“Kanga lomba lo otema” koko okitshakitsha

1-3. Lande na kakokaso ndjashikikɛ dia Jehowa ekɔ l’okitshakitsha?

NAKA ombutshi wa pami ekɔ lo nanga mbokiya ɔnande leke dikɛnda dikambo dimɔtshi di’ohomba efula, ko munanda mɛtɛ otema ande, ngande wahombande nsala? Onde nde pombaka memala l’otale ande tshɛ la ntondo k’ɔna ko pangɔhangɔ dia mbookiya wɔma? Kana onde nde pombaka minyama ko mbeewoya dikambo diakɔ la lotutsha ndo la ngandji? Ombutshi wele la lomba, ndo la okitshakitsha ayoyanga dia mbookiya la lotutsha.

² Woho akɔna w’Ombutshi wele Jehowa, wa lotamanya kana wele la okitshakitsha? W’awui wolo kana wele la lotutsha? Jehowa mbeyaka akambo tshɛ ndo lomba lande bu la ekomelo. Ko, onde wɛ atɛnyi dia anto wele l’ewo ndo la yimba hawoleke monga l’okitshakitsha? Bible mbutaka dia “ewo konyaka lo monga la otako.” (1 Kɔrɛtɔ 3:19; 8:1) Koko Jehowa lele “kanga lomba lo otema,” ekɔ ndo la okitshakitsha. (Jɔbɔ 9:4) Kɛsɔ hɛnya dia Jehowa ekɔ lo dihole dia l’ɛse kana bu la lɔnɛnɛ koko mɛnyaka tsho dia nde bu la lotamanya. Lande na kediɔ ngasɔ?

³ Jehowa ekɔ ekila. Ɔnkɔnɛ, nde hakoke monga la dionga dia kɔlɔ diele oko lotamanya diakoka mbodja mindo. (Makɔ 7:20-22) Ndo nto, tende kɛnɛ kakate omvutshi Jɛrɛmiya lo dikambo dia Jehowa: “Wɛ mɛtɛ ayohɔ ndo ayonkusamɛ.”a (Delo dia Jɛrɛmiya 3:20) Ohokanyiya! Jehowa Nkumi kaheme l’andja w’otondo aketawɔ dia ‘nkusama’ kana polɔ dia mbɛdima la Jɛrɛmiya l’oyango wa nde mpokamɛ onto lele bu kokele ɔsɔ. (Osambo 113:7) Eelo mɛtɛ, Jehowa ekɔ la okitshakitsha. Ko okitshakitsha waki Nzambi alembetshiyawɔ? Diɔtɔnganelo diakɔna diele lam’asawɔ la lomba? Ndo naa ohomba awɔ le so?

Woho wɛnya Jehowa dia nde ekɔ l’okitshakitsha

4, 5. a) Okitshakitsha kɛdikɛdi na, ngande wɛnamawɔ, ndo lande na kahawakoke mbɔsama oko ɔhɔdu kana ɔsɔnyi? b) Ngande wakɛnya Jehowa okitshakitsha lo dionga diaki lande otsha le Davidɛ, ndo okitshakitsha waki Jehowa wekɔ la wahɔ akɔna le so?

⁴ Okitshakitsha kɛdikɛdi yimba ya ndjaholoya, yele bu la lotamanya kana la ndjadiya. Oko wediɔ dionga dia l’etei k’otema, okitshakitsha mɛnamaka oma lo waonga wele oko memakana, lotutsha, ndo ekanelo k’ɔlɔlɔ. (Ngalatiya 5:22, 23) Koko onto lele la waonga wangɛnyangɛnya Nzambi asɔ hahombe mbɔsama oko ɔhɔdu kana ɔsɔnyi. Vɔ hawɛnya dia Jehowa hakoke momala nkɛlɛ ka losembwe kana nkamba la wolo ande wa nanya. Koko oma l’okitshakitsha ndo memakana kande Jehowa mɛnyaka nkudu k’efula kele lande, mbuta ate wolo wele lande wa monga la ndjakimɛ ka kokele. (Isaya 42:14) Ngande wokakatanyi okitshakitsha la lomba? Dibuku dimɔtshi dialembetshiya awui wa lo Bible mbutaka ɔnɛ: “L’ekomelo, okitshakitsha mɛnyaka . . . ndjasha kaha la nyanga wahɔ ɔmɔtshi ndo wekɔ etatelo ka lomba tshɛ.” Ndooko lomba la mɛtɛ lakoka monga naka okitshakitsha bu. Wahɔ akɔna wakondjaso oma l’okitshakitsha wele la Jehowa?

