Mponda ka Balama kambɔtɛkɛta

Ase Isariyɛlɛ wakatshikala l’oswe wa shɛnga l’edja ka ɛnɔnyi oko 40. Vɔ wakalɛndja esomba efula wa wolo. Kakianɛ, etena kohangiwɔ l’oswe wa Mɔaba lo ɛstɛ ka Ɔkɛdi wa Jɔrdana, etena kakakoke ka vɔ mbɔtɔ lo nkɛtɛ ya Daka. Balaka, nkumekanga ka Mɔaba akoke wɔma dia wayanga mbɔkɔsɔla wodja ande. Ɔnkɔnɛ, nde akelɛ pami kɛmɔtshi kakawelɛka Balama dia ndja la Mɔaba ndo dia ndjodja ase Isariyɛlɛ mananu.

Koko Jehowa akatɛ Balama ate: ‘Todjake ase Isariyɛlɛ mananu.’ Ɔnkɔnɛ, Balama akatone dia ntshɔ. Nkumekanga Balaka akawelɛ mbala ka hende ndo akalake dia mbosha kɛnɛ tshɛ kalangande. Koko, Balama akatone. Ko Nzambi akate ate: ‘Wɛ mbeyaka ntshɔ, koko kotote paka kɛnɛ kayomokotɛ dia mbita.’

Balama akahema lo mponda kande ndo akatshu otsha lo sidɛ la Mɔaba. Nde akakongɛ dia todja ase Isariyɛlɛ mananu kaanga mbele Jehowa akawotɛ diaha nde nsala dui sɔ. Ondjelo wa Jehowa akɛnama lo mboka mbala shato. Balama kɔmɛnaka ondjelo, koko mponda kande akawɛnyi. Mbala ka ntondo, mponda kakamɔ lo mboka ko mbɛtɔla l’oswe. Mbala ka hende, mponda kakadɛ lo dive ndo kakasakanya lokolo la Balama lo dive diakɔ. Mbala k’ekomelo, mponda kakadjasɛ l’atei wa mboka. Mbala tshɛ, Balama akakɔmɔlaka mponda kande la lofimbɔ.

L’ɔkɔngɔ wa mbala ka sato, Jehowa akasale dia mponda ntɛkɛta. Mponda akambola Balama ate: ‘Lande na katetemalayɛ kɔmɔlami?’ Balama akate ate: ‘Wɛ ambɔmɛna enginya. Otondonga laki la lokuwa tshike lakakodiaki.’ Mponda akate ate: ‘Aya ɛnɔnyi efula wambahemayɛ. Onde dimi lambokosalɛka nganɛ lushi lɔmɔtshi?’

Ko Jehowa akasale dia Balama mɛna ondjelo. Ondjelo akate ate: ‘Jehowa akakotɛ diaha wɛ mbidja Isariyɛlɛ mananu.’ Balama akate ate: ‘Lambosala kɔlɔ. Layanga nkalola lakami.’ Koko ondjelo akate ate: ‘Wɛ koka ntshɔ la Mɔaba koko kotote paka kɛnɛ kayokotɛ Jehowa dia mbuta.’

Onde Balama akakondja wetshelo? Ndooko. L’ɔkɔngɔ wa laasɔ, Balama akayange mbala shato y’etondo dia mbidja ase Isariyɛlɛ mananu, koko mbala tshɛ Jehowa akaatshɔkɔlaka lo dihole dia vɔ mbidjama mananu. L’ekomelo, ase Isariyɛlɛ wakayɔlɔshaka ase Mɔaba ndo Balama akadiakema. Shi otonga dimɛna dia Balama mpokamɛ Jehowa lo dihole dia ntondo?