Tshikala lo ngandji ka Nzambi

1, 2. Kakɔna kakokaso nsala dia ntshikala lo ngandji ka Nzambi?

SHO tshɛ nangaka monga la wolo ndo la yonge ya dimɛna. Ɔnkɔnɛ, sho nyangaka dia ndɛɛka mbo y’amɛna, sutshasutshaka demba mbala la mbala ndo kokɛka alemba aso. Kaanga mbele awui asɔ nɔmbaka dia mbidja welo, sho ngɛnangɛnaka etombelo wakondjaso oma lɔkɔ diakɔ diahatahekɔ. Koko sho pombaka nto monga la wolo ndo la yonge ya dimɛna lo yoho nkina.

² Oyadi kaanga takatatɛ dimɛna dia mbeya Jehowa, sho pombaka ntetemala nkeketsha diɔtɔnganelo diasaso la nde. Etena kakakeketsha Judɛ Akristo ɔnɛ: “Nyotshikale lo ngandji ka Nzambi,” nde akalembetshiya woho wakawakoke nsala dui sɔ. Nde akawatɛ ate: “Nyoyahike nyuamɛ lo mbetawɔ kanyu koleki ekila.” (Judɛ 20, 21) Laasɔ, ngande wakokaso monga la mbetawɔ ka wolo?

TETEMALA KEKETSHA MBETAWƆ KAYƐ

3-5. a) Ngande walanga Satana dia wɛ ndjaoka lo kɛnɛ kendana l’ɛlɛmbɛ wa Jehowa? b) Ngande wɔsayɛ ɛlɛmbɛ ndo atɔndɔ wa Jehowa?

³ Ekɔ ohomba dia wɛmɛ nshikikɛ ɔnɛ mboka ya Jehowa mboleki tshɛ amɛna. Satana nangaka dia wɛ mbɔsa di’ɛlɛmbɛ wa Nzambi wekɔ wolo efula nkitanyiya ndo di’ɔnɛ wɛ ayoleka monga l’ɔngɛnɔngɛnɔ naka wɛmɛ nshikikɛ kɛnɛ kele ɔlɔlɔ la kɛnɛ kele kɔlɔ. Ntatɛ l’ekambɔ k’Ɛdɛna, Satana akayange di’anto mbetawɔ dui sɔ. (Etatelo 3:1-6) Ndo nde ekɔ lo ntetemala nyanga dia nsala ngasɔ la wolo tshɛ ɛlɔ kɛnɛ.

⁴ Onde Satana ekɔ la shadiya? Onde ɛlɛmbɛ wa Jehowa wekɔ lo todja lo shasa? Ndooko. Dia mboka dui sɔ, tɔshi ɛnyɛlɔ kɛnɛ, ohɔsa dia wɛ ekɔ lo takɛndakɛnda lo jardɛ ya dimɛna efula ko wɛ ambɛna lokombo la tanga lakoshimba diaha mbeta lo wedi okina. Ondo wɛ ayoyambola wate, ‘lande na kakawadje lokombo lɔnɛ?’ Koko l’etena kakɔ, wɛ amboka ntambwɛ kadikita lo wedi okina wa lokombo. Ngande wayoyoyaoka etena kɛsɔ lo kɛnɛ kendana la lokombo lakɔ? Wɛ ayɔngɛnangɛna dia lɔ lekɔ lo kokokɛ diaha ntambwɛ konda! Atɔndɔ wa Jehowa wekɔ oko lokombo lɔsɔ ndo Diabolo ekɔ oko ntambwɛ kɛsɔ. Ɔtɛkɛta wa Nzambi tɔhɛmɔlaka ɔnɛ: “Nyambalɛke, nyosungukalake. Diabolo otunyi anyu ekɔ lo mbeteta oko ntambwɛ kadikita kayanga onto la nde ndɛ.”—1 Petero 5:8.

