Tambosangana kâmɛ oma lo dimama dia ngandji dia kokele

“[Wakimanele, “NW”] lu ngandji.”​—⁠KOLOSAI 2:⁠2.

1, 2. Shɛngiya yakɔna ya diatɔnelo y’okɛma lo woho wa lânde ɛlɔ kɛnɛ na?

LONGA! Dui dia wolo efula diambotomba oma l’olongo diata ate: “Fono kayuyala la kete ndu l’ashi a wuki, ne dia uhimbanyi akayi le nyu. Ndi eko la kele ka wuki; ndi mbeyaka ati: Etena kami kambusukana.” (Enyelo 12:12) Ɔnɔnyi tshɛ watête, diewoyelo sɔ talekaka manɛ̂ wanɛ wodjashi la kɛtɛ.

² Ɔndɔshi a woke waki Jehowa okeyamaka edja efula oko ɔndɔshi (Satana) ndo oko omamatanyishi (Diabolo). Koko, kanga lokeso ɔsɔ akambakɔ olimu okina wa mbokadia anto wâle ɛlɔ kɛnɛ​—⁠wɔnɛ wa nzambi kele la kɛlɛ! Lande na? Dikambo dia Mikaɛlɛ l’andjelo ande wakawotshanya oma l’olongo lo ta diakatatɛ l’olongo lo 1914. (Enyelo 12:​7-9) Diabolo mbeyaka dia nde kema la wenya efula nto dia nde mɛnya mɛtɛ k’ɔsɛmɔ ande w’ɔnɛ nde kokaka minganyiya anto tshɛ di’aha vɔ tɛmɔla Nzambi. (Jobo 1:11; 2:​4, 5) Oko ambowokomɛ ewo, Satana nde l’ɛdiɛngɛ ande waya oko olui wa ndjwe wahangayika la kɛlɛ k’efula otsha le anto wa l’andja ɔnɛ wele oko ashi wasutshasutshama.​—⁠Isaya 57:⁠20.

3. Etombelo akɔna wakatombe oma l’oholoyelo waki Satana l’etena kaso kɛnɛ na?

³ Akambo asɔ watshama aha l’anto mɛna, wekɔ lo nembetshiya lande na kele ɛlɔ kɛnɛ anto efula waya kema la lɔkɛwɔ l’ɔlɔlɔ l’andja ɔnɛ. Akambo akɔ nembetshiyaka nto ndo weolo wadja anto dia sanganya wedja wayakakitola ndo wele anto awɔ hawodja dia mbidjasɛ kâmɛ lo wɔladi. Ata watomba oma lo lohetsho l’asa dibila dihende kana waoho konyaka miliyɔ efula y’anto l’ohomba a mvudu kana ndawɔ ngelo yawɔ. Hatokoke mamba dia ofulanelo wa diɔnyɔ di’ɛlɛmbɛ l’ahole efula oleki lo nshi ya ntondo! Oko wakadiewoya Yeso edja la ntondo, ‘ngandji k’anto efula kekɔ lo tɔ̂lɛ.’ L’ahole tshɛ, diokanelo la ngandji kema nto l’atei w’andja wasukasuka ɛlɔ kɛnɛ.​—⁠Mateu 24:⁠12.

4. Lande na kele lo woho wa lânde, anto a Nzambi wekɔ lo wâle na?

⁴ Lo menda awui w’eta l’andja ɔnɛ, dɔmbɛlɔ diakasale Yeso lo dikambo di’ambeki ande diekɔ l’olembetshiyelo a woke efula: “Dimi halombe nti: Uwanya [l’andja ɔnɛ, NW], keli lambukolomba nti: [owakoke oma le kanga kɔlɔ, NW]. Vo kema wa [l’andja ɔnɛ, NW] uku wemi kema la [l’andja ɔnɛ, NW].” (Joani 17:​15, 16) Ɛlɔ kɛnɛ, “[kanga kɔlɔ, NW]” mbelaka kɛlɛ kande tshɛ oya le “wane watukitanyiaka elembe wa [Nzambi ndo wele l’olimu wa sambisha dikambo dia Yeso, NW].” (Enyelo 12:17) Otondongaka Jehowa hawake asho ɔlɔlɔ ndo hakokɛ la ngandji, tshike Ɛmɛnyi ande wa kɔlamelo wamboshilama oshiki. Nsɛnɔ yaso kimamɛ oma lo woho wakambaso olimu la tɛdikɔ takɔshi Nzambi lo kɛnɛ k’endana la lotui ki laso ndo la ɔlɔlɔ aso wa lo nyuma. Omalɔkɔ, sho pombaka mbidja weolo lo yɛdikɔ ya wolo Ande wakondjaso oma lo tshimbo ya Kristo oko akatɔlɔmbɛ ɔpɔstɔlɔ lo Kolosai 1:⁠29.

