Yeso akakɛnɛmɔla “lomba l’oma le Nzambi”

1-3. Ngande wakɔshi wanɛ waki asukanyi waki Yeso wetshelo ande, ndo kakɔna kakiwɔ kombeyaka lo dikambo diande?

ANTO waki lo shinangɔnga wakambe heyama. Vɔ wakeyaka ɔlɔngɔlɔngɔ a pami wakemala la ntondo kawɔ awaetsha. Ɔlɔngɔlɔngɔ akɔ aki Yeso. Nde akole l’osomba awɔ ndo akakambe olimu w’otshudi w’abaya l’edja k’ɛnɔnyi efula. Ondo Yeso akasha lonya lo wokelo wa mvudu yaki anto amɔtshi wa l’atei awɔ ndo ondo anto asɔ wakakambaka dikambɔ diawɔ la nkongo ndo nkɔhɔ yakandasalaka.a Ngande wakawasale lam’akawoke wetshelo w’onto laki otshudi w’abaya ɔsɔ na?

² Efula k’anto wakahokamɛka Yeso wakaambe heyama ndo wakambola ɔnɛ: “Lende ambotokondja onto ɔnɛ lomba la nganɛ?” Ndo wakate nto vate: “Shi ɔna aki otshudi w’abaya kende? Shi nyango lokombo lande Mariya?” (Mateo 13:54-58; Makɔ 6:1-3) Lonyangu ko, wanɛ waki asukanyi wa Yeso asɔ wakakanyiyaka vate: ‘Otshudi w’abaya ɔnɛ sho la nde mbodjashi lanɛ.’ Kaanga mbaki ɛtɛkɛta ande la lomba l’efula, vɔ wakootone. Kɛnɛ kakiwɔ kombeyaka ele lomba lakandetshaka komonga lakinde hita.

³ Oma lende akakondja Yeso lomba lɔsɔ? Nde akate ate: “Kɛnɛ ketshami haye oma le mi, koko ndja oma le Ɔnɛ lakantome.” (Joani 7:16) Ɔpɔstɔlɔ Pɔɔlɔ akayolembetshiya dia Yeso ‘akayoyala le so lomba l’oma le Nzambi.’ (1 Kɔrɛtɔ 1:30) Ɔnkɔnɛ, Jehowa akakɛnɛmɔla lomba lande lo tshimbo yaki Yeso y’Ɔnande. Diakɔ mɛtɛ diakakoke Yeso nkoma polo ndo lo mbuta ɔnɛ: “Dimi la Papa tekɔ 1.” (Joani 10:30) Tɔsɛdingole toho tosato takakɛnɛmɔla Yeso “lomba l’oma le Nzambi.”

Kɛnɛ kakandetshaka

4. a) Losango laki Yeso laki l’ɔtɛ a dui akɔna, ndo lande na kakilɔ ohomba efula? b) Lande na kaki alako waki Yeso nshi tshɛ amɛna ndo la wahɔ efula le ampokami ande?

⁴ Yoho ya ntondo ele tɔsɛdingole kɛnɛ kaketshaka Yeso. Ɔtɛ a dui wa losango lande aki “lokumu l’ɔlɔlɔ la Diolelo.” (Luka 4:43) Losango lɔsɔ laki ohomba efula l’ɔtɛ w’olimu wayokamba Diolelo dia nkidia lokombo la Jehowa, mbidja ndo lokumu lele lande oko Owandji wa losembwe ndo dia mbela anto ɛtshɔkɔ wa pondjo. Wetshelo ande waki nto l’alako wa lomba efula ndo wele ohomba lo lɔsɛnɔ laso la lushi la lushi. Ndaamɛ akayaɛnya dia nde kele “Ondaki wa Mamba” wakatama. (Isaya 9:6) Alako ande wakahombe mɛtɛ monga wa diambo nɛ dia nde aki l’ewo k’efula k’Ɔtɛkɛta wa Nzambi ndo ka lolango lande. Nde akashihodiaka eongelo k’onto ndo akokaka anto ngandji k’efula. Diakɔ diele, alako ande waki nshi tshɛ amɛna ndo la wahɔ efula le ampokami ande. Nde akatɛkɛtaka “ɛtɛkɛta wa lɔsɛnɔ la pondjo.” Naka onto ndjela alako ande, kete nde ayokondja mpanda.​—Joani 6:68.

