Jehowa kokaka tosha wolo
“Nde atushaka one lambokomo wulu. Nde atufudiayaka one lamboko la yimba tshimba wulu.”—ISAYA 40:29.
1, 2. Naa akambo amɔtshi wɛnya ɔnɛ Jehowa ekɔ la wolo w’efula na?
JEHOWA ekɔ Nzambi kele “la wulu wa mamba.” Sho kokaka mɛna djembetelo ya “wulu andi wa pundju [ndo Lonzambi lande, NW]” oma l’olangala w’etongelo kande kɛnama. Wanɛ watona mbetawɔ akambo a mɛtɛ asɔ wɛnya ɔnɛ nde mbele Otungi hawokoke nyindjama.—Osambu 147:5; Romo 1:19, 20.
2 Wolo waki Jehowa talekaka mɛnama lushi la lushi lam’atashola akanga diewo toseke ta lo lowa, lowa lakɔ lele l’efula k’ɛlɔngɔswamelo wa tɔɔtɔ w’angani lo etale ka nunu la nunu dia miliyɔ ya kilɔmɛtɛlɛ lam’asawɔ. L’otsho, naka wɛ mbalɛ lo wɛnɛkɛdi, kete asolo ayɛ ayonga woho akɔ wâmɛ la waki omembi w’Esambu lakate ate: “Lam’atumendaka ulungu, ulimu w’anya aye, ngondo la toto takayatungi, untu eli na, dia we mbukanela? La ona untu eli na, dia we [mbôkokɛ, NW]?” (Osambu 8:3, 4) Ande woho wakakokɛ Jehowa onto, mbuta ate wakandatokokɛ lee! Nde akasha atshukani ahende wa ntondo edjaselo ka la kɛtɛ ka dimɛna efula. Kânga kɛtɛ yatɔ yâki la wolo—wa tondja diononɛ la ngɔnya mbo ya ndɛ y’ɛlɔlɔ. Lo kɛnɛ k’endana la eongelo ka lo demba, anto la nyama wakakondjaka wolo oma lo ɛnamelo ka wolo waki Nzambi ɔsɔ.—Etatelo 1:12; 4:12; 1 Samuele 28:22.
3. Aha la mbadia diangɔ di’ɛnama dia l’andja, kakɔna kɛnya nto ɔnɛ Nzambi ekɔ la wolo na?
3 Elongo tambiaka ndo tombatomba la dikɛndakɛnda tɔngɛnyangɛnya, koko diɔ tɛnyaka nto wolo waki Nzambi. Ɔpɔstɔlɔ Paulo akafunde ate: “Waonga ande wahɛnama wambɛnama hwe oma ko etongelo k’andja, nɛ dia vɔ wambeyama oma lo diangɔ diakatongama, eelo, wolo ande wa pondjo ndo Lonzambi lande.” (Romo 1:20, NW) Koko, ekɔ ɛngɔ kekina nto kɛnya wolo ande ndo kahomba kotola yambalo la lowando laso. Ondo wɛ ayoyambola wate: ‘Ɛngɔ kakɔna nto kakoka mɛnya wolo wa Nzambi oleki andja w’otondo na?’ Okadimwelo vɔ ɔnɛ: Yeso Kristo. Mɛtɛ, etena kakasambiyama ɔpɔstɔlɔ Paulo oma le Nzambi, nde akate ate: Kristo lakahanema l’otamba kele “wulu wa [Nzambi ndo lomba la Nzambi, NW].” (1 Koreto 1:24) Ondo wɛ kokaka ndjambola wate: ‘Lo woho akɔna na? Ndo shɛngiya yakɔna yele la dikambo sɔ lo lɔsɛnɔ la mi la nshi nyɛ na?’
Wolo Wakɛnama Oma lo Tshimbo y’Ɔn’ande
4. Woho akɔna wakɛnama wolo wa Nzambi lo kɛnɛ k’endana l’Ɔn’ande na?
4 Wolo a Nzambi wakɛnama mbala ka ntondo lam’akandatonge Ɔn’ande ɛtɔi, lakatongama l’efanelo kande. Ɔna akɔ la lo nyuma ɔsɔ akakambɛ Jehowa oko “ukambi a komba” lam’akandayakimanyiya la wolo w’efula waki Nzambi dia tonga diangɔ dikina tshɛ. (Tukedi 8:22, 30) Paulo akafundɛ anango w’Akristo wa la Kɔlɔsai ate: “Ne dia [oma, NW] le ndi, kakatungama diango tshe, l’ulungu ndu la kete, diango dienama ndu diango diahenama . . . [Diangɔ dikina tshɛ diakatongama oma lo tshimbo yande ndo lo dikambo diande, NW].”—Kolosai 1:15, 16.
