Tetemala nkeketsha elongamelo kayɛ k’Okristo

1. Elongamelo kakɔna kakatosha Jehowa?

Jehowa akatosha elongamelo ka diambo efula ka lɔsɛnɔ la pondjo. Amɔtshi wekɔ l’elongamelo ka tɔsɛna pondjo pondjo l’olongo oko ditongami dia lo nyuma diahavɔki. (1 Kɔr. 15:50, 53) Koko anto efula wekɔ l’olongamelo ka nsɛna pondjo pondjo lanɛ la nkɛtɛ wele la yoonge ya kokele ndo l’ɔngɛnɔngɛnɔ. (Ɛny. 21:3, 4) Oyadi tekɔ lo nongamɛ dia monga la lɔsɛnɔ la pondjo l’olongo kana la nkɛtɛ, elongamelo kaso kekɔ la nɛmɔ efula le so.

2. Lo na ohikami elongamelo kaso ndo lande na kakokaso mbuta ngasɔ?

² Tshɛkɛta “elongamelo,” oko wokambiwɔ la yɔ lo Bible, koka nembetshiya “nongamɛ di’akambo w’ɛlɔlɔ wayosalema.” Elongamelo kaso kendana la nshi yayaye kekɔ shikaa nɛ dia tɔ ndja oma le Jehowa. (Rɔmɔ 15:13) Sho mbeyaka dia nde akalake, ndo sho mbeyaka dia nde kotshaka alaka ande nshi tshɛ. (Wal. 23:19) Tekɔ l’eshikikelo dia Jehowa ekɔ la nsaki ndo la wolo wa nkotsha kɛnɛ tshɛ katande dia nde ayosala. Ɔnkɔnɛ, elongamelo kaso hahikami lo kɛnɛ kafɔnyaso kana kakombolaso. Koko tɔ mpikama lo kɛnɛ kele shikaa ndo kele mɛtɛ.

3. Kakɔna kayotɔsɛdingola lo sawo nɛ? (Osambo 27:14)

³ Shɛso lele l’olongo tokaka ngandji ndo nde nangaka dia sho ndjaɛkɛ le nde. (Adia Osambo 27:14.) Naka elongamelo kaso le Jehowa kekɔ nge, kete tayonga l’akoka wa mbikikɛ ehemba ndo tokomɛ nshi yayaye la dihonga ndo l’ɔngɛnɔngɛnɔ tshɛ. Nyɛsɔ tɔsɛdingole woho watokokɛ elongamelo kaso. L’oyango ɔsɔ lo yimba, tayanga mvusola ntondo woho wele elongamelo kaso kekɔ oko longo la masuwa ndo oko lofulɛ. Oma laasɔ, tayɔsɛdingola woho wakokaso nkeketsha elongamelo kaso.

ELONGAMELO KASO KEKƆ OKO LONGO LA MASUWA

4. Lo woho akɔna wele elongamelo kekɔ oko longo la masuwa? (Hɛbɛru 6:19)

⁴ Lo mukanda wakandafundɛ ase Hɛbɛru, ɔpɔstɔlɔ Pɔɔlɔ akɛdika elongamelo kaso la longo la masuwa. (Adia Hɛbɛru 6:19.) Mbala efula Pɔɔlɔ akandaka nkɛndɔ lo ndjale, diakɔ diele nde akeyaka dia vɔ kambaka la longo la masuwa dia nshikimadia masuwa diaha vɔ ntshɔ l’ɔkɛngɛ. Lo diaaso dimɔtshi, nde akatandaka lɔkɛndɔ lo masuwa etena kakapɛpaka lɔpɛpɛ la wolo. Etena kakapɛpaka lɔpɛpɛ lɔsɔ, nde akɛnyi wanɛ wakatakɛndjakɛndjaka masuwa woka longo la masuwa l’ashi dia nkokɛ masuwa diaha vɔ tɔtɛtama l’ave. (Ets. 27:29, 39-41) Oko wele longo la masuwa shikimadiaka masuwa, mbele elongamelo kaso toshikimadiaka diaha sho ntakɔ mboka ka Jehowa etena katenyanyaso ntena dia wolo. Elongamelo kaso ka nge tokimanyiyaka diaha sho mbayaya etena kahomanaso l’ekakatanu nɛ dia sho mbeyaka di’awui wayolowana lushi lɔmɔtshi. Tohɔ dia Yeso akatatshi dia sho tayɔhɛnyahɛnyama. (Jni. 15:20) Laasɔ, nkana yimba lo difuto dialongamɛso lo nshi yayaye, tokimanyiyaka dia ntetemala la esakelo kaso ka lowango l’Okristo.

