Tonge la okitshakitsha wa mɛtɛ
‘Wɛ atoshimbɛka onto lele la okitshakitsha.’—2 SAMUELE 22:28.
1, 2. Lo dui diakɔna diafɔna ewandji efula wa lo andja ɔnɛ?
DIMƐTA dia lo Edjibito mɛnyaka weho w’apami wakalɔmbɔlaka wodja ɔsɔ lo nshi yakete. Ewandji ekina wakatshike nsango lo ɔkɔndɔ w’anto ko: Senakeribɛ ka l’Asuriya, Alexandre le Grand ka la Ngirika ndo Jules César ka la Rɔma. Ewandji ɛsɔ tshɛ fɔnaka lo dui ɔtɔi. Vɔ kombeyama oko anto waki la okitshakitsha wa mɛtɛ.—Mateu 20:25, 26.
2 Onde wɛ kokaka fɔnya dia ɔmɔtshi l’atei w’ewandji ɛsɔ aki la mbekelo ka mbetetaka lo diolelo diande dia tana ase wola waki l’ohomba wa ekeketshelo? Kema! Ndo vɔ kotshɔka lo mvudu yaki anto wakahɛnyahɛnyamaka dia tâkeketsha. Dionga diawɔ tshikitana mɛtɛ efula la diaki Jehowa Nzambi, Owandji Waheme andja w’otondo!
Ɛnyɛlɔ koleki dimɛna ka okitshakitsha
3. Owandji Waheme lâdiko dia tshɛ ngande wasalɛnde ambolami ande w’anto akambo na?
3 Jehowa ekɔ woke heyama ndo lâdiko dia tshɛ, koko “[nde] atukaka ashu andi lu kete tshe, dia nsukela waku weli la etema tshe le ndi.” (2 Ekondo 16:9) Kakɔna kasala Jehowa etena kɛnande atɛmɔdi ande wahɛnyahɛnyama lo yimba l’ɔtɛ wa ehemba wa weho la weho? Lo yoho mɔtshi, nde ‘ekɔ kâmɛ’ la anto asɔ lo ekimanyielo ka nyuma kande k’ekila “dia mbulula lumu la kanga ndjakitshakitsha la nkikitsha kanga utema wambate.” (Isaya 57:15) Ɔnkɔnɛ, oma lo ekimanyielo kande, atɛmɔdi ande wambokeketshama ndo wambokoka mbokambɛ la ɔngɛnɔngɛnɔ. Ande okitshakitsha wele la Nzambi lee!
4, 5. a) Omembi w’esambo akandakanyiyaka lo woho wakamba Jehowa la ɛlɔmbwɛlɔ kande? b) Kakɔna kalembetshiya yoho ‘yayaholoya’ Nzambi dia kimanyiya “usi wula” na?
4 Ndoko onto la lo andja ɔnɛ lakayakitshakitsha dia kimanyiya akanga wa pɛkato, ko mbɛdima la Nkum’Olongo. Diakɔ diakakoke omembi w’esambo funda ate: “[Jehowa] eli ladiku dia wedja tshe, la lutumbu landi ladiku di’ulungu. Akona edimi la [Jehowa, Nzambi k]asu? Ndi katudjaseka ladiku lu kiti kandi. Ndi [“atoholoyaka,” NW] ashu andi l’ulungu ndu la kete. Ndi atunyaka usi wula uma lu ditshu, ndu omenyi fono uma lu diala.”—Osambu 113:4-7.
5 Tolembete etelo k’ɔnɛ ‘nde atoyaholoyaka.’ Etena kendanatɔ la anto, etelo kɛsɔ kokaka mbela kanyi ya kɔlɔ ya ‘ndjaɔsa lâdiko dia ɔnɛ lele l’ɛse kana lele bu la lomombo oko sho.’ Jehowa Nzambi hakoke pondjo monga la dionga dia otako dia ngasɔ nɛ dia nde ekɔ pudipudi ndo ekila, ɔnkɔnɛ nde bu la “utaku.” (Mako 7:22, 23) Koko nde ‘ndjaholoyaka’ lo yoho nyɛ yele nde ndjakitshakitsha polo lo dihole di’onto lele l’ɛse kande, mbuta ate nde ndjaholoyaka oma lo dihole diande kana nɛmɔ diande dia mbala akambo la anto wele l’ɛse kande. Diakɔ diele, Bible mɔtshi kadimolaka Osambu 113:6 lo mbuta ɔnɛ Nzambi ndjakitshakitshaka. Etelo kɛsɔ mɛnyaka woho wele oma lo okitshakitsha ande, Nzambi kaso kotshɛka atɛmɔdi ande wele kema kokele ehomba awɔ la ngandji tshɛ!—2 Samuele 22:36.