5, 6. Ngande waki asolo w’ɔpɔstɔlɔ Paulo lo dikambo di’Akristo wa la Kɔlɔsai, ndo lande na kele divɛsa dia l’ɔnɔnyi 1995 sunganaka dimɛna na?

⁵ Ondo, kânga mbaki Paulo kombaɛna ndamɛmɛ la asho, nde akokaka anango wa la Kɔlɔsai ngandji. Nde akawatɛ ate: “Dimi kombolaka dia nyu mana fundu woho akɔna ayakiyanyami dia dikambo dianyu.” (Kolosai 2:​1, The New Testament in Modern English, oma le J. B. Phillips) Lam’ele ambeki wa Yeso kema wa l’andja ɔnɛ, “[kanga kɔlɔ, NW]” ekɔ lo pangiya dia nanya kâmɛ k’Akristo lo sɔsɔmiya lomba l’andja ɔnɛ l’atei awɔ. Nsango yakaye la Epafara oma la Kɔlɔsai yakɛnyaka dia, dui sɔ diakashile la ntshama lo yɛdikɔ mɔtshi.

⁶ Ɔtɔi ɔmɔtshi a l’atei w’ekiyanu a weke waki la Paulo lo dikambo di’Akristo w’anango vɔ ɔnɛ lo tshena pe: ‘Nyokimanele kâmɛ lo ngandji.’ Ɛtɛkɛta ande wekɔ l’olembetshiyelo a woho wa lânde ɛlɔ kɛnɛ, l’atei w’andja wayâtola ɔnɛ ndo wahokana ngandji. Naka sho mbidja dako dia Paulo sɔ l’etema aso, kete tayokondja ɛlɔlɔ oma lo yambalo yadja Jehowa le so. Tayɛna nto ndo wolo wele la spirito kande lo lɔsɛnɔ laso, dui sɔ diayotokimanyiya dia sho pika tanga la ntondo ka tɔsɛngiya t’andja ɔnɛ. Nde dako dia lomba dia ngasɔ lee! Diɔ diakɔ diele Kolosai 2:2 ekɔ divɛsa diaso di’ɔnɔnyi 1995.

7. Diokanelo diakɔna diahomba monga l’atei w’Akristo a mɛtɛ na?

⁷ Lo mukanda ɔmɔtshi wakandatomɛ ase Koreto yema la ntondo, ɔpɔstɔlɔ akɔsɛ demba di’onto oko ɛnyɛlɔ. Nde akafunde di’aha “diatanelu” ndjâla l’atei w’etshumanelo k’Akristo w’akitami, koko dia “beke dia dimba dialamani pupu.” (1 Koreto 12:​12, 24, 25) Ande ɛnyɛlɔ ka dimɛna efula lee! Bɛkɛ diaso dia demba kimanɛka, ɔmɔmɔ kimanɛ la bɛkɛ dikina dia demba. Yoho yakɔ yâmɛ mbasalema ndo l’atei wa nkumbo ka l’andja w’otondo k’anangɛso, nkumbo kotongami l’akitami ndo la miliyɔ kina y’anto wele l’elongamelo ka monga la lɔsɛnɔ lo paradiso ka la kɛtɛ. He tatoyakakitolake pondjo oma lo demba diokengami la anyaso w’Akristo dia sɛna lo woho walangaso! Spirito ka Nzambi kakamba olimu oma lo tshimbo ya Yeso Kristo toyɛ̂ka lo yɛdikɔ ya woke oma l’ekimanyielo ka diɔtɔnɛlɔ dia l’anangɛso ndo l’akadiyɛso.

Diokanelo Kimanɛ Kâmɛ la Ewo

8, 9. (a) Kakɔna kahombaso ntsha dia diokanelo monga l’atei w’etshumanelo na? (b) Woho akɔna wakayakondja ewo k’endana la Kristo na?

