Wɛ koka monga l’eshikikelo ɔnɛ Jehowa akakodimanyiya

1-2. Kakɔna kasala Jehowa etena kayatshumoyaso oma lo pɛkato yaso? (Enda ndo osato.)

NKUMEKANGA Davidɛ akashihodia woho wayaoka onto etena kayaɛndjande onongo lo dikambo dia pɛkato yakandasele lo nshi yakete. (Os. 40:12; 51:3; efundelo wa la diko dia tshapita) Nde akasale munga ya weke lo lɔsɛnɔ lande. Koko, nde akayatshumoya l’otema ɔtɔi ndo Jehowa akodimanyiya pɛkato yande. (2 Sa. 12:13) Etombelo waki la dui sɔ ele, Davidɛ akonge l’ɔngɛnɔngɛnɔ etena kakandeye dia Jehowa ambodimanyiya pɛkato yande.—Os. 32:1.

² Oko Davidɛ, sho koka monga l’ɔngɛnɔngɛnɔ etena keyaso ɔnɛ Jehowa ambotoka kɛtshi ndo ambotodimanyiya pɛkato yaso. Ande ekeketshelo mbeya dia Jehowa ekɔ suke dia todimanyiya pɛkato yaso kaanga mbeyɔ weke naka sho ndjishola ndo ndjatshumoya l’otema ɔtɔi ndo nsala kɛnɛ kakokaso nsala diaha ndjikalolɛ nto lee! (Tok. 28:13; Ets. 26:20; 1 Jni. 1:9) Ndo sho mongaka l’ɔngɛnɔngɛnɔ etena katodimanyiya Jehowa pɛkato yaso nɛ dia nde hatotaanya kana tosha dilanya nto l’ɔtɛ ayɔ.—Ɛzk. 33:16.

3-4. Ngande wakayaoke kadiyɛso kɛmɔtshi l’ɔkɔngɔ wa nde nongola batisimu, ndo kakɔna kayotɛna lo sawo nɛ?

³ Koko lo tena dimɔtshi, anto amɔtshi koka mɛna dia ekɔ wolo mbetawɔ edimanyielo ka Jehowa. Tende kɛnɛ kakakomɛ Jennifer lakodiama l’akambo wa mɛtɛ. Lam’akinde eke mangase, nde akayasha lo lɔsɛnɔ la mindo ndo akatatɛ nsɛna lɔsɛnɔ la dungi pende. Koko ɛnɔnyi efula l’ɔkɔngɔ, nde akayosalaka etshikitanu lo lɔsɛnɔ lande, akayakimɔ le Jehowa ndo akalongola batisimu. Nde mbutaka ate: “Lo nshi yakete, lakayashaka mbala efula l’awui wa mindo wa dieyanelo, lakanɔka didjoyadjoya, laki ɛkɛlɛkɛlɛ ndo oweso wa lomombo mbaki dui diakaleke ohomba lo lɔsɛnɔ lami. Lo yimba yami, lakeye dia l’ɔkɔngɔ wa dimi nɔmba edimanyielo ndo ndjatshumoya, olambo wa Kristo wakambɛdia. Koko kaanga mbakamayatshumoya ndo mbakamalɔmbɛ Jehowa edimanyielo, dimi komonga l’eshikikelo ɔnɛ nde akadimanyiya.”

⁴ Onde lo tena dimɔtshi wɛ mongaka l’okakatanu dia mbetawoya otema ɔnɛ Jehowa akakodimanyiya pɛkato yakayasale lo nshi yakete? Jehowa nangaka dia sho ndjaoka l’ekokelo l’ɔtɛ wa kɛtshi kande oko wakayaoke Davidɛ. Lo sawo nɛ, tayɛna lande na keso l’ohomba wa mbetawɔ edimanyielo ka Jehowa ndo kɛnɛ kakoka tokimanyiya dia nsala dui sɔ.

LANDE NA KAHOMBASO MBETAWƆ EDIMANYIELO KA JEHOWA?