Lande na kaki Yeso la okitshakitsha?
6. Naa tshelo yoleki woke ya okitshakitsha waki Jehowa?
6 Tshelo yaki Nzambi yoleki woke ya okitshakitsha ndo ya ngandji ele woho wakandatome Ɔnande l’enondo la ngandji dia nde ndjotɔ la nkɛtɛ ndo mbodiama oko onto dikambo dia panda k’anto. (Joani 3:16) Yeso akatetsha akambo wa mɛtɛ wendana la She lele l’olongo ndo akakimɔ lɔsɛnɔ lande la kokele dia minya “kolo ya wa la kete.” (Joani 1:29; 18:37) Lo kɛnɛmɔla waonga waki Jehowa lo yoho ya kokele, mbidja ndo okitshakitsha ande, Yeso aketawɔ sala kɛnɛ kakɔlɔmbɛ Nzambi dia sala. Ɔnkɔnɛ, nde akatshike ɛnyɛlɔ koleki woke ka okitshakitsha ndo ka ngandji kahatatshikaka ndoko etongami kaki Nzambi. Aha anto tshɛ mbakândola okitshakitsha waki Yeso. Atunyi ande wakawɔsaka oko “one luleki tshitshe.” (Danyele 4:17) Koko, Ɔpɔstɔlɔ Paulo akashihodia dia asekande ambetawudi wakahombe mbokoya Yeso ndo monga la okitshakitsha lo diɔtɔnganelo dia lam’asawɔ.—1 Koreto 11:1; Filipi 2:3, 4.
7, 8. a) Ngande wakeke Yeso dia monga la okitshakitsha? b) Leeta lakɔna lakasha Yeso wanɛ wakakoke ndjokoma ambeki ande?
7 Paulo akake epole ɔsɛkɛ lo ɛnyɛlɔ kaki Yeso ka diambo, etena kakandafunde ate: “Nyuyali la yimba nye l’atei anyu yaki ndu le Kristu Jesu. Kuyanga ndi aki lu efanelu ka [Nzambi], ndi kunkana ati: Mbedima pupu la [Nzambi] eko engo ka dimi munda. Keli ndi akayanya uma lu lutumbu, akayala uku ukambi, akuto lu efanelu k’antu. Lam’akandayala uku untu, ndi akayakitshakitsha, akayala la ukitanyia edja ndu lu nyoi, ee, nyoi ka l’utamba [w’asui].”—Filipi 2:5-8.
8 Toyambole shate: ‘Ngande wakeke Yeso dia monga la okitshakitsha?’ Yeso akasɛnɛ etena kaheyama mbɛdika suke la She lele l’olongo, etena kakandasha lonya lo otongelo wa diangɔ tshɛ oko “ukambi a komba.” (Tukedi 8:30) L’ɔkɔngɔ wa ɔtɔmbɔkwɛlɔ wa lo Ɛdɛna, Ɔna enondo laki Nzambi ɔsɔ akakoke mɛna kɛnɛ kakasalɛ She atshi wa pɛkato la okitshakitsha tshɛ. Woho akɔ wâmɛ mbele, etena kaki Yeso la nkɛtɛ, nde akakɛnɛmɔla okitshakitsha waki She ndo nde akasha anto leeta lɔnɛ ate: “Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu.”—Mateu 11:29; Joani 14:9.
9. a) Lande na kakangɛnangɛnaka Yeso ana? b) Wetshelo akɔna waketsha Yeso etena kakandakotola yambalo oya le ɔna ɔmɔtshi la tshitshɛ?