⁸ Ɔtɔi a l’atei a tokanyi ta kondoko taki Paulo ele di’ɔnɛ: diokanelo dia l’asa Akristo kimanɛ kâmɛ la ewo, djekoleko ewo k’endana la Kristo. Paulo akafundɛ Akristo ate: “[wakimanele, NW] lu ngandji la lu ongonyi w’akambu tshe wa yimba [yawɔ, lo dikambo dia ewo k’oshika ka sheke y’ekila yaki Nzambi, mbuta ate: Kristo, NW].” (Kolosai 2:⁠2) Takashile la kondja ewo kana mbeya akambo​—⁠oma kam’akatatatɛ la mbeka Dui dia Nzambi. Lo yɛdikɔ yatatahotɔ woho akɔna wɔ̂tɔ efula k’akambo akɔ asɔ l’atei wa sangwelo dia Nzambi, sho potɔka olimu a woke wakamba Yeso. “Ongonyi wa [lomba la ewo, NW] wambushama le ndi.”​—⁠Kolosai 2:⁠3.

⁹ Onde ɔsɔku mbɔsayɛ Yeso kâmɛ l’olimu wakambande l’atei a sangwelo diaki Nzambi oka? Anto efula wa l’atei a Lokristo kristo minyanyaka Yeso, wasɛma ɔnɛ wekɔ la mbetawɔ le nde ndo wamboshila la kondja panda. Ko onde mɛtɛ, vɔ mbowêyaka oka? Atonga na, nɛ dia efula ka l’atei awɔ mbetawɔka wetshelo a Losato l’Osanto wâmanɛ l’Afundelo. Aha paka ɔnɛ wɛ mbeyaka kɛnɛ kele mɛtɛ lo dikambo sɔ, koko wɛ ekɔ l’ewo k’efula lo kɛnɛ k’endana la wetshelo wa Yeso ndo elimu ande wakandatshe. Miliyɔ efula y’anto wakakondja ewo kɛsɔ oma lo wekelo w’oshika l’ekimanyielo ka dibuku Le plus grand homme de tous les temps. Koko, sho pombaka tɔtɔmiya ewo kaso k’endana la Yeso kâmɛ l’etsha ande.

10. Lo woho akɔna akokaso monga la ewo koshami na?

¹⁰ Wotelo w’ɔnɛ: “ongonyi wa [lomba la ewo, NW] wambushama” le Yeso hɛnya ɔnɛ sho hatokoke shihodia ewo ka ngasɔ ndo lomba la ngasɔ. Koko, sho kokaka mbɛdinya ewo kakɔ la difuku dia hwe diakokaso kondja mbɔkɔ y’akɛsɔ. Hawotohike dia paka tshima ɛtshi ka woke, takandakanda dia mbeya lende ahombaso tatɛ la tshima. Tamboshilaka la kondja ewo kɛmɔtshi​—⁠nɛ dia ewo ka mɛtɛ tatɛka oma lo kɛnɛ katetsha Bible lo dikambo dia Yeso Kristo. Lam’ahotɔso ɔlɔlɔ olimu wakamba Yeso lo ekotshamelo ka sangwelo diaki Jehowa, sho kondjaka diangɔ di’oshinga wolo nɛ: lomba la mɛtɛ la ewo ka mɛtɛ. Omalɔkɔ, kɛnɛ kahombaso ntsha ele tetemala la tshima ɔhɔngɔ, dia mbishola mbɔkɔ kina y’akɛsɔ kana mbo kina y’oshinga a wolo yatanema lo kɛtɛ yakɔ yakatatatɛ la tshima.​—⁠Tokedi 2:​1-5.

11. Woho akɔna akokaso fudia ewo la lomba laso lam’akanaso lomba lo kɛnɛ k’endana la lɔkɛwɔ la Yeso na? (Yakimanyiya l’ɛnyɛlɔ ka woho wakasole Yeso ekolo w’ambeki ande, kana sha diɛnyɛlɔ dikina.)