5-7. (a) Lo nshi ya ntondo, waɛnamelo akɔna a wolo wa Nzambi wakakimanyiyaka anto amɔtshi na? (b) Ɔkɔkɔ akɔna wele laso watetawoya ɔnɛ: wolo wa Nzambi kokaka mɛnama ɛlɔ kɛnɛ lo dikambo di’Akristo na?
5 Sho tekɔ l’atei a ‘diangɔ diakatongama la kɛtɛ.’ Ko onde na, Nzambi akakoke tosha wolo oko weso anto oka? Eelo, lo ndjela ɔkɔndɔ wasa Nzambi nde l’anto w’ekokele, lo tena dimɔtshi, Jehowa akashaka ekambi ande wolo wa lânde dia mbakimanyiya woho wa vɔ kotsha asangwelo ande. Mɔsɛ akeyaka mbala tshɛ ɔnɛ, anto w’ekokele sɛnaka paka ɛnɔnyi 70 kana 80. (Osambu 90:10) Ko nshi ngana yakasɛnɛ Mɔsɛ ndamɛmɛ na? Nde akakotsha ɛnɔnyi 120, koko “ashu andi kundjala lungi, wulu andi kunkitakita.” (Euhwelu k’Elembe 34:7) Dui sɔ hadiɛnya ɔnɛ Nzambi mbishaka osek’okambi ande tshɛ akoka wa sɛna edja efula ngasɔ oko Mɔsɛ kana nama wolo wa ngasɔ, koko, dui sɔ mɛnyaka dia Jehowa kokaka mbisha anto wolo.
6 Djembetelo kina yɛnya ɔnɛ Nzambi ekɔ l’akoka wa mbisha apami la amato wolo mɛnamaka lo kɛnɛ kakandasalɛ wadiaki Abarahama. “Sara ndame akalungula wulu a ntsho diemi lam’akindi usumbi, ne dia ndi aketawo ati: One lakandaki eko la kolamelu.” Kana, tôhɔ woho wakasha Nzambi embadi ndo anto akina wa l’Isariyɛlɛ wolo: “Ngidiyona, Baraka, Samisona, Jefeta, dia Davidi la Samuele l’amvutshi . . . Uma lu weodu mbakawayala la wulu.”—Heberu 11:11, 32-34.
7 Wolo wa ngasɔ kokaka kamba olimu ndo le so. Mɛtɛ, ɛlɔ kɛnɛ, hatokoke kongɛ dia kondja ɔna oma lo dihindo dimɔtshi kana monga la wolo oko wɔnɛ waki la Samisɔna. Koko mɛtɛ, sho kokaka ndjâla la wolo oko wakaditɛkɛta Paulo lo mukanda ande wakandafundela anto k’anto waki la Kɔlɔsai. Eelo, Paulo akafundɛ apami, amato ndo ana, anto wɔfɔnyi la wanɛ watonga tshumanelo dia nshi nyɛ, mukanda ndo nde akate dia vɔ ‘wakakeketshama la wolo tshɛ.’—Kolosai 1:11.
8, 9. Woho akɔna wakɛnama wolo wa Jehowa hwe le anto wele oko sho l’eleko ka ntondo na?
8 Lo edja kakakambe Yeso olimu ande wa la kɛtɛ, Jehowa akakɛnɛmɔla hwe dia wolo ande akakambaka olimu oma lo tshimbo y’Ɔn’ande. Ɛnyɛlɔ, lam’akaye olui w’anto lushi lɔmɔtshi oya le Yeso la Kapɛrɛnauma, “Wulu wa [Jehowa wakikɔ lawɔ dia nde, NW] nkonoya antu.”—Luka 5:17.