⁵ Jehowa nangaka dia sho nsɛna lɔsɛnɔ loleki tshɛ dimɛna. Nde halange dia sho kesama oma le Satana. Diakɔ diakandatosha ɛlɛmbɛ ndo atɔndɔ dia tokokɛ ndo tosha ɔngɛnɔngɛnɔ. (Ɛfɛsɔ 6:11) Jakɔba akafunde ate: “Onto laka washo lo ɛlɛmbɛ wa kokele wa lotshungɔ ndo latetemala lɔkɔ . . . ayonga l’ɔngɛnɔngɛnɔ lo nsala dui sɔ.”​—Jakɔba 1:25.

6. Ngande wakokaso monga l’eshikikelo k’ɔnɛ mboka ya Nzambi mboleki tshɛ amɛna?

⁶ Etena kayelaso ɛlɔmbwɛlɔ ka Jehowa, nsɛnɔ yaso ndowanaka ndo diɔtɔnganelo diasaso lande mongaka nge. Ɛnyɛlɔ, sho kondjaka wahɔ etena ketawɔso leeta lande la mbɔlɔmbaka mbala la mbala. (Mateo 6:5-8; 1 Tɛsalɔnika 5:17) Sho mongaka l’ɔngɛnɔngɛnɔ etena kayelaso ɛlɔmbwɛlɔ kande ka nsanganaka dia mbɔtɛmɔla ndo dia keketshana lam’asaso ndo etena kayashaso tshɛ l’olimu w’esambishelo ndo wa mbetsha. (Mateo 28:19, 20; Ngalatiya 6:2; Hɛbɛru 10:24, 25) Etena kakanyiyaso woho wakatokimanyiya awui asɔ dia mbetawɔ kaso monga nge, sho ndekaka monga l’eshikikelo dia mboka ya Jehowa mboleki tshɛ amɛna.

7, 8. Kakɔna kayotokimanyiya dia mbewɔ ndjakiyanya lo dikambo di’ehemba wayotokoka pomana lawɔ lo nshi yayaye?

⁷ Sho mbeyaka ndjakiyanya di’ɔnɛ lo nshi yayaye tayohomana l’ehemba wa mbetawɔ wa wolo efula. Naka ngasɔ mbayaokayɛ, ohɔ ɛtɛkɛta wa Jehowa wata ɔnɛ: “Dimi Jehowa kele Nzambi kayɛ, Ɔnɛ latoketshaka dikambo dia wahɔ ayɛ, Ɔnɛ lakɔlɔmbɔla lo mboka kahombayɛ nkɛndakɛnda. Otoyodja yimba lo ɛlɛmbɛ ami lee! tshike wɔladi ayɛ wotonga oko ɔkɛdi w’ashi ndo losembwe layɛ oko asuku wa ndjale.”​—Isaya 48:17, 18.

⁸ Naka sho nkitanyiya Jehowa, kete wɔladi aso wayonga oko ɔkɛdi w’ashi wahome ndo losembwe laso layonga oko asuku wa lo ndjale watetemala kɔmɔla l’omamu. Oyadi kakɔna kayotokomɛ lo lɔsɛnɔ, sho koka monga la kɔlamelo. Bible ndakaka ɔnɛ: “Kitsha wotsho ayɛ le Jehowa, ko nde ayokosukɛ. Nde hetawɔki pondjo dia onto ɔlɔlɔ nkɔ.”​—Osambo 55:22.

“ANTO WAMBOTSHUNDA”

9, 10. Kakɔna kalembetshiya monga onto lambotshunda?

⁹ Etena kakeketshayɛ diɔtɔnganelo diasayɛ la Jehowa, wɛ ayonga ‘onto lambotshunda.’ (Hɛbɛru 6:1) Kakɔna kalembetshiya monga onto lambotshunda?