5. Kakɔna kalanga Satana tetawoya? Sha ɛnyɛlɔ.

⁵ Mbetawɔ edimanyielo ka Jehowa koka tokimanyiya dia mbewɔ diaha nkɔ lo tolonga ta Satana. Tolembete dia Satana koka nsala kɛnɛ tshɛ kakokande nsala dia toshimba diaha sho kambɛ Jehowa. Dia nkotsha oyango ɔsɔ, Satana mbeyaka mpemba dia tetawoya ɔnɛ pɛkato yaso hayodimanyiyamaki pondjo. Tɔsɛdingole ɛnyɛlɔ ka pami ka la Kɔrɛtɔ kakanyɛma oma l’etshumanelo l’ɔtɛ w’awui wa mindo wa dieyanelo. (1 Kɔr. 5:​1, 5, 13) L’ɔkɔngɔ diko nde akayoyatshumoyaka koko Satana akalange di’ase etshumanelo ntona mbodimanyiya ndo mbolongola l’etshumanelo. L’etena kakɔ kaamɛ, Satana akalange dia otshi wa pɛkato ɔsɔ mɛna dia pɛkato kande hadimanyiyamaki, laasɔ “lonyangu l’efula” laki la nde lakakoke mboshimba dia kambɛ Jehowa. Satana atatshikitanya eyango ndo toho tande. Koko sho mbeyaka “toho ta mayɛlɛ takamba la nde.”—2 Kɔr. 2:​5-11.

6. Kakɔna kakoka tokimanyiya naka tekɔ lo ndjaɛndja onongo wa pɛkato kakatasale?

⁶ Mbetawɔ edimanyielo ka Jehowa koka tokimanyiya dia mbewɔ ndjaɛndja onongo. Sho ndjaokaka kɔlɔ etena kasalaso pɛkato. (Os. 51:17) Bu kɔlɔ ndjaoka ngasɔ. Nkum’otema kaso koka tokimanyiya dia ntakola wanya w’amɛna dia nɔngɔsɔla kɛnɛ kakatasale. (2 Kɔr. 7:​10, 11) Koko naka sho ntetemala ndjakiyanya ɔnɛ Jehowa kotodimanyiya, kete dui sɔ koka toshimba dia mbokambɛ. Etena ketawɔso dia Jehowa ambotodimanyiya, sho koka ntshika dia ndjaɛndja onongo. Ɔnkɔnɛ, sho koka kambɛ Jehowa oko walangande sho mbokambɛ, mbuta ate la nkum’otema ka pudipudi ndo l’ɔngɛnɔngɛnɔ. (Kɔl. 1:​10, 11; 2 Tim. 1:3) Ko ngande wakokaso mbetawoya otema aso dia mbetawɔ edimanyielo ka Nzambi?

KAKƆNA KAKOKA TOKIMANYIYA DIA MBETAWƆ EDIMANYIELO KA JEHOWA?

7-8. Kakɔna kakatɛ Jehowa Mɔsɛ lo dikambo diande ndo eshikikelo kakɔna katosha dui sɔ? (Etombelo 34:​6, 7)

⁷ Kana yimba lo kɛnɛ kakate Jehowa lo dikambo diande ndaamɛ. Tende kɛnɛ kakatɛ Jehowa Mɔsɛ lo Dikona dia Sinayi.a (Adia Etombelo 34:​6, 7.) Kaanga mbele Jehowa ekɔ la waonga w’amɛna efula, nde akatɛ Mɔsɛ dia nde ekɔ “Nzambi ka kɛtshi ndo kokana kandji.” Onde Nzambi ka ngasɔ koka ntona dimanyiya ɔtɛmɔdi ande wakayatshumoya mɛtɛ oma lo pɛkato? Ndooko kaanga yema! Naka nde nsala ngasɔ, kete nde ayɛnya dia nde bu la kɛtshi ndo ekɔ otema wolo, waonga wele Jehowa hakoke monga la wɔ pondjo.

⁸ Sho koka monga l’eshikikelo di’etena kata Jehowa ɔnɛ nde ekɔ Nzambi kokana kɛtshi, nde ekɔ lo mbuta mɛtɛ nɛ dia nde hataka kashi. (Os. 31:5) Laasɔ, sho koka monga l’eshikikelo lo kɛnɛ katande. Naka wɛ ekɔ lo mɛna wolo dia ntshika ndjaɛndja onongo l’ɔtɛ wa pɛkato yakayasale lo nshi yakete, yambola wate: ‘Onde dimi mbetawɔka mɛtɛ dia Jehowa ekɔ Nzambi ka kɛtshi ndo kokana kandji ndo nde hatonaka pondjo dimanyiya otshi wa pɛkato wayatshumoya? Laasɔ, lande na kahamakoke mbetawɔ dia nde akadimanyiya pɛkato yami?’