⁵ Nkumekanga Davidɛ akembɛ Jehowa ate: “Wɛ mbishakami engawo kayɛ ka panda, lonya layɛ l’omi sukɛkami, ndo okitshakitsha ayɛ mbetɛkami woke.” (Osambo 18:35) Jehowa ndjaholoyaka dia ndjasha le anto wele bu kokele, dia mbakokɛ ndo mbasukɛ lushi la lushi. Davidɛ akeye dia ekɔ paka nɛ dia Jehowa aki suke dia ndjakitshakitsha mbakandakoke nongamɛ dia nkondja panda ndo kaanga nkoma nkumekanga ka woke. Onto akɔna l’atei aso mɛtɛ lotonga l’elongamelo ka panda otondonga Jehowa bu l’okitshakitsha ndo la lolango la ndjaholoya ko monga laso oko Ombutshi wa lotutsha ndo w’ɔlɔlɔ?

6, 7. a) Lo yoho yakɔna yele Jehowa l’okitshakitsha? b) Diɔtɔnganelo diakɔna diele lam’asa memakana la lomba, ndo akɔna akasha ɛnyɛlɔ koleki lo dikambo sɔ?

⁶ Okitshakitsha ekɔ dionga dia dimɛna efula diahomba anto wele la kɔlamelo monga ladiɔ. Diɔ kakatana la lomba. Ɛnyɛlɔ, Tokedi 11:2 mbutaka ɔnɛ: “Lomba lekɔ kaamɛ la akanga w’okitshakitsha.” Koko Bible hatɛkɛta pondjo di’ɔnɛ Jehowa ekɔ la okitshakitsha wele oko anto. Okitshakitsha watɛkɛtama lo Afundelo dikambo di’anto nangaka mɛnya dia onto mbeya elelo ande dimɛna, mbuta ate lam’akomɛ akoka ande. Koko, Kanga-Wolo-Tshɛ bu la elelo, onyake wɛnɛ wayadjɛnde ndamɛ dia nkitanyiya ɛlɛmbɛ ande wa losembwe. (Makɔ 10:27; Tito 1:2) Ndo nto, oko wende Nkum’Olongo, ndooko onto lahombande nɛmbɛɛ. Ɔnkɔnɛ, kanyi ya okitshakitsha wa woho ɔsɔ hayendana la Jehowa.

⁷ Jehowa ekɔ l’okitshakitsha lo woho wetawɔnde mbɔtɔnɛ l’anto. Nde ekɔ nto la memakana. Nde mbetshaka ekambi ande dia memakana ekɔ ohomba efula dia monga la lomba. Bible tɛkɛtaka dikambo dia “memakana kaya oma lo lomba.” (Jakɔba 3:13) Jehowa mbishaka ɛnyɛlɔ koleki tshɛ lo dikambo sɔ.

L’okitshakitsha tshɛ Jehowa mbishaka ɛkɛndɛ ndo mpokamɛka

8-10. a) Lande na kele ekɔ dikambo dia diambo lo woho wetawɔ Jehowa dia mbisha anto akina ɛkɛndɛ ndo mbahokamɛ? b) Ngande wakɛnya Kanga-Wolo-Tshɛ okitshakitsha ande otsha le andjelo?

⁸ Okitshakitsha wa Jehowa mɛnamaka lo woho wetawɔnde dia mbisha anto akina ɛkɛndɛ ndo dia mbahokamɛ. Ɔsɔ ekɔ dikambo dia diambo efula nɛ dia nde bu l’ohomba w’ekimanyielo, kana wa dako. (Isaya 40:13, 14; Rɔmɔ 11:34, 35) Koko, oko wadiɛnya Bible, Jehowa ndjakitshakitshaka lo toho tɔsɔ mbala efula.