¹⁰ Hatokome Akristo wambotshunda paka tsho lo monga epalanga w’anto. Dia nkoma anto wambotshunda, sho pombaka mbetɛ Jehowa Ɔngɛnyi aso woleki tshɛ ndo nyanga dia mɛna akambo woho wawaɛnande. (Joani 4:23) Pɔɔlɔ akafunde ate: “Wanɛ wasɛna lo ndjela demba kanyiyaka akambo wa lo demba, koko wanɛ wasɛna lo ndjela nyuma kanyiyaka akambo wa lo nyuma.” (Rɔmɔ 8:5) Onto lambotshunda hayasha tshɛ l’ɛngɛnɔngɛnɔ kana lo lomombo la l’emunyi. Koko nde ndjashaka tshɛ lo kambɛ Jehowa ndo nde mbɔsaka tɛdikɔ ta lomba lo lɔsɛnɔ lande. (Tokedi 27:11; adia Jakɔba 1:2, 3.) Nde hetawɔ dia sɛngiyama dia nsala kɛnɛ kele kɔlɔ. Onto lambotshunda mbeyaka kɛnɛ kele ɔlɔlɔ ndo nde ndjaketembolaka dia kisala.

11, 12. a) Kakɔna kakate Pɔɔlɔ lo dikambo dia “wolo wa shɛnɔdi” y’Okristo? b) Ngande wele nkoma Okristo wambotshunda lo nyuma ekɔ oko nkoma ɔkɛnyi wa tɔkɛnyɔ?

¹¹ Nɔmbamaka dia mbidja welo dia monga onto lambotshunda. Ɔpɔstɔlɔ Pɔɔlɔ akafunde ate: “Mbo ya ndɛ ya wolo yekɔ dikambo di’anto wambotshunda, wanɛ wele oma lo okambelo, wolo wa shɛnɔdi yawɔ wambekiyama dia ntshikitanya ɔlɔlɔ la kɔlɔ.” (Hɛbɛru 5:14) Tshɛkɛta ‘mbekiyama’ koka tokonya dia nkanyiya woho wekiyama ɔkɛnyi wa tɔkɛnyɔ.

¹² Etena kɛnaso ɔkɛnyi wa tɔkɛnyɔ ɔmɔtshi wa manamana akɛnya, sho mbeyaka dia mbɔsaka etena k’otale ndo nɔmbamaka dia nde ndjaekiya dia nde monga l’akoka waya la nde. Nde kombotɔ ɔkɛnyi wa tɔkɛnyɔ. Etena kotɔ ɔna, nde heye shikaa woho wa nkamba l’anya ndo l’ekolo ande. Koko l’edjedja ka wonya, nde mbekaka woho wa nkimɛ diangɔ ndo woho wa nkɛndakɛnda. Naka nde mbekiyama, kete nde koka nkoma ɔkɛnyi wa tɔkɛnyɔ. Woho akɔ wamɛ mbele, nɔmbamaka etena k’otale ndo dia sho mbekiyama dia nkoma Akristo wambotshunda lo nyuma.

13. Kakɔna kayotokimanyiya dia sho kanyiyaka woho wakanyiya Jehowa?

¹³ Lo dibuku nɛ, tambɔsɛdingola woho wakokaso nkanyiya woho wakanyiya Jehowa ndo mɛna akambo woho wawaɛnande. Tambɛna woho wa ngɛnangɛna ndo nanga ɛlɛmbɛ wa Jehowa. Etena kɔsaso tɛdikɔ, sho pombaka ndjambola ɔnɛ: ‘Naa ɛlɛmbɛ kana atɔndɔ wa lo Bible wɔtɔnɛ la dikambo nɛ? Ngande wakokami nkamba la wɔ? Kakɔna kayolanga Jehowa dia dimi nsala?’​—Adia Tokedi 3:5, 6; Jakɔba 1:5.

14. Kakɔna kahombaso nsala naka sho nangaka nkeketsha mbetawɔ kaso?

¹⁴ Hatotshikaki pondjo dia ntetemala nkeketsha mbetawɔ kaso le Jehowa. Oko wele oleelo wa diangɔ di’amɛna tokimanyiyaka dia monga l’alemba wa wolo, mbeka akambo wendana la Jehowa tokimanyiyaka dia monga la mbetawɔ ka wolo. Etena kakatatatɛ mbeka Bible, sho takeke akambo wa mɛtɛ w’etatelo wendana la Jehowa ndo la mboka yande. Koko lam’atete nshi, sho pombaka nshihodia akambo woshɛmi etale. Kɛsɔ kakalange Pɔɔlɔ mbuta lam’akandate ate: “Mbo ya ndɛ ya wolo yekɔ dikambo di’anto wambotshunda.” Sho kondjaka lomba lo nkamba la kɛnɛ kekaso. Bible totɛka ɔnɛ: “Lomba lekɔ ɛngɔ koleki ohomba.”​—Tokedi 4:5-7; 1 Petero 2:2.

