Toleke kondja wahɔ oma lo nsanganya y’otsha l’olimu w’esambishelo
1. Ngande wakoka tokimanyiya nsanganya y’otsha l’olimu w’esambishelo?
1 Nsanganya y’amɛna y’otsha l’olimu w’esambishelo keketshaka mɛtɛ ndo toshaka wetshelo w’ohomba la ntondo ka sho ntshɔ l’esambishelo. Nsanganya shɔ tokimanyiyaka dia sho sambisha l’olui woho wa sho kamba kâmɛ l’anto akina dia sukanɛ ndo mbetshana. (Tuk. 27:17; Und. 4:9, 10) Akokaso sala dia sho ndeka kondja wahɔ oma lo nsanganya shɔ?
2. Naa awui amɔtshi wakoka sɛdingola ɔnɛ lalɔmbɔla?
2 Ɔnɔmbɔdi: Lo nsanganya shɔ hawɛnya la ntondo awui shikaa wayɔsɛdingɔma. Koko, naka wɛ mbayɔlɔmbɔla, kete ekɔ ohomba efula wɛ ndjalɔngɔsɔla dimɛna. Tongake la mbekelo ka sɛdingolaka divɛsa dia lushi, kânga mbakokayɛ mɛna ɔlɔlɔ mbidja kanyi yele lɔkɔ lo ɔkɛtshanyelo naka yɔ mendanaka efula l’olimu w’esambishelo. Takanyi yimba la ntondo di’ekimanyielo kakokayɛ mbisha wanɛ wayosambisha lushi longo. Ɛnyɛlɔ, nyu mbeyaka mɛna ɔlɔlɔ kɛtshanya awui amɔtshi kana sala wɛnyɛlɔ ɔmɔtshi. Wɛ mbeyaka mɛna ɔlɔlɔ vusola dui dimɔ diele lo dibuku Comment raisonner, Kalasa k’olimu kana etenyi kɛmɔtshi ka Losanganya l’olimu kahatete edja. Lo mbala nkina, nyu mbeyaka sɛdingola woho wa kandola okakatanu ɔmɔtshi wakoka tomba l’ɛtshi kanyu ka nkɛtɛ kana nyu kokaka tɛkɛta woho wa nomialomia nsaki k’onto ndo wa tatɛ wekelo wa Bible, djekoleko naka apandjudi efula wayosala waendelo w’eyoyo. Oyadi dikambo diakɔna diɔmbɔlayɛ, ɔmbɔladiɔ la wangasanu tshɛ ndo lo yoho yakeketsha.
3. Edja ka ngande kahomba losanganya l’otsha l’olimu w’esambishelo mbiviya, ndo kakɔna kahomba salema l’edja kɛsɔ tshɛ?
3 Tatɛ losanganya lɔsɔ la wonya, oyadi kânga wɛ mbeyaka di’anto amɔtshi wayoya l’ɔkɔngɔ. Onga la shɛnɔdi dia mbeya kahanya anto ndo ɛtshi ka nkɛtɛ le wanɛ wele la ohomba atɔ. Losanganya lɔsɔ hahombe ndekana minitɛ 10 kana 15 ndo naka l’ɔkɔngɔ wa nsanganya ya l’etshumanelo mbasalemalɔ, kete lɔ pombaka monga l’ɛse ka lâsɔ. Onto tshɛ pombaka mbeya onto lahomba tomba la nde ndo dihole diatawatshu dia tosambisha la ntondo ka wɛ kumiya losanganya lɔsɔ. Pombaka kumiya losanganya la dɔmbɛlɔ.
4. Kakɔna kayokimanyiya anto tshɛ dia vɔ ndeka kondja wahɔ oma lo nsanganya y’otsha l’olimu w’esambishelo?
4 Nyu kokaka mbisha lonya: Oko wasalemadiɔ lo nsanganya ya l’etshumanelo, sho pombaka nɛmiya Jehowa ndo kanɛ anto akina lo komaka la wonya. Tɛkɛta lo wonya w’ɔkɛtshanyelo. Wɛ koka mbetawɔ dia ɔnɛ lalɔmbɔla kosha onto la wɛ sambisha la nde, kana wɛ mbeyaka tokanyi l’onto ɔmɔtshi la ntondo ka losanganya. Naka wɛ kombolaka tokanyi l’onto la ntondo, kete yatshutshuya dia ‘ndiholɛ anto akina otema’ lo kamba kâmɛ la apandjudi tshɛ lo dihole dia sambishaka tena tshɛ paka l’angɛnyi ayɛ. (2 Kor. 6:11-13) Kam’ashila losanganya lɔsɔ, pombaka ntshɔ mbala kakɔ ɔtɔi lo ɛtshi ka nkɛtɛ ndo mbewɔ dia tshikitanya anto.
5. Oyango akɔna wele la nsanganya y’otsha l’olimu w’esambishelo?
5 Oyango wa nsanganya y’otsha l’olimu w’esambishelo ekɔ wâmɛ la wa nsanganya ya l’etshumanelo. Yɔ nɔngɔswamaka dia sho ‘kananɛ onto l’onto dia tshutshuyana lo ngandji la lo elimu w’ɔlɔlɔ.’ (Heb. 10:24, 25) Naka sho ndjatshutshuya dia kondja wahɔ oma lo nsanganya shɔ, kete tayokimanyiyama dia kamba olimu, mbuta ate kamba ‘olimu wa dimɛna.’