9 L’ɔkɔngɔ w’eolwelo kande, Yeso akashikikɛ ambeki ande dia ‘wayokondja wolo etena kayowawâhemɛ spirito k’osanto.’ (Etsha 1:8) Nde kombuta kashi! Ɔkɔndɔdi ɔmɔtshi w’ɛkɔndɔ ekɔ lo tɛkɛta di’akambo wakete nshi mɔtshi tsho la ntondo ka Pɛtɛkɔsta k’ɔnɔnyi 33 T.D. (lo tena diaso nɛ) ate: “[La wolo w’efula, apɔstɔlɔ wakatetemalaka la sambisha, NW] dia eulwelu ka Khumadiondjo Jesu.” (Etsha 4:33) Paulo ndamɛmɛ akakondja wolo dia kamba olimu wakawosha Nzambi. L’ɔkɔngɔ wa nde kadimola otema ndo mɛna, nde “akaluli la wulu, akatewadia asi Juda wakaladi la Damaseke; akawatela hwe ati: Jesu keli Kristu.”—Etsha 9:22.
10. Woho akɔna waki wolo w’oma le Nzambi ekeketshelo k’efula lo dikambo diaki Paulo na?
10 Mɛtɛ, Paulo aki l’ohomba wa wolo woleki wɔnɛ wokongaka l’onto, naka sho menda ehomba wa lo nyuma ndo wa lo lomba wakinde la dia monga lawɔ dia nde ntshɔ lo kɛndɔ yande shato ya misiyɔnɛrɛ ya kilɔmɛtɛlɛ nunu la nunu. Ndo nto, nde akakikɛ weoho tshɛ w’ekakatanu: wɔtwɛlɔ wa kanu la wâle wa mvɔ oko omvwedi a dietawɔ. Oma l’ekimanyielo ka na? Ɔnkɔnɛ mbakadimolande ate: “Khumadiondjo akemala la mi, akankikitsha, dia dimi mvutelaka antu diui ololo.”—2 Timote 4:6-8, 17; 2 Koreto 11:23-27.
11. Lo kɛnɛ k’endana la wolo wa Nzambi, elongamelo kakɔna kakasholɛ Paulo wanyande ekambi wa la Kɔlɔsai na?
11 Kema dui dia diambo dia, lam’akandafundɛ “[anango wa kɔlamelo lo kâmɛ la Kristo, NW],” wanɛ waki la Kɔlɔsai mukanda, Paulo akashikikɛ dia vɔ wakakoke ndjâla “la wulu tshe, uku wulu a lutumbu landi [la Jehowa], dia ndjala la etetemalu lu [ndjakimela k’efula, NW], kame la ongenongeno.” (Kolosai 1:2, 11) Kânga mbele oma k’etatelo, Akristo w’akitami mbakawatɛ awui asɔ, ɛlɔ kɛnɛ, wanɛ tshɛ wayela wanya wa Kristo kokaka kondja wahɔ w’efula oma l’awui asɔ wakafunde Paulo.
Wakakondja Wolo la Kɔlɔsai
12, 13. La ntondo k’akambo akɔna wakafundama mukanda w’otsha le ase Kɔlɔsai, ndo akawatshe dia dui diakɔ na?
12 Etshumanelo ka la Kɔlɔsai kaki lo lɛtshi la kɛtɛ l’ase Rɔmɔ la l’Asia, etshumanelo kakatɔngɔ mbala mɔtshi oma l’esambishelo kaki Epafara, Okristo ɔmɔtshi wa kɔlamelo. Ondo lam’akandeye ɔnɛ wambonda Paulo la Rɔmɔ ya l’ɔnɔnyi 58 T.D., Epafara akɔsɛ tɛdikɔ dia ntshɔ la tenda ɔpɔstɔlɔ ndo dia tôkeketsha la mbosha alapɔlɔ wa dimɛna w’endana la ngandji ndo l’okeketalo w’anango wa la Kɔlɔsai. Ondo, Epafara akawosha ndo alapɔlɔ wa mɛtɛ lo dikambo di’awui amɔtshi waki l’ohomba dia nɔngɔswama l’atei w’etshumanelo ka la Kɔlɔsai. Lo wedi ande, Paulo akɛnyi ɔlɔlɔ dia tomɛ etshumanelo mukanda w’ekeketshelo ndo w’ɔhɛmwɛlɔ. Ndo sho lawɔ, sho kokaka kondja ekeketshelo k’efula oma lo tshapita ya ntondo ya mukanda akɔ, nɛ dia vɔ wekɔ lo nembetshiya woho wakoka Jehowa mbisha ekambi ande wolo.
