WEKELO 8
Kamba la bɛnyɛlɔ diasha wetshelo
Mateo 13:34, 35
LO TSHENA PE: Mɔtsha wetshelo ayɛ lo nkamba la bɛnyɛlɔ dia wɔdu diayokimanyiya ampokami ayɛ ndo diayowaetsha akambo w’ohomba.
WOHO WA NSALA DUI SƆ:
Sɔna bɛnyɛlɔ dia wɔdu. L’ɛnyɛlɔ ka Yeso, kamba l’awui wa totshitshɛ dia nembetshiya awui wa weke ndo awui wa wɔdu dia nembetshiya awui wa wolo. Tokotshake awui wele bu ohomba diaha nkonya ɛnyɛlɔ kakɔ wolo. Yashikikɛ di’awui wa l’ɛnyɛlɔ mbɔtɔnɛka la kɛnɛ ketshayɛ diaha ampokami mbɔtɔ l’okandokando l’ɔtɛ wele awui wa lɔkɔ hawɔtɔnɛ kana haweyama ɔtɛ l’ekolo.
Kanyiyaka wahɔ wayokondja ampokami ayɛ. Sɔna bɛnyɛlɔ diendana l’elimu wasala ampokami ayɛ ndo kɛnɛ kayashawɔ lɔkɔ. Onga la yewo diaha bɛnyɛlɔ diayɛ mbadja l’okandokando kana mbanyangiya.
Etsha dui dioleki ohomba. Yasha lo awui woleki ohomba wa l’ɛnyɛlɔ kayɛ, koko aha l’awui wele bu ohomba. Yashikikɛ dia ampokami ayɛ wayohɔka aha ɛnyɛlɔ keto, koko ndo wetshelo w’oma lɔkɔ.