⁹ Tɔshi ɛnyɛlɔ ka dikambo dimɔtshi di’ohomba efula diakatombe lo lɔsɛnɔ laki Abrahama. Abrahama akalongola angɛndangɛnda asato, ndo nde akete ɔmɔtshi ate Jehowa. Koko, angɛndangɛnda asɔ waki andjelo ndo ɔmɔtshi l’atei awɔ akaye lo lokombo la Jehowa ndo akatshaka akambo lo lokombo Lande. Lam’akatɛkɛtaka ndo wakasalaka ondjelo ɔsɔ dikambo dimɔtshi, aki oko Jehowa mbakatɛkɛtaka ndo mbakasalaka dikambo diakɔ. Jehowa akatɛ Abrahama lo tshimbo y’ondjelo ɔsɔ dia Nde amboka “ekoko wadawɔ lo dikambo dia Sɔdɔma la Ngɔmɔra.” Jehowa akate ate: “Dimi layanga mpolɔ dia tenda kana vɔ wekɔ lo nsala akambo wɔtɔnɛ l’ekoko wambokoma polo le mi ɛsɔ. Ko naka aha ngasɔ, kete dimi layeya.” (Etatelo 18:3, 20, 21) Aha lo mɛtɛ mɛtɛ mbakahombe Kanga-Wolo-Tshɛ “mpolɔ” ndamɛ. Koko, ondjelo mbakandahombe ntoma lo dihole diande. (Etatelo 19:1) Lande na? Onde Jehowa lɛna akambo tshɛ takinde l’akoka wa ‘mbeya’ akambo waketaka l’ɛtshi ka nkɛtɛ kɛsɔ? Nde aki lawɔ, koko l’okitshakitsha tshɛ nde akasha andjelo ɔkɛndɛ wa tenda akambo asɔ ndo wa ntshɔ tɛnana la Lɔta la nkumbo kande la Sɔdɔma.

¹⁰ Ndo nto, Jehowa mpokamɛka. Lam’akandalɔmbɛ andjelo dia mbosha tokanyi lo kɛnɛ kakahomba salema di’olanyelo wa Ahaba laki nkumekanga ka kɔlɔ, nde takinde l’ohomba wa tokanyi tɔsɔ. Koko nde aketawɔ kanyi yakatondja ondjelo ɔmɔtshi ndo akalɔmbɛ ondjelo akɔ dia nkamba layɔ. (1 Nkumi ya dikanga 22:19-22) Shi ɔsɔ aki mɛtɛ okitshakitsha?

11, 12. Lo diaaso diakɔna diakɛnyi Abrahama okitshakitsha waki Jehowa?

¹¹ Jehowa mbetawɔka dia mpokamɛ kaanga anto wele bu kokele dia vɔ mbeewoya ekiyanu awɔ. Ɛnyɛlɔ, lam’akandewoya Abrahama oyango ande wa ndanya Sɔdɔma la Ngɔmɔra, dikambo sɔ diakahandjola pami ka kɔlamelo kɛsɔ wɔɔngɔ. Abrahama akawotɛ ate: “Wɛ hasalaki ngasɔ pondjo. Onde Shushi ya nkɛtɛ k’otondo hatosala akambo la losembwe?” Nde akambola dia mbeya kana Jehowa hatolanya esomba ɛsɔ naka nde ntana anto w’ɔlɔlɔ 50 lɔkɔ. Jehowa akooshikikɛ dia Nde hosala dikambo sɔ. Koko Abrahama akambola nto, lo kitshakitsha lofulo lo anto 45, 40 ndo akatetemala mpoloya lofulo lɔsɔ. Kaanga mbakooshikikɛka Jehowa, Abrahama akatetemala la mpoloya lofulo lɔsɔ polo l’anto 10. Ondo laasɔ ko Abrahama atashihodia dimɛna woho wele kɛtshi ka Jehowa. Oyadi woho akɔna tshɛ, l’okitshakitsha ndo la solo dia lotutsha, Jehowa aketawɔ di’ɔngɛnyi ndo okambi ande Abrahama mbeewoya ekiyanu ande lo dikambo sɔ.​—Etatelo 18:23-33.