13 Ohotokokanyiya woho wakayala asolo w’anangɛso ndo akadiyɛso wa la Kɔlɔsai lam’akawoke ɔnɛ: Paulo ambowaɔsa oko “[anango wa kɔlamelo lo kâmɛ la Kristo, NW].” Wakakoke mandɔma nɛ dia vɔ waki la ‘ngandji le ekilami’ ndo ‘wakatɔkaka elowa wa lokumu l’ɔlɔlɔ’ oma ko lushi lakawakome Akristo. Onde, weoho w’ɛtɛkɛta wa ngasɔ kokaka mbutama lo dikambo di’etshumanelo kaso, kana lo dikambo diaso shoamɛ oka?—Kolosai 1:2-8.
14. Paulo akandakombolɛka ase Kɔlɔsai na?
14 Paulo aki l’ɔngɛnɔngɛnɔ w’efula oma l’alapɔlɔ wakakandakondja, diɔ diakɔ diakandewoya ase Kɔlɔsai ate: nde akatetemala mbâlɔmbɛ dia vɔ ‘ndodjama la ewo k’oshika ka lolango la Nzambi, la lomba ndo la yimba y’akambo wa lo nyuma, dia vɔ kɛndakɛnda lo woho wasungana la ntondo ka Jehowa.’ Nde akalɔmbaka dia vɔ ‘tetemala la ntɔ elowa lo elimu tshɛ w’ɔlɔlɔ ndo dia vɔ mbola lo ewo ka mɛtɛ ka Nzambi, lo monga la wolo wa wolo tshɛ lo yɛdikɔ ya wolo ande wa lotombo, dia vɔ tetemala l’ɔlɔlɔ tshɛ ndo dia vɔ monga la ndjakimela k’efula kâmɛ l’ɔngɛnɔngɛnɔ.’—Kolosai 1:9-11.
Wakakondja Wolo ndo l’Etena Kaso Kɛnɛ
15. Ngande akokaso monga la woho akɔ wâmɛ wa lomba lɛnyama lo mukanda waki Paulo otsha le ase Kɔlɔsai na?
15 Ande ɛnyɛlɔ k’ɔlɔlɔ kakatotshikɛ Paulo lee! Anangɛso wa l’andja w’otondo wekɔ l’ohomba w’alɔmbɛlɔ aso dia mbakimanyiya woho wa vɔ monga l’etetemalo ndo dia vɔ nama ɔngɛnɔngɛnɔ awɔ kânga mbɛnawɔ pâ. Oko Paulo, sho pombaka shikimala l’alɔmbɛlɔ aso etena kokaso sango y’ɔnɛ anangɛso wa l’etshumanelo kekina kana wa lo wodja okina wekɔ l’ekakatanu. Mbeyaka monga kana etshumanelo kɛmɔtshi kosukanyi laso kekɔ lo pâ oma lo dito dimɔtshi kana kekɔ l’ekakatanu ɛmɔtshi wa lo nyuma. Kana mbeyaka monga di’Akristo amɔtshi wekɔ l’asui watomba oma l’ata wa l’atei a wodja kana odiakanelo wa l’asa kabila la kabila. L’alɔmbɛlɔ aso, sho pombaka nɔmba Nzambi dia nde kimanyiya anangɛso dia vɔ “nkendakenda ololo uku alanga [Jehowa],” dia vɔ tetemala la ntɔ elowa wa Diolelo lam’atawɛnya etetemalo awɔ, ndo dia vɔ tetemala la mbola lo ewo. Lo woho wa ngasɔ mbalongola ekambi a Nzambi wolo wa spirito kande, “[lo ndjâla la wolo wa wolo tshɛ, NW].” Toyashikikɛ dia Shɛso ayolonga ndo ayetawɔ alɔmbɛlɔ aso.—1 Joani 5:14, 15.
16, 17. (a) Oko wakadifunde Paulo, lo dikambo diakɔna diahombaso mboka losaka na? (b) Lo woho akɔna wakakondja ekambi a Nzambi etshungwelo ndo edimanyielo na?