9 Lam’ele Yeso aki la okitshakitsha wa mɛtɛ, ana w’akɛnda kombôkaka wɔma. Koko, vɔ wakakotɔmaka otsha le nde. Ndo nde, akokaka ana ngandji k’efula ndo akawadjaka yimba. (Mako 10:13-16) Kakɔna kakangɛnangɛnaka Yeso le ana na? Lo mɛtɛ, vɔ waki la waonga w’amɛna efula wele ambeki ande amɔtshi wele waki epalanga kɔkɛnɛmɔlaka tena tshɛ. Ekɔ mɛtɛ dia ana w’akɛnda mbɔsaka epalanga oko anto wâleki. Diɔ diakɔ diokawɔ ambola efula. Eelo, lo mbaɛdika la epalanga efula, ana ndeka mbetawɔ wetshelo ndo vɔ bu la mbekelo ka ndjadiya oko wasala epalanga. Lushi lɔmɔtshi, Yeso akakotola yambalo y’ambeki ande oya le ɔna la tshitshɛ ndo akawatɛ ate: “Nyu hanyeyi mboto lu diulelu dia l’ulungu, tshikima nyu nyambukadimula etema, ndu nyambuyala uku tokendakenda.” Nde akakotsha ate: “Untu tshe layakitshakitsha uku kiendakenda nye, ndi kuleki wuki lu diulelu dia l’ulungu.” (Mateu 18:3, 4) Yeso akasha tɔndɔ nɛ ate: “[Onto] tshe layambiya, ayukitshakitshama; one layakitshakitsha ayumbiyama.”—Luka 14:11; 18:14; Mateu 23:12.
10. Ambola akɔna wayotɔsɛdingola?
10 Dikambo dia mɛtɛ sɔ monyiyaka ambola w’ohomba. Dia nongamɛ kondja lɔsɛnɔ la pondjo, sho pombaka monga la okitshakitsha wa mɛtɛ nɛ dia ɔsɔ ekɔ dui dimɔtshi dialɔmbama. Ko lande na kele mbala mɔtshi Akristo mongaka la okakatanu dia monga la okitshakitsha? Lande na kele ekɔ tshondo y’okakatanu dia sho minya lotamanya laso ndo monga la okitshakitsha la ntondo ka ekakatanu? Ndo kakɔna kayotokimanyiya dia monga la okitshakitsha wa mɛtɛ?—Jakoba 4:6, 10.
Lande na kele ekɔ wolo monga la okitshakitsha
11. Lande na kele bu dui dia diambo dia sho monga la okakatanu dia monga la okitshakitsha?
11 Naka tena dimɔtshi wɛ mongaka la okakatanu dia monga la okitshakitsha, kete eya diaha wɛmɛ oto mbele la okakatanu ɔsɔ. Lo 1920, jurunalɛ nyɛ yakatɛkɛta dikambo dia alako wa lo Bible wɛnya ohomba wa monga la okitshakitsha, lo mbuta ɔnɛ: “Lam’ele vɔ shihodiaka ohomba w’efula wele la okitshakitsha lo washo wa Nkumadiɔndjɔ, Akristo wa mɛtɛ tshɛ pombaka keketshama dia mongaka la dionga sɔ lushi la lushi.” Oma lâsɔ, jurunalɛ nyɛ mbutaka dui dimɔtshi dia mɛtɛ ɔnɛ: “Kânga mbasha Afundelo alako asɔ tshɛ, woho wamboleka anto ndjasha lo awui wa kɔlɔ ekɔ okakatanu woleki le wanɛ wakoma ekambi wa Nkumadiɔndjɔ ndo wayela mboka kɛsɔ dia kɛnɛmɔla dionga sɔ oleki waonga akina.” Yɔ mɛnyaka ɔkɔkɔ ɔmɔtshi wahomba Akristo wa mɛtɛ sala la wolo dia monga la okitshakitsha, ɔkɔkɔ akɔ ko eongelo kaso k’atshi wa pɛkato kombolaka nongola lotombo lahatahombe nongola. Ekɔ ngasɔ nɛ dia tekɔ tokanula ta Adama la Eva wadi l’omi wa atshi wa pɛkato ndo wakakɔ lo nsaki ya lokaki.—Romo 5:12.
12, 13. a) Ngande wadjɛ andja ɔnɛ Akristo wekamu dia vɔ kɛnɛmɔla okitshakitsha w’Okristo? b) L’ɔtɛ wa onto akɔna wele ekɔ wolo tshikala la okitshakitsha?
