Jehowa mbɔsaka ekambi ande wele l’okitshakitsha la nɛmɔ

1. Ngande wɔsa Jehowa anto wele l’okitshakitsha? Lembetshiya.

JEHOWA nangaka anto wele l’okitshakitsha. Paka wanɛ wele mɛtɛ l’okitshakitsha mbakoka monga la diɔtɔnganelo dia dimɛna la nde. Lo wedi okina “kanga otako nde mbeeyaka paka oma lo tshalola.” (Os. 138:6) Sho tshɛ nangaka ngɛnyangɛnya Jehowa ndo nangema oma le nde, diakɔ diele tekɔ l’ɛkɔkɔ w’eshika wa monga l’okitshakitsha.

2. Awui akɔna wayotɔsɛdingola lo sawo nɛ?

² Lo sawo nɛ, tayɔsɛdingola ekadimwelo wa ambola asato anɛ: 1) Okitshakitsha kɛdikɛdi na? 2) Lande na kahombaso nkɛnɛmɔla dionga sɔ? 3) Akambo akɔna wakoka mbidja okitshakitsha aso l’ohemba? Oko wayotodiɛna, etena kakɛnɛmɔlaso okitshakitsha, sho ngɛnyangɛnyaka otema wa Jehowa ndo shoamɛ kondjaka wahɔ.​—Tok. 27:11; Isa. 48:17.

OKITSHAKITSHA KƐDIKƐDI NA?

3. Okitshakitsha kɛdikɛdi na?

³ Onto lele l’okitshakitsha hafɔnya ɔnɛ nde ndeka anto akina, nde bu otako kana lotamanya. Bible mɛnyaka di’onto lele l’okitshakitsha ekɔ l’ekanelo k’ɔlɔlɔ lo diɔtɔnganelo diasande la Jehowa Nzambi ndo la wonyande onto. Onto lele l’okitshakitsha mbeyaka ɔnɛ onto tshɛ mboleka lo yoho mɔtshi.​—Flpɛ. 2:3, 4.

4-5. Lande na kakokaso mbuta ɔnɛ okitshakitsha wa mɛtɛ bu tsho dui dimɔtshi diɛnama lo washo?

⁴ Anto amɔtshi mɛnamaka oko wekɔ l’okitshakitsha. Vɔ mbeyaka monga diki. Kana vɔ mbeyaka monga anto wele la dilɛmiɛlɔ kana la loshilambo otsha le anto akina l’ɔtɛ wa mbekelo ndo woho wakawodiama. Koko, mbeyaka monga ko vɔ wekɔ l’otako w’efula. L’edjedja ka wonya, vɔ wayɛnya kɛnɛ kele mɛtɛ l’otema awɔ.​—Luka 6:45.

⁵ Lo wedi okina, aha naka anto mɛnamaka dia wekɔ l’eshikikelo ndo wekɔ lo mbuta awui hwe hwe, kete laasɔ wekɔ etako. (Jni. 1:46, 47) Koko, anto wele bu diki pombaka monga la yewo diaha ndjaɛkɛ l’akoka awɔ hita. Oyadi tekɔ diki kana bu, sho tshɛ pombaka nsala la wolo dia monga l’okitshakitsha wa mɛtɛ.

