Anto efula wayokohokamɛ, naka wɛ ayowasha diaaso dia vɔ mbisha tokanyi tawɔ. L’ɔkɔngɔ wa wɛ mimbola wombola ɔmɔtshi, hokamɛ ompokami ayɛ la yambalo tshɛ. Onga la ngandji lo dihole dia mɔnyɔla okadimwelo wosha onto. Andola onto etena kɛnayɛ dia dui sɔ kokaka salema l’otema ɔtɔi. Lushi lɔmɔtshi, l’ɔkɔngɔ w’ofundji ɔmɔtshi “kaluya diui dia yimba,” Yeso akawandola lo mbotɛ ate: “We kema etali uma lu diulelu dia [Nzambi].” (Mako 12:34) Oyadi wɛ bu l’onto okina kanyi ɔtɔi, wɛ koka mbosha losaka l’ɔtɛ woshande kanyi yande. Kɛnɛ kotshinde koka kokimanyiya dia mbeya dionga diahomba monga layɛ etena keyɛ lo mbosambisha akambo wa mɛtɛ wa lo Bible.

Dia mbɔtshiya tokanyi t’ohomba. Etena katɛkɛtayɛ l’olui w’anto kana l’onto ɔtɔi, hemba dia kamba la wembola dia mbɔtshiya tokanyi t’ohomba. Yashikikɛ dia wembola ayɛ mendanaka l’awui wayasha ampokami ayɛ efula. Wɛ koka nto kamba la wembola wemula nsaki nɛ dia okadimwelo wekɔ yema wolo mbisha. Naka wɛ memala yema l’ɔkɔngɔ wa wɛ mboka wombola, kete ondo ampokami ayɛ wayoyela kɛnɛ kayangayɛ mbuta oma lâsɔ la yambalo tshɛ.

Lo diaaso dimɔtshi, omvutshi Mika akakambe la wembola ɛmɔtshi. L’ɔkɔngɔ wa nde mimbola kɛnɛ kakongɛ Nzambi oma le anto wɔtɛmɔla, omvutshi akahɛ nto wembola ekina ɛnɛi wele wombola la wombola wakahombe monga l’okadimwelo ɔmɔtshi. Wembola ɛsɔ tshɛ kimanyiyaka dia nɔngɔsɔla ambadi otsha l’ekadimwelo wa yimba wokambi lande dia komiya sawo diande. (Mika 6:6-8) Onde wɛ koka sala woho akɔ wamɛ wonya wetshayɛ? Hemba sala ngasɔ.

Dia kana l’anto yimba lo dui dimɔtshi. Wɛ koka kamba la wembola dia kimanyiya anto akina dia mboka woho watɔmbwama tokanyi l’ɔnɔngɔ. Lam’akandewoyaka as’Isariyɛlɛ awui w’ohomba efula, Jehowa akasale dui sɔ, oko wadiɛnya Malaki 1:2-10. Nde akawatɛ ntondo ate: “Dimi lakanyulangi.” Vɔ komonga la lowando lo ngandji kɛsɔ, diakɔ diakandawambola ate: “Esau aha onangu Jakoba?” Oma lâsɔ Jehowa akɛnya woho wakatshikala Ɛdɔma tɔngɔ too dia mɛnya ɔnɛ oma l’awui awɔ wa kɔlɔ, Nzambi konanga wodja ɔsɔ. Nde akakambe nto la bɛnyɛlɔ diaki ndo la wembola dia tɔtɔmiya woho waki wodja w’Isariyɛlɛ komonga la lowando lo ngandji kande. Wembola ɛmɔtshi waki oko ɛlɔmbɛdi waha la kɔlamelo mbakokaka. Wembola ekina, Jehowa ɛlɔmbɛdi ɛsɔ mbakandoke. Sawo sɔ memulaka nsaki ndo kotolaka yambalo yaso; diɔ mɔmbwama l’ɔnɔngɔ ndo losango la lɔkɔ hohamɛki.

Atɛkɛtshi amɔtshi kambaka dimɛna la wembola lo yoho yamɛ shɔ. Oyadi anto hawotokadimola l’onyɔ, ampokami mbidjaka yimba lo kɛnɛ katama watekana oko wanɛ wasawola l’onto.

Lam’alɔmbɔlaso wekelo wa Bible, sho kambaka la shambu yalɔmba dia nd’ombeki tɛkɛta. Lo mɛtɛ, ombeki ayokondja wahɔ efula naka nde ayokadimolaka l’ɛtɛkɛta ande hita. La dui dioludi tɔ la ngandji, kamba la wembola ekina dia kana yimba wɛ l’ombeki. Lo tokanyi toleki ohomba, keketshande dia kamba la Bible dia sukɛ okadimwelo ande. Wɛ koka mombola nto ɔnɛ: “Ngande wɔtɔnɛ awui anɛ la dui dikina diakateke? Bonde kele dikambo nɛ ohomba? Ngande wahombadiɔ mendana la nsɛnɔ yaso?” Shambu shɔ mboleki dimɛna lo dihole dia wɛmɛ mbishaka tokanyi tayɛ kana elembetshiyelo efula. Lo yoho shɔ, wɛ kimanyiyaka ombeki dia kamba la ‘dikoka diande di’ekanelo ka yimba’ dia nde tɛmɔla Nzambi.​—Romo 12:1.

Naka ombeki hashihodisha kanyi mɔtshi, kete onga la solo dia lotutsha. Mbeyaka monga ko nde ekɔ lo mbɛdika kɛnɛ katayɛ l’awui wakandetawɔ aya ɛnɔnyi efula. Naka wɛ nembetshiya dikambo sɔ lo yoho kina, kete nde koka dioka. Koko mbala mɔtshi, mbeyaka monga ohomba wɛ kana la nde yimba lo yoho ya wɔdu. Kamba l’Afundelo dimɛna. Kamba la bɛnyɛlɔ. L’ɔnɔngɔ wa bɛnyɛlɔ sɔ, kamba la wembola wa wɔdu watshutshuya onto dia kana yimba lo tolembetelo towoshayɛ.