5. Naa akambo amɔtshi wakatɛkɛta Yeso lo Dako diande dia lo Dikona?

⁵ Dako dia lo Dikona diekɔ ɛnyɛlɔ ka laande kɛnya lomba lahakoke mbɛdikama lele lo wetshelo waki Yeso. Ondo dako sɔ diofundami lo Mateo 5:3–7:27, diakashama l’edja ka minitɛ 20 tsho. Koko alako wa lɔkɔ wekɔ wa pondjo pondjo, ndo wekɔ ohomba ɛlɔ kɛnɛ oko wakiwɔ lam’akawashama ntondo. Yeso akatɛkɛta weho tshɛ w’akambo, mbidja ndo woho wa monga la diɔtɔnganelo dia dimɛna l’anto akina (5:23-26, 38-42; 7:1-5, 12), woho wa monga la lɔkɛwɔ la pudipudi (5:27-32), ndo woho wa nsɛna lɔsɛnɔ lele l’oyango (6:19-24; 7:24-27). Yeso kokomɛ tsho lo mbutɛ ampokami ande kɛnɛ kelɛwɔ dionga dia lomba; koko nde akawaɛnya dikambo sɔ lo mbisha elembetshiyelo, lo nkana lawɔ yimba ndo lo mbasha tolembetelo.

6-8. a) Naa ɛkɔkɔ w’eshika wakasha Yeso wɛnya di’aha ndjakiyanya? b) Kakɔna kɛnya dia alako waki Yeso waki la lomba l’oma l’olongo?

⁶ Tɔshi ɛnyɛlɔ ka dako dia lomba diakasha Yeso lo Mateo tshapita 6 lo woho wa ndɔshana l’ekiyanu wendana la lomombo la l’emunyi. Yeso akatolake ate: “Nyotshike ndjakiyanya dikambo dia nsɛnɔ yanyu nyate: Ayotɔlɛ na? Kana ayotɔnɔ na? Kana lo dikambo di’alemba anyu nyate: Ayotɔlɔta na?” (Divɛsa 25). Diangɔ dia ndɛ ndo ahɔndɔ ekɔ ohomba, ndo ndooko kɔlɔ di’onto ndjakiyanya dia nkondja diangɔ sɔ. Koko Yeso totɛka dia sho ‘tshika ndjakiyanya’ dikambo dia diangɔ sɔ.b Lande na?

⁷ Ohohokamɛ elembetshiyelo ande, vɔ mbetawoyaka. Lam’ele Jehowa mbakatosha lɔsɛnɔ ndo demba, onde nde hakoke tosha diangɔ dia ndɛ diele ohomba lo lɔsɛnɔ ndo ahɔndɔ wa ndɔtsha demba diakɔ? (Divɛsa 25) Naka Nzambi mbishaka tofudu diangɔ dia ndɛ ndo ndɔtshaka alɛmbɔlɛmbɔ dimɛna, kete hoke anto wele atɛmɔdi ande! (Divɛsa 26, 28-30) Laasɔ, naa ohomba wa ndjakiyanya? Okiyanu hatokoka taloya lɔsɛnɔ laso kaanga yema.c (Divɛsa 27) Ko ngande wakokaso mbewɔ ndjakiyanya? Yeso akatosha dako nɛ ate: Nyotetemale la mbetsha ɔtɛmwɛlɔ waki Nzambi lo dihole dia ntondo lo lɔsɛnɔ. Wanɛ wasala ngasɔ koka monga l’eshikikelo dia ehomba awɔ tshɛ wa lushi la lushi ‘wayokotshama’ oma le Shɛwɔ lele l’olongo. (Divɛsa 33) L’ekomelo, Yeso akasha dako di’ohomba efula ate: Nyɔsɛnake lo ndjela lushi la lushi. Lande na kotsha ekiyanu wa loyi laadiko dia ekiyanu w’ɛlɔ? (Divɛsa 34) Ndo lande na ndjakiyanya l’ɔtɛ wa dikambo diele ondo hadiotosalema pondjo? Okambelo wa la alako wa lomba asɔ koka tokokɛ oma lo paa efula ya l’andja woludi la ekiyanu ɔnɛ.