9. Kakɔna kalembetshiya edimanyielo ka pɛkato yaso? (Osambo 32:5)

⁹ Kana yimba lo kɛnɛ kakasambiyɛ Jehowa afundji wa Bible dia mfunda lo kɛnɛ kendana l’edimanyielo. Ɛnyɛlɔ, tende woho wakalembetshiya Davidɛ ofundji ɔmɔtshi wa Bible, edimanyielo ka Jehowa. (Adia Osambo 32:5.) Davidɛ akate ate: “Wɛ akadimanyiya munga ndo pɛkato yami.” Tshɛkɛta ya lo Hɛbɛru yokadimɔmi ɔnɛ “edimanyielo” koka nembetshiya “monyiya,” “minya” kana “mɛmba.” Ɔnkɔnɛ, etena kakadimanyiya Jehowa Davidɛ, Davidɛ akayaoke diele oko Jehowa ambowamuya wotsho ɔmɔtshi wakandɛmbaka. Davidɛ akahombe monga l’ɔngɛnɔngɛnɔ lo mbeya dia Jehowa ambodimanyiya pɛkato yande tshɛ lo tshɛ. (Os. 32:​2-4) Sho lawɔ koka mboka ɔngɛnɔngɛnɔ wa woho akɔ waamɛ. Etena kayatshumoyaso l’otema ɔtɔi oma lo pɛkato yaso, hatokoke ndjaɛndja onongo wa pɛkato yele Jehowa amboshilaka todimanyiyayɔ.

10-11. Kakɔna katetsha etelo k’ɔnɛ “suke dia dimanyiya” lo dikambo dia Jehowa? (Osambo 86:5)

¹⁰ Adia Osambo 86:5. Lanɛ, Davidɛ ekɔ lo ntɛkɛta dia Jehowa ekɔ “suke dia dimanyiya.” Lo nembetshiya etelo kɛnɛ, rɛfɛransɛ ɔmɔtshi wa lo Bible mbutaka lo dikambo dia Jehowa ɔnɛ : “[Nde] ekɔ ‘ɔnɛ ladimanyiya,’ ndo ɔsɔ ekɔ ‘lonto lande.’” Lande na kele Jehowa suke dia dimanyiya? Etenyi kayela ka divɛsa nembetshiyaka ɔnɛ: “Wɛ ndola tɔɔ la ngandji ka kɔlamelo le wanɛ tshɛ wakelɛ.” Oko wakatɛnyi lo sawo dietshi, Jehowa ndakaka dia mɛnya ngandji kande ka kɔlamelo le wanɛ wawoka ngandji ndo nde hawakalɛki pondjo. Oma lo ngandji kande ka kɔlamelo, Jehowa ‘ayodimanyiya l’otema ɔtɔi’ atshi wa pɛkato tshɛ wayatshumoya. (Isa. 55:​7, nɔtɛ) Naka wɛ ekɔ l’okakatanu dia mbetawɔ edimanyielo ka Nzambi, yambola wate: ‘Onde dimi mbetawɔka dia Jehowa ekɔ suke dia dimanyiya wanɛ tshɛ wayatshumuya l’otema ɔtɔi ndo wele l’ohomba wa kɛtshi kande? Onde halakoke mbetawɔ dia nde akadimanyiya etena kakamɔɔlɔmbɛ dia mbokami kɛtshi?’

¹¹ Sho koka nkondja ekeketshelo lo mbeya dia Jehowa shihodiaka dimɛna dimɛna eongelo kaso k’anto wele keema kokele. (Os. 139:​1, 2) Kɛsɔ mbatanaso nto l’Osambo wa Davidɛ wakoka tokimanyiya dia mbetawɔ edimanyielo ka Jehowa.

TOHƐKE KƐNƐ KOHƆ JEHOWA

12-13. Lo ndjela Osambo 103:​14, kakɔna kohɔ Jehowa lo dikambo diaso ndo kɛsɔ mbotshutshuyaka dia nsala na?

¹² Adia Osambo 103:14. Davidɛ mbutaka dia Jehowa “mbohɔka dia tekɔ ditshu.” Oma l’ɛtɛkɛta ɛnɛ, Davidɛ mbutaka dia Jehowa ekɔ suke dia dimanyiya atɛmɔdi ande wayatshumoya: Nde shihodiaka eongelo kaso k’atshi wa pɛkato. Dia sho nshihodia dikambo sɔ dimɛna, nyɛsɔ tɔsɛdingole ɛtɛkɛta wa Davidɛ.