16 Paulo akafundɛ ase Kɔlɔsai dia vɔ ‘mbokaka Sheso losaka, ɔnɛ lakawasha diaaso dia vɔ sanga l’ekilami sango di’osase.’ Ndo sho lawɔ, tosha Shɛso le l’olongo losaka dikambo dia dihole di’ɔsaso l’atei a dikongɛ diande dia Diolelo, oyadi l’olongo kana lanɛ la kɛtɛ. Woho akɔna wakasale Nzambi di’anto w’ekokele mbɔ̂ngɛnyangɛnya na? Paulo akafundɛ anango w’akitami ate: “Ndi kakatutshungula uma lu wulu a udjima, [kakatɔsɛkɔla, NW] utsha lu diulelu dia On’ande la ngandji. Uma le ndi kesu l’etshungwelu kasu, ndu la edimanyelu ka kolo yasu.”—Kolosai 1:12-14.
17 Oyadi elongamelo kakɔna kele laso, ka l’olongo kana ka la kɛtɛ, sho kaloyaka Nzambi losaka oseka lushi tshɛ oma lo woho wakandatotshungola lo dikongɛ dia kɔlɔ dia odjima nɛ, etshungwelo kosalemi oma lo mbetawɔ kaso lo yɛdikɔ shɔ y’oshinga a wolo yele olambo wa tshungo di’Ɔn’ande la ngandji. (Mateu 20:28) Akristo w’akitami wa spirito wakakondja ɛngɛnɔngɛnɔ w’oma lo tshungo kakasalema lo dikambo diawɔ lo woho wa lânde, dia vɔ ‘sɛkwama otsha lo diolelo diaki Ɔna Nzambi ka ngandji.’ (Luka 22:20, 29, 30) Koko, ndo “ekoko ekina” mbakondja wahɔ oma lo tshungo diakɔ oma kakianɛ. (Joani 10:16) Vɔ kokaka kondja edimanyielo ka Nzambi dia vɔ mɛnama anto w’ɛlɔlɔ lo asho a Nzambi oko angɛnyi ande. Vɔ mbɔsaka etenyi ka woke efula l’esambishelo ka “lukumu l’ololo lone la diulelu” lo nshi y’ekomelo nyɛ. (Mateu 24:14) Lâdiko dia lâsɔ, vɔ wekɔ l’elongamelo ka diambo ka koma akanga a losembwe l’akambo tshɛ ndo kokele l’alemba l’ekomelo ka Lowandji laki Kristo l’Ɛnɔnyi Kinunu. Lam’atayale awui wɔkɔndwami lo Enyelo 7:13-17, mɛtɛ wɛ ayetawɔ ɔnɛ: akambo watama lɔkɔ mɛnyaka di’ɔnɛ mɛtɛ tayotshungɔ ndo tayɔtshɔkwama.
18. Diokanelo diakɔna diakatɛkɛtama lo dibuku dia Kɔlɔsai diele Nzambi adikotshakɔ ɛlɔ kɛnɛ na?
18 Mukanda wa Paulo ɔnɛ tokimanyiyaka dia sho mpotɔ ɔlɔlɔ kɛnɛ kahombaso salɛ onto loleki woke lo tena tshɛ. Kakɔna kakakotshaka Nzambi oma lo tshimbo ya Kristo na? “[Aki] dia [nyomokanya, NW] diango tshe la ndi, mbakandete ki lu dikila [diakandatshola l’otamba w’asui, oyadi, NW] diango dia la kete ndo diango dia l’ulungu.” Sangwelo dia Nzambi ele dia mbokanya ditongami tshɛ kâmɛ la nde, oko waki la ntondo k’ɔtɔmbɔkwɛlɔ wa l’Ɛdɛna. Ɔnɛ lakakambema olimu dia tonga diangɔ tshɛ mbele Ɔnɛ akɔ lakambema olimu kakianɛ dia kotsha diokanelo diakɔ.—Kolosai 1:20.
Wakakondja Wolo di’Oyango Akɔna?
19, 20. Lo na eso ekilami ndo aha la l’ɛkɔmɔ na?