6. Oko wadiɛnya 1 Kɔrɛtɔ 15:10, wetshelo akɔna wakokaso nkondja oma l’ɛnyɛlɔ ka ɔpɔstɔlɔ Pɔɔlɔ?

⁶ Tɔsɛdingole ɛnyɛlɔ k’ɔpɔstɔlɔ Pɔɔlɔ. Jehowa akakambe la nde efula dia nkenga tshumanelo di’eyoyo l’esomba wotshikitanyi. Ondo nde akasambisha l’esomba efula ndeka apɔstɔlɔ akina wa Yeso Kristo. Koko, Pɔɔlɔ kɔmbɔsa dia nde ndeka anango ohomba. L’okitshakitsha tshɛ, nde akate ate: “Dimi kele ɔpɔstɔlɔ woleki tshitshɛ ndo dimi haasungana mbelamɛ ɔpɔstɔlɔ, nɛ dia lakahɛnyahɛnyaka etshumanelo ka Nzambi.” (1 Kɔr. 15:9) Oma laasɔ, Pɔɔlɔ akate dia ɔlɔlɔ waheyama mbɛdika wakosalɛ Jehowa mbakokimanyiya dia nde monga la diɔtɔnganelo dia dimɛna la Nzambi, koko aha l’ɔtɛ waki Pɔɔlɔ onto la laande kana wakandasale akambo efula. (Adia 1 Kɔrɛtɔ 15:10.) Ɔsɔ ekɔ ɛnyɛlɔ ka dimɛna k’okitshakitsha kakasha Pɔɔlɔ lo mukanda wakandafundɛ ase Kɔrɛtɔ, djekoleko etena kohɔso dia apami amɔtshi wa l’etshumanelo wakayangaka ndjaɛnya dia vɔ ndeka Pɔɔlɔ!​—2 Kɔr. 10:10.

7. Ngande wakakɛnɛmɔla anangɛso amɔtshi weyama nshi nyɛ okitshakitsha? Sha ɛnyɛlɔ.

⁷ Ekambi wa Jehowa efula wambokeketshama la ɔkɔndɔ wa lɔsɛnɔ w’ɔnangɛso Karl F. Klein, laki ose Olui-walɔmbɔla. Lo ɔkɔndɔ ande wa lɔsɛnɔ, ɔnangɛso Klein akɛnya l’okitshakitsha tshɛ woho wakandalɔshanaka l’ekakatanu efula l’edja k’ɛnɔnyi. Ɛnyɛlɔ, lo ɛnɔnyi wa 1920, nde akɛnyi di’esambishelo ka luudu la luudu kaki wolo efula, diakɔ diele l’ɔkɔngɔ wa nde nsambisha lo luudu la luudu mbala ka ntondo, nde akayotshika l’edja k’ɛnɔnyi ehende. L’ɔkɔngɔ diko etena kakandakambaka lo Bɛtɛlɛ, ɔnangɛso ɔmɔtshi akawosha alako ndo nde akawomalɛ l’etena kɛmɔtshi l’ɔkɔngɔ wa nde nongola alako akɔ. Ndo nto, nde akadiɛnɛ la ɔkɔmwɛlɔ w’efula, ndo nde akayɔkɔnɔ l’ɔkɔngɔ. Koko, nde akonge nto la ɛkɛndɛ efula wa weke. Ohokanyiya, akalɔmbama dia monga l’okitshakitsha dia ɔnangɛso leyama ɔsɔ mbita hwe hwe wɛɔdu ande ɛsɔ! Anangɛso l’akadiyɛso efula mbohɔka la ngandji tshɛ ɔnangɛso Klein ndo ɔkɔndɔ ande wa lɔsɛnɔ wa dimɛna ndo watande akambo hwe hwe.b

LANDE NA KAHOMBASO NKƐNƐMƆLA OKITSHAKITSHA?

8. Ngande watokimanyiya 1 Petero 5:6 dia mɛna dia okitshakitsha ngɛnyangɛnyaka Jehowa?

⁸ Ɔkɔkɔ woleki wahombaso nkɛnɛmɔla okitshakitsha ele nɛ dia vɔ ngɛnyangɛnyaka Jehowa. Ɔpɔstɔlɔ Petero akɛnya dui sɔ hwe. (Adia 1 Petero 5:6.) Lo ntɛkɛta dikambo dia kɛnɛ kakate Petero, dibuku ‘Yaka, ondjele’ mbutaka ɔnɛ: “Lotamanya lekɔ oko lɔlɛngɔ ndo lɔ kokaka monga l’etombelo wa kɔlɔ. Dionga sɔ kokaka konya onto lele l’akoka efula dia nde monga onto l’anyanya lo washo wa Nzambi. Lo wedi okina, okitshakitsha koka nkonya kânga tshonto y’anyanya dia nde nkoma ohomba efula le Jehowa. . . . Nde ayɔngɛnangɛna tofuta . . . l’ɔtɛ w’okitshakitsha aso.”c Lo mɛtɛ, dui dioleki dimɛna diakokaso nsala ele ngɛnyangɛnya Jehowa.​—Tok. 23:15.