¹² Akanga a yimba ndo ambewi wa mukanda angana wetawɔ pokamɛ onto lele l’ɛse kawɔ la solo dia lotutsha dia ngasɔ?b Ngasɔ mbele okitshakitsha waki Nzambi kaso. Sawo sɔ akakimanyiya Abrahama nto dia nshihodia ɔnɛ Jehowa ‘hoke nkɛlɛ esadi.’ (Etombelo 34:6) Ondo woho wakandeyaka dia nde bu la lotshungɔ la ntona kɛnɛ kayanga Kanga-Wolo-Tshɛ nsala, Abrahama akɔɔsɛngasɛnga mbala hiende y’etondo ɔnɛ: “Jehowa le, lam’alangayɛ tomalake.” (Etatelo 18:30, 32) Jehowa komboka nkɛlɛ. Shi nde mɛtɛ ekɔ la “memakana kaya oma lo lomba”?

Jehowa ekɔ l’ekanelo k’ɔlɔlɔ

13. Lo ndjela woho wokambiwɔ layɔ lo Bible, tshɛkɛta “ekanelo k’ɔlɔlɔ” alembetshiyayɔ, ndo lande na kɔtɔnɛyɔ dimɛna la Jehowa?

¹³ Okitshakitsha wa Jehowa mɛnamaka nto lo dionga dikina dia dimɛna efula diahaleke mɛnama le anto wele bu kokele. Dionga diakɔ ko ekanelo k’ɔlɔlɔ. Jehowa bu tsho suke dia mpokamɛ ditongami diande diele la yimba, koko nde nangaka ndo mbetawɔka nsala kɛnɛ kɔɔlɔmbawɔ naka ndooko atɔndɔ ande wa losembwe wɔnyɔma. Koko oko wokambiwɔ la yɔ lo Bible, tshɛkɛta “ekanelo k’ɔlɔlɔ” nembetshiyaka “ndjaɔtɔnganyiya.” Dionga sɔ nto diekɔ yoho mɔtshi ya lomba laki Nzambi. Jakɔba 3:17 mbutaka dia: “Lomba l’oma la diko lekɔ . . . la ekanelo k’ɔlɔlɔ.” Yoho ya laande yɛnama ekanelo k’ɔlɔlɔ kaki Nzambi kaso kele la lomba lahadjama anya ele dikoka diande dia ndjaɔtɔnganyiya. Tohɔ dia lokombo la nde tetshaka dia Jehowa ndjalaka kɛnɛ tshɛ kahombama dia kotsha asangwelo ande. (Etombelo 3:14) Shi kɛsɔ mɛnyaka yimba ya ndjaɔtɔnganyiya ndo ekanelo k’ɔlɔlɔ?

14, 15. Ɛnɛlɔ k’Ɛzɛkiyɛlɛ ka pusupusu ka Jehowa atetshatɔ lo dikambo di’etenyi ka l’olongo k’okongamelo wa Jehowa, ndo ngande wotshikitanyiwɔ l’ekongamelo wa l’andja ɔnɛ?