19 Wanɛ wôkana la Nzambi l’atei aso wekɔ l’ɛkɛndɛ. Lo nshi y’edjedja, sho taki akanga a pɛkato ndo takangana etale la Nzambi. Koko, ɛlɔ kɛnɛ, lam’ele tambodja mbetawɔ l’olambo wa Yeso ndo tokanyi taso hayokadimɔ nto dia ntsha akambo wa kɔlɔ, tambɔsama l’ɔlɔlɔ tshɛ oko “ekilami waha la ekomo,” taha “la unungu [lo asho a Nzambi].” (Kolosai 1:21, 22) Wɛ mbokaka di’ondoko! oko waki Nzambi kombokaka sɔnyi lo dikambo di’ekambi ande wa kɔlamelo wa lo nshi ya ntondo, woho akɔ wâmɛ mbende kema la sɔnyi lo dikambo diaso, dia sho mbɔtɛndɛ̂ oko Nzambi kaso. (Heberu 11:16) Ɛlɔ kɛnɛ, ndoko onto lahomba tosha ɛkɔmɔ ɔnɛ: hatosungana mbelamɛ lo lokombo lande la lotombo kana ɔnɛ: sho tekɔ lo mboka wɔma wa sambisha lokombo lakɔ polo ndo lo tokoma ta kɛtɛ!
20 Koko, tolembete lɔhɛmɔ lakasha Paulo lo Kolosai 1:23, ata ate: ‘Diakinyu ko dia tshikala lo mbetawɔ, nyoshikikadi ndo aha la mɛngangɛnga lo dikambo dia lokumu l’ɔlɔlɔ lakanyoke ndo lakasambishama le etongelo tshɛ ka l’ɛse olongo.’ Diangɔ efula diatokongɛkɔ naka tayolama kɔlamelo yaso le Jehowa, lo ndjela wanya w’Ɔn’ande la ngandji efula. Jehowa kâmɛ la Yeso wakatosalɛ awui efula! Tɛnya ngandji kawaokaso lo ndjela dako diaki Paulo.
21. Lande na keso l’ɔkɔkɔ wa mɛtɛ wa ngɛnangɛna ɛlɔ kɛnɛ na?
21 Akristo wa la Kɔlɔsai wakahombe ngɛnangɛna lam’akaweye ɔnɛ ‘lokumu l’ɔlɔlɔ lakawôke’ “lakasambishama l’etungelu tshe la tshina di’ulungu.” Ɛlɔ kɛnɛ, ekɔ dikambo di’ɔngɛnɔngɛnɔ efula dia mɛna polo ndo lo yɛdikɔ yakɔna yambosambishama lokumu l’ɔlɔlɔ la Diolelo, oma le Ɛmɛnyi olekanyi nunu nɛi l’etenyi lo wedja olekanyi 230. Ndo, ɔnɔnyi tshɛ, suke l’anto 300 000 w’oma lo wedja tshɛ wekɔ lo mbokana la Nzambi!—Mateu 24:14; 28:19, 20.
22. Oyadi kânga tekɔ lo sowa, kakɔna kakoka tosalɛ Nzambi na?
22 Mɛtɛ, kânga mbaki Paulo lo lokanu etena kakandafundɛka ase Kɔlɔsai mukanda akɔ, nde kondjakiyana dia kɛnɛ kakôkomɛ. Koko, nde akate ate: “Kakiane, dimi lambongenangena lu asui ami wamumusuwa dikambu dianyu.” Paulo akeyaka elɛwɔ “ndjala la etetemalu [ndo monga la ndjakimela k’efula, NW], kame l’ongenongeno.” (Kolosai 1:11, 24) Koko, nde akeyaka dia takandakoke ntsha ngasɔ oma lo wolo ande hita. Jehowa akawosha wolo! Ɔsɔku mbasalema ɛlɔ kɛnɛ. Nunu di’Ɛmɛnyi wakɔtɔ kanu ndo wakasoyama koko, vɔ koshisha ɔngɛnɔngɛnɔ awɔ wa kambɛ Jehowa. Lo dihole dia monga ngasɔ, vɔ wakɛnyi mɛtɛ k’ɛtɛkɛta a Nzambi watanema lo Isaya 40:29-31 wata ɔnɛ: “Ndi atushaka one lambokomo wulu . . . Keli wane watukungelaka [Jehowa], Watuludiamaka la wulu w’uyuyu.”
23, 24. Naa sheke y’ekila yatɛkɛtama lo Kolosai 1:26 na?