9. Ngande wakotola okitshakitsha anto akina oya le so?

⁹ Laadiko dia ngɛnyangɛnya Jehowa, sho kondjaka wahɔ efula etena kakɛnɛmɔlaso okitshakitsha. Okitshakitsha kotolaka anto akina oya le so. Dia nshihodia lande na, yadja lo dihole di’anto akina. (Mat. 7:12) Anto yema tshitshɛ l’atei aso mbangɛnangɛna monga kaamɛ l’anto walanga di’anto nsala paka kɛnɛ kalangawɔ ndo watona tokanyi t’anto akina. Otshikitanyi la wɔ, sho keketshamaka etena keso kaamɛ l’asekaso ambetawudi wakitanyiya dako diata ɔnɛ: “Nyokane kandji, nyokane ngandji k’onto l’ɔnango, nyokane kɛtshi k’efula ndo nyonge la okitshakitsha.” (1 Pe. 3:8) Naka sho ndjasukanya l’anto wa ngasɔ, kete ondo vɔ wayoyasukanya la so l’edja tshɛ kayotongaka l’okitshakitsha.

10. Ngande wele okitshakitsha mbetɛka lɔsɛnɔ laso wɔdu?

¹⁰ Okitshakitsha mbetɛka nto lɔsɛnɔ laso wɔdu. Lo mɛtɛ, ondo sho koka mɛna akambo wɛnama oko bu la losembwe. Sɔlɔmɔna, nkumekanga ka lomba akate ate: “Dimi lakɛnyi ekambi laadiko dia mfalasa, koko ewandji watakɛndakɛnda l’ekolo oko ekambi.” (Ond. 10:7) Aha nshi tshɛ mbatolongolaka wanɛ wele la akoka w’efula kɛnɛmɔ. Ndo lo tena dimɔtshi, wanɛ wele bu l’akoka w’efula nongolaka kɛnɛmɔ k’efula. Kaanga mbediɔ ngasɔ, Sɔlɔmɔna akeye dia ekɔ dui dia lomba le so dia mbɔsa akambo woho wewɔ ndo aha nyanga lo woho wasalema akambo lo lɔsɛnɔ. (Ond. 6:9) Naka tekɔ l’okitshakitsha, kete ayonga dui dia wɔdu dia sho mbɔsa lɔsɛnɔ woho welɔ, koko aha woho wafɔnyaso wahombalɔ monga.

AKAMBO AKƆNA WAKOKA MBIDJA OKITSHAKITSHA ASO L’OHEMBA?

11. Kakɔna kahombaso nsala naka wambotosha dako?

¹¹ Lushi tshɛ, sho mongaka la waaso efula wa nkɛnɛmɔla okitshakitsha. Tɔsɛdingole awui amɔtshi. Etena katoshawɔ dako. Sho pombaka mbohɔ ɔnɛ naka onto ɔmɔtshi ambokamba la diaaso dimɔtshi dia tongola, kete ondo takasale munga ka woke oleki woho wafɔnyaso. Lo tena dia ngasɔ, ondo kanyi ya ntondo yayotoyɛ ele ntona dako sɔ. Ondo sho koka mɔnyɔla onto lotosha dako diakɔ kana woho wodishande. Koko naka tekɔ l’okitshakitsha, kete tayosala la wolo dia monga la ekanelo k’ɔlɔlɔ.