¹⁴ Divɛsa dimɔtshi dia diambo dia lo Bible tokimanyiyaka dia mbeya dikoka diele la Jehowa dia ndjaɔtɔnganyiya. L’ɛnɛlɔ kɛmɔtshi, omvutshi Ɛzɛkiyɛlɛ akɛnyi etenyi ka l’olongo k’okongamelo wa Jehowa kokengami la ditongami dia lo nyuma. Nde akɛnyi pusupusu ka woke efula kele oko mutuka waki Jehowa walɔmbɔlande Ndamɛ wonya tshɛ. Kɛnɛ koleki kotola yambalo tshɛ ele woho wakɛndakɛnda pusupusu kɛsɔ. Etshimbi atɔ wa weke efula wekɔ la ndjɛkɛ nyɛi ndo ndola tɔɔ la washo woho ɔnɛ wakokawɔ mɛna dihole tshɛ, ndo vɔ koka mengesɔ la shashimoya ko ntshɔ otsha lo lɛkɛ lokina aha la memala kana tshimba. Ndo shakasaka ya pusupusu kɛsɔ hakɛndakɛnda oko mituka wemba wetsho wakasale anto. Tɔ koka ndawɔ lowango lele oko osase ndo kaanga kadimɔ mbala kakɔ ɔtɔi, ko mbɛlɛ otsha lo wedi okina! (Ɛzɛkiyɛlɛ 1:1, 14-28) Eelo, lo ndjela ɛnyɛlɔ kaki Kanga-Wolo-Tshɛ lele Omboledi Waheme tshɛ lakɛndjakɛndja pusupusu kɛsɔ, tɔ ndjaɔtɔnganyiyaka lo yoho ya diambo; ndo mbekesanɛka wonya tshɛ la etshikitanu ndo la ehomba w’eyoyo.

¹⁵ Anto koka tsho mpemba dia ndjaɔtɔnganyiya lo yoho ya kokele shɔ. Koko, anto ndo ekongamelo awɔ mongaka mbala efula awui wolo lo dihole dia ndjaekesanyiya, ndo lo dihole dia ndjaɔtɔnganyiya vɔ hawonge la ekanelo k’ɔlɔlɔ. Tɔshi ɛnyɛlɔ: Woke ndo wolo wele la shaka ya masuwa wɛmba pitilɔ ndo kawolo kɛmba diangɔ mbeyaka monga ndo wɔma. Ko onde dihomɔ sɔ koka mengesɔ mbala kak’ɔtɔi etena kahomanawɔ la wekamu ɔmɔtshi wa shashimoya? Etena kahomana kawolo kana masuwa wa weke ɛsɔ la wekamu ɔmɔtshi lam’atawatshu, vɔ bu la akoka wa mengesɔ mbala kak’ɔtɔi dia mbewɔ wekamu akɔ. Vɔ hawokoke memala la shashimoya. Kawolo katakɛndakɛnda koka temala paka lo Kilɔmɛtrɛ oko hiende l’ɔkɔngɔ wa vɔ mbika frɛ dia memala! Woho akɔ wamɛ mbele masuwa wɛmba pitilɔ mbeyaka ntetemala la nkɛndakɛnda Kilɔmɛtrɛ enanɛi l’ɔkɔngɔ wa vɔ nima mɔtɛrɛ. Oyadi kaanga vɔ kondjaka vitɛsɛ ya kawola ɛkɔngɔkɔngɔ, vɔ wayotshɔ otsha la ntondo Kilɔmɛtrɛ shato! Ngasɔ mbele ndo ekongamelo w’anto wele awui wolo ndo bu l’ekanelo k’ɔlɔlɔ. L’ɔtɛ wa lotamanya, anto tonaka mbala efula dia ndjaɔtɔnganyiya l’etshikitanu w’akambo. Woho wewɔ awui wolo ɔsɔ ambɔkɔsha amundji w’okanda efula ndo mandji ya pɔlitikɛ efula. (Tokedi 16:18) Tekɔ l’ɔngɛnɔngɛnɔ wa mbeya dia Jehowa l’okongamelo ande bu ngasɔ!