12 Ekɔ ɔkɔkɔ okina wele ekɔ wolo le so dia kɛnɛmɔla okitshakitsha. Ɔkɔkɔ akɔ ele, tekɔ lo nsɛna lo andja wakeketsha anto dia monga la yimba ya shɛmanedi. L’atei w’eyango waleka ndjasha anto wa lo andja ɔnɛ mbele ndo mposa ka ngɛnyangɛnya “saki ka dimba [dia pɛkato], ndu saki ka ashu, ndu utaku a lumu.” (1 Joani 2:16) Lo dihole dia vɔ nɔmbwama la nsaki ya woho ɔsɔ ya andja ɔnɛ, ambeki waki Yeso pombaka nama sso diawɔ ɔsɛlɛngɛ ndo mbidja yimba lo osalelo wa lolango la Nzambi.—Mateu 6:22-24, 31-33; 1 Joani 2:17.
13 Ɔkɔkɔ wa sato wele monga ndo kɛnɛmɔla okitshakitsha ekɔ wolo ele Satana Diabolo owandji w’andja ɔnɛ ekɔ kiɔkɔ ya otako. (2 Koreto 4:4; 1 Timote 3:6) Satana keketshaka anto dia monga la waonga ande wa kɔlɔ. Ɛnyɛlɔ, nde akalake Yeso “waulelu tshe wa l’andja ndu lutumbu lawo” naka nde mbɔtɛmɔla. Oma lo okitshakitsha ande, Yeso akatone la wolo tshɛ kɛnɛ kakalange mbosha Diabolo. (Mateu 4:8, 10) Woho akɔ wâmɛ mbele, Satana pembaka Akristo dia vɔ ndjayangɛ lotombo. Koko, Akristo wele la okitshakitsha salaka la wolo dia ndjela ɛnyɛlɔ kaki Yeso dia mbisha Nzambi lotombo ndo kɛnɛmɔ.—Mako 10:17, 18.
Tonge ndo tɔkɛnɛmɔlɛ okitshakitsha wa mɛtɛ
14. Elɛwɔ ‘okitshakitsha wa kashi’?
14 Lo mukanda ande otsha le ase Kɔlɔsɛ, ɔpɔstɔlɔ Paulo akawaewola lo kɛnɛ kendana la okitshakitsha wa lâdiko di’ɛlɔmɔ wele paka la oyango wa mambiya anto. Paulo akate dia ɔsɔ ekɔ ‘okitshakitsha wa kashi.’ Anto wayaɛnya diele oko wekɔ la okitshakitsha bu anto wele la lonyuma l’ɔlɔlɔ. Koko, aha la mbeya vɔ mɛnyaka ɔnɛ vɔ ‘ndola tɔɔ’ la lotamanya. (Kolosai 2:18, 23) Yeso akasha bɛnyɛlɔ dia okitshakitsha wa kashi wa ngasɔ. Nde akânya Afarisɛ l’ɔtɛ wa alɔmbɛlɔ awɔ wa ndjaɛnyanya ndo l’ɔtɛ wakawalanyaka kana wakawongaka la dungi dia ɔkɛtshi dia anto mɛna ɔnɛ wambokila mbo ya ndɛ. Dia alɔmbɛlɔ aso hita monga la nɛmɔ lo washo wa Nzambi, vɔ pombaka mbutama la okitshakitsha.—Mateu 6:5, 6, 16.
15. a) Akokaso sala dia nama okitshakitsha aso? b) Naa bɛnyɛlɔ dimɔtshi di’amɛna dia okitshakitsha diele laso?
15 Kana yimba lo ɛnyɛlɔ koleki dimɛna ka okitshakitsha kaki Jehowa Nzambi ndo kaki Yeso Kristo ayokimanyiya Akristo dia vɔ monga la yimba ya okitshakitsha wa mɛtɛ. Dui sɔ nɔmbaka dia mbekaka Bible mbala la mbala ndo ekanda walembetshiya Bible watosha ‘ɔhɔmbɔ wa kɔlamelo ndo wa kɛsɔ.’ (Mateu 24:45) Wekelo wa ngasɔ wekɔ ohomba efula le emendji w’Akristo, ‘diaha etema awɔ ndjambiya lâdiko dia anangɛwɔ.’ (Euhwelu k’Elembe 17:19, 20; 1 Petero 5:1-3) Tokane yimba lo bɛnyɛlɔ di’anto wele oko Ruta, Hana, Elizabɛtɛ ndo akina efula wakatshɔkwama l’ɔtɛ wa okitshakitsha awɔ. (Ruta 1:16, 17; 1 Samuele 1:11, 20; Luka 1:41-43) Tokanyiya nto dikambo dia bɛnyɛlɔ di’amɛna di’apami wele kânga mbakiwɔ la lokumu efula, vɔ wakatetemala kambɛ Jehowa la okitshakitsha, ɛnyɛlɔ oko Davidi, Jɔsiya, Joani Obatizanyi ndo ɔpɔstɔlɔ Paulo. (2 Ekondo 34:1, 2, 19, 26-28; Osambu 131:1; Joani 1:26, 27; 3:26-30; Etsha 21:20-26; 1 Koreto 15:9) Ko kayotota dikambo dia bɛnyɛlɔ efula dia nshi nyɛ dia okitshakitsha diɛnaso lo etshumanelo k’Akristo? Kana yimba lo bɛnyɛlɔ sɔ tshɛ ayokimanyiya Akristo wa mɛtɛ dia vɔ monga la ‘yimba y’okitshakitsha otsha le onto la onyande.’—1 Petero 5:5.