¹¹ Oko ɛnyɛlɔ, ondo sho mbeyaka ɔnɛ: Yeso akasole ekolo w’apɔstɔlɔ ande. (Joani 13:​1-20) Ko onde sho takakane lomba lo wetshelo wakandasha ndo dia lɔkɛwɔ lakandɛnya oka? Naka tayotsha ngasɔ, kete tayoshola ɛngɔ ka lomba k’oshinga a wolo kayotokimanyiya​—⁠mbuta ate kayotosokoya​—⁠dia sho nyomɔsɛdingola lɔkɛwɔ laso otsha le ɔnangɛso kana kadiyɛso kɛmɔtshi kele lonto lande hatɔngɛnyangɛnya. Kana, mbala kekina kayowotosha olimu ɔmɔtshi wahetshaso, ondo tayonga l’okashimwelo a woho okina naka tambohotɔ dimɛna kɛnɛ kata Joani 13:​14, 15. Ɔsɔku mbatohokola ewo la lomba. Naka tayoyela ɛnyɛlɔ kaki Kristo l’ɔlɔlɔ tshɛ lo kɛnɛ k’endana la ohamelo w’ewo, naa shɛngiya yayokoka monga la dikambo sɔ otsha le anto akina na? Mbala mɔtshi, etshumanelo ‘kayoleka kimanɛ kâmɛ lo ngandji.’a

Mbahola Lomba Kokaka Nanya Diokanelo

12. Dia ewo kakɔna kahombaso ndjalama na?

¹² Lam’ele ewo ka mɛtɛ mbêtɛ akambo wɔdu dia sho ‘kimanɛ kâmɛ lo ngandji,’ ko etombelo akɔna waya oma lo “[kɛnɛ k’elɛwɔ la dindja ɔnɛ: ‘ewo’, NW]” na? Ele etombelo w’etshuletshule​—⁠ewanu, tâmu, otakwelo wa mbetawɔ. Omalɔkɔ, sho pombaka ndjalama oma lo woho wa ewo ka kashi kɛsɔ oko akewola Paulo Timote. (1 Timote 6:​20, 21) Paulo akafunde nto ate: “Dimi lambunyutela dikambu ne, untu tanyunganyiaki [la tokanyi ta pɛmɔ, NW]. Nyewo, untu tanyunganyiaki la yimba y’antu ndu la akambu wa kashi, uku ditshelu di’antu, watuyelaka akambu wa la kete, wahayeli Kristu.”​—⁠Kolosai 2:​4, 8.

13, 14. (a) Lande na kaki anangɛso wa la Kɔlɔsai lo wâle lo kɛnɛ k’endana la ewo na? (b) Lande na kakoka anto amɔtshi ndjaoka ɛlɔ kɛnɛ ɔnɛ vɔ kema la ntondo ka wâle a woho akɔ na?

¹³ Mɛtɛ, Akristo wa la Kɔlɔsai waki la diɔtɔnganelo la tɔsɛngiya ta lokeso ta kɛnɛ kakelamɛka la dindja ɔnɛ: ewo. Anto efula wa la Kɔlɔsai ndo lo ngelo yosukanyi latɔ wakɔsaka filɔzɔfia ya wa Grɛkɛ la nɛmɔ di’efula. Kâmɛ ndo andɔshi amɔtshi wa mɛtɛ w’elɛwɔ wa Judayiza, wanɛ wakalɔmbaka Akristo dia vɔ ndjela Ɛlɛmbɛ wa Mɔsɛ, oko olamelo wa nshi y’afɛstɔ ndo otshelo wa kila mbo mɔtshi ya ndɛ wakikɔ. (Kolosai 2:​11, 16, 17) Paulo koshimbaka anango dia vɔ kondja ewo ka mɛtɛ, koko vɔ wakahombe ndjalama di’aha mundama lo djonga ya tokanyi ta pɛmɔ takakoke mbakonya dia vɔ mbɔsa sɛnɔ yawɔ l’etsha awɔ oko woho wɔsa anto akina. Mbokɛmaka hwe lasɔ dia, naka anto amɔtshi wa l’atei w’etshumanelo wambotshikɛ tomba tawɔ la tɛdikɔ tɔsawɔ etena ka tɔ nɔmbwama oma lo tokanyi ta lo lɔsɛnɔ tahɔtɔnɛ l’Afundelo tɔsɔ, kete diokanelo la ngandji ka l’asa anto wa l’etshumanelo honga.