Woho wɛnya Jehowa ekanelo k’ɔlɔlɔ

16. Ngande wakɛnya Jehowa ekanelo k’ɔlɔlɔ otsha le Lɔta la ntondo ka ndanya Sɔdɔma la Ngɔmɔra?

¹⁶ Tɔtɛkɛtɛ nto dikambo di’olanyelo w’osomba wa Sɔdɔma la Ngɔmɔra. Ondjelo waki Jehowa akewoya Lɔta hwe ate: “Nyolawɔ lo lɛkɛ l’akona diaha nyu ndanyema.” Koko kɛsɔ kɔngɛnyangɛnya Lɔta. Nde akɔlɔmbɛ ate: “Jehowa le, lam’alangayɛ, aha lɛsɔ!” Oko wakinde l’eshikikelo dia nde mbeyaka tovɔ naka nde ndawɔ otsha l’akona, Lɔta akalɔmbɛ dia nde la nkumbo kande ndawɔ otsha l’osomba wa Zɔara. Koko Jehowa akalange ndanya ndo osomba ɔsɔ. Ndo nto, Lɔta takinde l’ɛkɔkɔ w’eshika wa mboka wɔma, nɛ dia Jehowa akakoke mbokokɛ l’akona! Jehowa aketawɔ kɛnɛ kakɔlɔmbɛ Lɔta ndo kondanya osomba wa Zɔara. Ondjelo akatɛ Lɔta ate: “Dimɛna efula. Dimi layokookɛ ndo hantolanya shombasomba yotshiyɛ.” (Etatelo 19:17-22) Shi Jehowa akɛnya mɛtɛ ekanelo k’ɔlɔlɔ?

17, 18. Ngande wakɛnya Jehowa dia nde ekɔ l’ekanelo k’ɔlɔlɔ lo kɛnɛ kakandasalɛ ase Niniva?

¹⁷ Jehowa tɛtɛka solo nto etena kayatshumoya onto l’otema ɔtɔi, ndo mbala tshɛ nde salɛka onto akɔ akambo la kɛtshi ndo la losembwe. Tende kɛnɛ kakete lam’akandatome omvutshi Jɔna otsha l’osomba wa Niniva wakalole l’akambo wa kɔlɔ ndo wa ngala. Jɔna aketeta lo toshinga ta Niniva, atewoya losango l’okɛma hwe ɔnɛ: L’ɔkɔngɔ wa nshi 40, osomba wa wolo ɔnɛ wayolanyema. Koko akambo wakatshikitana efula. Ase Niniva wakayatshumoya!​—Jɔna, tshapita 3.

¹⁸ Wɛdikelo wa woho wakasale Jehowa la woho wakasale Jɔna lo dikambo sɔ mbishaka wetshelo. La ntondo ka dikambo sɔ Jehowa akayaɔtɔnganyiya, lo ndjaala Ɔnɛ ladimanyiyana pɛkato lo dihole dia monga “ɔndɔshi wa ta wa wolo.”c (Etombelo 15:3) Koko, Jɔna aki awui wolo ndo takinde kaanga la yema ya kɛtshi. Lo dihole dia mbokoya ekanelo k’ɔlɔlɔ kaki Jehowa, nde kokadimɔ esadi oko kawolo kana oko masuwa wɛmba pitilɔ. Lam’ele nde akasambisha dia elanyelo, laasɔ elanyelo kakahombe paka ndja! Ɔnkɔnɛ, la solo dia lotutsha tshɛ, Jehowa aketsha omvutshi ande waki komonga la dionga sɔ wetshelo w’ohomba efula wendana la monga l’ekanelo k’ɔlɔlɔ ndo la kɛtshi.​—Jɔna, tshapita 4.

19. a) Kakɔna katoshikikɛ dia Jehowa ekɔ la ekanelo k’ɔlɔlɔ lo kɛnɛ kalongamɛnde oma le so? b) Ngande watɛnya Tokedi 19:17 dia Jehowa ekɔ Owandji wele “ɔlɔlɔ ndo la ekanelo k’ɔlɔlɔ,” koko ekɔ nto la okitshakitsha woleki tshɛ?