12. Lo ndjela Tokedi 27:5, 6, lande na kahombaso monga la lowando otsha le onto ɔmɔtshi lambotosha dako? Sha ɛnyɛlɔ.

¹² Onto lele l’okitshakitsha mongaka la lowando etena kawoshawɔ dako. Ɛnyɛlɔ: Ohɔsa dia wɛ ekɔ lo losanganya l’Akristo, l’ɔkɔngɔ wa wɛ nsawola l’asekayɛ ambetawudi efula, onto ɔmɔtshi la l’atei awɔ ambokelɛ l’omamu ndo ambokotɛ dia wɛ ekɔ la djɛsɛ lo wanyu. Aha la taamu, wɛ ayoka sɔnyi. Ko onde wɛ hatonga la lowando l’ɔtɛ wokote onto ɔsɔ dui sɔ? Lo mɛtɛ, ondo wɛ otokombola di’onto ɔmɔtshi kotɛ yema esadi la ntondo! Woho akɔ waamɛ mbele, sho pombaka l’okitshakitsha tshɛ monga la lowando le osekaso ombetawudi wele la dihonga dia tosha dako etena keso ladiɔ ohomba. Tɔshi onto ɔsɔ oko ɔngɛnyi, koko aha oko otunyi aso.​—Adia Tokedi 27:5, 6; Ngal. 4:16.

13. Ngande wakokaso nkɛnɛmɔla okitshakitsha naka anto akina wambokondja ɛkɛndɛ?

¹³ Etena kakondja anto akina ɛkɛndɛ. Jason lele ekumanyi mbutaka ate: “Etena kɛnami anto akina wambokondja ɛkɛndɛ, lo tena dimɔtshi dimi toyambolaka lande na kakimi kɔsɔnama.” Onde ndo wɛ amboyaokaka ngasɔ? Bu kɔlɔ “nkombola” dia nkondja ɛkɛndɛ wa weke. (1 Tim. 3:1) Koko, sho pombaka monga la shɛnɔdi lo woho wakanyiyaso. Naka hatongi la shɛnɔdi, kete sho koka ndjonga l’otako. Ɛnyɛlɔ, Okristo wa pami koka ntatɛ mfɔnya ɔnɛ nde mbele l’akoka woleki dia mɛmba ɔkɛndɛ kapanda. Kana Okristo wa womoto koka mfɔnya ɔnɛ: ‘Omɛmi ekɔ l’akoka ndeka anangɛso akina!’ Koko naka tekɔ mɛtɛ l’okitshakitsha, kete tayewɔ yimba y’otako ya ngasɔ.

14. Wetshelo akɔna wakokaso nkondja lo yoho yakasale Mɔsɛ akambo etena kakalongola anto akina ɛkɛndɛ?

¹⁴ Sho koka nkondja wetshelo lo woho wakasale Mɔsɛ akambo etena kakakondja anto akina ɛkɛndɛ. Mɔsɛ akɔsaka ɔkɛndɛ ande wa nɔmbɔla wodja w’Isariyɛlɛ la nɛmɔ. Kakɔna kakasale Mɔsɛ etena kaketawɔ Jehowa di’anto akina nkamba elimu ɛmɔtshi wakandakambaka? Nde komboka kandjema. (Wal. 11:24-29) Lo kɛnɛ kendana la nombosha anto, nde aketawɔ l’okitshakitsha tshɛ di’anto akina mbokimanyiya la olimu wa woke ɔsɔ. (Eto. 18:13-24) Ase Isariyɛlɛ wakayokondja apami efula wakakoke mbakambɛ olimu lo yoho shɔ ndo lo nsala ngasɔ vɔ kokoka nkonga edja dia ndjolomboshama. Lo nsala ngasɔ, Mɔsɛ aketsha wahɔ w’anto akina la ntondo lo dihole dia ɛkɛndɛ ande. Ɔsɔ ekɔ ɛnyɛlɔ ka dimɛna le so! Tohɔ dia naka sho nangaka monga ohomba le Jehowa, kete okitshakitsha aso pombaka ndeka akoka wele la so. Kaanga “mbele Jehowa [la diko], nde mbidjaka yimba le kanga okitshakitsha.”​—Os. 138:6.