⁸ Mbokɛmaka hwe dia alako wakasha Yeso wekɔ ohomba ɛlɔ kɛnɛ oko wakiwɔ etena kakawashama ambeta ɛnɔnyi suke la 2000. Onde ɔsɔ bu djembetelo yɛnya lomba l’oma l’olongo? Alako woleki tshɛ amɛna w’oma le andaki w’anto mbetaka lowe kana komaka esadi eto lo vusɔma kana mpɛnyama l’alako akina w’eyoyo. Koko, alako waki Yeso hawete lowe kaanga mbayawɔ ɛnɔnyi efula. Dikambo sɔ hadiohombe taambiya nɛ dia Ondaki wa Mamba ɔsɔ akatɛkɛta “awui wa Nzambi.”​—Joani 3:34.

Yoho yande ya mbetsha

9. Kakɔna kakate asɔlayi amɔtshi lo dikambo dia wetshelo waki Yeso, ndo lande na kele vɔ kombidja oshimu esɔ?

⁹ Yoho ya hende yakakɛnɛmɔla Yeso lomba laki Nzambi aki lo yoho yande ya mbetsha. Mbala kɛmɔtshi, asɔlayi wakawatome dia towonda wakakalola anyanya wata vate: “Ndooko onto lakatɔtɛkɛta ngasɔ.” (Joani 7:45, 46) Vɔ kombidja oshimu esɔ. Oko wakaye Yeso ‘oma l’olongo,’ ndooko onto laki l’ewo k’efula ndo lakalembetɛ lokema l’akambo wa mbetshaka oko nde. (Joani 8:23) Nde aketshaka mɛtɛ yoho yoleki anto tshɛ. Tɔtɛkɛtɛ dikambo dia toho tohende ta wetshelo taki Ombetsha wa lomba ɔsɔ.

10, 11. a) Lande na kahatakoke mamba woho wakakambaka Yeso la bɛnyɛlɔ? b) Wɛɛla kɛdikɛdi na, ndo ɛnyɛlɔ kakɔna kɛnya dia wɛɛla waki Yeso wakashaka wetshelo w’oshika?

¹⁰ Bɛnyɛlɔ di’eshika. Bible totɛka ɔnɛ: “Yeso akatɛ elui w’anto akambo asɔ tshɛ lo nkamba la wɛɛla. Lo mɛtɛ, nde kɔtɛkɛtaka la wɔ aha la wɛɛla.” (Mateo 13:34) Ekɔ mɛtɛ diambo dia mɛna dikoka diaheyama mbɛdika diaki la nde dia mbetsha akambo wa mɛtɛ wa wolo shihodia lo nkamba l’awui wakɛnaka anto lushi la lushi. Akambi wa dikambɔ wonɛ ntɔngɔ, wamato wakatɛ mapa, ana wakɛnya lo lobingu, amundji wa nse woka ɛtɛyi l’ashi ndo alami w’ɛkɔkɔ watayange ɔkɔkɔ wakashishɔ, ɔsɔ aki mɛtɛ awui wakɛnaka ampokami ande tena efula. Naka akambo wa mɛtɛ w’ohomba nembetshiyama l’ekimanyielo k’awui wɛna anto mbala la mbala, kete vɔ kakatɛka esadi eto ndo wolo lo yimba ndo l’otema.​—Mateo 11:16-19; 13:3-8, 33, 47-50; 18:12-14.