Dia mbeya nsaki yele l’otema w’onto. Lam’akadimola onto wembola, aha mbala tshɛ mbatondɔkɛnɛmɔlaka kɛnɛ kele mɛtɛ l’otema ande. Nde mbeyaka tsho mbisha ekadimwelo wafɔnyande ɔnɛ wɛ ekɔ lawɔ ohomba. Lâsɔ, ekɔ ohomba monga la shɛnɔdi. (Tuk. 20:5) Oko wakasale Yeso, wɛ koka mombola ɔnɛ: “We mbetawoka diui so?”​—Joa. 11:26.

Lam’akatakana ambeki efula wa Yeso l’ɔtɛ wa kɛnɛ kakandate ndo wakawatshike dia mboyela, Yeso akalɔmbɛ apɔstɔlɔ ande dia vɔ mbuta kɛnɛ kaki l’etema awɔ. Nde akawambola ate: “Ndu nyu mbalanga ntsho?” Petero akakɛnɛmɔla nsaki yawɔ lo mbuta ate: “Khumadiondjo, le na atshosu? We keli la aui wa lumu la pundju. Shu taketawo; shu mbeyaka shati: We keli l’Ekila la [Nzambi].” (Joa. 6:67-69) Lo diaaso dikina, Yeso akambola ambeki ande ate: ‘Anto atawɔ ele Ɔna onto na?’ Oma lâsɔ, nde akoke wombola okina wakalɔmbɛ dia vɔ mbuta kɛnɛ kaki l’etema awɔ ate: ‘Ko nyu atanyu emi na?’ Petero akakadimola ate: “Kristu keye On’a [Nzambi k]a lumu.”​—Mat. 16:13-16.

Lam’ekayɛ l’onto Bible, wɛ koka sala woho akɔ wamɛ l’akambo amɔtshi. Wɛ koka mombola wate: “Ngande wɔsa anyayɛ wa la kalasa (kana wa l’olimu) dikambo nɛ?” Oma lâsɔ, wɛ koka mombola wate: “Ko wɛ ngande wadiɔsayɛ?” Naka wɛ ambeya kɛnɛ kele mɛtɛ l’otema w’onto, kete oko weyɛ ombetsha, wɛ ayeya mbokimanyiya efula.

Dia tɔtɔmiya. Wembola koka kokimanyiya dia tɔtɔmiya tokanyi. Ɔpɔstɔlɔ Paulo akasale ngasɔ oko wɔkɔndwamidiɔ lo Romo 8:​31, 32 ɔnɛ: “Naka [Nzambi] eko la su wedi ayeya ntahamela na? One laki kumpandja On’andi hita, keli akukimo dikambu diasu, ukundi ahandutusha ndu diango tshe kame la ndi?” Lembetɛ lanɛ dia, wombola tshɛ nembetshiyaka kɛnɛ kakatami ntondo.

L’ɔkɔngɔ wa nde tɛkɛta dia dilanya diaki Jehowa otsha le nkumekanga ka Babilɔna, omvutshi Isaya akɛnya mbetawɔ ka wolo kaki lande lo mbuta nto ate: “[Jehowa] kanga lulimbilimbi kakasanguya esangwelu kene, eya nkifukutanya? Lunya landi lambusimbo, eya lokonye na?” (Is. 14:27) Oma l’awui wele lɔkɔ, wembola wa ngasɔ mɛnyaka dia kanyi yotami hayokoke manyema. Ndoko okadimwelo wele ohomba lo wembola wa ngasɔ.

Dia mɛnya dia kanyi yekɔ kɔlɔ. Wembola w’amɛna koka nto kokimanyiya efula dia tondja kanyi ya kɔlɔ sɛkɛ. La ntondo ka nde kadimola pami kɛmɔtshi, Yeso akambola Afarisɛ ndo ambewi amɔtshi w’Ɛlɛmbɛ ate: “Nkonoya untu lushi l’ekila eko ekila, kana kema?” L’ɔkɔngɔ wa nde kɔnɔla onto akɔ, nde akawambola nto ate: “Untu akona l’atei anyu, ayuyala la punda kana ngombe, lam’ayutoko lu difuku di’ashi, ku ndi hakitundja esadi lushi l’ekila?” (Luka 14:1-6) Ndoko okadimwelo wakandalongamɛ, ndo ndoko okadimwelo wakawawosha. Wembola ɛsɔ wakakɛnɛmɔla tokanyi ta kɔlɔ taki lawɔ.

Tena dimɔtshi, kânga Akristo wa mɛtɛ koka monga la tokanyi ta kɔlɔ. Akristo amɔtshi wa lo ntambe ka ntondo wakafundaka anangɛwɔ lo tominadi dia kandola ekakatanu wakawakokaka kandola vamɛ lam’asawɔ. Ngande wakakandola ɔpɔstɔlɔ Paulo dikambo sɔ na? Nde akoke wembola ɛmɔtshi dia nɔngɔsɔla tokanyi tawɔ.​—1 Kor. 6:1-8.

Lo pemba, wɛ koka mbeka dia kamba dimɛna la wembola. Koko, ohɔ dia wɛ pombaka monga la loshilambo, djekoleko etena katɛkɛtayɛ l’epalanga w’anto, l’anto wahayeye, kana l’ewandji. Kamba la wembola dia nembetshiya akambo wa mɛtɛ wa lo Bible lo yoho yangɛnyangɛnya anto.