5. Ngande wakasukɛ elongamelo Yeso etena kakinde la ntondo ka nyɔi?

⁵ Tende woho wakakimanyiya elongamelo Yeso dia ntshikala nge kaanga la ntondo ka nyɔi ka kɔlɔ efula kakokongɛka. Lo lushi la Pɛntɛkɔsta ka lo 33 T.D., ɔpɔstɔlɔ Petero akate ɛtɛkɛta wa prɔfɛsiya w’oma lo dibuku di’Esambo diɛnya lo yoho ya dimɛna woho wakatshikala Yeso ki lo mbuta ate: “Dimi layongaka lo elongamelo; nɛ dia wɛ hatontshika lo Diombo ndo wɛ hatetawɔ di’okambi ayɛ wa kɔlamelo mɛna ɛhɔndɛlɔ. . . . Wɛ ayondodia l’ɔngɛnɔngɛnɔ w’efula laleyɛ.” (Ets. 2:25-28; Os. 16:8-11) Kaanga mbakeyaka Yeso dia nde ayovɔ, nde aki l’elongamelo ka shikaa dia Nzambi ayowolola ndo nde ayonga l’ɔngɛnɔngɛnɔ wa monga nto kaamɛ la She l’olongo.​—Hɛb. 12:2, 3.

6. Kakɔna kakate ɔnangɛso ɔmɔtshi lo kɛnɛ kendana la elongamelo?

⁶ Elongamelo kaso k’Okristo kambokimanyiya anangɛso l’akadiyɛso efula dia mbikikɛ. Tɔsɛdingole ɛnyɛlɔ kaki Leonard Chinn, ɔnangɛso ɔmɔtshi la kɔlamelo ladjasɛ l’Angleterre. Lo nshi yakalɔmaka Ta dia ntondo dia l’andja w’otondo, nde akadjama lo lokanu l’ɔtɛ wakandatone mbɔtɔ l’olimu w’ɔsɔlayi. L’edja ka ngɔndɔ hiende, wakawanganya l’anto akina, ko oma laasɔ ndjokoma l’etena kakawokambishaka elimu wa wolo. Nde akayofunda l’ɔkɔngɔ ate: “Awui wakahomana lami wakamɛnya nɛmɔ diele la elongamelo lo woho watokimanyiyatɔ dia mbikikɛ. Tekɔ l’ɛnyɛlɔ ka Yeso, k’apɔstɔlɔ, k’amvutshi ndo tekɔ l’alaka w’eshika wa lo Bible. Awui asɔ tshɛ toshaka elongamelo ka wolo kendana la nshi yayaye ndo tokeketshaka dia sho mbikikɛ. Elongamelo kaki oko longo la masuwa le Leonard, ndo tɔ koka monga oko longo la masuwa le so.

7. Ngande wakeketsha ehemba elongamelo kaso? (Rɔmɔ 5:3-5; Jakɔba 1:12)

⁷ Elongamelo kaso keketalaka l’ɔkɔngɔ wa sho mbikikɛ ehemba, wa mɛna woho watokimanyiya Jehowa ndo woho wetawɔmaso le nde. (Adia Rɔmɔ 5:3-5; Jakɔba 1:12.) Ɔnkɔnɛ, taya la elongamelo ka nge koleki kɛnɛ kaki laso etena kakatetawɔ lokumu l’ɔlɔlɔ mbala ka ntondo. Satana nangaka di’ehemba aso tɔkɔmɔla, koko l’ekimanyielo ka Jehowa sho koka ntondoya oseka ohemba tshɛ.