16. Ngande watokimanyiya olimu w’Okristo dia monga la okitshakitsha?
16 Tombaka mbala la mbala l’olimu w’Okristo koka tokimanyiya dia monga la okitshakitsha. Okitshakitsha tokimanyiyaka dia sambisha dimɛna anto wahateye wahomana la so lo esambishelo ka lo luudu la luudu ndo lo ahole akina. Dui sɔ diekɔ mɛtɛ djekoleko etena katona anto losango la Diolelo la wendjodi kana la ngala tshɛ mbala ka ntondo ka sho sawola la wɔ. Tena efula anto tonaka awui wetawɔso ndo okitshakitsha kokaka kimanyiya Okristo dia nde kadimolaka ambola la ‘memakana ndo la dilɛmiɛlɔ di’efula.’ (1 Petero 3:15) Ekambi waki Nzambi wele la okitshakitsha wakonɔ lo bɛtshi dia nkɛtɛ di’eyoyo ndo wakakimanyiya anto wele la mbekelo ndo la toho ta lɔsɛnɔ totshikitanyi. Mbala mɔtshi Akristo asɔ nɔmbamaka dia monga la okitshakitsha etena kekawɔ ɔtɛkɛta ɔmɔtshi dia ndeka mbeya kimanyiya anto wasambishawɔ lokumu l’ɔlɔlɔ. Vɔ mandɔmaka heyama l’ɔtɛ wa dui sɔ!—Mateu 28:19, 20.
17. Ɛkɛndɛ akɔna w’Akristo walɔmba dia monga la okitshakitsha?
17 Anto efula kotshaka ɛkɛndɛ awɔ w’Okristo la okitshakitsha tshɛ ndo mbetshaka wahɔ w’anto akina la ntondo ka wawɔ hita. Ɛnyɛlɔ, dia ombutshi wa pami ndjadjɛ elelo lo wenya wetshande lo elimu ande hita ndo nɔmbɔla wekelo wa Bible la anande, nde pombaka monga la okitshakitsha. Okitshakitsha kimanyiyaka nto ana dia vɔ nɛmiya ndo kitanyiya ambutshi awɔ wele kema kokele. (Efeso 6:1-4) Akristo wa wamato wele waomɛwɔ kema ambetawudi pomanaka mbala efula la ekakatanu wâlɔmba dia vɔ monga la okitshakitsha etena kasalawɔ la wolo dia kondja elonganyi awɔ oma lo ‘dionga diawɔ di’ɔlɔlɔ diɔsɔhanyemi la dilɛmiɛlɔ di’efula.’ (1 Petero 3:1, 2) Okitshakitsha ndo ngandji ka ndjahombia ekɔ nto ohomba efula etena kakotshaso la ngandji tshɛ ehomba wa ambutshi wele la hemɔ kana waya esombe.—1 Timote 5:4.
Okitshakitsha kandolaka ekakatanu
18. Ngande wakoka okitshakitsha tokimanyiya dia kandola ekakatanu?
18 Ekambi tshɛ wa Nzambi bu kokele. (Jakoba 3:2) Lâsɔ lo tena dimɔtshi, ekakatanu kana ewanu koka tomba lam’asa Akristo ahende. Ɔmɔtshi mbeyaka monga la ɔkɔkɔ wa shikaa wa momalɛ okina. Mbala efula, awui wa ngasɔ koka kandɔma etena kakambaso la dako nɛ diata ɔnɛ: “Nyukikaneli kolo. Nyudimanyanyia kolo yanyu, naka untu eko la ukina dikambu. Uku akanyudimanyia [Jehowa] kolo, dieli la nyu, ndu nyu dia nyimanyiana kolo.” (Kolosai 3:13) Lo mɛtɛ, ndjela dako sɔ bu dui dia wɔdu, koko okitshakitsha ayotokimanyiya dia kamba la diɔ.
