WOHO WA NTATƐ SAWO L’ONTO
WEKELO 6
Wɔma watokoshimbake dia nsambisha
Tɔndɔ: “Takakondja dihonga oma le Nzambi kaso dia nyewoya lokumu l’ɔlɔlɔ.”—1 Tɛs. 2:2.
Kɛnɛ kakasale Yeso
1. Enda VIDƐO kana adia Luka 19:1-7. Oma laasɔ kana yimba lo ambola wayela anɛ:
Lande na kakewewɔka anto amɔtshi Zakɛyo?
Kaanga mbakidiɔ ngasɔ, kakɔna kakatshutshuya Yeso dia mbosambisha lokumu l’ɔlɔlɔ?
Wetshelo akɔna wakondjaso oma le Yeso?
2. Tekɔ l’ohomba wa dihonga dia nsambisha weho w’anto tshɛ losango la Diolelo.
Okoya Yeso
3. Yaɛkɛ le Jehowa. Nyuma ka Nzambi kakasha Yeso wolo wa nsambisha, tɔ koka kosha ndo wɛ wolo wa nsambisha. (Mat. 10:19, 20; Luka 4:18) Lɔmba Jehowa dia kosha dihonga dia nsambisha anto wokayɛ wɔma.—Ets. 4:29.
4. Tokanɛke anto kɔlɔ. Sho koka mengenga dia nsambisha anto amɔtshi l’ɔtɛ w’ɛnamelo kawɔ, dihole diele lawɔ lo tshunda, yoho ya lɔsɛnɔ yele lawɔ kana l’ɔtɛ w’ɔtɛmwɛlɔ awɔ. Koko tohɔ dia:
Jehowa la Yeso koka mbadia kɛnɛ kele l’otema w’onto, kaanga mbele sho hatokoke nsala dui sɔ.
Ndooko onto lahakoke mbokama kɛtshi oma le Jehowa.
5. Onga la dihonga, la yewo ndo la dilɛmiɛlɔ. (Mat. 10:16) Ewɔ ewanu. Komiya sawo la dilɛmiɛlɔ naka onto hetawɔ mpokamɛ lokumu l’ɔlɔlɔ ndo naka wɛ ambɛna di’awui wotatshu otsha lo kɔlɔ.—Tok. 17:14.