ELONGAMELO KASO KEKƆ OKO LOFULƐ

8. Ngande wele elongamelo kekɔ oko lofulɛ? (1 Tɛsalɔnika 5:8)

⁸ Bible mbɛdikaka elongamelo kaso la lofulɛ. (Adia 1 Tɛsalɔnika 5:8.) Ɔsɔlayi ndɔtaka lofulɛ dia nkokɛ ɔtɛ ande oma lo mpito y’atunyi ande. Lo ta diaso dia lo nyuma, sho pombaka nkokɛ yimba yaso oma l’ɛlɔshamelo waki Satana. Nde teelaka ehemba efula ndo tokanyi tele l’oyango wa ndanya ekanelo kaso ka yimba. Oko wakokɛ lofulɛ ɔtɛ w’ɔsalayi, mbele elongamelo kaso kokɛka ekanelo kaso ka yimba dia sho ntshikala la kɔlamelo le Jehowa.

9. Etombelo akɔna wayonga le onto lele bu l’elongamelo?

⁹ Elongamelo kaso ka lɔsɛnɔ la pondjo kayotokimanyiya dia nsala akambo la lomba ndo la shɛnɔdi. Lo wedi okina, naka elongamelo kaso kambɔla ndo naka sho mbetawɔ dia ndodja wɔɔngɔ aso la tokanyi ta lo demba, kete sho koka ndjoshisha elongamelo kaso ka lɔsɛnɔ la pondjo. Tɔsɛdingole kɛnɛ kakakomɛ Akristo wakasɛnaka la Kɔrɛtɔ ka lo nshi y’edjedja. Vɔ wakashisha mbetawɔ lo daka dimɔtshi di’ohomba diaki Nzambi, mbuta ate elongamelo ka eolwelo. (1 Kɔr. 15:12) Pɔɔlɔ akafundɛ wanɛ waki komonga l’elongamelo k’eolwelo dia vɔ wakasɛnaka paka dia nkotsha nsaki yawɔ hita. (1 Kɔr. 15:32) Ɛlɔ kɛnɛ, anto efula wele bu l’elongamelo l’alaka wa Nzambi sɛnaka paka la lɔsɛnɔ la kakianɛ, ndo vɔ ndjashaka l’ɛngɛnɔngɛnɔ wa nshi nyɛ. Koko, sho ndjaɛkɛka lo nshi yayaye yatolaka Nzambi. Elongamelo kaso kekɔ oko lofulɛ la didjidji lakokɛ tokanyi taso ndo latokokɛ diaha sho nsɔna yoho ya lɔsɛnɔ yayolanya diɔtɔnganelo diasaso la Jehowa.​—1 Kɔr. 15:33, 34.

10. Ngande wakoka elongamelo tokokɛ oma lo tokanyi ta kɔlɔ?

¹⁰ Lofulɛ laso l’elongamelo tokokɛka oma lo tokanyi t’ɔnɛ ndooko kakokaso nsala dia ngɛnyangɛnya Jehowa. Ɛnyɛlɔ, anto amɔtshi koka mbuta ɔnɛ: ‘Hamongaki pondjo l’atei wa wanɛ wayɔsɛna pondjo pondjo. Dimi bu onto ɔlɔlɔ. Hamongaki pondjo l’akoka wa nsɛna lo yoho yɔtɔnɛ l’atɔndɔ wa Nzambi.’ Tohɔ dia osambi wa kɔlɔ waki Jɔbɔ, Elifazɛ akakambe la tokanyi ta woho ɔsɔ otsha le Jɔbɔ. Elifazɛ akate ate: “Onto okovɔ eende katondonga pudipudi?” Ndo nde akate lo dikambo diaki Nzambi ate: “Eenda, nde bu la mbetawɔ le ekilami ande, kaanga olongo bu pudipudi lo washo ande.” (Jɔbɔ 15:14, 15) Ɔsɔ ekɔ kashi ka mamba! Tohɔ dia Satana kalanga dia wɛ monga la tokanyi ta ngasɔ. Nde mbeyaka dia naka sho ntetemala monga la tokanyi ta ngasɔ, kete tayoshisha elongamelo kaso. Laasɔ, sho pombaka ntona kashi shɔ ndo mbika washo l’alaka wa Jehowa. Tatodjake taamu pondjo dia nde nangaka dia sho nsɛna pondjo pondjo ndo nde ayotokimanyia dia nkotsha oyango ɔsɔ.​—1 Tim. 2:3, 4.