19. Kakɔna kahombaso mbohɔka etena kasawolaso la onto lotosale kɔlɔ?
19 Tena dimɔtshi, Okristo ɔmɔtshi koka fɔnya dia okakatanu wele lam’asande la onto okina wekɔ woke efula woho ɔnɛ wele hakoke minya yimba oma lɔkɔ. Etena kɛsɔ, okitshakitsha ayowokimanyiya dia nde sawola la ɔnɛ lɔsande ɔnɛ akosalɛ kɔlɔ dia mbidja wɔladi. (Mateu 18:15) Ɔkɔkɔ ɔmɔtshi wasala dia mbala efula ekakatanu watomba lam’asa Akristo tetemala ele ɔmɔtshi kana vɔ akɔ ahende wekɔ la lotamanya efula dia mbetawɔ dia wakasale munga. Kana ɔnɛ lɔshi yɛdikɔ ya tosawola la okina mbeyaka sala dui sɔ lo ndjaɔsa dia nde kele osembɔki kana lo mɔnyɔla osekande okina. Koko okitshakitsha wa mɛtɛ ekɔ dimɛna efula dia kandola ekakatanu.
20, 21. Naa ekimanyielo koleki woke dia monga la okitshakitsha?
20 Nna di’ohomba efula dia monga la okitshakitsha ele nɔmba Nzambi dia nde tokimanyiya ndo tosha nyuma kande. Koko, tohɔ dia “[Nzambi] . . . atushaka one layakitshakitsha ngandji ka mamba [mbidja ndo nyuma kande k’ekila].” (Jakoba 4:6) Diɔ diakɔ diele, naka wɛ ekɔ la okakatanu la onyayɛ ombetawudi, kete lɔmba Jehowa dia nde kokimanyiya dia wɛ mbetawɔ oseka munga tshɛ kakayasale kamboyotondja owanu oyadi kekɔ tshitshɛ kana woke. Naka onto akakonyangiya ndo ɔnɛ lokosale kɔlɔ ambota la otema ɔtɔi ate: “Odimanyiya,” kete la okitshakitsha tshɛ dimanyiyande. Naka ekɔ wolo efula dia wɛ sala dui sɔ, kete lɔmba Jehowa dia nde kokimanyiya dia wɛ minya fushi tshɛ y’otako yele l’otema ayɛ.
21 Naka sho shihodia dia okitshakitsha mbelaka ɛlɔlɔ efula, kete tayotshutshuyama dia monga la dionga dia nɛmɔ sɔ ndo aha dishisha. Jehowa Nzambi ndo Yeso Kristo wekɔ bɛnyɛlɔ dia diambo efula lo dikambo sɔ! Tatohɛke pondjo eshikikelo katosha Nzambi ka ɔnɛ: “Difutu dia [okitshakitsha] la woma wa [Jehowa] dieli: ekundji, nemo la lumu.”—Tukedi 22:4.
Awui wa kana yimba
• Waa na wele bɛnyɛlɔ dioleki weke dia okitshakitsha?
• Lande na kele ekɔ wolo monga la okitshakitsha?
• Kakɔna kakoka tokimanyiya dia sho monga la okitshakitsha?
• Lande na kele ekɔ ohomba tetemala monga la okitshakitsha?
[Osato wa lo lɛkɛ 17]
Yeso aki la okitshakitsha wa mɛtɛ
[Osato wa lo lɛkɛ 19]
Andja ɔnɛ keketshaka anto dia vɔ sala la wolo dia ndeka akina
[Efundelo wɛnya kanga]
Fɔtɔ ka OMS oma le L. Almasi/K. Hemzǒ
[Osato wa lo lɛkɛ 20]
Okitshakitsha tokimanyiyaka dia sambisha anto wahateye wahomanaso l’esambishelo
[Esato wa lo lɛkɛ 21]
Ekakatanu kokaka kandɔma mbala efula naka sho komba la okitshakitsha ndo la ngandji dikambo diakɔ