15. Etshikitanu akɔna wonga l’anto efula?

¹⁵ Etena katshikitana awui amɔtshi. L’ɛnɔnyi weke kambeta ɛnɛ, anto efula waki la diewo l’edja k’ɛnɔnyi akumi wakawatshikitanyɛ ɛkɛndɛ awɔ. Ɛnyɛlɔ, lo 2014 wakalɔmbɛ emendji wa distrikɛ la wadiɛwɔ dia nkamba woho okina w’olimu wa lo tena tshɛ. Ntatɛ l’ɔnɔnyi akɔ waamɛ, emendji w’etshimbedi pombaka ntshika ɔkɛndɛ awɔ etena kayawɔ l’ɛnɔnyi 70. Ndo anangɛso waya l’ɛnɔnyi 80 kana ndekana hawotonga ɛnɔmbɔdi w’elui wa dikumanyi dia l’etshumanelo nto. Ndo nto, ambeta ɛnɔnyi efula wele anto efula wa lo nkumbo ka Bɛtɛlɛ wakatomama oko ambatshi mboka. Akina wakatshike olimu wa laande wa lo tena tshɛ l’ɔtɛ w’ekakatanu wendana la yoonge, ɛkɛndɛ wa lo nkumbo ndo l’ɔtɛ w’awui akina.

16. Ngande wakakɛnɛmɔla anangɛso l’akadiyɛso okitshakitsha lo ndjaekesanyiya la etshikitanu w’ɛkɛndɛ?

¹⁶ Komonga dui dia wɔdu le anangɛso l’akadiyɛso asɔ dia nsala etshikitanu ɛsɔ. Nɛ dia vɔ wakangɛnangɛnaka ɛkɛndɛ waki la wɔ ntondo, ɛkɛndɛ wakawangɛnangɛnaka l’edja k’ɛnɔnyi lo toho efula. Amɔtshi wakonge “l’ɔkɛyi” dia ntshika olimu awɔ dia ndjaekesanyiya la etshikitanu. Koko, l’edjedja ka wonya vɔ wakayoyaekesanyiya la otshikitanu ɔsɔ. Lande na? Aki l’ɔtɛ wa ngandji kakawokaka Jehowa. Vɔ wakeyaka dia wakayakimɔ le Nzambi, koko aha lo olimu, titrɛ kana lo ɔkɛndɛ ɔmɔtshi. (Kɔl. 3:23) Vɔ wekɔ l’ɔngɛnɔngɛnɔ dia ntetemala kambɛ Jehowa l’okitshakitsha tshɛ oyadi ɔkɛndɛ akɔna wele la wɔ. Vɔ wekɔ lo “[k]itsha ekiyanu a[wɔ] tshɛ le nde,” lo mbeya dia nde ndjakiyanyaka dikambo diawɔ.​—1 Pe. 5:6, 7.

17. Lande na keso la lowando lo woho watokeketsha Ɔtɛkɛta wa Nzambi dia nkɛnɛmɔla okitshakitsha?

¹⁷ Onde sho bu la lowando lo woho watokeketsha Ɔtɛkɛta wa Nzambi dia nkɛnɛmɔla okitshakitsha? Etena kakɛnɛmɔlaso dionga dia dimɛna sɔ, sho l’anto akina kondjaka wahɔ. Sho mongaka l’akoka wa mbikikɛ ekakatanu wa lo lɔsɛnɔ. Kɛnɛ koleki tshɛ ohomba ele, sho ndekaka ndjasukanya la Shɛso lele l’olongo. Tekɔ l’ɔngɛnɔngɛnɔ dia mbeya ɔnɛ kaanga mbende “Ɔnɛ lele la diko ndo Lodiyami,” nde nangaka ndo mbɔsaka ekambi ande wele l’okitshakitsha la nɛmɔ!​—Isa. 57:15.