Kɛnɛ Kele Ana L’ohomba Oma Le Ambutshi Awɔ
AMBUTSHI tshɛ mbishaka lonya lo dikambo dimɔtshi diele anto hawokoke dimana fundo. Ombutshi wa pami la wa womoto kimɔka onto l’onto yangɔ mɔtshi oma lo demba diande. Oma lâsɔ, yangɔ yakimɔ papa la mama tatɛka pama lo dikundju diaki mama polo lo yɔ ndjotondja tshondo y’onto lasɛna. Diakɔ diele lam’otɔ ɔna, anto mbutaka ɔnɛ ɔsɔ ekɔ “dihindo dia eotwelo.”
Lo mɛtɛ, eotwelo k’ɔna ekɔ tsho etatelo k’ɔkɛndɛ waki ambutshi. Ntondotondo, ana w’anto kongɛka oseka ɛngɔ tshɛ oma le ambutshi awɔ, koko lam’ayawole, vɔ mongaka l’ohomba w’awui akina efula koko aha paka ehomba awɔ wa l’emunyi. Vɔ wekɔ l’ohomba w’ekimanyielo dia tshunda lo yimba, lo nsaki, lo lɔkɛwɔ ndo lo nyuma.
Dia vɔ mbola dimɛna, ana wekɔ l’ohomba w’efula wa ngandji kaki ambutshi awɔ. Ekɔ ohomba di’ambutshi mɛnyaka anawɔ ngandji kɛsɔ oma l’ɛtɛkɛta ndo oma lo ditshelo. Eelo, ana wekɔ l’ohomba w’ɛnyɛlɔ ka dimɛna kaki ambutshi awɔ. Vɔ wekɔ l’ohomba w’ɛlɔmbwɛlɔ lo kɛnɛ kendana la lɔkɛwɔ ndo wekɔ l’ohomba wa wetshelo wahomba mbaɛnya yoho yahombawɔ sɛnaka. Ndo wekɔ l’ohomba w’awui asɔ oma ko tɔkɛndakɛnda tawɔ. Awui wa lonyangu efula koka tomba ndo awui asɔ tombaka naka ana hawolongodi ekimanyelo kam’ekende suke.
Atɔndɔ woleki amɛna tanemaka lo Bible koko aha l’ahole akina. Wetshelo w’oma lo Bible wekɔ la wahɔ wa lânde. Oma l’ekimanyielo ka wetshelo ɔsɔ, ana tatɛka mɛna dia kɛnɛ kawaetshawɔ haye oma le anto, koko tɔ ndja oma le Otungi awɔ, mbut’ate Shɛwɔ lele l’olongo. Dikambo sɔ keketshaka dako diashama lo yoho yaheyama mbɛdika.
Bible keketshaka ambutshi dia vɔ sala la wolo tshɛ dia tɔtɔmiya atɔndɔ w’ɔlɔlɔ lo timba t’anawɔ. Koko, lam’ayole ana, mbala efula ambutshi ndekaka mɛna wolo dia tɛkɛta la wɔ awui woleki ohomba. Dibuku nɛ diele l’ɔtɛ a dui ɔnɛ: Etshama oma le Ombetsha a Woke diambofundama l’oyango wa kimanyiya ambutshi dia vɔ mbewɔ woho wa dikambo sɔ. Dibuku nɛ diambofundama dia nyosha awui wa lo nyuma w’eshika wa nyu l’ananyu mbadiaka kâmɛ. Lâdiko wa lâsɔ, dibuku nɛ pombaka keketsha sawo lam’asa ana la wanɛ wadia dibuku nɛ kâmɛ la wɔ.
Wɛ ayɛna dia dibuku nɛ nɔmbaka ana dia vɔ mbisha ekadimwelo lo wembola wele lɔkɔ. Wembola efula w’amɛna wekɔ lo dibuku nɛ. Lam’ayoyokoma lo wembola ɛsɔ, wɛ ayɛna tokɔ tosato ( . . . ). Tokɔ tɔnɛ koholaka dia wɛ memala yema ndo nɔmba ɔna dia nde kadimola lo dimbola. Ana nangaka dia ndo vɔ lawɔ tɛkɛta. Naka ɔna hatɛkɛta, kete nde ayonya yimba esadi eto oma lo kɛnɛ kawadiɛyɛ.
Koko, kɛnɛ koleki ohomba ele, wembola ɛsɔ wayokokimanyiya dia wɛ mbeya kɛnɛ kele lo yimba y’ɔna. Mɛtɛ, ɔna mbeyaka mbisha ekadimwelo wa kɔlɔ. Koko, awui wayela dimbola tshɛ koka kimanyiya ɔna dia nde monga l’akoka w’ɔlɔlɔ wendana l’ekanelo ka yimba.
Dikambo dimɔtshi dia dimɛna efula dia lo dibuku nɛ ele esato ndekana 230 wele lɔkɔ. Efula k’esato ɛsɔ wekɔ la tɔtɛkɛta talembetshiya esato tele tɔ nɔmbaka ɔna dia mbisha okadimwelo w’oma lo kɛnɛ kɛnande ndo kadishande. Ɔnkɔnɛ, pombaka wɛ sɛdingolaka esato ɛsɔ kâmɛ l’ɔna. Esato koka monga dihomɔ di’amɛna efula dia wetshelo diayonyokimanyiya dia mbika epole ɔsɛkɛ l’awui w’ohomba walakanyema.
Naka ɔna ekɔ lo mbeka woho wa mbadia, kete keketshande dia nde kadiyɛ dibuku nɛ la dui dia wolo ndo dia mbadia dibuku diakɔ dikambo diande ndamɛ. Naka nde mbadiaka dibuku nɛ mbala efula, kete alako w’ɔlɔlɔ wele lɔkɔ wayoleka tɔtɔmɛ lo yimba ndo l’otema ande. Koko dia wɛ keketsha amama wa ngandji ndo dilɛmiɛlɔ diele lam’asayɛ l’ɔnayɛ, sala tshɛ dia wɛ mbadiaka dibuku nɛ kâmɛ la nde ndo salaka dikambo sɔ mbala la mbala.
Aya ɛnɔnyi efula wele ana wotshutshuyamaka lo yoho ya kɔlɔ efula, dia ndjakimɔ l’awui wa dieyanelo dia kɔlɔ, l’awui w’ɛdiɛngɛ ndo lo ditshelo dikina dia kɔlɔ efula. Ɔnkɔnɛ, vɔ wekɔ l’ohomba w’ekokelo. Dibuku nɛ mbishaka ekokelo kɛsɔ lo yoho y’ɔlɔlɔ ndo ya wɔdu. Lo yoho ya lânde, ana wekɔ l’ohomba wa nɔmbɔma otsha lo Kiɔkɔ ya lomba tshɛ, mbut’ate otsha le Shɛso lele l’olongo, Jehowa Nzambi. Kɛsɔ mbakasalaka Yeso, Ombetsha a Woke nshi tshɛ. Tekɔ lo nongamɛ l’otema ɔtɔi dia dibuku nɛ diayokokimanyiya wɛ la nkumbo kayɛ dia nyu tshikitanya yoho yanyu ya lɔsɛnɔ woho wa nyu ngɛnyangɛnya Jehowa ndo kondja ɛtshɔkɔ wa pondjo pondjo.