¹¹ Yeso akakambaka mbala efula la wɛɛla, mbuta ate ɛkɔndɔ wa tomondo wakatombaka wetshelo wendana la lɔkɛwɔ kana la lonyuma. Oko wele ɛkɔndɔ wɔdu nshihodia ndo kimamɛ oleki tokanyi tahɛnama, wɛɛla wakakimanyiyaka di’aha wetshelo waki Yeso mbohamɛ. Lo wɛɛla efula, Yeso akalembetshiya woho wele She lo nkamba la bɛnyɛlɔ di’eshika diahakoke mbohamɛ esadi eto. Ɛnyɛlɔ, onto koka esadi eto nkimɛ wetshelo w’oma lo wɛɛla w’ɔna lotshito, dikambo vɔ mɛnyaka dia Jehowa mbokaka onto lambotakɔ mboka layatshumoya l’otema ɔtɔi kɛtshi ndo nde mbolongolaka la ngandji tshɛ.​—Luka 15:11-32.

12. a) Ngande wakakambaka Yeso la ambola lo wetshelo ande? b) Ngande wakadihe Yeso wanɛ waki kombetawɔka wolo waki lande enyɔ?

¹² Ambola wa la ɔkɔmi. Yeso akakambaka la ambola dia tshutshuya ampokami ande dia vɔamɛ ntana ekadimwelo, dia mbeya eyango awɔ kana dia mbaatshutshuya dia mbɔsa tɛdikɔ. (Mateo 12:24-30; 17:24-27; 22:41-46) Nde akambola ewandji w’ɛtɛmwɛlɔ waki kombetawɔka dia wolo ande wakaye oma le Nzambi ate: “Onde batisimu ka Joani kakaye oma l’olongo kana oma le anto?” Oko wakawonge l’okandokando lo dimbola sɔ, vɔ wakatatɛ nkana yimba lam’asawɔ ɔnɛ: “Naka sho mbuta ɔnɛ: ‘Oma l’olongo,’ kete nde ayototɛ ate: ‘Ko lande na kakinyu kombeetawɔ?’ Ko onde tayosombɔ mbuta ɔnɛ: ‘Oma le anto’? Vɔ wakokaka olui w’anto wɔma lam’ele olui w’anto akɔ wakɔsaka mɛtɛ Joani oko omvutshi.” L’ekomelo vɔ wakokadimola vate: “Sho hateye.” (Makɔ 11:27-33; Mateo 21:23-27) Tshɔi ya dimbola yakawaoke Yeso akaadihe enyɔ ndo akakɛnɛmɔla lokeso laki l’etema awɔ.

13-15. Ngande wɛnya wɛɛla w’ose Samariya l’ɔlɔlɔ lomba laki Yeso?

¹³ Mbala mɔtshi Yeso akasɔhanyaka toho ta wetshelo, lo nsanganya ambola watshutshuya dia nkana yimba kaamɛ la bɛnyɛlɔ. Lushi lɔmɔtshi, lam’akawombola ombewi w’ɛlɛmbɛ ɔmɔtshi w’ose Juda kɛnɛ kakandahombe nsala dia nkondja lɔsɛnɔ la pondjo, Yeso akawohola Ɛlɛmbɛ wa Mɔsɛ wakadjangaka dia nanga Nzambi ndo wonyande. Oko wakandalange ndjaɛnya dia nde aki onto ɔlɔlɔ, pami kakɔ akambola ate: “Akɔna mɛtɛ ele wonyami?” Yeso akookadimola lo mbotɛ ɔkɔndɔ ɔmɔtshi. Pami kɛmɔtshi k’ose Juda akatɛngɔlaka ndaamɛ ko akahomana la waa bandi wakɔɔkɔmɔla heyama ko mbotshika suke la nyɔi. Ase Juda ahende wakete lo mboka kakɔ, ntondo ɔlɔmbɛdi ko l’ɔkɔngɔ ose Lɛwi. Vɔ akɔ ahende wakasale oko hawowɛnyi. L’ɔkɔngɔ ose Samariya akayokoma lo dihole sɔ. Nde akoke onto akɔ kɛtshi, nde akoosole mpota la ngandji tshɛ ndo akawɛmbɛ l’ɔlɔlɔ tshɛ polo lo luudu lakahangaka angɛndangɛnda lɛnɛ akandahombe tɔkɔnɔ. Dia kumiya ɔkɔndɔ ɔsɔ Yeso akambola onto lakawooke dimbola ate: “Oko le yɛ, akɔna l’atei w’anto 3 asɔ aki wonyande la pami kakahomana la apɔtwanyi kɛsɔ?” Pami kɛsɔ akahombe paka kadimola ɔnɛ: “Ɔnɛ lakawoke kɛtshi.”​—Luka 10:25-37.