¹⁴ Wɛ kokaka kana wate: ‘Eelo, dimi mɛnaka wâle waki l’ase Kɔlɔsai, koko dimi kema ndoko l’otakanya wa sɛngiyama oma lo tokanyi ta wa Grɛkɛ, oko wetshelo w’ɔnɛ anima havu kana Losato l’Osanto; kana wâle wa dimi mbisana l’afɛstɔ w’apanganu wa l’ɔtɛmwɛlɔ wa kashi wakamashile la tomba omalɔkɔ.’ Ɔsɔ ekɔ dui di’ɔlɔlɔ. Kema kɔlɔ mbetawɔ l’otema ɔtɔi ɔnɛ: etshina ka mɛtɛ katanema l’Afundelo ndo kakɛnyama oma lo tshimbo yaki Yeso kekɔ l’oshinga a wolo efula. Ko onde, sho tekɔ lo wâle wakoka ndja oma lo wa filɔzɔfia kina kana tokanyi t’anto tambohandjɔnɛ nshi nyɛ oka?

15, 16. Lokanyi lakɔna la lo lɔsɛnɔ lakoka nânya tokanyi t’Okristo na?

¹⁵ Ɔtɔi ɔmɔtshi a l’atei a tokanyi takɔ tokɛ̂namaka tɔsɔ ko: “Lende ediɔ, daka di’Oyelo ande na? Dikambo dia lâkavu washɛso, awui tshɛ wekɔ woho akɔ wâmɛ oko oma k’etongelo.” (2 Petero 3:​4, Osty) Ondo lokanyi lɔsɔ kokaka mɛnyama l’ɛtɛkɛta ekina, koko kanyi yakɔ tshɔi tsho mbɛnama. Oko ɛnyɛlɔ, anto amɔtshi kokaka kana lomba ɔnkɔnɛ: ‘Ambeta ɛnɔnyi dikumi la ndjahe oma lam’akamatatɛ la mbeka mɛtɛ, wakataka ɔnɛ ekomelo kaya “ka onyɔ.” Koko, polo ndo kakianɛ ekomelo kataye, ko akɔna eya etena kahombatɔ ndja na?’ Mɛtɛ, ndoko onto leya etena kahomba ekomelo ndja. Koko, tolembete kanyi yakɔna yakatokeketshaka Yeso dia sho monga layɔ: “Nyendaki, [nyosungukalake, NW], ne dia nyu hanyeya lam’ayukuka etena kako.”​—⁠Mako 13:​32, 33.

¹⁶ Ande wâle mbuta ɔnɛ: lam’ele hateye etena kayoya ekomelo, ndeka dimɛna mbɔsa tɛdikɔ ta monga la lɔsɛnɔ l’oshika ndo latawɔ ɔnɛ “lasungana” lee! Woho a lokanyi la ngasɔ kokaka mbisha onto kanyi y’ɔnɛ: ‘Ayoleka ɔlɔlɔ le mi dia mbɔsa tɛdikɔ takoka kimanyiyami (kana kimanyiya an’ami) dia ntshâka olimu ɔmɔtshi wa nɛmɔ efula woho wa kondjaka falanga efula ndo wayokimanyiyaka dia dimi mongaka l’ekondjelo lo lɔsɛnɔ. Eelo, layɔtɔka lo sanganya y’Akristo oko woho wokomotshaka ndo layotombaka yema l’olimu w’esambishelo, koko ndoko ohomba a dimi ndjaɛnyaka pâ k’efula nto kana ndjasha ɔtɛkɔya.’​—⁠Mateu 24:​38-42.

17, 18. Yeso l’apɔstɔlɔ ande wakatokeketsha dia sho monga la woho akɔna a lokanyi na?

¹⁷ Hatokoke manguna dia Yeso l’apɔstɔlɔ ande wakatɔlɔmbɛ dia sho sɛnaka la kanyi y’ɔnɛ: lokumu l’ɔlɔlɔ pombaka sambishama esadi esadi, dia sho mbidjaka weolo aso ndo mongaka suke dia ndjakimɔ oko olambo. Paulo akafunde ate: “Analengo, dimi lambonyotɛ nte: etena kambototshikalɛ kaya tshitshɛ efula. Lawɔ mbele, akanga a wadi wayale oko vɔ kema lawɔ, . . . ndo, wanɛ wasomba oko wanɛ waha l’ekondjelo, ndo wanɛ wakamba elimu la diangɔ dia l’andja ɔnɛ oko wanɛ wahadishidiya; nɛ dia ɛnɛlɔ k’andja ɔnɛ kekɔ lo tatshikitana.”​—⁠1 Koreto 7:​29-31 (NW); Luka 13:​23, 24; Filipi 3:​13-15; Kolosai 1:29; 1 Timote 4:10; 2 Timote 2:4; Enyelo 22:⁠20.