¹³ Davidɛ mbutaka dia Jehowa “mbeyaka dimɛna woho wakatakengama.” Nde akatonge Adama “oma lo ditshu dia nkɛtɛ.” Ɔnkɔnɛ, nde mbeyaka woho wakatongama anto ndo nde mbeyaka ehomba awɔ. Ɛnyɛlɔ, anto wekɔ l’ohomba wa ndɛ, ndala ndo mpɛnga. Kaanga anto wa kokele wekɔ l’ohomba wa diangɔ sɔ. (Eta. 2:7) Koko, l’ɔtɛ wakasale Adama l’Eva pɛkato, etelo k’ɔnɛ anto wakatongama oma lo ditshu kakayonga l’elembetshielo ekina. Oko weso tokanula tawɔ, takahowɔ eongelo k’atshi wa pɛkato katokonya dia salaka kɛnɛ kele kɔlɔ. Jehowa heye tsho dia tekɔ atshi wa pɛkato, koko Davidɛ mbutaka dia Jehowa “mbohɔka” dui sɔ. Tshɛkata ya lo Hɛbɛru yokambiwɔ la yɔ lanɛ koka nembetshiya mbɔsa tɛdikɔ t’amɛna. Sho koka nembetshiya ɛtɛkɛta wa Davidɛ lo yoho nyɛ: Jehowa shihodiaka dia sho koka nsala kɛnɛ kele kɔlɔ lo tena dimɔtshi, ndo etena kasalaso kɔlɔ ndo kayatshumoyaso, nde tɛnyaka kɛtshi ndo todimanyiyaka.—Os. 78:​38, 39.

14. a) Kakɔna nto kata Davidɛ lo woho watodimanyiya Jehowa? (Osambo 103:12) b) Wetshelo akɔna wakondjaso lo woho wakadimanyiya Jehowa Davidɛ? (Enda kiombo yele l’ɔtɛ a dui ɔnɛ: “Woho wadimanyiya ndo wohɛ Jehowa pɛkato yaso.”)

¹⁴ Wetshelo akɔna nto wakokaso nkondja oma l’Osambo 103 lo woho watodimanyiya Jehowa? (Adia Osambo 103:12.) Davidɛ mbutaka dia etena katodimanyiya Jehowa, Nde manganyaka pɛkato yaso “oko wanganyi ehotwelo [ɛstɛ] la edjelo ka wonya [owɛstɛ] etale.” Lo yoho mɔtshi, ɛstɛ mangana etale efula la owɛstɛ ndo tokoma takɔ tohende tɔsɔ hatohomanaki pondjo. Kakɔna katetsha dikambo sɔ lo kɛnɛ kendana l’edimanyielo ka Jehowa? Dibuku dimɔtshi nembetshiyaka ɛtɛkɛka wa lo divɛsa nɛ ɔnɛ: Nzambi manganyaka pɛkato yaso etale efula la so, wate kana oko nsolo k’ɛngɔ kɛmɔtshi kamboshila tshɛ lo tshɛ. Laasɔ sho koka monga l’eshikikelo dia nde hohɔki kana hatoholaki pondjo awui wendana la pɛkato yakɔ nto. Diakɔ diele etena katodimanyiya Jehowa pɛkato yaso, nde manganyaka pɛkato yakɔ etale efula la so lo yoho yele oyadi nde kana sho hatokoke mbohɔ pɛkato yakɔ nto ndo nde hatotosha dilanya l’ɔtɛ ayɔ.—Ɛzk. 18:​21, 22; Ets. 3:19.

15. Kakɔna kakokaso nsala naka tekɔ lo ndjaɛndja onongo l’ɔtɛ wa munga yaso yakatasale lo nshi yakete?

¹⁵ Ngande wakoka ɛtɛkɛta wa Davidɛ watanema l’Osambo 103 tokimanyiya dia mbetawɔ edimanyielo ka Jehowa? Kanyiya woho wayaoka Jehowa lo dikambo diayɛ. Nde mbeyaka dia wɛ ekɔ otshi wa pɛkato. Ndo Jehowa dimanyiyaka onto tshɛ layatshumoya lo pɛkato kande ndo kɛsɔ mbakayasale. Ohɔ nto dia Jehowa akɔshi yɛdikɔ yaha mbohɔ kana nkanyiya pɛkato yakandakodimanyiya. Diakɔ diele nde hatokɛndja onongo kana kosha dilanya l’ɔtɛ wa pɛkato yakɔ nto. Jehowa hake washo lo pɛkato yaso yakete ndo sho lawɔ hatohombe mbika washo lo pɛkato yaso yakete. (Os. 130:3) Etena ketawɔso edimanyielo ka Jehowa, tayonga l’akoka wa mbohɛ pɛkato yakatasale lo nshi yakete ndo tayotetemala mbokambɛ l’ɔngɛnɔngɛnɔ.