TETEMALA NKEKETSHA ELONGAMELO KAYƐ

11. Lande na kahombaso monga la solo dia lotutsha etena kakongaso di’elongamelo kaso kotshama?

¹¹ Hatongaka nshi tshɛ dui dia wɔdu dia ntetemala monga la elongamelo ka wolo. Sho mbeyaka ndjoshisha solo dia lotutsha etena kakongɛso le Nzambi. Koko, Jehowa tshikalaka pondjo pondjo ndo woho wɔsande etena ntshikitana la woho wɔsaso etena. (2 Pe. 3:8, 9) Nde ayokotsha sangwelo diande lo yoho yoleki dimɛna, koko nde hatosala dui sɔ l’etena kalongamɛso dia nde kisala. Kakɔna kakoka tokimanyiya dia ntetemala monga la elongamelo ka wolo etena kakongɛso la solo dia lotutsha dia Nzambi nkotsha alaka ande?​—Jak. 5:7, 8.

12. Lo ndjela Hɛbɛru 11:1, 6, diɔtɔnganelo diakɔna diele lam’asa elongamelo la mbetawɔ?

¹² Tayotetemala monga la elongamelo ka wolo naka sho ndjasukanya la Jehowa, nɛ dia nde mbayosala di’elongamelo kaso kotshama. Lo mɛtɛ, Bible mɛnyaka dia diɔtɔnganelo diekɔ lam’asa elongamelo la mbetawɔ k’ɔnɛ Jehowa ekɔ ndo ɔnɛ nde ekɔ “ofutshi wa wanɛ wooyanga l’otema ɔtɔi.” (Adia Hɛbɛru 11:1, 6.) Lo yɛdikɔ yayoleka Jehowa monga onto la mɛtɛ le so, mbayotoleka monga l’eshikikelo ɔnɛ nde ayosala kɛnɛ tshɛ kakandalake. Nyɛsɔ tɔsɛdingole toho ta shikaa takokaso nkeketsha diɔtɔnganelo diele lam’asaso la Jehowa ndo ntetemala monga l’elongamelo ka wolo.

13. Ngande wakokaso ndjasukanya la Nzambi?

¹³ Tɔlɔmbake Jehowa ndo tadiake Ɔtɛkɛta ande. Kaanga mbahatakoke mɛna Jehowa, sho koka ndjasukanya la nde. Sho koka nsawola la nde lo dɔmbɛlɔ, tele l’eshikikelo dia nde ayotohokamɛ. (Jɛr. 29:11, 12) Sho koka mpokamɛ Nzambi etena kadiaso Ɔtɛkɛta ande ndo kakanaso la wɔ yimba. Naka sho mbadiaka awui wɛnya woho wakayakiyanyaka Jehowa lo dikambo dia wanɛ waki la kɔlamelo le nde lo nshi y’edjedja, kete elongamelo kaso kayonga wolo efula. Awui tshɛ wakafundama l’Ɔtɛkɛta wa Nzambi “wakafundama dia tosha wetshelo, dia oma lo ekikelo kaso ndo oma lo esambelo k’oma lo Afundelo, sho monga la elongamelo.”​—Rɔmɔ 15:4.

14. Lande na kahombaso nkana yimba lo kɛnɛ kakasalɛ Jehowa anto akina?

¹⁴ Tokanake yimba lo woho watetemala Jehowa nkotsha alaka ande. Tɔsɛdingole kɛnɛ kakasalɛ Jehowa Abrahama nde la Sara. Vɔ wakakome l’ɛnɔnyi wakiwɔ kokoka mbota ana nto. Koko, Nzambi akaalake dia vɔ wayota ɔna pami. (Eta. 18:10) Kakɔna kakasale Abrahama la ntondo ka dikambo sɔ? Bible mbutaka ɔnɛ: “Nde aki la mbetawɔ dia nde ayonga she wedja efula.” (Rɔmɔ 4:18) Kaanga mbele lo kanyi y’anto, vɔ komonga nto l’elongamelo ka vɔ mbota, Abrahama aki l’eshikikelo ɔnɛ Jehowa ayokotsha daka diande. Pami ka kɔlamelo kɛsɔ kɔmɛmba ɛkɔndjɔ. (Rɔmɔ 4:19-21) Ɛkɔndɔ wa ngasɔ teetshaka dia sho kokaka ndjaɛkɛka nshi tshɛ le Jehowa dia nde nkotsha alaka ande, kaanga etena kɛnama dui dimɔtshi oko hadiosalemaki pondjo.