¹⁴ Ngande wakɛnya ɔkɔndɔ ɔsɔ lomba laki Yeso? Lo nshi shɔ, ase Juda wakakambaka la tshɛkɛta “wonyami” paka otsha le wanɛ wakayelaka mbekelo yawɔ, koko aha otsha le ase Samariya. (Joani 4:9) Otondonga Yeso akɛnya l’ɔkɔndɔ ɔsɔ ɔnɛ ose Juda mbakakimanyiya ose Samariya lakahomɔ, onde nde ototshikitanya tokanyi ta kɔlɔ taki la wɔ? Diakɔ diakakongɛ Yeso ɔkɔndɔ ɔsɔ la lomba tshɛ dia ose Samariya nkimanyiya ose Juda la ngandji tshɛ. Tolembete nto dimbola diakambola Yeso lo ekomelo k’ɔkɔndɔ ɔsɔ. Nde akatshikitanya kitshimudi yakakambaka la wɔ lo kɛnɛ kendana la tshɛkɛta “wonyami.” Ombewi w’ɛlɛmbɛ ɔsɔ akalange mbeya onto akɔna akandahombe mboka ngandji oko wonyande. Koko lam’akandawombola ate: “Akɔna l’atei w’anto 3 asɔ aki wonyande la pami kakahomana la apɔtwanyi kɛsɔ?” Yeso akakotola yambalo yande aha otsha le ɔnɛ lakawasalɛ ɔlɔlɔ, mbuta ate onto lakɔtɔ l’anya wa waa bandi, koko otsha le onto lakosalɛ ɔlɔlɔ, mbuta ate ose Samariya. Wonyaso la mɛtɛ kɛdikɛdi ɔnɛ lɔsa yɛdikɔ ya mɛnya ngandji kande otsha le anto akina oyadi kabila kakɔna kewɔ. Ndooko yoho kina yotoleka Yeso nembetshiya dikambo sɔ dimɛna.

¹⁵ Laasɔ, onde koka monga dikambo dia diambo lo woho wele anto wakambe efula lo “yoho yande ya mbetsha,” ndo wakakotɔma oya le nde? (Mateo 7:28, 29) Lo diaaso dimɔtshi, “olui a woke w’anto” wakatshikala lalende nshi shato y’etondo aha la ndɛ kaanga yangɔ!​—Makɔ 8:1, 2.

Yoho yande ya lɔsɛnɔ

16. Lo yoho yakɔna yakɛnya Yeso “djembetelo y’oshika” dia nde akalɔmbɔmaka la lomba laki Nzambi?

¹⁶ Yoho ya sato yakakɛnɛmɔla Yeso lomba la Jehowa aki yoho yakandasɛnaka. Lomba lekɔ ohomba efula; lɔ tondjaka etombelo w’amɛna. Ombeki Jakɔba akambola ate: “Onto akɔna ele la lomba ndo la yimba l’atei anyu?” Oma lasɔ ndaamɛ akakadimola lo dimbola diande ate: “Lɔkɛwɔ lande la dimɛna longe djembelo y’oshika ya dikambo sɔ.” (Jakɔba 3:13, The New English Bible) Dionga diaki la Yeso aki “djembetelo y’oshika” yakɛnya dia nde akalɔmbɔmaka la lomba laki Nzambi. Yoho yande ya lɔsɛnɔ ndo woho wakandasɛnaka l’anto akina akɛnya dia nde aki l’ekanelo k’ɔlɔlɔ.