¹⁹ Ndo Jehowa ekɔ nto l’ekanelo k’ɔlɔlɔ lo kɛnɛ kalongamɛnde oma le so. Nkumekanga Davidɛ akate ate: “Nde mbeyaka dimɛna woho wakatakengama, nde mbohɔka dia tekɔ ditshu.” (Osambo 103:14) Jehowa mbeyaka elelo aso ndo woho weso bu kokele lo yoho yotoleki ndo shoamɛ. Nde halongamɛ pondjo dia sho nsala kɛnɛ kahatakoke nsala. Bible tshikitanyaka ewandji w’ana w’anto wele “ɔlɔlɔ ndo la ekanelo k’ɔlɔlɔ” la wanɛ wele “awui wolo.” (1 Petero 2:18) Woho akɔna w’Owandji wele Jehowa? Tokedi 19:17 mbutaka ɔnɛ: “Onto loka mbolambola kɛtshi ekɔ lo nsɔndja Jehowa diangɔ.” Mbokɛmaka hwe dia paka owandji w’ɔlɔlɔ ndo wele l’ekanelo k’ɔlɔlɔ mbakoka mɛna kiambokambo tshɛ y’ɔlɔlɔ yasalɛwɔ ase wola. Kɛnɛ koleki tshɛ ele, divɛsa sɔ mɛnyaka dia Otungi w’andja w’ontondo ndjaɔsaka oko onto lambokama dibasa di’anto asɔ wasalɛ ase wola akambo la kɛtshi! Onde ekɔ yoho kina ya monga la okitshakitsha ko ndeka laasɔ?

20. Ngande weyaso dia Jehowa mbokaka alɔmbɛlɔ aso ndo kadimolaka alɔmbɛlɔ akɔ?

²⁰ Jehowa ekɔ la memakana ndo l’ekanelo k’ɔlɔlɔ otsha l’ekambi ande wa nshi nyɛ. Etena kɔlɔmbaso la mbetawɔ, nde tokaka. Woho wahandatome akɛndji wa andjelo dia ndjɔtɛkɛta la so hɛnya dia nde hakadimola alɔmbɛlɔ aso. Tohɔ dia etena kakalɔmbɛ ɔpɔstɔlɔ Pɔɔlɔ asekande ambetawudi dia vɔ mbɔlɔmbɛ woho wa nde tshungɔ oma lo lokanu, nde akashikikɛ ate: “Dia dimi nkalola le nyu esadi.” (Hɛbɛru 13:18, 19) Ɔnkɔnɛ, alɔmbɛlɔ aso mbeyaka tshutshuya Jehowa dia nde nsala kɛnɛ kele, otonga aha alɔmbɛlɔ akɔ tshike totondokisala!​—Jakɔba 5:16.

21. Kakɔna kahatakoke mbuta lo kɛnɛ kendana la okitshakitsha waki Jehowa, ndo kakɔna kahombaso nanga le nde?

²¹ Memakana kande, woho wende suke dia mpokamɛ, solo diande dia lotutsha ndo ekanelo kande k’ɔlɔlɔ ekɔ toho takɛnɛmɔla Jehowa okitshakitsha ande, koko ndooko dionga ɔtɔi l’atei a waonga asɔ diɛnya dia Jehowa mɔnyɔlaka atɔndɔ ande wosembwe. Ewandji w’ɛtɛmwɛlɔ wa Lokristokristo mbeyaka fɔnya ɔnɛ wekɔ l’ekanelo k’ɔlɔlɔ lo woho wɔnyɔlawɔ ɛlɛmbɛ waki Jehowa wendana la lɔkɛwɔ dia ‘ngɛnyangɛnya atoyi’ waki ambetawudi awɔ. (2 Timɔte 4:3) Koko mbekelo kele l’anto ka mɔnyɔlaka ɛlɛmbɛ etena katanema diaaso dimɔtshi hɔtɔnɛ l’ekanelo k’ɔlɔlɔ kaki Nzambi. Jehowa ekɔ ekila ndo nde halanyaki ɛlɛmbɛ ande wa losembwe pondjo. (Akambo w’ase Lɛwi 11:44) Ɔnkɔnɛ, tolange eongelo kaki Jehowa kele la ekanelo k’ɔlɔlɔ woho wetɔ, mbuta ate tɔ kekɔ djembetelo mɔtshi y’okitshakitsha ande. Shi ekɔ ɔngɛnɔngɛnɔ wa mamba dia mbeya dia Onto loleki lomba tshɛ l’andja w’otondo mboleki ndo monga la okitshakitsha? Ekɔ mɛtɛ ɔngɛnɔngɛnɔ dia sho ndjasukanya la Nzambi kɛsɔ ka diambo, koko ekɔ la memakana, la solo dia lotutsha ndo l’ekanelo k’ɔlɔlɔ!