15. Lande na kahombaso kanaka yimba lo kɛnɛ kamboshilaka Nzambi tosalɛ?

¹⁵ Tokanake yimba lo kɛnɛ kamboshilaka Jehowa tosalɛ. Tokanyiya wahɔ wambotoshilaka nkondja onto ndo l’onto oma lo ekotshamelo k’alaka wele l’Ɔtɛkɛta wa Nzambi. Ɛnyɛlɔ, Yeso akalake dia She ayotokotshɛka ehomba aso wa lo lɔsɛnɔ. (Mat. 6:32, 33) Yeso akatoshikikɛ nto dia Jehowa ayotosha nyuma k’ekila naka sho mbɔlɔmbatɔ. (Luka 11:13) Jehowa ekɔ lo ntetemala nkotsha alaka asɔ. Lo mɛtɛ, sho koka nkana yimba l’alaka wambondokotshaka lo dikambo diaso. Ɛnyɛlɔ, nde tolakaka dia nde ayotodimanyiyaka, ayotokeketshaka ndo ayotoleshaka lo nyuma. (Mat. 6:14; 24:45; 2 Kɔr. 1:3) Naka sho nkana yimba lo kɛnɛ kamboshilaka Nzambi tosalɛ, kete tayokeketsha elongamelo kaso lo kɛnɛ kayondotosalɛ lo nshi yayaye.

TƆNGƐNƐNGƐNƐ LO ELONGAMELO

16. Lande na kele elongamelo ekɔ woshasha w’oshinga wolo?

¹⁶ Elongamelo kaso ka lɔsɛnɔ la pondjo kekɔ woshasha w’oshinga wolo w’oma le Nzambi. Tekɔ lo nongamɛ l’asolo walomɔlomɔ nshi yayaye ya diambo ndo tekɔ l’eshikikelo dia dui sɔ diayokotshama. Elongamelo kɛsɔ kekɔ oko longo la masuwa le so. Tɔ toshaka wolo wakokaso mbikikɛ ehemba, wa nshika tanga la ntondo k’ɔlɔshamelo ndo kaanga la ntondo ka nyɔi. Tɔ kekɔ oko lofulɛ le so lo woho ɔnɛ wele tɔ kokɛka ekanelo kaso ka yimba dia sho monga l’akoka wa ntona kɛnɛ kele kɔlɔ ndo nsala kɛnɛ kele ɔlɔlɔ. Elongamelo kaso kohikami lo Bible tosukanyaka suke suke la Nzambi ndo tɔ tɛɛnyaka woke woke wa ngandji katokande. Sho kondjaka wahɔ w’efula etena kakeketshaso elongamelo kaso.

17. Lande na kele elongamelo kaso konyaka l’ɔngɛnɔngɛnɔ?

¹⁷ Lo mukanda wakandafundɛ ase Rɔmɔ, Pɔɔlɔ akaakeketsha ate: “Nyɔngɛnɛngɛnɛ lo elongamelo.” (Rɔmɔ 12:12) Pɔɔlɔ akakoke ngɛnangɛna nɛ dia nde aki l’eshikikelo ɔnɛ naka nde nama kɔlamelo yande, kete nde ayokondja lɔsɛnɔ la pondjo l’olongo. Sho lawɔ koka ngɛnangɛna la elongamelo kaso nɛ dia tekɔ l’eshikikelo dia Jehowa ayokotsha alaka ande. Omembi w’esambo akafunde ate: “Ɔngɛnɔngɛnɔ le onto . . . ɔnɛ lalongamɛ le Jehowa Nzambi kande, . . . [ndo le] ɔnɛ latshikala nshi tshɛ la kɔlamelo.”​—Os. 146:5, 6.