¹⁸ Aha la tosha alako dia sho mbetɛ lɔsɛnɔ l’ɔngɔnyi oko oweso aso, Paulo akafunde etena kakandasambiyama ate: “Ne dia shu kundja nduku l’engo la kete nye, ku hateyi ntola nduku engo uma la kete. Keli lam’ayutuyala la diango dia nde ndu la diango dia ndota, shu tayuyala la ongenongeno lu diango diako. . . . Olo ta di’ololo dia mbetawo, ukimeli lumu la pundju, lakayetama loko, uku akayetawo l’etawelu k’ololo lu ashu w’emenyi efula.”​—⁠1 Timote 6:​7-12.

19. Etombelo akɔna wayɛnama naka anto wa l’etshumanelo wamboyela woho a lɔsɛnɔ lakatokeketsha Yeso dia sho monga a lɔ na?

¹⁹ L’atei w’etshumanelo kotongami l’Akristo wele l’ohetoheto, wadja weolo l’otema ɔtɔi tshɛ dia ‘sanya wotelo w’ɔlɔlɔ wa lo sɛkɛ,’ etombelo watɛnamaka ko diokanelo. Vɔ hawote ɔnɛ: ‘wɛ ekɔ la kianda ya mbo y’ɔlɔlɔ y’ombami lo dikambo di’ɛnɔnyi efula, sutshasutsha demba diayɛ, lɛka, nɔka, yangɛnyangɛnya.’ (Luka 12:19) Koko, vɔ sanganaka lo mbidja weolo kâmɛ, wetawɔ dia ndjalambola woho wa vɔ ndeka kamba olimu wahakambemaki nto pondjo.​—⁠Ɛdika la Filipi 1:​27, 28.

Toyalame lo Dikambo dia Tokanyi ta Pɛmɔ

20. La ntondo ka woho w’akambo akina akɔna wakoka Akristo kesama na?

²⁰ Mɛtɛ, ekɔ weoho ekina wakoka Akristo ‘kesama la tokanyi ta pɛmɔ’ kana la lokeso lahokɛma lakoka mbashimba dia vɔ ‘kimanɛ kâmɛ lo ngandji.’ Mbalasa kɛmɔtshi kaki la Société Watch Tower ka l’Allemagne akafunde ɔnkɔnɛ: “Dui dimɔtshi diakatondja tamu l’etshumanelo kɛmɔtshi ko, apandjudi kâmɛ ndo dikumanyi dimɔtshi wakete wedi ɔmɔtshi dia sukɛ kana manguna osakelo wakalongola ɔnangɛso ɔmɔtshi.” Vɔ wakakotsha ɔnɛ: “Lo menda efula ka toho takakambema olimu ndo lofulo la woke l’ɛkɔnyi lakikɔ, tamu takatombe ndo, naka weoho w’osakelo ɛsɔ mbidjaka akambo w’endana l’ɔtɛmwɛlɔ w’ɛdiɛngɛ l’atei, kete vɔ kokaka monga nto la wâle.”​—⁠Efeso 6:⁠12.

21. Woho akɔna akoka Okristo shisha yambalo yande y’ɔlɔlɔ ɛlɔ kɛnɛ na?

²¹ Akristo kombolaka monga la lɔsɛnɔ ndo la demba dia wolo woho wa vɔ monga l’akoka wa tɛmɔla Nzambi. Koko, Lo dikongɛ di’eso nɛ, sho tekɔ lo manemɛ le lotshundju la hemɔ yakaye oma l’ekokele kaso. Lo dihole dia mbika epole ɔsɛkɛ l’akambo w’endana la ki ka demba, sho pombaka mbahɛ asolo aso l’okandwelo wa mɛtɛ wayotela ɔngɛnɔngɛnɔ, oyadi le so kana le anyaso. (1 Timote 4:16) Kristo mbele tshonga esambu y’okandwelo akɔ ɔsɔ oko wakinde tshonga esambu ya dako diaki Paulo otsha le ase Kɔlɔsai. Koko, tohɔ dia Paulo akalembetshiya ɔnɛ: anto amɔtshi wayoya “[la tokanyi ta pɛmɔ, NW]” dia mbahola yambalo yaso oma le Kristo, esangɔ ɛmɔtshi lo ndjifukutanya la weoho w’esakelo ɛmɔtshi, ekanga kana okilelo wa mbo ya ndɛ.​—⁠Kolosai 2:​2-4.