15. Naa ohomba wele la ngandji ka mɛtɛ kokaso Jehowa ndo anangɛso l’akadiyɛso?

¹⁵ Onto ɔmɔtshi mbeyaka monga la wolo ndo la yonge ya dimɛna, koko dia ntshikala ngasɔ, nde mbeyaka dia nde pombaka ntetemala ndjakokɛ. Lo yoho yakɔ yaamɛ, onto lambotshunda mbeyaka dia nde pombaka nkamba la wolo dia ntetemala mbetɛ diɔtɔnganelo diasande la Jehowa nge. Pɔɔlɔ toholaka ɔnɛ: “Nyotetemale ndjasɛdingola dia mbeya kana nyekɔ lo mbetawɔ; nyotetemale mɛnya woho w’anto wenyu.” (2 Kɔrɛtɔ 13:5) Koko nɔmbamaka akambo efula le so aha tsho monga la mbetawɔ ka wolo. Ngandji kokaso Jehowa ndo anangɛso l’akadiyɛso pombaka ntetemala mpama. Pɔɔlɔ akate ate: “Dimi kongaka la . . . ewo tshɛ, ndo dimi kongaka la mbetawɔ tshɛ kakoka nsɛkɔla akona, ko dimi bu la ngandji, kete dimi lekɔ anyanya.”​—1 Kɔrɛtɔ 13:1-3.

YASHA TSHƐ L’ELONGAMELO KAYƐ

16. Ngande walanga Satana dia sho ndjaoka?

¹⁶ Satana nangaka dia sho mbɔsa dia hatokokaki pondjo monga anto w’ɛlɔlɔ wakoka ngɛnyangɛnya Jehowa. Nde nangaka dia sho kɔmɔ ndo mbɔsa dia ekakatanu wele laso hawotokandɔma. Nde halange dia sho ndjaɛkɛ le asekaso Akristo ndo nde halange dia sho monga l’ɔngɛnɔngɛnɔ. (Ɛfɛsɔ 2:2) Satana mbeyaka dia tokanyi ta kɔlɔ koka tosalɛ shoamɛ kɔlɔ ndo ndanya diɔtɔnanganelo diasaso la Nzambi. Koko Jehowa akatosha ɛngɔ kɛmɔtshi katokimanyiya dia sho ndɔshana la tokanyi ta kɔlɔ. Nde akatosha elongamelo.

17. Ohomba akɔna wele l’elongamelo?

¹⁷ Lo 1 Tɛsalɔnika 5:8, Bible mbɛdikaka elongamelo kaso la lofulɛ lakokɛ ɔtɛ w’ɔsɔlayi lo ta lo mbelɛ lofulɛ lɔsɔ ɔnɛ “elongamelo ka panda.” Monga l’elongamelo l’alaka wa Jehowa koka nkokɛ timba taso ndo tokimanyiya dia sho minya tokanyi ta kɔlɔ lo yimba.

18, 19. Ngande wakakeketshama Yeso oma l’elongamelo?

¹⁸ Elongamelo kaki la Yeso kakawosha wolo. L’otsho w’ekomelo ka lɔsɛnɔ lande la nkɛtɛ, nde akahomana l’ekakatanu wa weho la weho. Ɔngɛnyi ande ɔmɔtshi wa ma ma akoofunge. Okina akanguna dia nde haweye. Akina wakotshike ndo wakalawɔ. Ase wodja ande wakɔɔtɔmbɔkwɛ, wakayange dia nde ndjakema l’otamba. Kakɔna kakokimanyiya dia mbikikɛ awui wa kandji asɔ? “L’ɔtɛ w’ɔngɛnɔngɛnɔ wakakitshama la ntondo kande, nde akakikɛ otamba w’asui, akɔnyɔla nsɔnyi ndo akatodjasɛ lo lonya l’omi la kiti ka lowandji ka Nzambi.”​—Hɛbɛru 12:2.