17. Kakɔna kɛnya dia Yeso akasɛnaka lɔsɛnɔ laki la wɛdimo wa kokele?

¹⁷ Onde wɛ atɛnaka dia anto wele bu l’ekanelo k’ɔlɔlɔ salaka akambo mbala efula lo yoho ya tshambandeko? Dia sho monga la wɛdimo, sho pombaka monga nto la lomba. Oko wakandakɛnɛmɔlaka lomba laki Nzambi, Yeso aki la wɛdimo wa kokele. Akambo wa lo nyuma mbakandetshaka lo dihole dia ntondo la ntondo k’akambo akina tshɛ wa lo lɔsɛnɔ la nde. Nde akayashaka tshɛ dia mbewoya anto lokumu l’ɔlɔlɔ. Nde akate ate: “L’oyango ɔsɔ mbakamaye.” (Makɔ 1:38) Oyangelo wa diangɔ dia l’emunyi kondjala okiyanu ande wa ntondo; ndo mɛnamaka dia nde komonga la diangɔ dia l’emunyi efula. (Mateo 8:20) Koko nde kɔsɛna lɔsɛnɔ la ndjadima ɛngɛnɔngɛnɔ tshɛ. Yeso aki onto laki l’ɔngɛnɔngɛnɔ oko She lele “Nzambi k’ɔngɛnɔngɛnɔ” ndo nde akasalaka di’anto akina monga l’ɔngɛnɔngɛnɔ. (1 Timɔte 1:11; 6:15) Lushi lakandatshu lo fɛtɛ kɛmɔtshi ka diwala, weho wa fɛtɛ yaki la mishiki, kembo, ndo ɛngɛnɔngɛnɔ, nde kotshɔ lɛkɔ dia tonyangiya anto akina. Etena kakashile wanu, nde akahilola ashi wanu wa dimɛna efula, ɛnɔnɔ ‘katɔngɛnyangɛnyaka otema w’onto.’ (Osambo 104:15; Joani 2:1-11) Yeso aketawɔ dia ntshɔ laka anto efula wakawetaka dia ntɔlɛ diangɔ, ndo nde akakambaka la waaso asɔ dia mbetsha.​—Luka 10:38-42; 14:1-6.

18. Ngande wakɛnya Yeso ekanelo k’ɔlɔlɔ koleki tshɛ lo dikambo di’ambeki ande?

¹⁸ Yeso aki l’ekanelo k’ɔlɔlɔ koleki tshɛ lo yoho yakandasɛnaka l’anto akina. Ewo kande ka eongelo k’anto akookimanyiya dia nde monga la eokelo k’ɔlɔlɔ otsha le ambeki ande. Nde akeyaka dimɛna dia vɔ komonga kokele. Koko nde akeyaka waonga awɔ w’ɔlɔlɔ. Nde akɛnyi akoka waki l’apami asɔ wakakotola Jehowa oya le nde. (Joani 6:44) Yeso aki nsuke dia mbaɛkɛ otema kaanga mbakawasalaka munga. Dia mɛnya dia nde akawaɛkɛka otema, nde akasha ambeki ande ɔkɛndɛ wa woke wa nsambisha lokumu l’ɔlɔlɔ. Nde aki l’eshikikelo dia vɔ wekɔ l’akoka wa nkamba olimu akɔ dimɛna. (Mateo 28:19, 20) Dibuku dia Etsha mɛnyaka dia vɔ wakakambe olimu ɔsɔ la kɔlamelo tshɛ. (Etsha 2:41, 42; 4:33; 5:27-32) Yeso mɛtɛ aki la shadiya ya mbaɛkɛ otema.