22. Lɔkɛwɔ lakɔna la l’atei atei lahombaso monga a lɔ la ntondo k’ɛsɛmɔ w’efula w’endana la weoho w’esakelo kana w’ekanga na?

²² L’andja w’otondo, anto wamboshisha ewo la nyanga ndo mpokamɛ woho akɔna wasɛma anto lo dikambo di’ekanga ɛmɔtshi ndo dia weoho w’esakelo. Efula ka l’atei w’ekanga akɔ amboshila la kambema olimu ndo mbeyamaka, ekina mɔnywamaka ndo anto akina mbewɔka woho w’ekanga kana osakelo akɔ.b Onto l’onto ekɔ l’ɔkɛndɛ wa nde shikikɛ woho akɔna ahombande ntsha dia ki ka demba diande. Koko, wanɛ wetawɔ dako diaki Paulo diofundami lo Kolosai 2:​4, 8 wayokokamɛ di’aha kesama oma lo “[tokanyi ta pɛmɔ, NW]” kana “[lokeso l’anyanya, NW]” langanyiya efula ka anyaso watayange paka dia kalangana nɛ dia vɔ kema l’elongamelo ka Diolelo. Ndo endaka Okristo ɔmɔtshi ambɛna dimɛna ɔnɛ: okanga kapanda mbɔtɔnɛka lande, kete nde hakoke fundɛ Akristo w’anango ɔnɛ paka nyu mbetawɔ okanga akɔ nɛ dia dui sɔ kokaka mbela tamu t’efula kana owanu. Nde ayohomba mɛnya oma lo dikambo sɔ dia nde kombolaka dia diokanelo dionge l’atei w’etshumanelo.

23. Lande na k’eso l’ɛkɔkɔ w’ɔngɛnɔngɛnɔ lo woho wa lânde na?

²³ Paulo akatɛtɛ dia diokanelo dia l’asa Akristo diekɔ kiɔkɔ y’ɔngɛnɔngɛnɔ wa mɛtɛ. Mɛtɛ, lo nshi yakinde, tshumanelo komonga efula oko lo nshi nyɛ. Koko, nde akafundɛ ase Kɔlɔsai ate: “Kuyanga dimi kema l’atei anyu, ku utema ami eko le nyu [lo nyuma, NW]. Dimi la ongenongeno lam’enami ndjalongosola kanyu, ndu ushikikalu a mbetawo kanyu le Kristu.” (Kolosai 2:5; enda ndo lo Kolosai 3:14.) Ande ɛkɔkɔ w’efula wele la so wa ngɛnangɛna lee! Sho kokaka mɛna aha la tâmu dia diokanelo, wɔladi la mbetawɔ ka shikaa tanemaka l’atei w’etshumanelo kaso, awui wakɛnɛmɔla kɛnɛ keta l’atei w’anto a Nzambi wa lo kɛtɛ k’otondo. Diɔ diakɔ diele, lo tshanda yayoviya dikongɛ di’akambo dia nshi nyɛ nɛ, tosale la weolo tshɛ dia ‘sho kimanɛ kâmɛ lo ngandji.’

[Footnotes]

Onde Wɛ Akalembete Oka?

◻ Ele divɛsa di’ɔnɔnyi 1995 le Ɛmɛnyi wa Jehowa na?

◻ Lande na kaki ohomba le Akristo wa la Kɔlɔsai dia vɔ kimanɛ kâmɛ lo ngandji, ndo lande na kahombaso ndo sho lawɔ monga ngasɔ ɛlɔ kɛnɛ na?

◻ Lokanyi lakɔna la kashi l’endana la lɔsɛnɔ lahomba Akristo ndjalama lo woho wa lânde ɛlɔ kɛnɛ na?

◻ Lande na kahomba Akristo ndjalama di’aha kesama la tokanyi ta pɛmɔ lo dikambo dia ki ka demba la weoho w’esakelo na?

[Caption]

Onde kɛnɛ ka kanyiyɛ dia sala lo nshi yayaye mendanaka la wôngelo waki Yeso oka?