¹⁹ Yeso akeyaka dia lo monga la kɔlamelo, nde ayotombola She ndo ayɛnya dia Satana ekɔ kanga kashi. Elongamelo kɛsɔ kakawosha ɔngɛnɔngɛnɔ wa mamba. Nde akeyaka nto dia kem’edja, nde ayanga toonga nto kaamɛ la She l’olongo. Elongamelo kɛsɔ kakokimanyiya dia mbikikɛ. L’ɛnyɛlɔ ka Yeso, sho pombaka mbika washo l’elongamelo kaso. Tɔ kayotokimanyiya dia mbikikɛ oyadi kakɔna tshɛ kayotomba.

20. Kakɔna kakoka kokimanyiya dia mɛna akambo la sso di’ɔlɔlɔ?

²⁰ Jehowa mɛnaka mbetawɔ ndo ekikelo kayɛ. (Isaya 30:18; adia Malaki 3:10.) Nde ndakaka ɔnɛ: “Ayokokotshɛ nsaki y’otema ayɛ.” (Osambo 37:4) Laasɔ tetemala mbidja yimba yayɛ tshɛ l’elongamelo kayɛ. Satana nangaka dia wɛ shisha elongamelo ndo mbɔsa di’alaka wa Jehowa hawokotshamaki pondjo. Koko tetawɔke dia tokanyi ta kɔlɔ tɔsɔ koyelɛ lo yimba! Naka wɛ ambɛna di’elongamelo kayɛ kaya bu mɛtɛ le yɛ, lɔmba Jehowa dia kokimanyiya. Ohɔ ɛtɛkɛta watanema lo Filipɛ 4:6, 7 wata ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu lo tshimbo ya Kristo Yeso.”

21, 22. a) Naa sangwelo dia Jehowa lo dikambo dia nkɛtɛ? b) Kakɔna kamboyoyashikikɛ dia nsala?

²¹ Ɔsaka etena mbala la mbala dia kanaka yimba dikambo dia nshi yayaye y’amɛna efula yatokongɛ. Kem’edja, onto tshɛ lele la lɔsɛnɔ ayɔtɛmɔla Jehowa. (Ɛnyɛlɔ 7:9, 14) Ohokanyiya yema dikambo dia lɔsɛnɔ l’andja w’oyoyo. Lɔ layonga dimɛna la fwa ndeka ɛngɔ tshɛ kakokaso nkanyiya! Satana, ɛdiɛngɛ ande ndo akambo wa kɔlɔ tshɛ wayonyɛma. Wɛ hatotata hemɔ ndo hatovɔ. Koko, wɛ ayemɔka la pindju tshɛ ele la demba dia wolo ndo l’ɔngɛnɔngɛnɔ wa monga la lɔsɛnɔ. Anto tshɛ wayokamba kaamɛ dia nkonya nkɛtɛ paradiso. Anto tshɛ wayonga la mbo ya ndɛ y’amɛna ndo la dihole dia dimɛna dia mbidjasɛ. Anto hawotonga todjawudi kana ngala koko wayonga mɛtɛ anto w’ɛlɔlɔ lam’asawɔ. L’edjedja ka wonya, anto tshɛ wele la nkɛtɛ wayɔngɛnangɛna “la lotshungɔ la lotombo la ana wa Nzambi.”​—Rɔmɔ 8:21.

²² Jehowa nangaka dia wɛ mbeetɛ Ɔngɛnyi ayɛ woleki tshɛ. Laasɔ, sala tshɛ kakokayɛ nsala dia nkitanyiya Jehowa ndo yalekaka ndjasukanya la nde lushi la lushi. Eelo, nyɛsɔ sho tshɛ totshikale lo ngandji ka Nzambi pondjo pondjo!​—Judɛ 21.