19. Ngande wakɛnya Yeso dia nde aki la “memakana ndo la otema w’okitshakitsha”?

¹⁹ Oko wakatɛnyi lo tshapita 20, Bible kakatanyaka okitshakitsha la memakana kaamɛ la lomba. Jehowa mɛtɛ mbele ɛnyɛlɔ koleki tshɛ lo dikambo sɔ. Ko kayotota lo dikambo diaki Yeso? Ekɔ mɛtɛ ekeketshelo lo menda okitshakitsha waki la Yeso otsha le ambeki ande. Kaanga mbakinde kɔmbɛdima la wɔ nɛ dia nde aki onto la kokele, nde kombaɔnyɔla. Ndooko lushi lakandawaɛnya dia vɔ wekɔ l’ɛse kana ɔnɛ vɔ bu l’akoka. Koko, nde akeyaka elelo awɔ ndo akakikɛka munga yawɔ la lotutsha tshɛ. (Makɔ 14:34-38; Joani 16:12) Kaanga ana wakɛnda wakangɛnangɛnaka monga suke la nde. Shi ɔsɔ aki dui dia dimɛna efula? Aha la taamu, vɔ wakangɛnangɛnaka monga nsuke la nde nɛ dia vɔ wakeyaka dia nde aki la “memakana ndo la otema w’okitshakitsha.”​—Mateo 11:29; Makɔ 10:13-16.

20. Ngande wakɛnya Yeso ekanelo k’ɔlɔlɔ otsha le womoto lele ɔnande la womoto aki la ɔdiɛngɛ?

²⁰ Yeso akakɛnɛmɔla okitshakitsha wa Nzambi lo yoho kina nto y’ohomba. Nde aki l’ekanelo k’ɔlɔlɔ kana aketawɔka nsala dikambo dimɔtshi naka kɛtshi ambotshutshuya dia disala. Ɛnyɛlɔ, oko lam’akɔsɛngasɛnga womoto ɔmɔtshi l’ose Wodja dia nde kɔnɔla ɔnande la womoto lakahɛnyahɛnyamaka efula la ɔdiɛngɛ. L’etatelo, Yeso akawɛnya lo toho tosato dia nde hatowokimanyiya: ntondo nde kombokadimola; oma laasɔ nde akoohonolɛ dia nde kotomama le ase Wedja koko le ase Juda; l’ekomelo nde akasha ɛnyɛlɔ kakɛnya womoto ɔsɔ l’ɔlɔlɔ tshɛ dia nembetshiya dui diakɔ diaamɛ. Koko womoto ɔsɔ akatetemala mbɔsɛngasɛnga ndo akɛnya mbetawɔ ka laande. Yeso akandasale la ntondo ka dikambo dia laande sɔ? Nde akasale kɛnɛ kakandate dia nde hatokisala, mbuta ate nde akakɔnɔla ɔnaki mama kɛsɔ la womoto. (Mateo 15:21-28) Ɔsɔ mɛtɛ aki okitshakitsha wa diambo, shi mɛtɛ? Tatohɛke dia okitshakitsha ekɔ kiɔkɔ ya lomba la mɛtɛ.

21. Lande na kahombaso nyanga dia mbokoya lonto, yoho ya tɛkɛta ndo dionga diaki Yeso?

²¹ Ande lowando lakoka monga laso woho watewoya Evanjiliɔ ɛtɛkɛta ndo etsha w’onto loleki lomba lo tena tshɛ! Tatohɛke dia Yeso akakɛnɛmɔla lonto la She lo yoho ya kokele. Lam’okoyaso lonto, yoho yande ya tɛkɛta ndo dionga diaki Yeso, sho mongaka la lomba l’oma l’olongo. Lo tshapita yayela tayɛna woho wakokaso kɛnɛmɔla lomba laki Nzambi lo lɔsɛnɔ laso.