16. Sha ɛnyɛlɔ kɛɛnya lande na kele ekɔ waale ntetemala ndjaɛndja onongo lo dikambo dia pɛkato yakatasale lo nshi yakete. (Enda ndo osato.)

¹⁶ Tɔshi ɛnyɛlɔ kɛnɛ. Ntetemala ndjaɛndja onongo lo dikambo dia pɛkato yakatasale lo nshi yakete, ekɔ oko onto latakɛndjakɛndja mutuka ko ekɔ lo ntetemala menda paka lo talatala kɛɛnya l’ɔkɔngɔ. Keema kɔlɔ mbokaka sso etena kɛmɔtshi lo talatala kɛɛnya l’ɔkɔngɔ nɛ dia dui sɔ koka kokimanyiya dia mbewɔ waale wele l’ɔkɔngɔ ayɛ. Koko dia wɛ ntetemala nkɛndjakɛndja la yambalo tshɛ, wɛ pombaka mbika washo la ntondo. Woho akɔ waamɛ mbele lo tena dimɔtshi, keema kɔlɔ nkana yimba lo munga yakatasale lo nshi yakete. Sho koka nkondja wetshelo oma lɔkɔ ndo mbɔsa yɛdikɔ yaha ndjikalolɛ nto. Koko, naka sho ntetemala ndjaɛndja onongo lo dikambo dia kɔlɔ yakatasale lo nshi yakete, kete kɛsɔ mbeyaka ndjotodjɛ wekamu dia sho ntetemala kambɛ Nzambi. Lo dihole dia nsala ngasɔ, totetemale mbika washo lo kɛnɛ kele la ntondo kaso. Tekɔ lo mboka katɔla otsha lo lɔsɛnɔ la pondjo l’andja w’oyoyo watolaka Nzambi lɛnɛ ele akambo wa kɔlɔ “hawotohɔma nto.”—Isa. 65:17; Tok. 4:25.

TETEMALA MBETAWOYA OTEMA AYƐ

17. Lande na kahombaso ntetemala mbetawoya otema aso lo kɛnɛ kendana la ngandji ndo edimanyielo ka Jehowa?

¹⁷ Sho pombaka ntetemala mbetawoya otema aso lo kɛnɛ kendana la ngandji ndo edimanyielo ka Jehowa. (1 Jni. 3:​19, nɔtɛ) Lande na? Nɛ dia Satana hatohekɔ mbidja welo dia tetawoya ɔnɛ sho hatosungana nangema kana dimanyiyama oma le Jehowa. Oyadi kakɔna tshɛ kakoka ntomba, oyango wa Satana ele toshimba diaha ntetemala kambɛ Jehowa. Sho koka nongamɛ dia Satana ayotetemala mbidja welo nɛ dia nde mbeyaka dia etena kande kaya mondo. (Ɛny. 12:12) Tatootshikɛke dihole pondjo!

18. Kakɔna kahombayɛ ntetemala nsala dia mbetawoya otema ayɛ lo ngandji ndo edimanyielo ka Jehowa?

¹⁸ Lo sawo dietshi takɛnyi kɛnɛ kakokaso nsala dia monga l’eshikikelo dia Jehowa tolangaka. Dia mbetawoya otema ayɛ lo dikambo dia edimanyielo ka Jehowa, kana yimba lo kɛnɛ kakate Jehowa lo dikambo dia woho w’onto wende. Kana yimba nto lo woho wakandasambiya afundji wa Bible dia mfunda akambo wendana l’edimanyielo kande. Tohɛke pondjo dia nde mbeyaka dia tekɔ atshi wa pɛkato ndo nde ayotosalɛ akambo la kɛtshi. Ndo tohɔke dia etena kadimanyiya Jehowa onto ɔmɔtshi pɛkato kande, nde mbohɛka tshɛ lo tshɛ. Wɛ koka monga l’eshikikelo dia Jehowa kookaka kɛtshi ndo wɛ koka mbuta oko wakate Davidɛ ɔnɛ: “Jehowa losaka, lo dimanyiya ‘munga ndo pɛkato yami’!”—Os. 32:5.