23 Paulo akɔsaka olimu wa lokumu l’ɔlɔlɔ wakendanaka la Kristo la nɛmɔ di’efula. Nde akakombolaka di’akina weye nɛmɔ l’ɔkɛndɛ wele la Kristo l’atei wa sangwelo dia Nzambi, diɔ diakɔ diakandelɛ dui sɔ ate: “[sheke y’ekila yakashɛma oma ko dikongɛ di’akambo wakete ndo oma ko nɔnga ya lo tena diakete, NW].” Koko, dui sɔ totodiotshikalaka sheke pondjo pondjo. Paulo akakotsha ate: “Keli kakiane, dio diambenama le ekilami andi.” (Kolosai 1:26) Lam’akatombe ɔtɔmbɔkwɛlɔ l’Ɛdɛna, Jehowa akasha daka dia mbo y’eyoyo yayoya, akewoya ɔnɛ: ‘osangɔ wa omoto ayɔtɛtshatɛtsha ɔtɛ w’oloyi.’ (Etatelo 3:15) Dui sɔ alangadiɔ mbuta na? Lo edja ka nɔnga la nɔnga, ka deko la deko, dikambo sɔ diakatshikala oko ehekesa ka dikambo. Ko lam’akayoyâka Yeso, Paulo akate ate: nde “[akasɛnɛkɔla lɔsɛnɔ la kɛnɛ kahahɔndaki pondjo oma l’ekimanyielo ka lokumu l’ɔlɔlɔ, NW].”—2 Timote 1:10.
24 Mɛtɛ, “[sheke y’ekila, NW]” mendanaka la Yeso kâmɛ la Diolelo diaki Mɛsiya. Paulo akate dia “diango dia l’ulungu,” atɛkɛta dikambo dia wanɛ wayɔlɔmbɔla kâmɛ la Kristo lo Diolelo. Oma lo tshimbo yawɔ mbayolongola “diango dia la kete” tshɛ, mbuta ate: anto wayonga la lɔsɛnɔ la pondjo lanɛ lo paradiso, ɛtshɔkɔ wa mamba. Omalɔkɔ, tambohotɔ mɛtɛ ɔkɔkɔ akɔna wakatɛkɛta Paulo dikambo dia “ongonyi la lutumbu la [sheke y’ekila nyɛ, NW].”—Kolosai 1:20, 27.
25. Lo ndjela Kolosai 1:29, lomba lakɔna lahombaso monga lalɔ kakianɛ na?
25 L’asolo lokoloko, mbakakongaka Paulo dihole diande lo Diolelo. Koko, nde akahotɔ ɔnɛ: takandakoke kɔma paka anya ato ko nongamɛka. Nde akate ate: “Dia dikambo ne, mbatumutshaka ulimu wulu, mbatumuhimbaka ntsha ulimu andi la wulu ami tshe watundumbishaka.” (Kolosai 1:29) Tolembete dia Jehowa akasha Paulo wolo oma lo tshimbo yaki Kristo woho wa nde kamba olimu ande wa mbitsha anto. Jehowa kokaka ntsha woho akɔ wâmɛ la so ɛlɔ kɛnɛ. Koko, sho pombaka ndjambola shoamɛ ɔnɛ: ‘Onde, lêke la lomba lakɔ la sambisha oko lɔnɛ laki lami etena kakameye mɛtɛ oka? Wate na ayoyokadimola na? Kakɔna kakoka kimanyiya ɔmɔmɔ a l’atei aso dia nde tetemala la ‘kamba la wolo ndo dia ndɔsha lo ndjela woho wa kamba wolo waki Jehowa olimu na’? Artikɛlɛ wayela ayɔtɛkɛta di’awui asɔ l’ɔmɔmɔ.
Onde Wɛ Akalembete Oka?
◻ Lande na kakokaso ndjashikikɛ ɔnɛ Jehowa kokaka mɛnya wolo ande lo dikambo di’anto na?
◻ La ntondo k’akambo akɔna wakafundaka Paulo ɛtɛkɛta wa lo Kolosai tshapita 1 na?
◻ Woho akɔna wakotsha Nzambi diokanelo diatɛkɛtama lo Kolosai 1:20 na?
◻ Oma lo wolo ande, kakɔna kakoka Jehowa kotsha oma lo tshimbo yaso na?